Бүгүн, 21-январда манасчы, жазуучу жана акын Сапарбек Касмамбетов А.Малдыбаева атындагы Опера жана балет театрынын алдында акыркы сапарга узатылды. Маркум менен коштошууга президенттик аппараттын жетекчиси Досалы Эсеналиев, спикер Дастан Жумабеков, вице-премьер-министр Кубатбек Боронов, ЖК депутаттары жана белгилүү коомдук ишмерлер, манасчылар, акын, жазуучу, төкмө акындар, артисттер келишип, залкар манасчыны эскеришти.
Коомдук ишмер, аксакал Топчубек Тургуналиев маркумдун кылган эмгектерин, акындыгын, мыкты манасчы болгонун жана адамдык сапатын баса белгилеп, жакында эле көргөнүн айтып, акыры шум ажал арабыздан жулуп кеткенине кейип, маркумдун жубайына, уул-кыздарына көнүл айтты. Акырында манасчылардын, шакирттеринин атынан Талантаалы Бакчиев сүйлөп, кыргыз үчүн көп эмгек кылганын айтып, манасчыларга үлгүлүү, мыкты шакирт болгонун баса белгилеп, устатына таазим кылды.
Манасчынын улуу кызы Гүлнара Касмамбетова: “кыргыз элибиз атамды жакын адамындай акыркы сапарга узатканы бизге күч-кубат берди, атамдын жаткан жери жайлуу болсун, биз атама ыраазыбыз“,- деп үч жолу айтып, көзүнө жаш алды.
Маркумдун сөөгү “Ала-Арча” көрүстөнүнө жерге берилди. 87 жаштагы манасчы 19-январда көз жумган. Сапарбек Касмамбетов көптөгөн чыгармалардын автору. “Эр Кошой” эпикалык чыгармасын айтып, аны өзүнчө китеп кылып чыгарган. Андан сырткары акындын “Асыл эне”, “Билерик”, “Балыкчы баяны”, “Бала Манас” чыгармалары китеп болуп басылып чыккан. “Манас” эпосунун окуялары англис тилинде баяндалган китеп “Singing The Kyrgyz Manas: Saparbek Kasmambetov’s Recitations Of Epic Poetry” деген аталышта Лондон университетинин Азия жана Африканы изилдөө институту тарабынан даярдалып жарык көргөн. Анын редакторлору Кейт Ховард, Сапарбек Касмамбетов. Китепте “Манас” эпосунун негизги окуялары кара сөз түрүндө берилип, Сапарбек Касмамбетовдун айтуусунда, CD диск түрүндө жазылып кошо тиркелген. Китеп 134 беттен турат. Китеп кыргыздардын жана жалпы эле көчмөн элдердин оозеки көркөм чыгармачылыгына кызыккан окурмандардын кеңири чөйрөсүнө арналган. Маркумдун бир уулу, 5 кызы бар. Улуу баласы Сүйүнбек Касмамбетов Жогорку Кеңеште аппарат жетекчиси болуп иштеген. Кыздарынын улуусу Гүлнара Касмамбетова менен кичи кыздарынын бири Акчолпон Койчиева бүткүл дүйнөлүк “Би-Би-Си” радиосунун Кыргыз кызматынын продюсерлери. Айнара, Динара, Чынара аттуу кыздары дагы жогорку билимдүү.
Булак: KyrgyzToday.kg
КОММЕНТАРИЙ КАЛТЫРУУ