Menu

Эдил Байсалов

Эдил Байсалов “Азаттык" радиосунун ишмердигин “Тап-таза бузукулук!” деп уяткарды

КР Министрлер кабинетинин төрагасынын орун басары Эдил Байсалов өзүнүн Тwitter социалдык тармагындагы баракчасында “Азаттык” радиосун кескин сынга алды.

“Мына эми карагылачы. Стандарттын стандарты дегендердин кылганын. “Эмнеси болсо да өнүгүү болбосун! Мамлекетке каршы чыккандын баары таза! Өкмөттүкү дайым туура эмес” деген логиканын кесепети. Токтоткула мындайыңарды. Бул эркиндик эмес. Тап-таза бузукулук!” – деп жазды Эдил Байсалов.

“Бул жердеги маскаралык бул “Азаттык радиосундагы” биз жогорку деңгээлдеги кесипкөйлөр деп эсептегендер тирешүү жана карама-каршы коюу максатында бир сөзмөрдүн эки жыл мурунку эски видеосун жаңы жаңылык катары жарыялоону чечкендиги. Бул аталган редакциядагы жана жалпы басма сөздөгү жакшы эмес ситуациянын реалдуу иллюстрациясы”, – дейт Байсалов.

Эсиңиздерге сала кетсек, 14-август күнү Facebook социалдык тармагынын колдонуучусу Ырыс Жекшеналиев өзүнүн “Полит Узник” баракчасында абактан араң кутулган УКМКнын мурунку төрагасы Абдил Сегизбаевдин 2 жыл мурунку Жетим-Тоо боюнча видеосун жаңы жаңылык катары жарыялаган. Аны аңдабай “Азаттык” радиосу да жаңы жанылык катары “Сегизбаевдин Жетим-Тоодогу кенди иштетүүгө каршы пикири жарыяланды” деп элге жар сала баштаган.

Эдил Байсаловдун уяткаруусунан кийин “Азаттык” өз жаңылыгын алып салган.

УКМКнын тергөө абагында каза болгон фактыларды иликтеген комиссия ишин аяктады

УКМКнын СИЗОсунда болгон учурда каза тапкан Бакыт Асанбаев менен Марат Казакпаевдин өлүмүнүн фактыларды иликтөө боюнча жумушчу комиссия ишин аяктады.

Көрсөтмөгө ылайык, комиссия мүчөлөрүнө УКМКнын тергөө абагынын имаратына кирүүгө, тергөө амалдары жүрүп жаткан камакка алынгандардын өздүк делолору, видеокөзөмөлдөөлөрдүн жазуулары менен танышууга,  ошондой эле УКМКнын кызматкерлери, тергөө абагында кармалып турган адамдар менен байланышууга толук мүмкүнчүлүк түзүлдү.

Комиссия өз ишинин жүрүшүндө 12 отурум өткөрсө, анын  беши УКМКнын СИЗОсунда, жетөө Өкмөт үйүндө болду.

Кыргыз Республикасынын Министрлер Кабинетинин Төрагасынын орун басары – Кыргыз Республикасынын Улуттук коопсуздук мамлекеттик комитетинин төрагасы Камчыбек Ташиевдин маалыматы угулуп, Б. Асанбаев менен М.Казакпаев камакта болгон учурдагы СИЗОнун байкоочу камералардагы жазуусу, тергөө абагынын эсеп-кысап документтери көрүлдү. Аны менен катар каза болгон адамдар менен чогу кармалгандар, СИЗОнун кызматкерлери суралып, бул кылмыш иштерин тергеген УКМКнын Башкы тергөө башкармалыгынын тергөөчүлөрү менен баарлашуу болду.

Жүргүзүлгөн иштердин жыйынтыгы боюнча комиссия Б.Асанбаев менен М.Казакпаевдин күтүүсүз өлүмүнө алып келген жагдайлардын трагедиялуу айкалышы жөнүндө алдын ала корутундуга келди.

Ушундай иштердин кайталанбашы учун комиссия зарыл чаралардын комплексин сунуш кылды.

