Menu

Author Archives: Эргешов Бактыбек

Акылбек Жапаров: Кытайдын кредитин төлөй албасак Бишкек ТЭЦи, Датка-Кемин электр түйүнү жана Түндүк-Түштүк альтернативалуу жолу Кытай банкынын колуна өтөт

2021-2032-жылдарга учурдагы тышкы карызды тейлөө жана төлөө боюнча бардык төлөмдөрдүн 83% туура келет.

Анын 50%ын Кытай Эл Республикасынын Эксим банкынан алынган насыяларды тейлөө жана төлөө түзөт. Бул тууралуу Кыргыз Республикасынын Министрлер Кабинетинин Төрагасы Акылбек Жапаров Кыргыз Республикасынын Жогорку Кеңешинин жыйынында билдирди.

Ал абдан маанилүү жана жоопкерчиликтүү мезгилге кирип жатканыбызды, 2023-жылга тышкы карыздын көпчүлүк бөлүгүн төлөөгө туура келерин кошумчалады.

«Мен эч кимди коркутпайм, бирок карызды төлөй албасак, Кытайдын Экспорт-импорттук банкы башкаруучу компанияны киргизип, Бишкек ТЭЦин башкаруу, Даткан-Кемин электр түйүнүн башкаруу жана Түндүк-Түштүк альтернативалу жолу сыяктуу стратегиялык объектилерибиз Кытай банкынын колуна өтөт. Биз ушундай моюнга илинген жиптен кутулушубуз керек. Кудай сактасын деп отура бербей, баарыбыз бир туунун астында биригип, бир багытта иштешибиз керек! Көз карандысыздыгыбызды сактап калалы! Мен экономикалык көз-караштан алып караганда туруштук бере алабыз деп ишенем”, — деди Акылбек Жапаров жана кытай компаниялары башка мамлекеттердеги объектилерди башкарууну көзөмөлгө алган мисалдар бар экендигин кошумчалады.

Эсиңиздерге сала кетсек, 2011-2017-жылдарда, президент Алмаз Атамбаевдин учурунда Бишкек ТЭЦин модернизациялоого, Датка-Кемин электр түйүнүн жана Түндүк-Түштүк альтернативалуу жолун курууга Кытайдан 1 млрд доллардан ашык кредит жогорку үстөк менен алынып, эгер төлөй албасак, аталган объектилер Кытай банкынын колуна өткөрүлүп берилет деп келишимге кол коюлган.

 

Акылбек Жапаров: Августтан тартып мамлекеттик жана муниципалдык кызматкерлердин маянасы көбөйөт

Августтан тартып Кыргызстандагы мамлекеттик жана муниципалдык кызматкерлердин маянасы көбөйөт. Бул тууралуу Министрлер кабинетинин төрагасы Акылбек Жапаров 29-июнда Жогорку Кеңеште депутаттардын суроолоруна жооп берип жатып билдирди.

Өкмөт башчы айлык канча пайызга жогорулай турганын тактаган жок.

Расмий маалыматка ылайык, өлкөдө мамлекеттик жана муниципалдык кызматкерлердин саны 28 миңге чамалайт.

Кыргызстанда бюджеттен каржыланган жалпы билим берүү тармагынын кызматкерлеринин айлык акысы 1-апрелден тартып 50-80% чейин көбөйгөн. Анын ичинде педагогдуку 80%, административдик башкаруу кызматкерлериники 50%, техникалык жана кенже кызматкерлердин айлык акысы 80% жогорулаган.

Кыргыз өкмөтү мамлекеттик кызматкерлердин айлыгын көбөйтүү максатында бюджеттен 26 млрд. сом кошумча бөлгөн. Анын 16 млрд. сому билим берүү тармагына кеткен. Андан сырткары дарыгердин айлыгына 50%, маданият чөйрөсүндө иштегендердин акчасына 80% кошулган.

