Menu

УКМК

УКМК: KOICA Кыргызстандагы киберкоопсуздук боюнча долбоорду каржылайт

КР УКМК  Корея Эл аралык Кызматташтык Агенттиги (KOICA) менен “Кыргыз Республикасында компьютердик инциденттерге ыкчам чара көрүү борборун (SOC) түзүү” гранттык долбоорун ишке ашыруу боюнча талкуулоо протоколуна кол койду.

Салтанатка КР УКМК төрагасы генерал-лейтенант Ташиев Камчыбек, Корея Республикасынын Кыргыз Республикасындагы атайын ыйгарым укуктуу элчиси Ли Вонджэ мырза жана KOICA өкүлчүлүгүнүн Кыргызстандагы директору мырза Ли Жонгсу катышты.

“Кыргыз Республикасында компьютердик инциденттерге ыкчам чара көрүү борборун (SOC) түзүү” долбоору, өлкөдөгү киберкоопсуздуктун абалын бекемдөөгө багытталган.

KOICA долбоорунун алкагында, SOC борборунун өзүн түзүү, жабдуулар жана программалар менен камсыздоо, мамлекеттик органдардын киберкоопсуздугун коргоо жана адамдык потенциалды өнүктүрүү боюнча чечимдерди жайылтуу пландаштырылууда.

Долбоордун узактыгы 5 жыл (2021-2025) болот. Бул долбоорду ишке ашыруу каражаты 5 миллион АКШ долларын түзөт

Кыргызстан үчүн УКМК Эл аралык «Касперский лабораториясы» менен «кибер калкан» түзүшөт

КР УКМК ЕККУнун Бишкектеги Программалык офисинин жардамы менен, маалымат коопсуздугу жана санариптик купуялык жаатында иштеген эл аралык «Касперский лабораториясы» компания менен киберкоопсуздук боюнча кызматташуу меморандумуна кол коюшту. Салтанатка «Касперский лабораториясынын» башкы директору Евгений Касперский жана КР УКМКнын төрагасынын орун басары, Кибер коопсуздукту координациялоо борборунун директору Жаныбек Жоробаев катышты.

Бул келишимдин артыкчылыктарынын бири – Кыргыз Республикасынын киберкоопсуздугунун комплекстүү системасын иштеп чыгуу жана ишке киргизүү. Кыргызстан кибер коркунучтардын ар кандай рейтингдеринде көп учурда алдыңкы катарларда турат. «Касперский лабораториясынын» маалыматы боюнча, 2021-жылдын башынан бери, Кыргызстанда болжол менен ар бир төртүнчү интернет колдонуучу ар кандай кибер коркунучтарга, ал эми ар бир экинчи интернет колдонуучу-колдонуучунун аппаратына алынуучу маалымат каражаттары аркылуу жергиликтүү (локалдык) коркунуч деп аталган чабуулдарга туш болгон.

Үстүбүздөгү жылдын алты айында «Касперский лабораториясы» Кыргызстандагы “фишинг” баракчаларына кирүүнүн 60 миңден ашыгына бөгөт койгон. Адистер киберкылмышкерлер барган сайын уюмдарды бутага алып жатканын белгилешет. Мисалы, 2021-жылдын январь-июнь айларында Кыргызстанда корпоративдик интернет колдонуучулардын 19% ы веб коркунучтарга, 42% ы жергиликтүү зыяндуу программаларга туш болушкан.

«Касперский лабораториясы» бул долбоорго улуттук масштабда киберкоопсуздук системаларын иштеп чыгуу жана киргизүү боюнча тажрыйбасы бар адистерди тартууну пландап, ошондой эле мамлекеттик маалымат системаларына каршы коркунучтар боюнча аналитикалык отчетторду берүүнү пландап жатат. Компания Кыргыз Республикасынын санариптик трансформациялоо программасынын маалымат системаларын жана ресурстарын коргоону көз карандысыз башкаруу боюнча өзүнүн техникалык компетенциясын калыптандырууга жардам берет. Бул үчүн семинарларды өткөрүү жана маалымат тутумдарын колдогон тутумдун администраторлору жана адистери менен дайыма консультация өткөрүү пландаштырылууда. Келишимдин алкагында талкууланган дагы бир кадам – тутумдук администраторлор үчүн үзгүлтүксүз билим берүү программасын ишке киргизүү жана университеттердин биринде окуу борборун жана «Маалыматтык коопсуздук» классын ачуу.

