Кечээ, 7-июнда кримтөбөл Азиз Батукаевдин түрмөдөн мыйзамсыз бошотолушу боюнча козголгон кылмыш ишинин алкагында камалган экс-Ички иштер министри Шамил Атаханов тергөө менен кызматташууну каалагандыгын билдиргенден кийин анын баш коргоо чарасы өзгөртүлгөн. Бул тууралу КР ИИМинин басма сөз кызматы билдирет.
Буга чейин Шамил Атахановду Бишкектин Биринчи май райондук соту 2 айга Бишкектин N1-СИЗОсуна абакка алуу чечимин чыгарган.
7-июнь күнү ИИМдин тергөө кызматы Шамил Атахановду Бишкектин N1-СИЗОсунан алып чыгып, адвокатынын катышуусунда тергөө амалдарын жүргүзүү учурунда Атаханов тергөө менен кызматташууну каалагандыгын билдирген. Ошондуктан Шамил Атахановдун баш коргоо чарасы өзгөртүлүп, абактан чыгарылган.
Бирок, ИИМ Шамил Атахановдун коопсуздугун эске алуу менен анын азыр кайда экенин ачык айтпайт.
Эксперттердин айтымында Атаханов үй камагына чыгарылышы мүмкүн жана “Күбөлөрдүү коргоо” программасынын алкагында ал коргоого алынышы ыктымал.
Булак: KyrgyzToday.kg
КОММЕНТАРИЙ КАЛТЫРУУ