Япония өкмөтү «Бишкек-Ош автомобиль жолунда кар күрткүлөрдөн коргоо» долбоору боюнча 1 млрд йен өлчөмүндө грант берет

Бүгүн, 29-июндагы Кыргыз Республикасынын Жогорку Кеңешинин Эл аралык иштер, коргоо, коопсуздук жана миграция боюнча комитетинин кезексиз жыйынында «2021-жылдын 24-декабрында Бишкек шаарында кол коюлган Кыргыз Республикасынын Министрлер Кабинети менен Япония өкмөтүнүн ортосундагы «Бишкек-Ош автомобиль жолунда кар күрткүлөрдөн коргоо» долбоору боюнча алмашуу ноталарын жана Кыргыз Республикасынын Министрлер кабинети менен Япония эл аралык кызматташтык агенттигинин (JIСА) ортосундагы «Бишкек-Ош автомобиль жолунда кар күрткүлөрдөн коргоо» долбоору боюнча гранттык макулдашууну ратификациялоо жөнүндө» мыйзамынын долбоору үч окууда каралып, жактырылды.

Жыйында аталган маселе боюнча баяндама жасаган КР транспорт жана коммуникациялар министринин орун басары Таабалды Тиллаев белгилегендей, бул долбоордун максаты табигый кырдаалдардын тобокелдигин азайтуу жана кар күрткү, муз сыяктуу өзгөчө кырдаалдарды алдын алуу, ошондой эле жол тармагын сактоо болуп саналат.

«Гранттык макулдашуунун шарттарына ылайык, Япония өкмөтү Кыргыз Республикасынын Министрлер Кабинетине алмашуу ноталарынын алкагында Япониянын мыйзамдарына ылайык бир миллиард отуз үч миллион жапон йени (¥ 1 033 000 000) өлчөмүндө грант берет», – деди Т.Тиллаев.

Таалайбек Конкобаев Кара-Көл шаарынын мэри болуп дайындалды

Бүгүн, 20-июнда Кыргыз Республикасынын Президенти Садыр Жапаров кол койгон тескемеге ылайык, Кыргыз Республикасынын Конституциясынын 71-беренесин жетекчиликке алып, «Жергиликтүү мамлекеттик администрация жана жергиликтүү өз алдынча башкаруу органдары жөнүндө» Кыргыз Республикасынын Мыйзамынын 47-беренесинин 1-бөлүгүнө ылайык Конкобаев Таалайбек Тажиматович Кыргыз Республикасынын Жалал-Абад облусунун Кара-Көл шаарынын мэри болуп дайындалды.

Мунун алдында Кара-Көл шаарынын мэри Балташов Алмазбек Шукуралиевич ээлеген кызматынан бошотулган.

Оштогу "Манас-Ата" кафесинин администратору Машрапхон Кушакбаева кызматынан алынды

Мурда маалымдагандай Ош шаарынын Манас-Ата кафесиндеги окуя боюнча Ош шаардык ички иштер башкармалыгынын кызматкерлери тарабынан аталган коомдук тамактануучу жайдын жетекчилигине, администраторуна түшүндүрүү иштери бул тууралуу маалыматтар интернет булактарына жарыяланган учурда эле жүргүзүлгөн.
Бүгүн, 29-июнда  бул окуяны текшерүүнүн алкагында аталган кафенин ээси Бахтияр Гуламов Ош шаардык ички иштер башкармалыгына чакыртылып, окуя боюнча суралды. Ал жарандарга орой мамиле жасагандыгы үчүн кафенин администратору Машрапхон Кушакбаева кызматтан кетирилгендигин билдирди.
Ошондой эле тергөө кызматына аталган кафенин администратору, блогерлер менен түшүнбөстүккө барган Машрапхон Кушакбаева, анын жардамчысы Ориф Аширалиев тергөө кызматына алынып келинип, окуя боюнча көрсөтмөлөрүн беришти.
Окуя маалыматтардын электрондук журналына катталды. Ар тараптуу текшерүүлөр жүргүзүлүп, катыштыгы бар жарандарга тиешелүү юридикалык баа берилет. Кафенин окуя болгон учурдагы администратору Машрапхон Кушакбаеванын айткан сөзү боюнча атайын экспертиза дайындалды.
Ошол эле мезгилде Ош шаардык ички иштер башкармалыгы бул окуяны шылтоо кылып, улуттар аралык араздашууну күчөткөн, жарандардын улутуна, жеке кадыр-баркына доо кетирген комментарийлерди жазуудан баш тартууга чакырат.
https://www.youtube.com/watch?v=0KfTsCTBKM4
Эсиңиздерге сала кетсек, 21-июнда Ош шаарындагы “Манас-Ата” кафесинин администратору Машрапхон Кушакбаева менен анын жаржамчысы Ориф Аширалиев “Не сахар” берүүсүнүн журналисти менен операторун кафеге киргизбей жаңжал чыгарышкан. Улут аралык ынтымакка шек келтирчү сөздөрдү айткан.
https://www.youtube.com/shorts/j3vCBik-krE