«Бул келишим бизге пайда алып келет. Биз «Касперский лабораториясы» менен компьютердик инциденттерге жооп берүү боюнча кызматташтыкты бекемдеп жатабыз, анткени кызматташуу кибер коркунучтарга каршы күрөшүүнүн эң эффективдүү жолу. Дүйнөдөгү киберкоопсуздуктун алдыңкы оюнчуларынын тажрыйбасы жана билими бизге мамлекеттик секторго, бизнеске жана жеке колдонуучуларга карата жасалган чабуулдарга каршы турууга жардам берет»-деди УКМКнын төрагасынын орун басары, Кибер коопсуздукту координациялоо борборунун директору Жаныбек Жоробаев. 

“Биздин портфолио салттуу антивирустук чечимдер менен чектелбейт. Биз ошондой эле татаал жана дайыма өнүгүп жаткан кибер коркунучтарга каршы күрөшүү үчүн кибер иммундук технологиялардын жана кызматтардын кеңири спектрин иштеп чыгабыз жана жайылтабыз, анын ичинде инфраструктуранын маанилүү объектилеринде дагы.

Биздин эксперттер мамлекеттик деңгээлде маалымат коопсуздугун жогорулатууну жана республикага кибер коркунучтардан эффективдүү, ыңгайлуу жана жеткиликтүү коргонууну ишке ашыруу үчүн КР УКМК менен иштөөгө кубанычта»,- деп кошумчалады «Касперский лабораториясынын» башкы директору Евгений Касперский.

УКМК: Аткезчилик менен алектенген бажы кызматкерлери кармалды

Кыргыз Республикасынын УКМК тарабынан КР Экономика жана финансы министрлигине (ЭжФМ) караштуу Мамлекеттик бажы кызматынан (МБК) алынган маалыматка ылайык, “ALG” ЖЧКсы жагындагы экономикалык контрабанда фактысы боюнча КР ЭжФМ караштуу МБК «Түндүк» Темир жол бажысынын «Кара-Балта» Бажы каттоо жеринин жогорку кызмат адамдары Ж.Д. жана М.Е. кармалып Кыргыз Республикасынын УКМК тергөө камак жайынын убактылуу кармоочу жайына киргизилишти.        

2021-жылдын 17-августунда Бишкек шаарынын аймагынан бажы көзөмөлү учурунда, тийиштүү бажы процедураларынан жана бажылык жол-жоболордон өтпөстөн Бишкекти көздөй жөнөп, “Дордой” соода базар комплексинин аймагына келип, бекитилген түзүлүштөрдү ачып, товарларды жарым-жартылай түшүргөн Түркия Республикасы тарабынан чыгарылган фирмалык кийим түрүндөгү эл керектөөчү товарлар менен «Түндүк» Темир жол бажысынын «Кара-Балта» Бажы каттоо жеринен үч жүк ташуучу унаа кармалган.

 Тергөөдө аныкталгандай, жүктөрдү түшүрүү «ALG» ЖЧКсынын кызматкерлеринин шериктештиги менен ишке ашырылганын, ал эми «Кара-Балта» Бажы каттоо жеринен  тийиштүү бажы процедураларынан жана бажылык жол-жоболордон өтүү КР Экономика жана финансы министрлигине караштуу Мамлекеттик бажы кызматынын кызмат адамдарынын демөөрчүлүгү астында жүргүзүлгөн.

Транзиттик декларацияларга ылайык, кармалган жүк бажы мамилелеринде фирмалык кийим түрүндөгү товарларга салыштырмалуу төмөн баада жол-жоболоштурулуучу трикотаж кездемелер, жиптер, токулган кездемелер, жибек кездемелер жана пахта катары декларацияланган.

КР Экономика жана финансы министрлигине караштуу Мамлекеттик бажы кызматынын кызматкерлеринин кылмыштуу иш-аракеттеринин натыйжасында, мамлекетке 8 миллион сомдон ашык зыян келтирилген, бул тергөө учурунда көрүлгөн чаралар менен тышкы экономикалык иштин катышуучусу тарабынан толук компенсацияланган.

Учурда кылмыш иши боюнча кылмышка тиешеси бар бардык адамдарды аныктоого багытталган тергөө жана ыкчам иш-чаралардын комплекси жүргүзүлүүдө, бул тууралуу коомчулукка кошумча маалымат берилмекчи.

