КООМ

Бүгүн, 12-апрелде КРнын Өкмөтүнүн Жалал-Абад облусундагы ыйгарым укуктуу өкүлү Кыянбек Сатыбалдиев Япониянын Кыргызстандагы атайын жана толук ыйгарымдуу элчиси Ёсихиро Ямамура мырзаны жана Кыргызстандагы ЮНИСЕФтин өкүлү Юкие Мокуо айымды кабыл алды. Бул туурасында ыйгарым укуктуу өкүлдүн басма сөз катчысы билдирди.

Ыйгарым укуктуу өкүл Кыянбек Сатыбалдиев Япония Өкмөтү тарабынан Кыргызстанга, анын ичинде Жалал-Абад облусуна көрсөтүлүп жаткан бир катар багыттардагы долбоорлорго терең ыраазычылыгын билдирди. Айрыкча Япония Өкмөтү облустун саламаттыкты сактоо тармагынын мекемелерине заманбап медициналык жабдуулар жана аппараттар менен камсыз кылуудагы алгылыктуу иш-аракеттерин баса белгилеп кетти. Жалпы жонунан 2005-2017-жылдар аралыгында Жалал-Абад облусунун саламаттыкты сактоо мекемелерине Япония Өкмөтү тарабынан ар кандай багыттагы долбоорлордун алкагында 566 908 долларды түзгөн медициналык жабдуулар менен аппараттар тапшырылган. Мындан сырткары Бишкек-Ош автомагистралынын 564 км. Сузак районунун Көк-Арт дарыясына гранттык негизде 12 млн. доллардык жаңы көпүрөнү куруп беришкен.

Күн чыгыш өлкөсүнүн – Япониянын Кыргызстандагы атайын жана толук ыйгарымдуу элчиси Ёсихиро Ямамура Кыргызстан менен Япониянын ортосундагы достук карым-катнашты дипломатиялык жол менен гана чыңдабастан экономикалык кызматташуу багытындагы иштерге дагы кеңири көңүл бурарына токтолду. Ал эми ЮНИСЕФтин Кыргызстандагы өкүлү Юкие Мокуо айым Баткен, Ош, Жалал-Абад жана Ысык-Көл облустарында энелер менен балдардын ден соолугун коргоо жаатында атайын долбоорлор иштеп жаткандыгына токтолду. Бул максатта ЮНИСЕФ тарабынан 2,5 млн. доллар каражат каралган. Ыйгарым укуктуу өкүл Кыянбек Сатыбалдиевдин Япониянын элчиси Ёсихиро Ямамураны кабыл алуусуна катышкан КРнын Саламаттыкты сактоо министри Талантбек Батыралиев Япония Өкмөтү тарабынан Кыргызстандын саламаттыкты сактоо мекемелерине көрсөтүп жаткан олуттуу жардамдарына терең ыраазычылыгын билдирди.

Жогорку Кеӊеште өлкөнүн илим тармагынын ишин өркүндөтүү максатында жаӊыдан иштелип чыккан “Илим жана мамлекеттик илимий-техникалык саясаттын негиздери тууралуу” мыйзам долбоору каралып, экинчи окууда добуш берүүгө жөнөтүлдү. Бул тууралуу КР ЖК Басма сөз кызматы маалымдады.

Билим берүү жана илим министрлигинин маалыматына караганда, 1994-жылы кабыл алынган “Илим жана мамлекеттик илимий-техникалык саясаттын негиздери тууралуу” мыйзам моралдык жактан эскирди. Акыркы жылдары өлкөнүн коомдук турмушунда, анын ичинде, илим чөйрөсүндө болгон өзгөрүүлөр аталган мыйзамдын жоболору азыркы жашоого ылайык келбей калганын көрсөттү.

Мындан тышкары, акыркы жылдары илимий изилдөөлөрдү уюштурууда, каржылоодо, өткөрүүдө жаңы принциптерге таянып иш алпаруу чараларын жөнгө салуу максатында, Өкмөт тарабынан Кыргыз Республикасынын илим тармагын уюштуруу тутумун реформалоо концепциясы иштелип чыкты.

