Оштогу соодагерлер 4 ай болжолдонгон унду 10 күндө сатып коюшкан. Бул тууралуу бүгүн, 10-апрелде Өкмөттүн Ош облусундагы ыйгарым укуктуу өкүлү Узарбек Жылкыбаев онлайн-брифингде билдирди.
Анын айтымында, бардык ун сатуу пункттарында ундар жетиштүү.
«Сатуучулар мага 4 айга болжолдонгон унду 10 күндүн ичинде сатышканын айтышты. Кайдыгер эмес адамдар көп. Мисалы, гуманитардык жардам катары Чоң-Алай аймагына ун алып келгендерге тургундар ыраазычылык катары картошка беришти. Бүгүнкү күндө жардам катары Чоң-Алай районунан 27 тонна картошка жөнөтүлдү », – деди ал.
Ош облусунда 28 миң жакыр үй-бүлө каттоодо турат. Бүгүнкү күнгө чейин 35 миң 750 үй-бүлөгө жардам көрсөтүлдү.
Жеке ишкерлерден 1,5 тонна ун, 11 тонна макарон, 78 литр өсүмдүк майы, 3,5 тонна күрүч, 4 миң 300 кг шекер, 1000 кг эт таратылды. Ошондой эле материалдык резервден 720 тонна ун бөлүнгөн.
КОММЕНТАРИЙ КАЛТЫРУУ