Menu

БОРБОРДУК АЗИЯДА

Видео - Орусияга каттаган тажик авиакомпаниялары билет бааларын көтөрдү

Орусияга каттаган тажик авиакомпаниялары соңку айларда билеттердин баасын кескин түрдө жогорулатты. “Сомон Эйр” алгач февралдын ортосунан тарта Дүйшөмбү-Москва каттамы боюнча бир билеттин наркын 240 доллардан 317 долларга чейин кымбаттаткан. Бир нече күн мурун баа – 402 долларга чейин көтөрүлдү.

Бул – Борбор Азия өлкөлөрүнүн ичинен Орусия каттамы боюнча эң жогорку баа. Бишкектен Москвага чейинки билеттин баасы болжол менен 136 долларды түзөт.

“Сомон эйр” менен Тажикстандын Транспорт министрлиги баалардын наркынын жогорулашынын себептерин түшүндүрө элек. “Тажик эйр” учак майы менен аэропорттун кызмат көрсөтүү баасы кымбаттаганын жүйө келтирүүдө.

Расмий маалыматтар боюнча Орусияда 800 миңден ашуун тажикстандык мигрант иштейт. Алар мекенине баруу үчүн туугандарынан жана банктардан билет үчүн карызга акча алууга мажбур болуп жатканын билдиришүүдө.

Булак: Борбор Азия жаңылыктар кызматы

Видео - Беларустун үч шаарында "Бекерпоздордун маршы" өттү

Беларустун Минск, Гродно жана Могилев шаарларында “Бекерпоздордун маршы” өтүүдө. Каршылык акциянын катышуучулары декретти жокко чыгарып, чогулган каражатты кайтарып берүүнү талап кылып жатышат. Эгер булар аткарылбаса, бийликке нааразы болгондор президент менен өкмөттүн отставкасын талап кылышат.

Мындан тышкары алар бийликти аймактардагы каршылык акциясында кармалгандарды бошотууга жана репрессияны токтотууга чакырышууда.

Акцияга катышкандардын пикиринде, “бекерпоздук жөнүндө” президент Александр Лукашенконун декрети Конституцияга жана Беларустун эл аралык милдеттенмелерине шайкеш келбейт. Алар бийликти жумушсуздар менен эмес, жумушсуздук менен күрөшүүгө үндөшүүдө.

“Бекерпоздук салыгына” каршы Беларуста февралдан бери жапырт каршылык акциялары өтүүдө. Жаңы мыйзамга ылайык, расмий түрдө иштебеген ар бир жаран жылына казнага 200 евро төлөшү керек. Митингдерден кийин президент Лукашенко салыкты төлөө мөөнөтүн кийинки жылга жылдырган.

Булак: Борбор Азия жаңылыктар кызматы

Тажикстанда түрмөдө жаткан жактоочу кошумча дагы 2 жылга кесилди

Тажикстанда 23 жылга соттолгон белгилүү жактоочу Бузургмехр Ёров сотту сыйлабай, бийлик өкүлдөрүнө акарат келтиргендиги үчүн кошумча дагы 2 жылга эркинен ажыратылды. Жыйынтыгында адвокат 25 жыл жаза өтөйт.

Бузургмехр Ёровдун адвокатынын билдиришинче, сотту сыйлабагандыгы үчүн эки жылга эркинен ажыратылды. Ал эми бийлик өкүлдөрүнө акарат келтирүү боюнча бир жылга түзөтүү жумуштарына кесилди. Өкүмдү угузуу жараянына адвокаттын туугандары катышкан эмес.

Бузургмехр Ёровдун жубайы Зарина Набиева сот жараяны тууралуу билдирүү келбегинин айтты. Бирок өкүм угузулгандан кийин ал күйөөсү менен жолуккан. Жактоочу соттун өкүмүнө макул эместигин билдирип, даттана турганын айткан.

Адвокат Бузургмехр Ёров 2015-жылы күздө “алдамчылык” жана “документ жасалмалоо” боюнча айыпталып камалган. Былтыр декабрда тергөө аны Кылмыш кодексинин дагы үч беренеси боюнча, анын ичинде “экстремисттик ишмердүүлүккө үгүттөөгө” күнөөлөгөн. Бузургмехр Ёров былтыр октябрда алдамчылык жана документ жасалмалоо боюнча айыптуу деп табылып 23 жылга түрмөгө кесилген.

Булак: Борбор Азия жаңылыктар кызматы

Астанадагы сүйлөшүүлөргө Сирия оппозициясы келген жок

Сирия оппозициясы Астанадагы сүйлөшүүлөргө келбейт. Бул тууралуу Казакстандын Тышкы иштер министрлигинен кабарлашты.