«Министрлер Кабинети мамлекет башчысынын тапшырмасы менен убактылуу кармоочу жайды, СИЗОну жана бардык пенитенциардык системаны толугу менен кайра түзүүнү пландаштырууда. Жакынкы жылдарда бул маселе коомду гумандаштыруунун, тергөө абагынын жана жаза өтөө жайларынын шарттарын жакшыртуунун алкагында эң артыкчылыктуу багыттардын бири болот», – деди – комиссиянын төрагасы Эдил Байсалов.

Эдил Байсалов Нью-Йорктогу БУУ штаб-квартирасында өтүп жаткан ЭКОСОС калкасы астындагы Туруктуу өнүгүү боюнча жогорку деңгээлдеги саясий форумга катышты

Кыргыз Республикасынын Министрлер Кабинетинин Төрагасынын орун басары Эдил Байсалов 2022-жылдын 5-июлунан 18-июлуна чейин Нью-Йорктогу БУУ штаб-квартирасында өтүп жаткан БУУнун Экономикалык жана социалдык кеңешинин (ЭКОСОС) калкасы астындагы Туруктуу өнүгүү боюнча жогорку деңгээлдеги саясий форумга катышты.

Министрлер Кабинетинин Төрагасынын орун басары Эдил Байсалов БУУ Европа экономикалык комиссиясынын (ЕЭК) региондору үчүн туруктуу өнүктүрүү боюнча аймактык форумунун төрагасы катары «Аймактардан келген билдирүүлөр» сессиясында баяндама жасады. Өз сөзүндө Э.Байсалов ТӨМгө жетишүү үчүн прогрессти тездетүүнүн маанилүүлүгүн белгилеп, БУУ ЕЭКтин региондогу туруктуу өнүгүү чөйрөсүндө биримдикти түзүү, макулдашылган саясатты жана өз ара үйрөнүүнү жогорулатуу платформасы катары ролун белгиледи.

Эдил Байсалов ошондой эле «2030-жылга карата ТӨМгө жетишүүнү тездетүү: кризистерди жана кыйынчылыктарды жеңүү» темасындагы Министрлердин тегерек столуна катышты. БУУнун башкы трибунасында сүйлөгөн сөзүндө ал Кыргызстан эл аралык туруктуу өнүгүү күн тартибин жана «эч кимди артта калтырбоо» глобалдык милдеттенмени ишке ашырууга умтуларын белгиледи. Туруктуу өнүгүү максаттары мамлекеттик өнүгүүнүн негизги документтерине интеграцияланганы баса белгиленди. Ал Кыргыз Республикасынын тоо күн тартибиндеги демилгелерине кеңири токтолду.

Белгилей кетсек, Туруктуу өнүгүү боюнча жогорку деңгээлдеги саясий форумдун жыйынтыгы боюнча Министрлик декларация кабыл алынат, анда кыргыз тарап Тоолорду туруктуу өнүктүрүүнүн эл аралык жылын жана тоо экосистемаларын сактоонун маанилүүлүгүн белгилөө бөлүгүндө эки чечүүчү пунктту камтый алды.

Эдил Байсаловдун Саясий форумдун ишине катышуусунун алкагында ошондой эле бир катар эки тараптуу жолугушуулар болуп өттү, атап айтканда БУУ Башкы катчысынын орун басары, БУУ Өнүктүрүү программасынын администраторунун орун басары Уша Рао-Монари менен жолугушуусу болуп өттү, анын жүрүшүндө эл аралык кызматташтыктын учурдагы жана актуалдуу маселелери талкууланды.

Эдил Байсалов коронавирус инфекциясына каршы эмдөөнүн кошумча дозасын алды

Кыргыз Республикасынын Министрлер Кабинетинин Төрагасынын орун басары Эдил Байсалов Чүй облустук үй-бүлөлүк медицина борборунун эмдөө бөлмөсүндө коронавируска каршы Pfizer вакцинасынын кошумча дозасын алды.

