Акылбек Жапаров

Бүгүн, 23-ноябрда, Кыргыз Республикасынын Коопсуздук кеңешинин катчысы Марат Иманкуловдун төрагалыгында Жогорку Кеңештин депутаттарын шайлоого даярдык көрүү жана өткөрүүдө шайлоо комиссияларына уюштуруучулук-техникалык маселелерди чечүүдө көмөктөшүү боюнча республикалык штабдын кеңейтилген отуруму өттү.

Жыйынга ошондой эле Министрлер Кабинетинин Төрагасы Акылбек Жапаров, Мамлекеттик катчы Сүйүнбек Касмамбетов, Башкы прокурор Курманкул Зулушев катышты.

Коопсуздук кеңешинин катчысы 28-ноябрга пландалган Жогорку Кеңештин депутаттарын шайлоо өзгөчө болорун белгиледи. Анткени, эгемендүүлүктүн 30 жылдыгында биринчи жолу шайлоо жараяны мыйзамдуу, таза жана ачык-айкын өтөт.

Марат Иманкулов Кыргызстанда адилетсиз шайлоолорду өткөрүү үч жолу массалык толкундоолорго алып келгенин эске салды. Ал массалык түрдө административдик ресурс жана шайлоочуларды сатып алуу колдонулган өткөн жылдын октябрындагы шайлоо кампаниясын мисал катары келтирди. «Бул шылтоо болду. Чындыгында толкундоолорго себептер көп эле. Бул экономикалык кризис, пандемия, жакырчылык. Бул көйгөйлөр үйүлүп калган, анын үстүнө шайлоо маалында мамлекеттик органдар шайлоо мыйзамдарынын бузулушуна жол берип, шылтоого жол беришти», — деди ал.

Коопсуздук Кеңештин катчысы шайлоонун жүрүшүндө бир нече жылдан бери аныкталган мыйзам бузуулар улуттук коопсуздукка коркунуч келтирүүчү факторго айланганын баса белгиледи.

«Эгер мындан ары да ушундай жол менен кетип, шайлоо маалында мыйзамдуулукту камсыздабасак, анда түз эле туңгуюкка кептелебиз. Андыктан биз бул шайлоолорду сөз менен эмес, иш жүзүндө таза жана адилеттүү өткөрүүдөбүз», — деп түшүндүрдү ал.

Марат Иманкулов бул шайлоо жараянынын учурунда негативдүү көрүнүштөрдү сезилерлик төмөндөтүүгө мүмкүн болгонуна көңүл бурду. «Бүгүнкү күндө коркунучтуу жана токтоосуз түрдө Президенттин же Министрлер Кабинетинин кийлигишүүсүн талап кылган көрүнүштөр жок», — деди ал.

Мындан сырткары, Коопсуздук кеңешинин катчысы Кыргыз Республикасынын Президенти Садыр Жапаровдун «2021-жылдын 28-ноябрында Кыргыз Республикасынын Жогорку Кеңешинин депутаттарын шайлоону эркин, таза жана ачык-айкын өткөрүүнү камсыз кылуу боюнча чаралар жөнүндө» Жарлыгында жана Республикалык штабдын талаптарында мамлекеттик органдарга мыйзамдарды так сактоо жана буйруктарды кынтыксыз аткаруу боюнча так тапшырмалар берилгенин эске салды.

Жыйында ошондой эле Шайлоо жана референдум өткөрүү боюнча борбордук комиссиянын, Саламаттыкты сактоо, Энергетика, Тышкы иштер жана Ички иштер министрликтеринин жетекчилеринин, ошондой эле Президенттин облустардагы ыйгарым укуктуу өкүлдөрүнүн, Бишкек жана Ош шаарларынын мэрлеринин парламенттик шайлоого даярдыктары тууралуу баяндамалары угулду.

Жыйындын жыйынтыгы боюнча мамлекеттик жана жергиликтүү өз алдынча башкаруу органдарынын жетекчилерине КР Президентинин «2021-жылдын 28-ноябрында Кыргыз Республикасынын Жогорку Кеңешинин депутаттарын шайлоону эркин, таза жана ачык-айкын өткөрүүнү камсыз кылуу боюнча чаралар жөнүндө» Жарлыгына ылайык тийиштүү тапшырмалар берилди.

Кыргыз Республикасынын Министрлер Кабинетинин Төрагасы Акылбек Жапаров Республикалык штабдын кезектеги жыйынын өткөрүп, жылытуу мезгилинин жүрүшү тууралуу маалыматты укту.

