КРИМИНАЛДЫК ХРОНИКА ЖАНА ОКУЯЛАР

“2010-жылы 7-апрелден кийин Азимбек Бекназаров менен Роза Отунбаева даярдаган Бакиевдин мүлктөрүн улутташтыруу боюнча декретке эмне үчүн “Мегакомдун” 51%ы кирбей калганын мен эң сонун билем”, – деп билдирди Алмаз Атамбаев бүгүн, 24-июлда Чолпон-Атадагы мамлекеттик N 2-резиденцияда журналисттерге берген акыркы жайкы маалымат жыйынында.

“Ошондуктан бир гана Текебаев эмес, Убактылуу өкмөттүн башка мүчөлөрү да өз былыктарына жооп бериши керек”, – деди Атамбаев.

Булак: Кyrgyztoday.kg

Нарын ГЭСтер каскадын жана чакан ГЭСтерди кура турган чех компаниясы тууралуу, Чехиянын өзүндө чуулгандуу маалыматтар чыккан. Aktualne.cz маалымат сайты ал компания энергетика жаатында иштеген эмес деп жазат. Ошол себептен “NEXT TV” “Liglass Trading” компаниясынын чуулганду чыры боюнча атайын чыгарылыш даярдаган.
ГЭС куруу үчүн миллиондогон каражаты жок деген маалымат сүрөттөрү менен элге тарайт. Aktualne.czден кенен маалымат алуу үчүн “NEXT TV” каналы, сайттын экономика боюнча журналисти Ондржей Соукупту кепке тартты.

Булак: “NEXT TV” 

Республика аймагында жүрүп жаткан рейддердин жүрүшүндө Кыргыз Республикасынын ИИМдин Баңгизаттарды мыйзамсыз жүгүртүүгө каршы күрөшүү кызматынын Чүй жана Ысык-Көл облустары боюнча башкармалыгынын кызматкерлери тарабынан 2017-жылдын 19-июлунда Чүй облусунун Сокулук районундагы Дача-Суу айылынын 25 жаштагы О. Т. аттуу тургуну 1 кг. 100 гр. кара куурай менен кармалган. Бул туурасында ИИМдин Басма сөз кызматы билдирет.

Ошондой эле Ысык-Көл районундагы Кара-Ой айылында жайгашкан “Фонтан” эс алуу жайынын түндүк жагынан, Каракол шаарынын 29 жаштагы Б.А. аттуу жашоочусунан 423 гр. марихуана табылган. Жогорудагы фактылар боюнча  Кыргыз Республикасынын Кылмыш жаза кодексинин 246-беренесинин (Башкага берүү максатын көздөбөстөн баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү) негизинде кылмыш иштери козголгон.

Азыркы убакта бул кылмыштарга тиешеси болгон башка кишилерди аныктоо боюнча тергөө жана ыкчам иш-аракеттери жүргүзүлүүдө.

КР Өнөр жай, энергетика жана кен байлыктар мамлекеттик комитетинин төрагасы Дүйшөнбек Зилалиев 18-июль күнү журналисттерге Кыргызстанда Жогорку-Нарын ГЭС каскадынын 2 ГЭСин жана 10 чакан ГЭСтерди куруу боюнча 500 миллиондон 1 миллиард долларга чейин инвестиция алып келебиз деп тендерди жеңип алган «Liglass Trading компаниясынын Чехиядагы «Юникредит» банкындагы эсебинде 383 миллион евросу бар» деп жарыялаган. Көрсө ал тууралу маалыматты кагаз жүзүндө Liglass Trading компаниясы кыргыздардын тендердик комиссиясына тапшырган экен.

Бул маалымат ММКларга жарыялангандан кийин чехиялык журналисттер мунун канчалык чындыгы бар экенин иликтеп, Чехиядагы «Юникредит» банкка кайрылышкан. UniCredit Bank Czech банкынын өкүлү Петр Плосек Liglass Trading компаниясынын банкта эсеби бар экенин бирок ал эсепте андай акча жок экенин, мындай чоң суммадагы операциялар банктын бир да филиалынан өтпөгөнүн билдирген.