Буга чейин бейшемби күнү таң менен оппозициялык топтордун айрым өкүлдөрү Сирия сүйлөшүүлөрү үчүн Астанага келери кабарланган. Айрым топтор Сирия өкмөтүн жана Орусияны ок атышпоо режимин сактабагандыгы үчүн айыптап, сүйлөшүүлөргө байкот жарыялашкан.

Астанадагы сүйлөшүүлөрдүн үчүнчү айлампасына Орусия, Түркия жана Иран делегациялары катышты. Жолугушуу маалында экстремисттик топтор менен байыстуу оппозицияны бөлүү маселеси талкууланды. Астанада өткөн буга чейинки эки жолугушуу ийгиликтүү аяктаган эмес.

Булак: Борбор Азия жаңылыктар кызматы

Лавров: ЕБдин Борбор Азия өлкөлөрүндөгү инвестициялары саясий мүнөзгө ээ

Орусия ТИМ башчысы Сергей Лавров Европа Биримдигинин Борбор Азия өлкөлөрүнө салып жаткан инвестициялары саясий мүнөзгө ээ деп эсептейт. Бул тууралуу ал «Эл аралык жашоо» журналына берген маегинде билдирди.

“Постсоветтик мейкиндикте «Чыгыш өнөктөштүк» сыяктуу демилгелерди ишке ашыруу боюнча кайгылуу тажрыйбалар бар. Ал Брюсселдин мурдагы СССР өлкөлөрүнө карата мамилеси бир тараптуу пайда көрүүнү гана көздөй турганын көрсөтүүдө. Ошол эле кезде биздин элдерди көптөгөн кылымдардан бери бириктирип келген байланыштар эске алынбай, ал эмес көпчүлүк учурларда аларды жөн гана бузууга багытталган аракеттер болууда», — деди Лавров.

Анын айтымында, европалык инвестициялар саясий мүнөзгө ээ. Каржы жардамдарынын башкы максаты — ЕБдин товарларын Борбор Азия базарларына бир тараптуу түрдө соодалоо болуп эсептелет.

Лавров акыркы 10 жыл аралыгында Орусия Борбор Азия өлкөлөрүнө 6,7 миллиард долларлык жардам көрсөткөнүн кошумчалады.

Булак: Борбор Азия жаңылыктар кызматы

Беларуста митингге катышкан журналистке айып пул салынды

«Азаттык» радиосунун беларус кызматынын кабарчысы Галина Абакунчикке Ворше шаардык сотунун чечими менен 300 долларга жакын айып пул салынды. Ал уруксат берилбеген митингге катышуу боюнча күнөөлүү деп табылды.

Журналист айыпты четке кагып, 12-мартта бекерпоздук салыгына каршы өткөн нааразылык акциясын чагылдырып жүргөн маалда кармалганын билдирүүдө. Ал журналист экенин айтканына карабастан милиция бөлүмүндө бир нече саат кармалып турган.

13-мартта активисттер жана оппозициячылар менен бирге бир канча ММК өкүлү да кармалган. Ал күнү шаарда бекерпоздук салыгына каршы демонстрация өтүп, анын катышуучулары президент Александр Лукашенко салык төлөө мөөнөтүн 2018-жылга чейин токтотконуна карабастан салыктын жоюлушун талап кылышкан.

Булак: Борбор Азия жаңылыктар кызматы

Улуу Британияда өзбек качкындары тууралуу тасма тартылды

Өзбекстанда туулуп, бирок бир канча жылдан бери Лондондо жашап жаткан 35 жаштагы Надира Мюррей (Алиева) өзүнүн алгачкы тасмасын тартып бүттү. Ал британ кинематографиясынын стандарттарына толук жооп берет.

«Locked in» («Камалган») деп аталган тасмадагы окуя чыныгы жашоодон алынган. Анда Өзбекстанда нааразылык акциясына катышып, андан соң Улуу Британияга барып башкалка сураган жубайлар Самира менен Назимдын башынан өткөргөн окуясы баяндалат.

Фильм Улуу Британиядагы чыныгы түрмөлөрдүн биринде тартылып, ага 18ден ашык британ актеру катышкан. Тасманын продюсери, сценарийинин автору жана режиссерлорунун бири Надира Мюррейдин айтымында, акыркы кездери Улуу Британияда бозгундарга карата терс мамиле калыптанып, көптөгөн качкындарды күчтөп депортация кылган учурлар байкалууда.

