КРИМИНАЛДЫК ХРОНИКА ЖАНА ОКУЯЛАР

Кылмыштык топ уюштуруп, опузалап жана адам уурдагандыгы үчүн уюшулган кылмыштуу топтун активдүү мүчөсү  катары ИИМдин оперативдүү катоосунда турган жана бир канча жолу соттолгон, 1981-жылы туулган Ш. А. аттуу жаран (каймана аты “Протез”) Чүйдүн жайыттарынын биринен кармалды. Бул туурасында ИИМдин басма сөз кызматы маалымдайт.

Маалыматка ылайык, Жогорку соттун 2014-жылкы чечиминин негизинде, кармалган жаран Мамлекеттик ЖААКтын 8-абагына мурда жасаган кылмышы үчүн толук өтөй элек жазасын өтөө үчүн жайгаштырылган.

Ага 2011-жылы сот  14-жылга эркинен ажыратуу чечимин чыгарган деген маалымат такталууда. Азыркы учурда Уюшулган кылмыштуулукка каршы күрөшүү боюнча башкы башкармалыгы кармалган жарандын дагы башка кылмыштарга катыштыгы бар же жок экендигин тактап жатат.

Кыргызстан Максим Бакиевге соттон утулуп калган карызын төлөп берүүгө чамасы жетпейт. Бул туурасында анын кызыкчылыгын жактаган адвокаттар 24.kg  маалымат агенттигине билдирген.

Эске салсак, Англиянын Жогорку соту кыргыз бийлигин 2010-жылы бийликтен түшкөн президент Курманбек Бакиевдин баласы Максим Бакиевди “26 милион доллар уурдады” деп так эмес айыптоо такканы үчүн соттоп, Максим Бакиевдин зыянын төлөп берүүгө милдеттендирген чечим кабыл алган.

Бирок Кыргызстандын Өкмөтү мындай акчаны төлөп берүүдөн баш тартууда. Ал эми Максим Бакиевдин юристтери ал сумманы сот аркылуу өндүрүп алуу үчүн келерки доону даярдашууда.

Эскерте кетсек, сентябрда “Хикман энд Роуз” юридикалык компаниясына шилтеме жасалып, ММКда Кыргызстан Максим Бакиевге 20 млн фунт стерлигге доо койду деген маалымат таркаган. Компаниянын түшүндүрмөсүндө Бакиевдин баласына алдамчылык боюнча жарандык доо коюлган, ал эки мамлекеттик фонддун акчасын уурдады делип айыпталган.

КР Өкмөтү мамлекеттик органдардын Максим Бакиевге карата кылган доону бул сот иштеринде анын жеңиши кылып  көрсөткөн кандайдыр бир жыйынтыктар чындыкка дал келбейт деп түшүндүрмө берди.

Булак: “24.kg“

Бүгүн, 29-майда Бишкектин Биринчи май райондук сотунда экс-генпрокурор,  азыркы “Ата Мекен” фракциясынын депутаты Аида Саляновага каршы биринчи соттук тескөө башталды.

Ал Жазык кодексинин “кызматын кыянатчылык менен пайдалануу” беренеси менен айыпталууда. Анын ишин төрагалык кылуучу сот Мирлан Термечиков карайт.

Эске салсак, 2016-жылдын 26-декабрында Аида Саляновага карата кылмыш иши козголгон. Баш прокуратура жана УКМК Салянова Юстиция министри болуп туруп, 2010-жылы апрель окуясынан бери изделүүдө жүргөн Алексей Елисеевге адвокттык лицензияны мыйзамсыз узартып берген деп айыптоодо.

Булак: Кyrgyztoday.kg

Видео: Жакшылык Бердибек уулу

Ички иштер органдары тарабынан кылмыштар тууралуу келип түшкөн бардык билдирүүлөргө ыкчам түрдө жооп берилип жатат. Бул туурасында ИИМдин Басма сөз кызматы маалымдайт.

22-28-майга чейинки аралыкта ИИМдин ыкчам чара көрүү борборуна Республика боюнча 2237 кылмыш иши катталып алардын 1835 нин өздүгү такталган. Кылмыш иликтөөгө тиешелүү 586 факты катталып, анын 339 кылмыштын бети ачылса, 81 кылмыш изи сууй электе ачылган. Мурда болгон 252 кылмыштын бети ачылган.