УКМК: Пара талап кылуу фактысы боюнча Бишкек ШИИБ Патрулдук милиция кызматкери кармалды

Кыргыз Республикасынын УКМК тарабынан укук коргоо органдарындагы коррупциялык кылмыштарды аныктоо, алдын алуу жана бөгөт коюу боюнча жүргүзүлүп жаткан иштердин жүрүшүндө, Кыргыз Республикасынын Ички иштер министрлигинин Ички иликтөө кызматы менен бирдикте, 64 миң сом өлчөмүндө пара талап кылуу фактысы боюнча Бишкек шаардык ички иштер башкармалыгынын Патрулдук милиция кызматы башкармалыгынын кызматкери «А.А.К.» кармалды.

Такталган боюнча, Бишкек шаардык ички иштер башкармалыгынын Патрулдук милиция кызматынын башкармалыгынын кызматкери «А.А.К.» таанышы менен жең учунан сүйлөшүп алып, зордуктоо үчүн кылмыш жоопкерчилигине тартуу боюнча коркутуп, Бишкек шаарынын тургуну «С.К.Б.» 100 миң сом өлчөмүндө акча талап кылган. Бирок, укук коргоо органдары борбордун бул тургунуна карата зордуктоо же башка укук бузуу фактыларын каттаган эмес.

КР Кылмыш-жаза кодексинин 326-беренесинин 2-бөлүмү (Пара талап кылуу) боюнча кылмыштардын жана жоруктардын бирдиктүү реестрине катталган сотко чейинки өндүрүштүн алкагында кармалган Бишкек шаарынын ШИИБ Патрулдук милиция кызматынын башкармалыгынын кызматкери «А.А.К.» тиешелүү тергөө-ыкчам иш-чараларын андан ары жүргүзүү үчүн Кыргыз Республикасынын УКМК убактылуу кармоочу жайына киргизилди.

 

УКМК: УКМКнын кызматкерлери көмүскө казинолорду коргоого катышкан деген маалымат чындыкка дал келбейт

Массалык маалымат каражаттарында КР УКМКнын кызматкерлери көмүскө казинолорду коргоого катышкан деген маалымат чындыкка дал келбейт. Бул тууралу УКМКнын басма сөз кызматы билдирет.

6-башкы башкармалыктын кызматкерлери, башчысы К.Досмамбетов жана анын орун басары А.Осмонов бөлүмдүн ротация болушуна байланыштуу башка кызматка которулган.

Видео - УКМК: Аткезчиликке каршы күрөшүүдө УКМКнын аракетсиздиги боюнча Х.Абдуганиев чагымчыл билдирүү жасаган

КР УКМК органдары тарабынан Кыргыз-тажик мамлекеттик чек арасынын тилкелеринде контрабандалык товарларды алып кирүүнүн жана алып чыгууну алдын алуу боюнча жүргүзүлгөн тиешелүү иш-чаралардын жүрүшүндө контрабандалык иштер токтотулуп жатканы байкалууда. 

Ошол эле учурда, чек аранын эки тарабындагы калктын массалык түрдө мыйзамсыз иштерге барышынан улам, көп сандагы чек ара тилкесиндеги ачык жерлердин тактала электигинен улам, аткезчилик фактылары дагы эле уланууда.

Маалыматтарга ылайык, мындай кылмыштардын белгилүү бир бөлүгү шериктештик менен жөнгө салуу органдарынын жана жергиликтүү өз алдынча башкаруу органдарынын айрым кызмат адамдарынын камкордугунун натыйжасында да жасалгандыгын көрсөтөт. 

2021-жылдын 14-августунда “Түштүк” ыкчам бажысынын улук ыкчам кызматкери, капитан “Ж.Э.С” коштоосунда 23 тоннага жакын күрүч түрүндөгү оор жүк ташуучу унаа кармалган. Бул факт Кыргыз Республикасынын Кылмыш-жаза кодексинин 320-беренесинин 2-бөлүгү «Кызмат абалынан кыянаттык менен пайдалануу» боюнча кылмыштардын жана жоруктардын бирдиктүү реестрине катталган.

