АКШнын шайланган президенти Жо Байден 6-январда Вашингтондо болгон окуяларга байланыштуу азыркы мамлекет башчы Дональд Трампты америкалык демократияны алсыратууга айыптады.
Байден ал күнү Капитолий имаратына кирип барган Трамптын тарапташтарын «жергиликтүү террорчулар» деп атап, Трамптын президенттиги тушунда өлкөдөгү демократиялык институттарга сокку урулганын белгиледи.
Ал арада демократтардын Сенаттагы лидери жана Өкүлдөр палатасынын спикери Нэнси Пелоси Конституцияга киргизилген 25-толуктоону пайдаланып, президент Трампты кызматтан кетүүгө мажбурлоо керек деген сунуштарды колдоп чыкты. Ал Трамптын администрация мүчөлөрүнө кайрылып, аларды конституциялык ыйгарым укуктарын пайдалануу менен президентти кызматтан кетирүүгө чакырды. Пелосинин айтымында, болбосо Өкүлдөр палатасы импичмент жараянын башташы мүмкүн.
BREAKING: Nancy Pelosi calls for the 25th Amendment to be invoked by Mike Pence to remove Donald Trump from office.
She says Congress is prepared to proceed with impeachment if it is not https://t.co/FSUmVKeupb pic.twitter.com/Tu8lKEiHmw
— Bloomberg (@business) January 7, 2021
Азырынча Трамп дарегине айтылган бул айыптоолор боюнча пикирин билдире элек. Кечээтен бери анын социалдык түйүндөрдөгү баракчалары убактылуу жабылган.
Трамп 2020-жылы 3-ноябрда өткөн президенттик шайлоодогу Байдендин жеңишин таануудан баш тартып, анда көптөгөн бурмалоолор болгонун айтып келет. 6-январда Конгресс добуш берүүнүн жыйынтыктары менен Байдендин жеңишин биротоло ырастоого чогулган. Ошол маалда Капитолий имаратына Трамптын тарапташтары кирип келип, жыйынды үзгүлтүккө учуратышкан. Жыйын имараттан адамдар чыгарылгандан кийин бир нече сааттан соң кайра уланган.
Бейбемби күнү Трамп 20-январда бийликти өткөрүп берүүнү убадалап, бирок шайлоодо жеңилгенин дале болсо мойнуна алган жок.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