Белгилей кетсек, Эдил Байсалов буга чейин үстүбүздөгү жылдын башында коронавирустук инфекцияга каршы эмдөөнүн кошумча дозасын алган. Учурда ал вакцинанын экинчи бустердик дозасын алууда.
Буга чейин Министрлер Кабинетинин Төрагасынын орун басары коронавирус инфекциясына каршы эмдөөнүн толук курсунан (2 доза) өткөн.

Маалымат үчүн: толук эмдөөдөн кийин адамдарда COVID-19дан коргонуунун жогорку деңгээли иштелип чыгат. Убакыттын өтүшү менен инфекциядан коргонуу начарлайт, бирок вакциналар оорунун күчөп кетүүсү, ооруканага кабылуу жана өлүм коркунучун азайтууда натыйжалуу болуп саналат.

Вакцинадан баштапкы коргонуу азая баштаганда, коргоону жогорулатуу үчүн вакцинанын кошумча дозасы талап кылынат, ал бустердик доза деп аталат. Бул кошумча доза адамды оорудан коргоо үчүн көбүрөөк антителолорду пайда кылат. Бустердик доза вакцинанын эффективдүүлүгүн жогорулатат жана коронавирустук инфекциянын жаңы штаммдарынан жакшыраак коргоону камсыздайт.
Кыргыз Республикасынын Министрлер Кабинети эмдөө коронавирус инфекциясында жеке жана жамааттык иммунитетти түзүүнүн эң натыйжалуу ыкмасы экенин эскертет. Мындан тышкары, эмдөө – жарандарды коронавирустун күчөп кетүүсүнөн жана зыяндуу кесепеттеринен коргоонун эң ишенимдүү жолу болуп саналат.

Өлкөдө менчик медициналык мекемелер текшерилет

Саламаттык сактоо министрлигинде түзүлгөн жумушчу комиссия жеке менчик медициналык жайларды текшере баштады. Бул тууралуу Министрлер кабинетинин төрагасынын орун басары Эдил Байсалов журналисттерге билдирди.

“Сарыктын оор түрлөрү, керек болсо ВИЧ жуктурган учурлар бар. Көбүнчө стоматология, косметология сыяктуу клиникалардан жуктурушат. Алар бизнес сыяктуу кабыл алынып, эч ким текшербейт экен. Бул маселени тыкыр текшерип чыгышыбыз керек”, – деди Байсалов.

18-июнда Улуттук госпиталда 41 жаштагы аял көз жумган. Жакындарынын айтымында, маркум менчик клиникадан липосакция операциясын жасаткандан кийин өзүнө келе албай, эс-учун жоготкон абалда госпиталга жеткирилгенден соң каза болгон.

Май айында Саламаттык сактоо министрлиги лицензиялык талаптарга жооп бербеген 111 менчик медициналык мекеме жабыларын билдирген. Мындан тышкары инфекциялык көзөмөл стандарттары сакталбаган 148 менчик медициналык кабинет менен клиника аныкталганы кабарланган.

Эдил Байсалов Генпрокуратуранын министр А.Бейшеналиевге каршы козгогон бир кылмыш ишиндеги одоно калпты ачыкка чыгарды

4-июнь күнү КР Башкы прокуратурасы КР Саламаттыкты сактоо министри Алымкадыр Бейшшеналиевге каршы козголгон дагы бир кылмыш иши тууралу кеңири маалымат таратып, аны өлкөдөн 55.000.000 сомду мыйзамсыз Түркияга которуп чыгарып кетип, өлкөгө ири өлчөмдө – 55.000.000 сом зыян келтирген деп айыптаган болчу.

