Россиянын Оренбург облусунда 80 кыргызстандык талаада күн кечирип жатышат. Бул тууралуу видеотасма кечээ, 7-майда социалдык тармактарда тарады.
Видеонун авторунун айтымы боюнча, ал адамдар автобус менен Оренбургга орус-казак чек арасына келишкен. Алар Кыргызстандын жарандарын ошол жерден алып кетип жатат деген маалымат угушкан. Бирок жерине жеткенде, чек ара жабык экенин көрүшүп, кайра артка кайта албай же чек арадан өтө албай, орто жолдо, талаада тамак-ашсыз калышкан. Алар кыргыз бийлигинен аларга көңүл бурууну жана мекенине кайтарууну суранышат.
“Кыскасы ары эмес же бери эмес болуп, орто жолдо калдык. Ээн талаа. Жегенге эч нерсе жок, баарынын курсактары ач, жада калса суу дагы жок” – дейт видеонун автору.
Кыргызстандын Москвадагы элчилиги журналисттерге маалымдагандай, алардын көпчүлүгү жатаканада (хостелде) жашаган Москвадагы мигранттар.
“Алардын айрымдары Москва шаарындагы жатаканаларда жашашкан, анткени алар турак жайы жок жана жумушсуз калышкан. Буга чейин элчилик аларга өкмөт бөлгөн каражаттын эсебинен турак-жайдын акысын төлөп берген. Бирок акыркы күндөрү чек аралар ачылды деген ар кандай ушактар тарады. Буга ишенип, жарандар жатаканадан чыгып кетишти. Биз аларга бардыгын түшүндүрүп бердик, чек ара жабылды, көчөдө калуу коркунучу бар экендигин эскерттик, бирок ага карабастан алар ал жакка жөнөп кетишкен, эми мындай абалга туш болуп отурушат. Бирок элчилик аларды кыйынчылыкка калтырбайт. Азыр маселени чечүүгө аракет кылып жатабыз” – деп айтылат маалыматта.
Эгер бул тексттен ката таап калсаңыз, ошол ката сөздү белгилеп, Ctrl+Enter кнопкаларын чоогу басуу менен билдирип коюңуз.
КОММЕНТАРИЙ КАЛТЫРУУ