Кой-Таш окуясында жабыркаган милициянын полковниги Самат Курманкуловдун ден-соолугу жакшырып келе жатат. Бул тууралуу бүгүн, 6-декабрда жарандык активист Мелис Аспеков Фейсбук баракчасында билдирди.
Анын айтымында, ал бүгүн Самат Курманкуловдун ден-соолугун билүү үчүн анын үйүнө барып келген.
“Бүгүн Сокулук районунун Шалта айылынын чыгаан уулу, бычакка сап болгон мыкты азаматы, милициянын полковниги Самат Курманкулов агамдын ден-соолугун сурап келдим. Үй-бүлөсү тынч, ден-соолугу турукташып, жеңем Аиданын маанайы жайдары, Кудай буюрса баары жакшы болуп келе жатат аларда“, – деди Мелис Аспеков.
Эсиңиздерге сала кетсек, былтыр 7-августта Алмаз Атамбаевдин үйүнүн алдында анын тарапкерлери Чүй облустук милициянын начальниги Самат Курманкуловду артынан таш менен башка урган. Алган жаракаттан улам ал комага түшүп, эки жолу операция болуп, жакшы жыйынтык болбогондон кийин 12-августта Москвага жөнөтүлгөн. Москвадан өлкөгө 6-апрель күнү кайтып келген.
КОММЕНТАРИЙ КАЛТЫРУУ