КР УКМК тарабынан контрабандалык каналдарды жоюу боюнча жүргүзүлгөн иш-чараларга байланыштуу, көзөмөлдөө органдарынын кызмат адамдарынын Баткен облусунун аймагында аткезчилик ишмердүүлүгүн жүргүзгөн адамдар менен кылмыштуу сүйлөшүү иштерин ишке ашырууга жол бербөөнүн натыйжасында, социалдык тармактардын тиркемелери аркылуу УКМК ишмердүүлүгүн негизсиз каралоо болуп жатат. 

2021-жылдын 23-августунда Кыргыз Республикасынын Президентинин Баткен облусундагы ыйгарым укуктуу өкүлүнүн жана Лейлек районунун мамлекеттик органдарынын жетекчилери, Максат айылынын тургундары менен уюштурулган жолугушуусунда аткезчиликке каршы күрөшүүдө УКМКнын аракетсиздиги боюнча Лейлек районунун Бешкент айылынын тургуну Х.А.Абдуганиев тарабынан чагымчыл билдирүү жасалган. 

Кийинчерээк Х.Абдуганиев УКМКнын контрабандага каршы күрөшүүдө аракетсиздигине байланыштуу туура эмес билдирүү жасаганын, УКМКнын Баткен облусунда аткезчиликке каршы жүргүзүлүп жаткан активдүү иши тууралуу маалыматы жоктугунан улам билбей айткандыгын белгилеген. 

Бул уюшкан кылмыштуу топтор контрабандага каршы аракеттерди азайтуу үчүн УКМКнын аброюн түшүрүүгө, иштен алыстатууга аракет кылып жаткандыгын көрсөтүп турат. 

КР УКМК органдары Кыргыз Республикасынын Тажикстан Республикасы менен мамлекеттик чек арасынын тилкелеринде товарларды мыйзамсыз ташуу каналдарын аныктоо жана бөгөт коюу боюнча тийиштүү чараларды улантып жатат, өлкөнүн экономикалык коопсуздугуна коркунуч келтирүүчү аткезчилик фактыларга чечкиндүү түрдө бөгөт коюуда.

УКМК: Талатбек Масадыковдун өлкөнүн Президенти бардык саясий туткундарды бошотушу керек деген билдирүүсү компетенттүүлүк жана расмий этика нормаларын сактабоо болуп эсептелет

Коопсуздук кеңешинин төрагасынын орун басары Т.Масадыковдун өлкөнүн Президенти бардык саясий туткундарды бошотушу керек деген билдирүүлөрүнө байланыштуу, Кыргыз Республикасынын УКМК төмөнкүлөрдү билдирүүнү зарыл деп эсептейт:

Учурдагы бийликтин демократиялык принциптерди андан ары бекемдөөгө болгон багыты кайтарылгыс. Ал үчүн мүмкүн болгон нерсенин баары жасалууда, анын ичинде коомдогу бардык күчтөрдүн консолидациясы, өлкөдөгү ачык-айкындуулукту жана теңчиликти өнүктүрүүнү артка тартып жаткан коррупциялык системаны талкалоо.

Бүгүнкү күндө биздин өлкөдө эч кандай саясий туткундар жок, кээ бир кызыкдар күчтөр саясий куугунтуктун туткундары катары көрсөтүүгө аракет кылып жатышкан, кылмыш иштери үчүн тиешеси бар жана тиешелүү юридикалык жоопкерчиликке тартылгандар бар.

Бүгүнкү күндө коомчулук буга көбүрөөк ишене баштады, анткени өлкөдө коррупциянын ар кандай көрүнүштөрүнө, анын ичинде саясий коррупцияга каршы күрөш жүрүп жатат.

УКМК ошондой эле кимдир бирөөнүн күнөөсү сот тарабынан аныкталарын жана ал гана актоого же катаалдаштырууга укуктуу экенин эске салууну зарыл деп эсептейт. Ал эми Кыргызстанда эч ким, анын ичинде мамлекет башчысы да сот системасынын ишине кийлигишүүгө акысы жок.

Ошондой эле, мамлекет башчысынын алдында туруп, президентке, айрыкча коомдук мейкиндикте, эмне кылуу керектигин көрсөтүү- компетенттүүлүк жана расмий этика нормаларын сактабоо болуп эсептелет.

