КООМ

Улут аралык кастыкты козутту деген айып менен укук коргоочу аталган Игорь Трофимов кармалып, камакка алынды. Бул эргул көптөн бери өзүнүн социалдык тармактардагы баракчалары аркылуу улут аралык кастыкты козуткан публикацияларды жарыялап келгендиктен кылмыш иши козголуп, Бишкек шаарындагы 1-СИЗОго камалды. Тергөө иштери жүрүүдө. Ырасында, акыркы кездери улут аралык жаңжал чыгарууга жол чаап, ар кандай тескери маалымат тараткан ниети арам бузукулар көбөйдү. Ошолорго сабак болуш үчүн бул шумпайга мыйзам чегинде катаал жаза бериш керек.

Булак: “Фабула”

ӨКМге караштуу Авиациялык ишканасынын кызматкер-лери пара алып жаткан жеринен кармалды. Экономика-лык кылмыштарга каршы күрөшүү мамлекеттик кызматы-на Бишкектин тургуну аталган ишкананын жетекчилиги 25 мин доллар талап кылып жаткандыгы боюнча кабар бер-ген. Ушундан улам атайы операциянын негизинде 1-июнь күнү бул ишти иликтөөнүн натыйжасында, Өзгөчө кырдаал-дар министрлигинин авиациялык мекемесинин директору, директорунун орун басары жана юристи 8 мин доллар пара алып жаткан жеринен кармалып, кылмыш иши козголуп, тергее башталды.

Башкы прокуратура Улуттук илимдер академиясынын Суу жана гидроэнергетика боюнча институтунан 720 миң сом мамлекетке зыян келгенин жар салды. Аталган институтта 2013-жылдан ушул жылга чейин бир нече иштебеген адамды “иштейт” кылып, алардын ордуна башкалар айлык алып келишкен. Бул аралыкта академияны Абдыганы Эркебаев жетектеп турганын эске алсак, «иттин өлүгү» кайда көмүлгөнүн аңдоо кыйынга турбайт. Демек, бул жагдай жыл башында өз каалоом менен деп кызматын тапшырып берип, үлгү көрсөтүмүш болуп жаткан Эркебаевдин «арты» таза эместигинен кабар берет.

Булак: “Фабула”

Бишкек шаардык кеңешинин 2-июндагы чогулушунда жол транспорту боюнча маселе көтөрүлүп, жыйынга мэр Албек Ибраимов катышты. Мэр жыйында сүйлөгөн сөзүндө: «Маршруттук каттамдарда орундуктардан сырткары туруп кетүүгө тыюу салсак, жол акыны көтөрүүгө туура келет. Андай кылбасак, айдоочулар тарабынан нааразычылыктар болот. Маршруттук каттамдарды жоюп салууга биздин мамлекет даяр эмес. Учурда элдер тарабынан маршруттук каттамдарда нааразычылык көп болуп жатат. Элдер орундуктарга отуруп кетүүнү кааласа, жол акы 15 сомдон 20 сомго чейин көтөрүлөт.

Булак: “Фабула”

Кечээ, Өзгөн районунун Мырзаке айылындагы “Абдираим кары” медресесинде 1000ден ашык адамга ифтарлык уюштурулду. Бул туурасында Ош облусунун мусулмандар казыятынын маалымат кызматы маалымдайт.

Аталган иш-чарага КРнын Өкмөтүнүн Ош облусундагы ыйгарым укуктуу өкүлү Таалай Сарыбашов, Ош облусунун казысы Самидин кары Атабаев, КРнын дин иштери боюнча мамлекеттик комиссиясынын түштүк аймактык бөлүмүнүн башчысы Исакбай Мурзабеков, Өзгөн районунун акими Олжобай Осмоналиев, шейх Мухаммад Хажжаж, “Имам-Аль Бухарий” Ислам институтунун ректору Абдырахман кары Атабаев, райондордун башкы имам-хатиптери жана райондун аймагынан чакырылган 1000ден ашуун тургундар катышышты.

Иш-чаранын жүрүшүндө облус казысы Самидин кары Атабаев жалпы тургундарды рамазан айы менен куттуктап, орозонун пайдалары туурасында кеңири баян жасап берди. Ал эми өкмөттүн Ош облусундагы ыйгарым укуктуу өкүлү Таалай Сарыбашов бардык ифтардын катышуучуларын орозо айы менен өкмөттүн атынан куттуктап, жалпы элге тынчтык, ынтымак жана биримдик каалады.

Жалал-Абад шаарындагы жарандык ала албай жүргөн кайрылмандар жана кара тизмеге түшүп, чыга албай жүргөн жарандар өздөрүнө тиешелүү маалыматтарга ээ болушту. КРнын Өкмөтүнө караштуу мамлекеттик миграция кызматынын кайрылмандар менен иштөө бөлүмүнүн башчысы Жыпар Мамбетова шаардагы кайрылмандан жана кара тизмеге түшкөн мигранттар менен жолугушуп, көйгөйлөр тууралуу баарлашты. Бул туурасында шаардык мэриядан маалымдайт.