Тиешелүү мамлекеттик жана жергиликтүү бийлик органдарынын жетекчилери жер-жерлерде жүргүзүлүп жаткан иш-чаралар, атап айтканда, энергетика объектилерин, социалдык, бюджеттик тармактарды жана калкты отун менен камсыздоо, ошондой эле күз-кыш мезгилинде керектөөчүлөрдү электр энергиясы менен камсыздоо боюнча маалымат беришти.

Акылбек Жапаров белгилегендей, Токтогул суу сактагычында суунун топтолушу жана отун менен камсыз кылууда пайда болгон кыйынчылыктарга карабастан, жылытуу мезгилин сапаттуу өткөрүү үчүн бардык маселелерди иштеп чыгуу зарыл.

«Негизги милдет – калкты үзгүлтүксүз электр энергиясы жана отун менен камсыздоо. Учурда чиновниктердин шалаакылыгынан улам республиканын аймактары көмүр менен толук көлөмдө камсыз болбой жатат. Буга жол берилбеши керек, азыркы кырдаалды жөнгө салуу үчүн сиздерге эки жума убакыт берем. Мамлекеттик органдардын транспорттук мүмкүнчүлүктөрүн мобилизациялоо менен облустарга көмүр ташууну уюштуруңуздар, республиканын бардык аймактары көмүр менен 100% камсыздалсын. Көмүрдү өз убагында камдоо электр тармагындагы жүктөмдү азайтып, белгиленген лимиттерди сактоого шарт түзмөк. Биз ар кандай сценарийге даяр болушубуз керек», – деп белгиледи Акылбек Жапаров.

Ал ошондой эле аткарылган иштердин сапаты жана жылытуу мезгилин уюштуруу боюнча мамлекеттик органдардын жана жергиликтүү бийлик органдарынын жетекчилеринин жеке жоопкерчилигине басым жасап, кышка даярдык жаз айларында башталышы керектигин белгиледи.

Министрлер Кабинетинин Төрагасы ошондой эле Бишкек шаардык ЖЭБин керектүү көлөмдө көмүр менен үзгүлтүксүз камсыздоо жана калк арасында электр энергиясын керектөө лимиттерин сактоо боюнча түшүндүрүү иштерин күчөтүү зарылдыгын белгиледи, ошол эле учурда Акылбек Жапаров керектөөчүлөрдүн жана социалдык объектилердин электр жарыгын өчүрүүгө жол берилбеши керектигин кошумчалады.

«Ар бир электр энергиясын өчүрүүнүн артында электр жарыгысыз калган биздин керектөөчүлөр турганын унутпашыбыз керек. Өчүрүүлөр болбошу тийиш, бардык күч-аракет электр энергиясы менен үзгүлтүксүз камсыздоого багытталышы керек»,- деди Акылбек Жапаров.

Кеңешме жыйынтыгы боюнча Министрлер Кабинетинин башчысы бир катар тапшырмаларды берди. Атап айтканда, Бишкек шаарынын мэриясынын жетекчилиги астында көмүрдүн баасын атайылап жогорулатып жиберүүгө жол бербөө жана зарыл болгон учурда жеке ташуучулар тарабынан көмүрдү жол жээгинде жогорулатылган баада сатууга тыюу салууну киргизүүнүн максатка ылайыктуулугун карап чыгуу максатында Кыргыз Республикасынын Энергетика министрлигинин, Кыргыз Республикасынын Ички иштер министрлигинин, Монополияга каршы жөнгө салуу кызматынын, Кыргыз Республикасынын Финансы министрлигине караштуу Салык кызматынын өкүлдөрүнөн турган мобилдик жумушчу топ түзүүнү тапшырды.

«Быйылкы жылдын күз-кыш мезгилине даярдык экономиканы коронавирус инфекциясынын кесепеттеринен калыбына келтирүү, электр энергиясын керектөөнүн жана жабдууларга болгон жүктөмдөрдүн жогорулашы шартында өттү. Ошого карабастан биз күз-кыш мезгилин үзгүлтүксүз жана ыңгайлуу өткөрүү боюнча элдин алдында милдеттенме алдык, аны аткарууга милдеттүүбүз. Тармактык мамлекеттик органдардын бардык күч-аракети ушуга багытталууга тийиш», – деп жыйынтыктады Акылбек Жапаров.

Кыргыз Республикасынын Министрлер Кабинетинин Төрагасы Акылбек Жапаров Республикалык ыкчам штабдын кезектеги кеңешмесин өткөрдү.

