Ош шаарында уюшкан кылмыштуу топтун мүчөсү, “Казак” деген каймана ат менен таанымал Умар Маратов бир айга камакка алынды. Бул тууралуу Ош шаардык ички иштер башкармалыгынын басма сөз кызматы бүгүн, 20-январда билдирди.
Алардын айтымында, Умар Маратов 17-февралга чейин камакка алынган. Мындай чечимди Ош облустук соту 19-январда чыгарган.
Эске сала кетсек, “Казак” атыккан Умар Маратов буга чейин бир канча жолу «Уурулук», «Каракчылык» беренелери менен соттолуп чыккан. Былтыр, октябрда 16 жаштагы кызды зордуктоого шек саналып кармалган. Бирок, ушул жылдын 8-январында Ош шаардык соту аны үй камагына чыгарган. 15-январда, парламентте депутат Наталья Никитенко 16 жаштагы кызды зордуктаган “Казак” аттуу криминалды үй камагына чыкканын айтып, нааразы болгон. “Казак” быйыл, 16-январда кармалып, камалган.
Булак: KyrgyzToday.kg
КОММЕНТАРИЙ КАЛТЫРУУ