«Качкындардын көйгөйүн, абалын жакшы түшүнгөндүктөн улам ушул тасманы жаратууну чечтим. Максатым – бир аз болсо да социалдык пикирлерге таасир этүү», – деди Мюррей.

Учурда тасманын бетачарын өткөрүү үчүн фестивалдардын өкүлдөрү менен сүйлөшүүлөр жүрүп жатат.

Надира Мюррей (Алиева) Улуу Британиянын Өзбекстандагы мурдагы элчиси жана «Самарканддагы адам өлтүрүү» китебинин автору Крейг Мюррейдин жубайы.

Булак: Борбор Азия жаңылыктар кызматы

Ашхабадда мыйзамсыз чылым сатуу учурлары көбөйүүдө

Бир айдан бери Ашхабаддагы мамлекеттик дүкөндөрдө расмий түрдө чылым сатылбай, шаарда мыйзамсыз тамеки саткан учурлар көбөйүүдө.

«Азаттык» радиосунун түркмөн кызматы билдиргендей, акыркы жумаларда Ашхабаддагы жеке дүкөндөрдө чет өлкөлөрдөн алынып келинген чылымдардын түрлөрү көбөйдү. Алардын бир даанасы 2,5-3 манаттан (0,7 доллардын тегерегиндеги сумма) сатылууда. Кыйла сапаттуураак чылымдардын баасы 5 манатка чейин жетет.

Түркмөнстанда чылым импорттоо жана сатуу өкмөттүн көзөмөлүндө. Тамеки сатууга расмий уруксат мамлекеттик дүкөндөргө гана берилген. Ошол эле маалда мыйзамсыз түрдө көмүскө базарда чылым саткандар да бар. Алардагы баа мамлекет тарабынан белгиленген баадан бир канча эсеге жогору.

ММКлар Түркмөнстандын Мамлекеттик бажы кызматына шилтеме кылып билдиришкендей, өкмөт тарабынан мамлекеттик дүкөндөрдө сатуу үчүн белгиленген чылымдын наркы четтен алынып келинген тамекинин баасынан 40 эсеге кымбат.

Булак: Борбор Азия жаңылыктар кызматы

Тажикстандагы жардыруу теракт катары сыпатталууда

Хатлон облустук прокуратурасы Курган-Төбө шаарындагы бир адамдын өмүрүн алган жарылууга байланыштуу «терроризм» беренеси боюнча кылмыш ишин козгоду. Окуянын себептерин иликтөө үчүн атайын ыкчам-тергөө тобу түзүлдү.

Учурда прокуратура шаардын 67 жаштагы тургуну Хасанбой Рахмоновдун теракттан же өзүн өзү жардырып каза тапканын аныктоого аракет кылууда.

Тергөөчүлөр маркумдун телефонундагы акыркы чалууларды текшерип жатышат. ИИМдин маалыматы боюнча Хасанбой Рахмонов шаардагы технологиялык лицейде кароолчу болуп иштеген. Жубайы жана алты баласы бар, буга чейин соттолгон эмес.

Жарылуу болгон аймак дагы деле тасма менен курчалган, анда милиция кызматкерлери күзөттө турушат.

Булак: Борбор Азия жаңылыктар кызматы

Кытай Астанага соттолгон үч казак жаранын өткөрүп берди

Пекин жаза мөөнөттөрүн Кытайдын түрмөлөрүндө өтөп жаткан үч казак жаранын Астанага өткөрүп берди. Бул тууралуу Казакстандын Тышкы иштер министрлигинен билдиришти.

Азырынча ал жарандардын аты-жөнү жана мындан аркы тагдыры тууралуу эч кандай маалымат жок.

Жакынкы убактарда кытай тарап Казакстандын соттолгон дагы үч жаранын өткөрүп берүү маселесин карай турганы кабарланууда. Министрликтин маалыматы боюнча учурда Кытайдын абактарында дагы тогуз казак жараны бар.

Үч жаранды мекенине берүү тууралуу макулдашуу марттын башында Казакстандын Кытайдагы элчиси Шахрат Нурышев менен Кытайдын юстиция министринин орун басары Лю Чжицяндын жолугушуусу маалында жетишилген. Эки өлкө ортосунда эркинен ажыратылган жарандарды бири-бирине өткөрүп берүү тууралуу макулдашуу бар. Буга чейин Кытай тарап бир канча жолу соттолгон казак жарандарын мекенине экстрадициялаган.

Булак: Борбор Азия жаңылыктар кызматы

Меню