Анын берген маалыматына караганда, Россия Федерациясында расмий түрдө 710 миң кыргыз жараны эмгектенсе, ал эми расмий эмес түрдө иштеген кыргыз жарандарынын саны 1,5 миллионго жеткен. Анын ичинен кара тизмедегилердин так саны 116 миң адамды түзөт.

-Кыргызстандын аймактарын кыдырып, элге толук маалымат берүү – бул пландуу иш. Анткени, буга чейин областтык администрация тарабынан бизде мына ушундай көйгөйлөр бар деп кат жолдошкон. Биз бүгүн шаардыктар менен жолугушуп, кенен баарлаштык. Чындыгында көйгөйлөр көп экен. Алардын басымдуу бөлүгү кара тизмеге түшкөн жарандардын тизмеден чыгуу жана жарандык алуу көйгөйлөрү. Мындан сырткары, кайрылмандардын бир-эки жылдап кезекте туруп, жарандык ала албай жаткандыгына күбө болдук. Биз бул маалыматтардын баарын министрликке жеткирип барабыз. Буга чейин мындай эл менен жолугушуулар жер-жерлерде болду, эми Сузак жана Аксы райондорунда да ушундай жыйындар болмокчу. Ал жердеги жергиликтүүлөрдүн көйгөйлөрү менен да таанышып, маселесин чечип беребиз, – дейт ал.

Жолгушуу учурунда ар кайсы көйгөйлүү маселелер боюнча шаардыктар көптөгөн суроолорду беришти жана жоопторду алышты.

Бүгүн, 5-июнда Агрардык саясат, суу ресурстары, экология жана регионалдык өнүктүрүү боюнча комитеттин жыйынында «Кыргыз Республикасында өзгөчө баалуу (жаңгак жана арча) дарактар породаларын кыюуга, ташууга, сатып алууга жана сатууга, даярдоого жана пайдаланууга, экспорттоого жана импорттоого тыюу салуу жөнүндө» мыйзамга өзгөртүүлөрдү киргизүү тууралуу» мыйзам долбоору 2-окууда каралды. Бул туурасында Жогорку Кеңештин Басма сөз кызматы маалымдады.

Мыйзам долбоору боюнча демилгечилердин бири катары аталган комитеттин төрагасы Айтмамат Назаров баяндама жасады.

Анын айтымында, мыйзам долбоорунун максаты – өзгөчө баалуу (жаңгак жана арча) дарактар породаларын кыюуга, ташууга, сатып алууга жана сатууга, даярдоого жана пайдаланууга, экспорттоого жана импорттоого тыюу салуу. Буга чейинки мораторийдин мөөнөтү үстүбүздөгү жылдын февраль айында бүтүп отурат. Мыйзам долбоору менен жогорудагы мораторийди дагы узартуу сунушталууда.

Мыйзам долбоорунун 2-окуудагы талкуусунун өзөгүн кыйылган 1 даана өзгөчө баалуу дарактын ордуна 100 даана дарак эгүү маселеси түздү. Жыйынга катышып отурган Айлана-чөйрөнү коргоо жана токой чарбасы мамлетик агенттигин өкүлү мындай сунуштка макулдугун айтып, ошол эле маалда отургузула турган 100 даракты кен казууга багытталган геология иштерин жүргүзө турган компаниялар деп тактап жазуу өтүнүчүн билдирди. Айтылган жоопторго ылайык, бул жагдай мыйзам алдындагы актыларга, жоболорго жазыла турган болду. Депутат Дастан Жумабеков кыйылган бир бакка 100 дарак тигүү маселеси жөнөкөй жарандарга тиешеси жоктугун тактады.

Ал эми Өнөржай, энергетика жана жер казынасы боюнча мамлекеттик комитеттин статс-катчысы Айбек Асанов мындай сунуш ишкерлерге оорчулук болуп калбайбы деген кооптонуусун айтып, кыйылган 1 даана өзгөчө баалуу даракка 10 дарак тигүүнү сунуш кылды. Аталган комитеттин төрагасы Айтмамат Кошоев 100 бак тигүү маселеси айрыкча, арча менен жаңгак дарагы жай өсүп, көптө жетиле тургандыгынын улам жана жаңгактын уникалдуулугун эске алуу менен сунушталып жатканын белгиледи.

Жыйынтыгында айтылган сунуш-пикирлерди эске алуу менен өзгөчө баалуу (жаңгак жана арча) дарактар породаларын кыюуга, ташууга, сатып алууга жана сатууга тыюу салууга багытталган мыйзам долбоорун 2-окууда жактыруу чечими кабыл алынды.

Белгилей кетсек, мыйзам долбоорунун демилгечилери – Кыргыз Республикасынын Жогорку Кеӊешинин депутаттары А. Назаров, М.Бакиров, А.Эргешов, Р.Туманбаева, И.Матраимов, С.Нышанов, А.Токторов.