Кеңешмени ачууда Министрлер Кабинетинин башчысы өнүктүрүү боюнча өнөктөштөргө өлкөгө COVAX глобалдык демилгелер алкагында 259 миң доза Phizer жана 111,600 доза Sinofarm вакцинасын алып келүүгө көмөктөшкөндүгү үчүн ыраазычылык билдирди

Кеңешмеде учурдагы эпидемиологиялык абал талкууланып, аймактардагы вакцинациялоо темпи жана билим берүү мекемелериндеги абал тууралуу маалымат угулду.

Акылбек Жапаров жарандар арасында вакцина алуу зарылдыгы тууралуу түшүндүрүү иштерин жүргүзүүнүн жана күчтөндүрүүнүн маанилүүлүгүн белгиледи.

Мындан тышкары, жолугушуунун жүрүшүндө жеке коргонуу каражаттарынын жана дары-дармектердин запасына тийиштүү маселе талкууланып, калктын социалдык жактан аяр катмарына ПЦР-анализдерди акысыз негизде, же жеңилдиктер аркылуу берүү сунушу каралды.

Кыргыз Республикасынын Министрлер Кабинетинин Төрагасы Акылбек Жапаров Нарын облусуна жумушчу сапарынын алкагында «Торугарт – Автожол» көзөмөл-өткөрүү пунктуна барды.

Акылбек Жапаров «Фантузи» контейнердик кранынын иши менен таанышып чыгып, мындан ары карай жүктөө «Арка» районунда эмес, «Торугарт» көзөмөл-өткөрүү пунктунда ишке ашырылаарын жана жүк ташуучу унаалардын саны көбөйтүлөөрүн белгиледи.

Министрлер Кабинетинин башчысы ошондой эле дезинфекциялык барьердин абалы менен таанышып, аталган пункттун инфраструктурасын жакшыртууну тапшырды.

Мындан тышкары, Акылбек Жапаров Тайлак Баатыр атындагы чек ара аскер бөлүгүнүн заставасынын абалы менен таанышты.

Кыргыз Республикасынын Министрлер Кабинетинин Төрагасы – Президенттин Администрациясынын Жетекчиси Акылбек Жапаров Кыргыз Республикасынын Президентинин Администрациясынын кызматкерлери менен жумушчу кеңешме өткөрүп, Администрациянын жакынкы келечекке карай ишинин негизги багыттарын белгиледи.

Ал билдиргендей, Кыргыз Республикасынын Президенти тарабынан Президенттин Администрациясына негизги милдет – мамлекет башчынын чечимдеринин аткарылышын так көзөмөлдөөнү камсыздоо коюлган, мында чоң жоопкерчилик тармактык министрликтерге жүктөлөт.

«Мен мамлекеттик кызматтын бардык тепкичтерин басып өткөм жана буга дейре Президенттин жана Өкмөттүн Администрациясында иш кандай жүргүзүлгөндүгүн билем. Иш процессин уюштуруу принциптерин ыкчам жана натыйжалуу чечимдердин кабыл алынышы максатында толугу менен карап чыгуу зарыл. Бир дагы документ Президенттин Администрациясында «кептелип» калбашы керек. Ар бир кызматкер кесипкөй сапаттарга ээ болуп, мамлекеттин келечеги үчүн командада ыкчам, ырааттуу жана толук кандуу иш алып барууга тийиш», – деп белгиледи Акылбек Жапаров.

Министрлер Кабинетинин Төрагасы белгилегендей, алдыда чоң өзгөрүүлөр турат, масштабдуу социалдык, экономикалык, технологиялык милдеттерди чечүү зарыл, аларды ишке ашырууда бийликтин бардык деңгээлинде, республикадагы айыл өкмөттөн жогорку жетекчиликке дейре мамлекеттик башкарууга жаңыча мамиле кылуу талап кылынат.

Министрлер Кабинетинин башчысы Президенттин Администрациясынын түзүмдүк бөлүмдөрүнүн жетекчилерин алдыдагы бир катар амбициялуу пландарды ишке ашыруу үчүн күч-аракеттерди бириктирүүгө чакырды жана чечим кабыл алуунун эпсиз жана натыйжалуулугу төмөн тутумунан баш тартып, жоопкерчиликтүү милдеттерди эффективдүү чече турган жогорку денгээлдеги кесипкөй адистерден турган мобилдүү жана ишке жөндөмдүү Президенттин Администрациясын түзүү мезгили келип жеткендигин белгиледи.