Кыргызстанда жыл башынан бери кызылча оорусуна чалдыккандардын саны 429га жетти. Саламаттык сактоо министрлиги тараткан маалыматка караганда, ооруну жуктургандар көбүнчө Бишкек шаарында жана Чүй облусунда катталууда.
Республикалык иммунопрофилактика борборунун директору Гүлбара Ишенапысованын айтканына караганда, Кыргызстанга кызылчага каршы эмдөө жүргүзүш үчүн 30 миң доза вакцина алынды.
– Ооругандардын 45% эмделбеген, бир жашка чейинки ымыркайлар болуп жатат. 5-6 жашка чейинки бир дозасын алган балдар ооруп жатат. Чоңдор арасында жана мектеп окуучуларынын арасында ооругандар жок. Азыр бир жашка чейинки балдар сасык тумоо болсо үйүндө кармап дарылабай, ооруканага алып барып жатышат. Ал жактан аба аркылуу кызылча жугуп жатат, – деди ал.
Ишанапысованын айтымында, ушул тапта Республикалык жугуштуу оорулар клиникасында 14 бала дарыланууда.
Буга чейин айрым ата-энелер балдары сасык тумоо менен ооруканага жатып кызылча жугузуп алышканын айтып, кайрылышкан.
Ишенапысова 2017-жылдын декабрь айында кызылча оорусу Орусиядан келген мигранттардын балдарынан башталып, азыр аны жугузуп алгандар арбып бара жатканын белгиледи.
2015-жылы кызылчанын эпидемиясы күчөп, өлкөдө 800дөн ашуун киши ооруган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