Эсиңиздерге сала кетсек, 30-июнь күнү кыргыз бийлиги «Сандык-1», «Сандык-2», «Сандык-3», «Чон Ак-Суу», «Папан», «Кара-Суу сол тарап 1»,  «Кара-Суу сол тарап 2», «Орто-Токой 1»,  «Орто-Токой 2» жана «Киров» чакан ГЭСтерин куруу боюнча тендерди Чехиянын «Liglass Trading компаниясы утту деп жарыялаган.

10-июль күнү Алмаз Атамбаевдин катышуусунда КР Өкмөтү менен Чехиянын «Liglass Trading компаниясынын отосунда Жогорку Нарын ГЭС каскадынын Акбулуң ГЭСи жана Нарын ГЭС-1, ошондой эле «Сандык-1», «Сандык-2», «Сандык-3», «Чон Ак-Суу», «Папан», «Кара-Суу сол тарап 1»,  «Кара-Суу сол тарап 2», «Орто-Токой 1»,  «Орто-Токой 2» жана «Киров» чакан ГЭСтерин куруу жана эксплуатацияга киргизүү боюнча келишимдерге кол коюлуп, бул ГЭСтердин жарымы 2019-жылы, калган жарымы 2020-жылы бүткөрүлүп ишке киргизилери убада кылынган. 2012-жылы да Жогорку Нарын ГЭС каскаддарын Россиянын “Русгидро” компаниясына беришип, ал ГЭСтер 2016-жылы бүтүп ишке киргизилет деп жарыялашкан. Бирок ал сөз бойдон эле аткарылбай калган.

15-июлдан тартып чех журналисттери «Кайсы бир мошенниктер Кыргызстанда Чехиянын атына жамынып, 1 миллиард доллардык ГЭСтерди куруу боюнча тендерди утуп алыптыр» ;  “Чехияда банкрот болгон «Liglass Trading компаниясы Кыргызстанда ГЭСтерди курат экен”, “Чехияда белгисиз болгон «Liglass Trading компаниясы кантип чоң тендерди утуп алды?” сыяктуу чуулгандуу макалаларды жарыялай баштады.

Булак: Кyrgyztoday.kg

КР УКМК депутат Канат Исаевдин үстүнөн ачылган коррупция боюнча кылмыш ишти тергеп бүтүп, КР Генпрокуратурасы бекиткенден кийин Бишкектин Биринчи май райондук сотуна өткөрүп берди. Жакынкы күндөрдө соттук отурумдардын күнү белгиленет да соттук процесстер башталат.

Эсиңиздерге сала кетсек, “Кыргызстан” фракциясынын мурдагы лидери Канат Исаев бийлик менен биригип, 2016-жылы премьер-министр Темир Сариевди коррупция менен айыптап, кызматтан чаап түшкөндөн кийин бийлик айрым бир убадаларын аткарбагандыктан өз ара таарынышып кетишкен. Андан кийин Исаев бийликке оппозицияга өтө баштаганда “Канат Исаев 2008-жылы Токмок шаарынын мэри болуп туруп, шаардык депутаттарга басым жасоо менен шаардын жерин жеке менчикке мыйзамсыз берип жиберген” деген айып тагып, коррупция беренеси боюнча кылмыш ишин козгогон.

Булак: Кyrgyztoday.kg

Бүгүн, 22-июлда “Ата-Журт” партиясынан билдиришкендей партиянын теңтөрагалары Ахматбек Келдибеков менен Камчыбек Ташиевдин документтери президенттикке талапкер катары катталуу үчүн КР БШКга тапшырылды.

Эсиңиздерге сала кетсек, 18-июлда Токтогул Сатылганов атындагы Кыргыз улуттук филармониясында өткөн “Ата-Журт” саясый партиясынын XI съезди 15-октябрда өтчү президенттик шайлоого партиянын атынан эки талапкерди – Ахматбек Келдибеков менен Камчыбек Ташиевди көрсөтүү чечимин кабыл алган.

Бүгүнкү күнгө чейин президент болууну каалап, БШКга арыз жазгандардын саны 36га жетти. Алардын ичинен 6 талапкер партиялар тарыбынан сунушталса калган 30 талапкер жеке өз демилгелери менен президенттик жарышка аттанууда.

Булак: Кyrgyztoday.kg