Адам өлтүрүү боюнча 6 кылмыш ишинин бети ачылса, 5 тоноочулук, 4 каракчылык, 4 денеге залал келтирүү, 14 зордуктоо, 232 алдамчылык, 72 уурулук, 1 мал уурулук, 1 унаа урдоо фактысынын бети ачылган. 5 кг. 985 грамм мыйзамсыз баңгизаты алынган. Анын ичинде 1 кг 300 гр героин болгон.

Оппозиционер Камчыбек Ташиевге тиешелүү «Саясат. kg» интернет сайты «Отунбаева Абековду неге канатына калкалачу эле же Роза апчебиз 2 млн. долларды «ап» этти беле?» деген темада коомчулуктун бүйүрүн кызыткан маалыматты жазып чыкты.

Анда Мамлекеттик финансылык чалгындоо кызматы Баш прокуратура, УКМК менен биргеликте «Альфа Телеком» ЖАКсынын офшорго чыгарылып кеткен финансылык активдерин кайтарып алуунун жыйынтыктоочу этабын жүргүзүп атканын жана Финансылык чалгындоо кызматы Лихтенштейн княздыгынын финансы­лык чалгындоо бөлүмү менен биргеликте Кыргызстандан чыгарылып кеткен активдерди таап, аны тоңдуруп койгону тууралуу жазат.

Анан дагы ошол тоңдурулган миллиондордун 2 миллиону өткөөл мезгилдин президенти болуп турган Роза Отунбаеванын убагында чыгарып кеткен каражаты экендигин социалдык түйүндөрдүн колдонуучулары талкуулап атканын да билдирген. «Чындыгында эле убагын­да «Мегакомдун» жетекчилеринин бири болгон А. Абековду Р. Отунбаева ка­натына калкалап жүргөнүн жакшы билебиз. Көрсө, кептин баары 2 млн долларда жаткан турбайбы. Эми буга тийиштүү органдар көңүл буруп, мыйзам чегинде чара колдоноор бекен?», – деген суроону коёт аталган сайт.

Өтө орчундуу суроо. Учурда өзүн сүттөй таза көрсөткүсү келип аткан Роза апчебиз эми бул маалыматка эмне деп жооп берер экен? Анан дагы бул маалыматты тийиштүү органдар иликтеп, чын-бышыгына жетеби? Эгер Отунбаеванын күнөөсү далилденсе кандай чара көрүлөөр экен, ыя?

Булак: “Ачык саясат”

Кыргызстанда Бакиевдерге тиешеси бар, бирок мамлекетке өтпөй калган деген дагы 15 объ­ект тууралуу маалымат чыгууда. Бул тууралуу Жогорку Кеңеш жыйынында Бакиевдердин айрым мүлкү боюнча парламентте түзүлгөн комиссиянын жетекчиси, де­путат Канатбек Исаев билдирди. Комиссия Скрябин көчөсү 45 жа­на 45Адан башка объекттер боюн­ча деп аталат. 15тей дагы объект чыгып жатат. Тергөө, сот, проку­ратура тараптан каталардын негизинде эмне себептен булар улутташтырылбай калган деп эки чоң папка даярдалды. Кээ бир органдардан жооптор келе элек. Башкы прокуратура Кыргызстандын мурдагы президенти Курманбек Бакиевдин уулу Максим Бакиевдин. Скрябин көчөсүндөгү жери мыйзамсыз сатылып кетиши боюн­ча кылмыш ишин 10-февралда козгогон. Бул жер Мамлекеттик мүлк фондуна сактоого өткөрүлүп берилген.

Бишкектин Скрябин көчөсүндө жайгашкан Бакиевге тиешелүү 1,28 гектар жалпы аянттагы жер участогун жана ошондой эле Бакиевдин айланасындагыларга тиешелүү болгон башка объекттерди сатуу фактыларына тийиштүү маселелерди иликтөө боюнча убактылуу депутаттык комиссия быйыл январь айында түзүлгөн. Комиссиянын жетекчиси Канат­бек Исаев жаңы объекттер чыгып жатканына байланыштуу анын ишин 30-июнга чейин узартууну өтүндү.

Булак: “Фабула”