Фото – Төрага Дастанбек Жумабеков Пакистандын элчиси Файсал Ниаз Тирмизини кабыл алды

Жолугушууда Кыргызстан менен Пакистандын кызматташтыгынын учурдагы абалы талкууланып, парламенттер аралык кызматташтыкты бекемдөө маселелери көтөрүлдү.

Төрага Дастанбек Жумабеков алгач элчини Кыргызстандагы дипломатиялык ишмердүүлүгүнүн башталышы менен куттуктап, ишине ийгиликтерди каалады. “Кыргызстан Пакистан менен болгон бардык багыттагы кызматташтыкты арттырууга кызыкдар” – деди Төрага.

Ошондой эле парламенттер аралык кызматташтык жигердүү өнүгүп жатканын белгилеген Дастанбек Жумабеков, буга мисал катары 2017-жылы мурдагы Төрага Чыныбай Турсунбеков баштаган парламенттик делегациянын Пакистандагы иш сапары уюштурулганын эске салды. Муну менен катар тыгыз кызматташтыкты улантуу керектигин айткан Төрага Пакистан Улуттук Ассамблеясынын Төрагасы Азад Казерди Кыргызстанга расмий иш сапар менен келип кетүүгө чакырып өттү.

Андан тышкары, соода-байланыш маселеси тууралуу да кеп салган Дастанбек Жумабеков бул жааттагы алакаларды арттыруу зарылчылыгына токтолду. Бул үчүн Кыргызстанда бардык шарттары түзүлүп жатканын маалымдады.

Өз кезегинде элчи Файсал Ниаз Тирмизи жылуу кабыл алгандыгы үчүн Төрага Дастанбек Жумабековго ыраазычылык билдирип, кыргыз-пакистан мамилесин өнүктүрүүгө багытталган пландары менен бөлүштү.

Дипломатиялык ишмердүүлүгүнүн алкагында парламенттер аралык кызматташтыкка өзгөчө көңүл бурарын айткан Файсал Ниаз Тирмизи соода-экономикалык байланыштарды бекемдөө жана маданий-гуманитардык алакаларды кеңейтүү да артыкчылыктуу багыттарынын бири экенин кошумчалады.

Муну менен катар Кыргызстандын университеттеринде көптөгөн пакистандык студенттер билим алып жатканын билдирген элчи билим берүү жаатындагы байланыштарды арттыруу зарылчылыгын маалымдады.