Кореяда Кыргызстандын Соода үйүнүн расмий ачылышы болуп өттү

Түштүк Кореянын борборунда соода-экономикалык кызматташтыкты активдештирүү максатында 2022-жылдын 24-июнунда Корея Республикасында Кыргыз Республикасынын Соода үйүнүн расмий ачылышы болуп өттү.

Соода үйү Кыргызстандын Кореядагы элчилигинин демилгеси менен Кыргызстандан келген мекендешибиз, NAG Group компаниясынын президенти Надырбекова Гүлшайырдын жардамы менен түзүлүп, кыргыз продукциясын Корея рыногуна жылдыруу ниетин билдирген.

Расмий аземге Кыргыз Республикасынын Элчиси Аида Исмаилова, Корея импорттоочулар ассоциациясынын (KOIMA) президенти Бён Кван Ким, Кыргыз Республикасынын Корея Республикасындагы ардактуу консулдары Ким Джон Гу жана Ким Хосонг, ошондой эле Кыргызстандын жана Кореянын жарандары катышты. Элчи Аида Исмаилова өз сөзүндө Корея Республикасы менен соода-экономикалык кызматташтыкты өнүктүрүүнүн маанилүүлүгүн белгилеп, жакынкы арада Кыргызстандын продукциялары Корея Республикасынын ири соода борборлорунда сатылат деген ишенимин билдирди. Өз кезегинде, KOIMA президенти Бён Кван Ким кореялык ишкерлер кыргыз продукциясынын сапатын жогору баалаарын белгилеп, кореялык рынокко органикалык продукцияны жеткирүүгө кызыкдар экенин билдирди.

Соода үйүндө 23-июндан 25-июнга чейин «Import Goods Fair 2022» Эл аралык көргөзмөсүнө катышкан компаниялардын кийизден жасалган буюмдары, табигый бал, варенье жана башка продукциялары менен Кыргызстандын органикалык продукциялары коюлган.

Тажикстанда камактагы журналист Далери Имомалинин жубайы менен жолугушуусуна уруксат берилди

Тажикстанда камактагы белгилүү блогер жана журналист Далер Имомалинин жубайы менен жолугушууусуна уруксат берилди.

Имомалини 15-июнда Душанбедеги Шохмансур районунун прокуратура кызматкерлери кармап кетишкен. Ал мыйзамсыз ишкердикке, кылмыш жөнүндө жалган көрсөтмө берүүгө жана Тажикстанда тыюу салынган уюмдарды колдоого айыпталууда.

Имомалинин жакындарынын айтымында, аялы аны менен 25-июнда Душанбедеги тергөө абагында жолугуп чыкты. 10-15 мүнөткө созулган жолугушуудан кийин жубайы Имомалинин абалы жакшы экенин айткан.

Ал ортодо тергөөчүлөр Имомали менен бирге кармалган дагы бир блогер Абдулло Гурбатиге жакындары менен жолугууга уруксат бере элек. Ал милиция кызматкерине күч колдонгон деп айыпталган. Блогер бул айыптоолорду толугу менен четке кагууда.

Эки блогер кармалгандан бери эки жума өткөнүнө карабастар, тажик бийлиги бул боюнча эч кандай расмий билдирүү жасай элек. Далери Имомалинин ишине жашыруун деген гриф басылган. Анын адвокаты иштин чоо-жайы тууралуу айтууга укугу жок экенин билдирүүдө.