Төмөндө прокуратуранын ал пресс-релизинин толук текстин жарыялайбыз:

“Башкы прокуратура тарабынан жүргүзүлгөн текшерүүдө Саламаттык сактоо министрлигинин жетекчилиги кээбир кызмат адамдары менен биргеликте өздөрүнүн кызыкчылыктарын көздөп, мамлекетке каршы контракт түзгөндүгү аныкталды.
2021-жылдын 08-июлунда “M.V.ch” Бахрейн компаниясы жана Кыргыз Республикасынын Саламаттык сактоо министрлигинин ортосунда Саламаттык сактоо министрлигинде дары-дармек каражаттарын көзөмөлдөө жана контролдоо боюнча мамлекеттик мекемелерге акысыз негизде кызмат көрсөтүү боюнча өз ара кызматташуу жөнүндө меморандумга кол коюлган.
Бирок, ага карабастан Саламаттык сактоо министрлигинин жетекчилиги, кээ бир кызмат адамдары менен биргеликте тендер өткөрбөй туруп, Түркиянын “TC. I. T.” Компаниясы менен келишим түзүп, 54 млн. 836 миң 316 сом которгон.
Ал эми Бахрейн компаниясы менен түзүлгөн меморандумга ылайык долбоорду эч кандай мамлекеттик чыгымдарсыз бекер ишке ашмак. Бирок, Кыргыз Республикасынын Саламаттык сактоо министрлигинин жетекчилиги жеке кызыкчылыктардын негизинде дары-дармектерди көзөмөлдөө системасын орнотууда атайылап пайдасыз келишим түзгөн.
Натыйжада, мамлекетке 54 млн. 836 миң 316 сом өзгөчө ири өлчөмдө зыян келтирилген.
Бул факты боюнча Башкы прокуратура тарабынан Кылмыш-жаза кодексинин 337 (кызмат абалын кыянаттык менен пайдалануу) жана 339-беренелери (билип туруп пайдасыз контракт түзүү) менен кылмыш иши козголуп, тергөө амалдары жүргүзүлүүдө.”
Бул маалыматты жарыялаган ЖМКлардын биринин Твиттердеги баракчасына КР Министрлер кабинетинин төрагасынын орун басары Эдил Байсалов “Гммм. Которуп чыгарып кеткен? Жаңылыштык. Акча өз ордунда эле турат. Тескерисинче биз министрди ошол дары-мафияга каршы күрөшкө бөлүнгөн акчаны өздөштүрбөй ордунда калтырганы үчүн урушканбыз“, деп таң калуу менен комментарий жазды.

Министрлер кабинетинин башчысынын орун басары Эдил Байсалов "Ак-Бешим" фестивалына барды

Чүй облусунда өтүп жаткан “Ак-Бешим” фестивалына Министрлер Кабинетинин Төрагасынын орун басары Эдил Байсалов катышты.

Иш чара тарыхый мурастарды сактоо, адеп-ахлактык, патриоттук жана эстетикалык тарбия берүү, ошондой эле туризмди өнүктүрүү максатында уюштурулган.

Фестивалдын катышуучулары  конокторго жергиликтүү продукцияларды жана кол өнөрчүлүк буюмдарын көрсөтүшүп, музыкалык жана бий оюндары тартууланды.

Министрлер Кабинетинин Төрагасынын орун басары өз сөзүндө түрдүү маданияттардын түйүнү болуп калган тарыхый мурасыбызды сактоонун маанилүүлүгүн белгиледи.

«Ак-Бешим конушундагы казуу иштеринин жүрүшүндө буддисттердин храмдары жана христиан чиркөөлөрү табылып, ЮНЕСКО Ак-Бешимге расмий түрдө дүйнөлүк мурастар статусун ыйгарды», – деди ал.

Эдил Байсалов Кыргыз Республикасынын Улуттук илимдер академиясынын кызматкерлери Япониянын Тейкё жана Рюкоку университеттеринин өкүлдөрү  менен биргеликте байыркы Ак-Бешим конушунда жүргүзүп жаткан казуу иштери менен таанышты.

Археологдор бул тарыхый жайда изилдөө, консервациялоо жана музей уюштуруу  иштерин жүргүзүү зарылдыгын белгилешип, мындан ары Ак-Бешим жерин туристтик жай катары өнүктүрүүнү караштырууну сунушташты.

Өз кезегинде Министрлер Кабинетинин Төрагасынын орун басары Эдил Байсалов республикадагы тарыхый эстеликтердин туристтик потенциалы зор экендигин белгилеп, буга мисал катары Баткен районундагы Кан-и-Гут үңкүрүн атап өттү.

