Улукбек Марипов

Кыргыз Республикасынын Министрлер Кабинетинин төрагасы Улукбек Марипов Министрлер Кабинетинин төрагасынын орун басарлары жана Кыргыз Республикасынын Президентинин Администрациясынын Жетекчисинин орун басарларынын катышуусу менен жумушчу кеңешме өткөрдү.

Жыйындын жүрүшүндө өлкөнүн социалдык-экономикалык өнүгүүсүнүн актуалдуу маселелери жана аларды чечүү жолдору талкууланды. Мындан тышкары, Кыргыз Республикасынын Президентинин Жарлыктарын ишке ашыруунун жүрүшү, эпидемиологиялык абалды турукташтыруу, жарандарды вакцинациялоо, азык-түлүк жана коомдук коопсуздукту камсыз кылуу маселелери каралды.

Кеңешменин жыйынтыгы боюнча Улукбек Марипов өлкөдө эпидемиологиялык кырдаал боюнча Министрлер Кабинетинин кезексиз жыйынын өткөрүүнү тапшырды. Ал ошондой эле тез арада аткарууну талап кылган бир катар тапшырмаларды берди.

Кыргыз Республикасынын Министрлер Кабинетинин төрагасы Улукбек Марипов Чүй облусуна болгон жумушчу сапарынын жүрүшүндө Бишкек-Кара-Балта унаа жолунун реконструкцияланышынын жүрүшүн текшерди.

Улукбек Марипов бардык курулуш иштерин сапаттуу жана белгиленген мөөнөттө бүтүрүүнү тапшырды.

Жолдун узундугу 52,5 км түзөт (45,1 км – Кара-Балта – унаа базары жана 7,4 км – унаа базары – Киркомстром). 45,1 км участогу боюнча иштер 2021-жылдын ноябрында, ал эми 7,4 км участогу боюнча – 2022-жылдын октябрь айында аякталышы пландалууда.

Кыргыз Республикасынын Министрлер Кабинетинин Төрагасы Улукбек Марипов Чүй облусуна жумушчу сапарынын жүрүшүндө «Сосновка»  транспорттук көзөмөл пунктунун ишин пландан тышкары текшерди.

Министрлер Кабинетинин башчысы транспорттук көзөмөл пунктунун жана салмак көлөмдүк контроль тутумунун иши менен таанышты.

«Маалыматтык тутум көрсөткөндөй, эртең мененки саат 8ден тарта 29 унаа өткөн, бирок 17 унаа гана каттоого алынган. Салмак көлөмдүк контроль   тутуму иштебейт. Биз транспорт каражаттарынын кыймылынын ачыктыгын жана толук эсепке алынышын камсыздоо максатында транспорттук көзөмөл пункттарындагы автоматташтырылган маалыматтык тутумдун толук кандуу иш алып баруусуна жетишүүбүз керек», – деди Улукбек Марипов.

Кыргыз Республикасынын Министрлер Кабинетинин Төрагасы Улукбек Марипов жана Бишкек шаарынын мэринин милдетин аткаруучу Бактыбек Кудайбергенов Бишкек шаарын өнүктүрүүнүн актуалдуу маселелерин талкуулады.

«Унаалардын агымын азайтуу жана шаардык транспорттук инфраструктураны өнүктүрүү үчүн Бишкек шаарына заманбап жана экологиялык жактан таза автобустарды жана троллейбустарды жеткирүү боюнча сүйлөшүүлөрдү тездетүү керек. Бишкек шаары коомдук автопаркты түп-тамырынан бери масштабдуу жаңыртууга жана кеңейтүүгө муктаж. Мындан бир нече күн мурда жаралган транспорттук көйгөй кайталанбашы тийиш», – деп белгиледи ал.

Улукбек Марипов Бишкек шаарынын мэринин көңүлүн шаардык чөйрөнү жакшыртууга багытталган комплекстиүү чараларды кабыл алуу зарылдыгына бурду.