Буга чейин бир нече укук коргоо уюму тажик бийлигин биргелешип репортаж даярдап жүргөн Далери Имомали менен Абдулло Гурбатиден бардык айыптарды алып, аларды эркиндикке чыгарууга чакырышкан.

Өзбекстан Конституциясынын жаңы долбоору каракалпакстандыктардын нааразылыгын жаратууда

26-июнда “Өзбекстан Республикасынын Конституциясына өзгөртүүлөрдү жана толуктоолорду киргизүү жөнүндө” коомдук талкууга чыгарылган мыйзам долбоору Каракалпакстан жашоочуларынын арасында нааразылык жаратты.

Конституциянын жаңы редакциясына ылайык, Каракалпакстан Республикасынын “суверендүүлүгү” жоюлуп, макамы өзөрүп, азыркы Баш мыйзамдан “республика эли жалпы референдумдун негизинде Өзбекстандын курамынан чыгып кетүү укугуна ээ” деген сөздөр алынып салынат.

26-июнда түзүлгөн “Каракалпакстан Конституциясы” деп аталган Telegram-каналга бир күндө эле 100 миңден ашуун киши катталды. Алар жапырт нааразылык акциясына чыгууга үндөп жатышат. 27-июнда Каракалпакстандын баш калаасы Нукустун жашоочулары шаарда мобилдик интернетке чектөө киргизилгенин кабарлашты.

Өзбекстан Конституциясынын азыркы редакциясынын 70-беренесинде “Каракалпакстан Суверендүү Республикасы Өзбекстан Республикасынын курамына кирет. Каракалпакстан Республикасынын суверендүүлүгү Өзбекстан Ресубликасы тарабынан корголот” деп жазылган.

Коомдук талкууга чыгарылган жаңы долбоордо бул беренеге өзгөртүү киргизилип: “Каракалпакстан Республикасы Өзбекстан Республикасынын курамына кирет. Каракалпакстан Республикасынын аймагында бардык укуктар жана эркиндиктер Өзбекстан Ресубликасынын Конституциясы менен мыйзамдарына ылайык жөнгө салынат” деп өзгөртүлгөн.

Мындай түзөтүүлөр, өзгөчө “суверендүүлүктүн” алынып салынышы Каракалпакстандын өзүндөгү айрым активисттердин жана чет жактагы этникалык каракалпактардын нааразылыгын жаратууда.

25-июнда Каракалпакстандагы Makan.uz сайтынын редактору Лалагул Каллыханова “Мен Өзбекстандын Конституциясына өзгөртүү киргизүүгө каршымын” деген макаласын жарыялап, видео кайрылуу жолдоду. Анда Каллыханова жаңы өзгөртүүлөр референдумда колдоо таба турган болсо, Каракалпакстан суверендүүлүгүнөн ажырап калышы мүмкүндүгүн эскертип, мындай түзөтүүлөргө жол берген жергиликтүү парламенттин жетекчилеринин кызматтан кетишин талап кыларын айтты.

Каракалпакстандын Чимбай районунда жашаган блогер конституицялык дебаттарга арналган Telegram-каналдардын баары жабылып жатканын билдирди.

“Кече Telegram-каналда жүз миңден ашуун киши бул өзгөрүүлөргө каршы экенин жазышкан. Сыягы, бүгүн бул топтордун администраторлору суракка чакырылып, каналдарды өчүрүшкөндөй. Эгер өзгөртүүлөр референдумга чыгарылса, 33 миллион кишинин ичинен эки миллион каракалпактын добушу эч нерсени өзгөртө албайт. Биз укуктарыбыз бузулабы деп түйшөлүп жатабыз”, – деди атын атабоону өтүнгөн блогер.

1930-жылы Каракалпак автоном облусу Казак АССРинин курамынан чыгарылып, түздөн-түз Орус советтик федеративдик социалисттик республикасынын (РСФСР) карамагына өткөн. 1936-1990-жылдары Каракалпакстан автономдуу советтик республика катары Өзбек ССРинин курамында болгон.