Эдил Байсалов: Профсоюздар федерациясы эң негизги укук коргоочу уюм болушу керек

Министрлер Кабинетинин Төрагасынын орун басары Эдил Байсалов Кыргыз Республикасынын Профсоюздар федерациясынын жаңы жетекчилигин – уюмдун Төрагасы Эмил Кызаевди жана анын орун басарлары Рыскүл Бабаева менен Омор Арстанбековду кабыл алды.

Жолугушууда Эдил Байсалов профсоюздун жаңы шайланган жетекчилерин куттуктап, өлкөнүн учурдагы өнүгүү этабында профсоюздардын ролу маанилүү экендигин белгиледи.

Министрлер Кабинетинин Төрагасынын орун басары профсоюздар системасы башталган реформаларда өзүнүн тийиштүү ролун ойноп, элдин татыктуу жашоосун камсыз кылууда Министрлер Кабинетинин ишенимдүү өнөктөшү болуп калат деген ишенимин билдирди.

«Профсоюздар федерациясы жаңы форматта иштеп баштоосу тийиш, сиздер күчтүү жана көз карандысыз эң негизги укук коргоочу уюм болушуңуздар керек. Биз сиздерден олуттуу жана позитивдүү өзгөрүүлөрдү күтөбүз», – деп белгиледи Эдил Байсалов.

Өз кезегинде Эмил Кызаев көп жылдар бою Профсоюздар федерациясына тийиштүү көңүл бурулбай келгендигин билдирди.

«Биз чоң жоопкерчиликти алдык жана уюмдун ишинин принциптерин жана ыкмаларын толук өзгөртүүгө даярбыз. Профсоюздар федерациясынын ишин таптакыр башка жогорку деңгээлге көтөрүү үчүн бардык күч-аракетибизди жумшайбыз”, – деп жыйынтыктады Эмил Кызаев.

Министрлер Кабинетинин Төрагасынын орун басары Эдил Байсалов Россиянын эл аралык уюмдарга катышуусун токтотуу аракетине каршы чыкты

Министрлер Кабинетинин Төрагасынын орун басары Эдил Байсалов Женева шаарына жумушчу сапарынын алкагында (Швейцария Конфедерациясы) Бириккен Улуттар Уюмунун Европа экономикалык комиссиясынын (БУУ ЕЭК) Регионалдык форумунун жабылышында жыйынтыктоочу сөз сүйлөдү.

Өз сөзүндө Эдил Байсалов Россия Федерациясынын эл аралык уюмдарга катышуусун токтотуу аракетине каршы чыкты.

Министрлер Кабинетинин Төрагасынын орун басары комиссияга мүчө 56 мамлекеттин делегациясын комиссиянын Чыгыш менен Батыштын ортосундагы кызматташтыктын көпүрөсү катары ишинин тарыхый мандатын сактап калууга чакырды.

«Төрага катары мен Сиздерди Европа экономикалык комиссиясынын өзгөчө ролун жана мандатын сактап калууга жана коргоого чакыргым келет. Бардык трагедиялуу жагдайларга, тараптардын позицияларынын кагылышына жана эмоциялардын күчөшүнө карабастан, биз БУУ ЕЭКти диалог аянтчасы жана кызматташтык көпүрөсү катары сактап калышыбыз керек. Акыркы 75 жыл ичиндеги чыңалуу мезгилдеринде биздин өлкөлөр уюмдун өзгөчө мандатын жогору баалап келген. Комиссиянын негизги мүчөлөрүнүн биринин катышуусун чектөө баарыбызды чектейт», – деди Эдиль Байсалов.

Белгилесек, БУУ Европа экономикалык комиссиясы (БУУ ЕЭК) 1947-жылы 28-мартта БУУнун Экономикалык жана Социалдык Кеңеши (ЭКОСОС) тарабынан аймактын ичиндеги экономикалык ишмердүүлүктү өнүктүрүү жана экономикалык байланыштарды чыңдоо максатында түзүлгөн. БУУ ЕЭК Бириккен Улуттар Уюмунун беш аймактык экономикалык комиссиясынын бири болуп саналат жана штаб-квартирасы Женевада жайгашкан.

