Донбасста украин өкмөтү менен жикчилдер ортосунда туткундарды алмашуу аяктады. Жогорку Раданын биринчи вице-спикери Ирина Гращенконун айтымында, алмашуунун жыйынтыгында 73 украин туткуну бошотулуп, Киев жикчилдерге 233 адамды өткөрүп берди.
“27-декабрда Донецк облусундагы Майорск районунда туткундарды алмашуу болду. Жикчилдердин абактарынан 73 украин бошотулду”, – деп билдирди Геращенко.
Мурдараак жикчилдер украин тарапка 74 кишини өткөрүп бергендиги кабарланган. Украин өкмөтү сандардагы мындай айырмачылык боюнча эч кандай түшүндүрмө бере элек. Донецктеги орусиячыл жикчилдер туткундарды алмашуунун алкагында бир киши Киевдин көзөмөлүндөгү аймакка баруудан баш тартканын билдиришүүдө.
27-декабрда Киев менен Лугансктагы жикчилдердин ортосунда дагы тутукундарды алмашуу болду. Украин тарапка 16 туткун өткөрүлүп берилсе, Луганскка 73 киши (алгач 99 киши экени кабарланган, бирок алардын бир канчасы орусиячыл жикчилдер көзөмөлдөгөн аймактарга кайтып баруудан баш тартышкан) берилди.
Украинанын президенти Петр Порошенко туткундан бошотулгандар менен Краматорскто жолукту. Мамлекет башчы алар тик учак менен Харьковго, андан ары Киевге жеткирилерин билдирди.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