Сунуш кылынган мыйзам долбоору илим чөйрөсүндөгү бирдиктүү мамлекеттик саясатты калыптандыруунун негизги багыттарын, анын механизмдери менен ишке ашыруу жолдорун  аныктайт. Ал өлкөнүн социалдык-экономикалык жана коомдук-саясий өнүгүүсүнүн максаттарын жана артыкчылыктарын эске алуу менен илим жана илимий-техникалык тармак боюнча мамлекеттик саясатты калыптандыруу, координациялоо жана ишке ашыруунун мыйзамдуу негиздерин жөнгө салат.

Талкуу жүрүшүндө депутаттар тарабынан илим тармагына бюджеттен бөлүнгөн 512 млн сом негизинен кызматкерлердин маянасына гана жумшалып, илимди өнүктүрүүгө каражат жетпей жатканы, Өкмөт бул багытта кошумча чараларды көрүшү керек экени белгиленди.

Ал эми депутат Акылбек Жапаров илимге өзгөчө көӊүл бурган Кытай сындуу өлкөлөр кыйла жандуу өнүгүп жатканын айтып, улуттук илим тармагын өнүктүрүүгө бекитилген бюджеттин 1 пайызын бөлүү сунушун берди. Анын пикиринде, бюджеттен каржылына турган илимий долбоорлор сынак аркылуу тандалып алынышы керек.

Андан сырткары, илимий мекемелердин материалдык-техникалык базасын жактыртуу, илимий кызаткерлердин эмгек акысын көтөрүү, илимий долбоорлорго инвестиция тартуу чараларын жакшыртуу, илимге жаштарды тартуу сындуу бир катар алгылыктуу сунуштар берилди.

Оппозициянын “Элдик парламент” кыймылынын мүчөлөрүнө өкүм 20-апрелде чыгарылат. Эске салсак, 2016-жылы 12-майда УКМК “Элдик парламенттин” жетекчилерине карата “Бийликти күч менен басып алууга даярдануу” жана “Бийлик өкүлүнө карата күч колдонууга даярдануу” беренелери боюнча кылмыш ишин козгогон. Алар 12 жылдан 22 жылга чейин эркинен ажыратылышы мүмкүн. Мамлекеттик айыптоо Дастан Сарыгуловду 12 жыл, Кубанычбек Кадыровду 16 жыл, Бектур Асановду 15 жыл, Эрнест Карыбековду үй-мүлкүн конфискациялоо менен 22 жылга эркинен ажыратууну сунуштаган.

Булак: “Фабула”

– Он күнгө жакын убакыттан бери изделип табылбай жаткан 11 жаштагы Асел Төрөбекова аттуу секелек кыздын сөөгү аз күн мурун Бишкектин Чоң Чүй каналынан табылганы маалым болду. Учурда кыздын эмне болуп сууга түшүп көз жумганы экспертиза тарабынан иликтенип жатыптыр. Дал ушул окуяга шайкеш, Чүйдүн Москва районундагы Беловодск айылында эки өспүрүм 2-апрель күнү түнкү саат 11лер чамасында үйдөн чыгып кеткен бойдон дайынсыз. Таенеси тарбиялап жаткан эки өспүрүм – 14 жаштагы Ислам Куттубек уулу жана 11 жаштагы Байболот Мырзабаев элдин баары уктаганда үйдөн качып чыгып кетишкен. 10 апрелде жоголгон балдар табылып, ата-энелерине берилгендигин милициядан билдиришти.

Булак: “Фабула”

Ар бир жаран 2017-жылдын 15-майында Кыргыз Республикасынын бардык аймагында аналогдук телеберүүлөр өчүрүлүп, санариптик телевидение иштей баштары тууралу кабардар болушу керек,-деди Биринчи вице-премьер-министр Мухамметкалый Абулгазиев Кыргыз Республикасында санариптик форматка өтүү боюнча Мамлекеттик комиссиянын кезектеги жыйынында. Бул тууралуу КР Өкмөтүнүн Аппаратынын басма сөз кызматы маалымдады.

Кыргыз Республикасынын санариптик берүүгө өтүү боюнча Мамлекеттик комиссиясынын жыйынына онлайн режиминде видеоконференция байланышта Кыргыз Республикасынын Өкмөтүнүн облустардагы өкүлдөрү, Бишкек, Ош шаарларынын мэрлери катышты.  Алар аймактарда санариптик автоматтык телевизиондук ретрансляторлорду орнотууга бөлмөлөрдү даярдоо, санариптик телевиденияга кошулуу динамикасы тууралуу маалымат беришти.

