Талас облусунда 28 жаштагы кыргызстандык Казакстанга дээрлик 50 миң парацетамол таблеткаларын чыгарып кетүүнү көздөгөн. Бул тууралуу Кыргыз Республикасынын Чек ара кызматынан кабарлашты.
Белгиленгендей, бүгүн, 15-июлда, “Чоң-Капка-Автодорожный” өткөрүү бекетинин чек арачылары Экономикалык кылмыштуулукка каршы күрөшүү боюнча мамлекеттик кызматынын кызматкерлери менен биргеликте Казакстанга эсепке алынбаган жүктөрдү ташууну токтотту.
1992-жылы туулган кыргызстандык М.А., “Мерседес-Бенц” автоунаасын айдап бара жатып, медициналык багыттагы буюмдарды, атап айтканда 48 миң парацетамол таблеткаларын экспорттоого аракет кылган.
Белгилей кетсек, өлкөдөн кандайдыр бир дары-дармектерди экспорттоого убактылуу тыюу салынган.
Документтер толтурулгандан кийин кармалган адам жана жүктү андан ары тергөө үчүн тиешелүү органдарга өткөрүлүп берилди.
КОММЕНТАРИЙ КАЛТЫРУУ