«Бишкек шаарынын борборунда абалы начар, басууга мүмкүн болбогон жөө жүргүнчүлөр үчүн тротуарлар кездешет. Мындан тышкары, бак-дарактарды мыйзамсыз кыюу, баш-аламан курулуштар, арыктардагы суунун жетишсиздиги, сугат тутумунун бузулгандыгы, же жоктугу сыяктуу маселелер нааразычылыктарды туудурууда. Бишкек шаары – биздин өлкөнүн борбору, ошондуктан муниципалдык бийлик күн сайын жана тутумдуу түрдө шаардын тышкы көрүнүшүн жакшыртуу, шаардыктардын ыңгайлуу жана коопсуз жашоосу үчүн шарттарды түзүү үстүндө иш алып баруулары керек. Шаар инфраструктурасын өнүктүрүүнүн маанилүүлүгүн эске алуу менен шаардык бийликтен учурдагы көчөлөрдүн биринде жалаң жөө жүргүнчүлөр үчүн каралган көчөнү түзүү боюнча сунуш киргизүүнү тездетүүнү өтүнөм», – деди Министрлер Кабинетинин Төрагасы.

Жолугушууга катышкан BPC Group улук вице-президенти Тохир Абдукадыров коомдук транспортто электрондук билет берүү тутумун ишке киргизүүнү караган «Бишкек шаарынын мэриясынын коомдук транспортун өнүктүрүү» долбоорун ишке ашыруунун аралык жыйынтыктары тууралуу маалымат берди.

Министрлер Кабинетинин Төрагасы Улукбек Марипов билдиргендей, жүргүнчүлөрдүн ыңгайлуулугун камсыздоо максатында аталган долбоорду ишке ашырууну улантуу зарыл.

«Бул тутум муниципалдык коомдук транспортто гана киргизилген. Мындай валидаторлорду жүргүнчүлөрдү ташыган жеке унаа каражаттарында орнотуу мүмкүнчүлүгүн кароо менен аны пайдаланууну кеңейтүү зарыл. Бишкек шаарынын коомдук транспортундагы эсептешүү толугу менен накталай эмес түрдө жүргүзүлүшү керек», – деп жыйынтыктады ал.

Кыргыз Республикасынын Министрлер Кабинетинин Төрагасы Улукбек Марипов Экономика жана финансы министрлигине караштуу Мамлекеттик салык кызматынын салыктык башкарууну жакшыртуу жана өнүктүрүү жаатындагы мындан аркы пландарын жана милдеттерин талкуулоо боюнча кеңешме өткөрдү.

Кеңешменин жүрүшүндө Салык кызматы “СМАРТ Салым” долбоорунун алкагында салык төлөөчүлөр үчүн санариптик технологияларды колдонуу менен жаңы тейлөө кызматтарын киргизүү боюнча иштерди жүргүзүп жаткандыгы белгиленди.

Министрлер Кабинетинин төрагасы салык жол-жоболорун санариптештирүү боюнча иш-чараларды күчөтүү, ошондой эле Кыргыз Республикасынын Салык кодексинин жаңы редакциясын иштеп чыгуу боюнча ишти приоритет катары алып баруу зарыл экендигин белгиледи.

“Ыйгарым укуктуу мамлекеттик орган бизнес өкүлдөрү менен документтин долбоорун коомдук талкуулоого өзгөчө көңүл буруусу зарыл. Салык кодексинин жаңы редакциясын иштеп чыгууда бизнес өкүлдөрүнүн пикири максималдуу эске алынууга тийиш”, – деди Улукбек Марипов.

Кеңешменин жүрүшүндө үстүбүздөгү жылдын 1-июлуна чейин киргизилүүгө тийиш болгон алкоголдук жана тамеки продукцияларын санариптик идентификациялоо каражаттары менен милдеттүү түрдө маркалоону киргизүү маселесине өзгөчө көңүл бурулду.

Ушул маселени кароодо Улукбек Марипов экономикалык субъекттердин арасында маалыматтык-түшүндүрүү иштерин жүргүзүүнүн маанилүүлүгүн белгиледи.

Кеңешме жыйынтыгы боюнча Министрлер Кабинетинин төрагасы тийиштүү мамлекеттик органдарга бир катар тапшырмаларды берип, аларды аткаруу мөөнөтүнө өзгөчө көңүл буруп, эгер алар аткарылбаса жетекчилердин жоопкерчилиги караларын белгиледи.