Булак: Борбор Азия жаңылыктар кызматы

Amnesty International: өзбек бийлиги блогерлердин укуктарын чектеп жатат

Өзбекстанда онлайн-платформалар менен социалдык түйүндөрдө өз пикирин айткан активисттердин жана блогерлердин укуктары чектелип жатат. Бул тууралуу Amnesty International (AI) эл аралык укук коргоо уюмунун 25-июнда жарыяланган билдирүүсүндө айтылат.

Анда өлкөнүн борбордук жана жергиликтүү бийлик өкүлдөрүн сындаганы үчүн куугунтукка, кысымга кабылып же камакка алынган өзбекстандык блогерлердин аты-жөнү жазылган.

Өзбекстандын президенти Шавкат Мирзиёев 2019-жылы “блогерлерди дайыма колдой турганын” айткан. Андан бери мамлекет башчысы туруктуу түрдө соцтармактарды карап турарын жана блогерелер менен журналисттердин сындары болуп турушу керектигин бир нече жолу белгилеген.

Бирок уюмдун маалыматына караганда, жергиликтүү ЖМКларда көп чагылдырылбаган темаларды анализдеп чыгарган блогерлердин көбү жыйынтыгында куугунтукка кабылууда. Ошол эле маалда өлкөдөгү блогерлер жогорку кызмат адамдарынын – президенттин, анын үй-бүлө мүчөлөрүнүн, премьер-министрдин, Ташкенттин акиминин жана облус башчыларынын ыктымал коррупциялык иштерине байланышкан темаларга көп кайрылбоого аракет кылышат. Акыркы убактарда Өзбекстанда аталган тема тууралуу айткан блогерлерге басым күчөп, айрымдары камакка алынган учурлар катталууда:

– жергиликтүү бийлик өкүлдөрүн сындаган сурхандарыялык блогер Отабек Саттори жети жылга соттолду;

– бийликти коррупция үчүн сындап, сөз эркиндиги менен ЛГБТ өкүлдөрүнүн укуктары тууралуу айткан ташкенттик блогер Миразиз Базаров үч жылга эркинен ажыратылды;

– өзбек бийлигинин дин саясатын ачык сынга алган ташкенттик блогер Фозилхожа Арифхожаев 7,5 жылга соттолду.

Human Rights Watch, “Чек арасыз кабарчылар”, “Журналисттерди коргоо комитети”, эл аралык “Мунапыс уюму”, ошондой эле АКШнын Мамлекеттик департаменти менен Батыш өлкөлөрү өзбек блогерлерине карата жасалып жаткан кысым менен куугунтукту айыптап келишет.

Булак: Борбор Азия жаңылыктар кызматы

ИИМ: «Радуга» пансионатындагы мушташ көлдүн жанында заара кылып жаткан мейман менен коопсуздук кызматкеринин ортосунда башталган

«Радуга» пансионатынын пляжында орун алган окуя боюнча 18 катышуучусу Ысык-Көл райондук ички иштер бөлүмүнө алынып келинген.
Окуянын катышуучуларынын көрсөтмөлөрүнө ылайык, бул күнү окуянын катышуучуларынын бир тарабы меймандарын пансионаттын пляжында кабыл алышкан. Меймандын бири көлдүн жанында заара кылып жатканда, аны жергиликтүү тургун, пансионаттын коопсуздук кызматында иштеген кызматкер байкап калып, эскертүү жасаган. Бирок, мейман эскертүүгө көңүл бурбады.
Натыйжада, мейман менен коопсуздук кызматкеринин ортосунда оозеки чыр чыгып, мушташка айланып, ага эки тараптын жарандары да кошулган.
Учурда, аталган факты боюнча сотко чейинки өндүрүш иши башталып, тергөө амалдары уланууда.
Айрым жарандар бул окуяны Кыргыз Республикасынын Президенти Садыр Жапаровдун «Ысык-Көл облусунун калктуу конуштарынын тургундарынын пляж аймактарына кирүү укугун камсыз кылуу жөнүндө» Жарлыгы менен байланыштырууга аракет кылып жатканына байланыштуу, Ысык-Көл облусунун ички иштер башкармалыгы бул окуя башка мүнөздө экенин жана жергиликтүү тургундардын пляж аймактарына кирүү укугу менен эч кандай байланышы жок экенин эскертет.

Меню