УКМК Коопсуздук кеңешинин төрагасынын орун басары Талатбек Масадыковдун кеңештерине муктаж эмес

УКМК бүгүнкү күндө жалпыга маалымдоо каражаттары менен иштөө мамлекеттик органдарга, анын ичинде УКМКга мурдагыдан да зарыл деп эсептейт, анткени бул коомчулуктун кызыкчылыгында аткарылып жаткан иштер тууралуу маалыматтын жеткиликтүү ыкмасы.

Бул жагынан алганда УКМК Т. Масадыковдун берген мындай кеңештерине муктаж эмес

УКМК аткаруу бийлигинин маанилүү органы болуп саналат, зарыл болгон учурда конституциялык укугу бар компетенттүү адамдардын кеңештерин жана сунуштарын колдонот.

Өз кезегинде УКМК Т. Масадыковду конституцияда каралган кызматтык милдеттерине негизделген ыйгарым укуктарын аткарууга чакырат.

УКМК: Өзбек жарандарынын кыргыз-өзбек чек арасында мыйзамсыз текшерүүгө жана чек арачылардын опузасына кабылып жатабыз деген билдирүүлөрү чындыкка дал келбейт

Өзбек жарандарынын кыргыз-өзбек чек арасында мыйзамсыз текшерүүгө жана чек арачылардын опузасына кабылып жатабыз деген билдирүүлөрү чындыкка дал келбейт. Бул тууралуу Улуттук коопсуздук комитетинин (УКМК) Чек ара кызматы 31-июлда билдирди.

Маалыматка караганда, социалдык тармактарда тарап жаткан кайрылуулардын негизинде тиешелүү текшерүү жүргүзүлүп, анын жыйынтыгында айтылгандар тастыкталган эмес.

Чек ара кызматы 2021-жылдын июнь айындагы буйрукка ылайык, кыргызстандык жана чет өлкөлүк жарандар чек арадан өтүүдө санитардык-карантиндик посттордун кызматкерлерине ПЧР-тесттин терс жыйынтыгын же COVID-19га каршы эмдөө сертификатын көрсөтүшү керек экенин маалымдайт.

Ошол эле учурда, акыркы убакта жасалма маалымкат менен чек арадан өтүү аракеттери көбөйгөндүгү айтылат.

Буга чейин өзбекстандык жарандар чек арадан өтүүдө негизсиз текшерүү көп болуп жатат деген нааразылыктарын билдиришкен.

УКМК: Темир жол бажысындагы коррупциялык схеманын бети ачылды

КР УКМК фискалдык органдардагы кылмыштарды аныктоо, алдын алуу жана бөгөт коюу иш-чараларынын алкагында, КР Экономика жана финансы министрлигинин Мамлекеттик бажы кызматынын алдындагы Ички иликтөө жана коррупцияга каршы күрөшүү башкармалыгынын кызматкерлеринин катышуусу менен бажы бөлүмдөрүнүн биринде туруктуу коррупциялык схема аныкталды.

«Түндүк» темир жол бажысынын бажы тариздөө борборунун бажы эрежелерин сактоо боюнча тобунун кызматкерлери логистикалык компаниялардын айрым өкүлдөрү менен туруктуу кылмыштуу мамиледе болуп, интернет продуктуну керектөөчүлөрдөн жана логистикалык компаниялардан тиешелүү бажы төлөмдөрүн төлөбөстөн товарларды өткөзүп туруу үчүн системалуу түрдө акча алып турушканы аныкталган.

2021-жылдын 29-июлунда ыкчам-тергөө иш-чараларынын натыйжасында, тиешелүү бажы төлөмдөрүн төлөбөстөн, кийинки келген жүктүн мыйзамсыз өтүүсү үчүн акча алып жаткан жеринен «Түндүк» темир жолунун бажы тариздөө борборунун бажы эрежелерин сактоо боюнча тобунун инспектору «Х.Э.» кармалган. Кармалган адам КР УКМКнын тергөө камак жайынын убактылуу кармоочу жайына киргизилген.

Азыркы учурда «Түндүк» темир жол бажысынын бажы тариздөө борборунун кызмат адамдарынын жана айрым логистикалык компаниялардын  бажыдагы коррупцияга тиешеси бар  экенин аныктоого, ошондой эле жеке жана юридикалык жактарга бажылык тариздөөдөн мыйзамсыз өткөн онлайн товарлардан келтирилген зыянды аныктоого багытталган тергөө-оперативдик иш-чараларынын комплекси жүргүзүлүп жатат.

Меню