«Жергиликтүү өзүн-өзү башкаруу органдарынын жетекчилери калк арасында приставкалардын (ресивер) жана  санариптик телевидениенин стандартына дал келүүчү DVB-T 2 MPEG 4 форматын колдой турган атайын антенналардын керектиги тууралуу маалыматтык-түшүндүрүү иштерин күчөтүшү зарыл. Өзгөчө көңүлдү приствакаларга (ресиверлерге) буруу керек, аймактарда ар бир каалаган жаран алганда жетиштүү болгондой көлөмдө  жабдыктар болушу шарт. Аны менен бирге аймактрадагы эң алыскы тоолу айылдарда да санариптик телевидение жеткиликтүү болушу үчүн, санариптик телевизиондук автоматаштырылган ретрансляторлорду алуу жана орнотуу иштери улантылат», – деди Биринчи вице-премьер-министр Мухамметкалый Абулгазиев.

Жыйында Кыргыз Республикасынын маданият маалымат жана туризм министринин орун басары Айнура Темирбекова менен Кыргыз Республикасынын маалыматтык технологиялар жана байланыш мамлекеттик агенттигинин төрагасы Бакыт Шаршембиев Кыргыз Республикасында 2017-жылдын апрель-май айларында санариптик телерадиоберүүгө өтүү Планынын аткарылышы тууралуу маалымат берди.

Жыйын соңунда министрликтер менен ведомстволорго, Кыргыз Республикасынын Өкмөтүнүн  2011-жылдын 2-ноябрындага №692 токтому менен бекитилген Кыргыз Республикасында санариптик телерадиоберүүгө өтүү тууралуу токтомунун негизинде Программанын пункттарын аткаруу боюнча бир катар тапшырмалар берилди.

Маалымат үчүн: 101 мамлекет анын ичинде Кыргыз Республикасы курамына кирген «Женева – 06» Планы милдеттүү түрдө санариптик берүүгө өтүүнү карайт. Андан кийин ТВ каналдардын аналогдук берүү жыштыгы Эл аралык укуктук коргоодо статусун жоготот.

“Бул боюнча Ош облустук мусулмандар казыятынын иш башкарма башчысы Абдыжапар ажы Жакыпов билдирди. Анын айтмында –““Ыйман, адеп жана маданият” жылына карата учурда Ош облустук казыяты тарабынан кыргыз адабиятынын көркөм сөз өнөрүн байыткан көрүнүктүү жазуучуларга таандык адабий китептери сатылып алынды” – деп маалымдады Ош облусунун мусулмандар казыятынын маалымат кызматы.

Тандалган китептер негизинен Кыргыз элинин көрүнүктүү жазуучулары Төлөгөн Касымбеков, Чыңгыз Айтматов, Жусуп Баласагын, Кеңеш Жусуповдордун чыгармалары жана даанышман акындар катары эсептелген Кетбука, Асанкайгы, Токтогул, Арстанбек, Калыгул, Калмырза, Эсенаман, Үмөтаалы, Жеңижок акындардын чыгармаларына таандык “Залкар акындар” сериясынан турат. Аталган жазуучулардын чыгармаларында Кыргыз Элинин көөнөрбөс маданияты, ыйманга жана бийик адеп-ахлактык тарбияга чакырган даанышман накыл кептери камтылган. Андыктан ар бир дин кызматкери Исламдын баалуулуктары менен Кыргыз адабиятын, жогорку маданиятын айкалыштырып коомчулукка жеткирүүсү абдан маанилүү. Бул демилге имамдар үчүн да  кыргыз элинин улуттук маданиятын таануу менен көркөм сөз чеберчилик өнөрүн үйрөнүп, сөз байлыгын байытуусуна өбөлгө болмокчу. Мындан сырткары ушул эле китептер топтомун райондук хатибияттардын кызматкерлери, мечит имамдары кодонуп, өздөрүнүн көркөм сөз өнөрүн байытып, сүйлөө чеберчилигин жогорулатуусу боюнча сунуштар берилди” – деп кошумчалады.

Эскерте кетсек, Ош облустук казыятынын кызматкерлери учурда “Оратордук искусство” темасында бир айлык курста окуп жатышат.