Улуттук коопсуздук боюнча мамлекеттик комитет (УКМК) Инвестицияны илгерилетүү жана коргоо агенттигинин мурдагы жетекчиси Данияр Акматов кармалганын билдирди. Ал президенттин жардамчысынан 300 миң доллар талап кылууга шек саналууда.
Атайын кызматтын маалыматына караганда, “ал колундагы чагымчыл материалдарды маалымат каражаттарына берүү менен коркутуп, акча талап кылган”.
Бул факты боюнча Кылмыш-жаза кодексинин 208-беренесинин негизинде кылмыш иши козголуп, 6-сентбярда сураган акчасынын бир бөлүгүн алып жаткан учурда колго түшкөн. Ал УКМКнын убактылуу кармоочу жайына киргизилген.
Атайын кызмат шектүүнүн акча которууга байланыштуу телефондон сүйлөшкөн аудиосун таратты. Анда ал акча биткоин түрүндө жөнөтүлүшү керектигин айткан.
Данияр Акматов социалдык тармактын активдүү колдонуучуларынын бири. Соңку учурда өкмөттүн ККМге байланыштуу чечимин сындап, электр энергиясын үнөмдөөдөн мурда майнинг компанияларды тыюу керек экенин жазган.
Акматов Инвестицияны илгерилетүү жана коргоо боюнча агенттиктин директору болуп 2020-жылы октябрда дайындалган. 2021-жылдын башында кызматтан кеткен.
КОММЕНТАРИЙ КАЛТЫРУУ