Жумушчу тилдер катары француз, англис жана орус тилдери саналат. Уюмга 56 мамлекет: Европа өлкөлөрү, АКШ, Канада, Түркия Республикасы, Израиль мамлекети, Борбор Азия өлкөлөрү кирет. Кыргыз Республикасы 1993-жылдын 30-июлунда Комиссиянын толук кандуу мүчөсү болгон.

Женевада Эдил Байсаловдун төрагалыгы астында Бириккен Улуттар Уюмунун Европа экономикалык форуму өтүүдө

Эдил Байсаловдун төрагалыгы астында Бириккен Улуттар Уюмунун Европа экономикалык комиссиясынын Регионалдык форуму өтүүдө.

Форумду ачып жатып, Министрлер Кабинетинин Төрагасынын орун басары COVID-19 пандемиясы бүткүл дүйнөгө олуттуу таасирин гана тийгизбестен, туруктуу өнүгүүнү жана 2030-жылга чейин Туруктуу өнүктүрүүнүн Күн тартибин ишке ашырууну камсыздоо аракеттерине да өз таасирин тийгизгендигин белгиледи.

Эдил Байсалов ошондой эле Кыргыз Республикасы тарабынан туруктуу өнүктүрүүнүн багыттарын ишке ашыру боюнча жүргүзүлүп жаткан иштер тууралуу маалымат берди, атап айтканда,  туруктуу өнүктүрүү жаатындагы максаттар 2026-жылга чейин Кыргыз Республикасын өнүктүрүүнүн улуттук программасына интеграцияланган.

«Биздин 6,5-миллион калкыбыздын жарымынан ашууну 25 жашка чейинки жаштар, өлкө Президенти Садыр Жапаров тарабынан балдар жана жаштар үчүн билим берүү жана саламаттык сактоо деңгээлин жогорулатуу боюнча жалпы улуттук максат жарыяланган. Бул максатты ишке ашыруу мектеп мугалимдеринин эмгек акысын кеминде 80%га жана үч эседен ашык жогорулатуу менен башталды. Биз так илимдер, математика, маалымат технологиялары жана чет тилдер боюнча жогорку квалификациялуу мугалимдердин жаңы муунун ишке тартуу жана даярдоо боюнча активдүү кампанияны баштоодобуз. Үчүнчү күн катары менен COVID-19 инфекциясынын жаңы учурлары катталган жок. Биз эмдөө өнөктүгүн ийгиликтүү өткөрдүк жана өнүгүп келе жаткан жаш өлкө катары COVID-19 пандемиясынан келип чыккан кесепеттерди калыбына келтирип баштоого умтулуудабыз», – деди Эдил Байсалов жана Министрлер Кабинети тарабынан калктын аяр катмары үчүн тышкы таасирлерди жумшартуу боюнча тийиштүү чаралар кабыл алынып жаткандыгын белгиледи.

Белгилесек, БУУнун Европа экономикалык комиссиясы (БУУ ЕЭК) 1947-жылы 28-мартта БУУнун Экономикалык жана Социалдык Кеңеши (ЭКОСОС) тарабынан аймактын ичиндеги экономикалык ишмердүүлүктү өнүктүрүү жана экономикалык байланыштарды чыңдоо максатында түзүлгөн. БУУ ЕЭК Бириккен Улуттар Уюмунун беш аймактык экономикалык комиссиясынын бири болуп саналат жана штаб-квартирасы Женевада жайгашкан.

Жумушчу тилдер катары француз, англис жана орус тилдери саналат. Уюмга 56 мамлекет: Европа өлкөлөрү, АКШ, Канада, Түркия Республикасы, Израиль мамлекети, Борбор Азия өлкөлөрү кирет. Кыргыз Республикасы 1993-жылдын 30-июлунда Комиссиянын толук кандуу мүчөсү болгон.

Меню