Menu

ВИДЕО

АКШ элчилиги адаттагыдай эле кыргыз элин Эгемендик күнү менен кыргыз тилинде куттуктады, а Россия элчилигичи?

Бүгүн, 31-августта АКШ элчилиги кыргыз элин Кыргыз Республикасынын Эгемендик күнү менен адаттагыдай эле кыргыз тилинде куттуктады.

“Достор, АКШ элчилигинин атынан сиздерди Кыргыз Республикасынын Эгемендүүлүк күнү менен куттуктайбыз! Бул өзгөчө күндүн урматына биз English Access студенттери менен Улуттук тарыхый музейге бардык. Биз турдан ырахат алып, Кыргыз Республикасын эгемендүүлүккө алып келген эр жүрөк инсандар жөнүндө билдик. Кыргыз Республикасы мындан ары да өсүп-өнүгө берсин!” деп айтылат куттуктоодо.

Ошол эле учурда орус өнөктөштөрүбүз (Орус элчилиги) кыргыз элин бир да жолу кыргыз тилинде куттуктап койбойт. Бул өнөктөштөрдүн тилине болгон кандай мамиле?

АКШнын Элчилиги Кыргыз Республикасынын Эгемендүүлүк күнүнө карата дубалдарын жарыктандырды - Видео

26-август – Бишкек. Баардык кыргызстандыктарды эгемендүүлүктүн 31 жылдыгы менен куттуктап, Америка Кошмо Штаттарынын Кыргыз Республикасындагы Элчилиги өзүнүн дипломатиялык өкүлчүлүгүндө өзгөчө жасалга тартуулады. 25-августтун кечинен 2-сентябрга чейин коомчулук элчиликтин, эл арасында Түштүк Магистраль атта белгилүү Абсамат Масалиев көчөсүнө караган дубалынан Кыргыз Республикасынын мамлекеттик желегин жана куттуктоо сөздөрүнүн жаркырап турганын көрүүгө мүкүнчүлүк алмакчы.  

АКШ элчилигинин кыргызстандык жана америкалык кызматкерлери жана алардын үй-бүлөлөрү АКШ Элчилигинин дубалына жарык чачуу боюнча расмий эмес иш-чарага АКШнын Убактылуу ишенимдүү өкүлү Соната Коултерге шерик болушту. Алар кыргыз жана америка элдеринин ортосундагы жалпы баалуулуктарды, анын ичинде эркиндикке, адилеттикке жана теңчиликке болгон сүйүүнү даңазалашты.

«Биз Кыргыз Республикасынын Эгемендүүлүк күнүнүн урматына элчилигибиздин дубалын жарыктандырууга кубанычтабыз. Бул биздин элдерибиздин ортосундагы достуктун жана Америка Кошмо Штаттарынын Кыргыз Республикасынын эгемендүүлүгүнө жана көз карандысыздыгына көрсөткөн колдоосунун көрүнүктүү символу», – деди Соната Коултер.

Америка Кошмо Штаттары 1991-жылы Кыргыз Республикасынын эгемендүүлүгүн дүйнөдө биринчилерден болуп тааныган, жана туруктуу дипломатиялык өкүлчүлүгүн Бишкекте ачкан эң биринчи мамлекет болгонуна сыймыктанат.

Балмуздак чыгарган "Үмүт и Ко" ЖЧКсынын ээси Журат Абдуллаев кармалды, тинтүүдө андан бронетранспортер, пулемет, автомат, граната, снайпердик мылтык жана ири суммадагы акча табылды

Көп сандаган ок атуучу жана жардыруучу кууралдарды мыйзамсыз сактаганы үчүн балмуздак чыгарган “Үмүт и Ко” ЖЧКсынын ээси, 1970-жылы туулган А.Ж.Т. кармалды. Бул тууралу УКМКнын басма сөз кызматы бүгүн, 19-августта билдирди.
Анын үйүн жана кабинетин тинтүү учурунда эбегейсиз көп куралдар жана октор, зоотолгон машина жана $540.000 накталай акча табылды.

Юстиция министрлигинин маалыматы боюнча “Үмүт и Ко” ЖЧКсынын ээлери болуп бир туугандар Журат жана Кайрат Абдуллаевдер катталган.

Журат Абдуллаев УКМКнын абагына киргизилип, кылмыш иши козголду.
Тинтүү учурунда табылган куралдар:
– «БРДМ-2» (Бронотранспортер) атайын техникасы — 1 комплект;
– Калашникова пулемету (танка үчун) — 1 даана, бронетранспортерге орнотулган.
–  АКСУ автоматы, номери №93882625;
–  «Сайга» мылтыгы, номери №20890019  жана 7 бош магазини менен;
– «Вепрь» автоматы, номери №НИ9595 жана  12 бош магазини менен;
– «Сайга 12К» мылтыгы, номери А09486574 жана бош магазини менен;
– «Hatsan» пневматикалык мылтыгы, 4,5 калибрде;
– 12 калибрдеги мылтык;
– «Вепрь» мылтыгы №1276 ТО6458, 2 бош магазини менен;
– «Тигр» винтовкасы, номери ЛО7501281 оптикалык кароолу менен 6х42 №00602314;
– «Fabarm» мылтыгы, номери 9914596;
– Ф-1 гранатасы;
–  «Форд» травматикалык тапанча, сериясы 17Р, номери В1045780 үч бош магазини менен;
– «Sony» планшети, «HP» ноутбугу;
– 7,62 калибрдеги патрондор — 196 даана;
– 5,45 калибрдеги патрондор — 423 даана.;
– 45 калибрдеги патрондор — 59 даана.;
–  5,45 калибрдеги патрондор — 21 даана;
– 12 калибрдеги патрондор — 120 даана;
– 9мм  калибрдеги патрондор – 150 даана;
– чачма ок — 3 пачка;
– бронежилет — 1 даана;
– каска — 1 даана;
– кастет — 1 даана;
– «GloFeng» рациясы — 1 даана жана башкалар.

 

Курманкул Зулушев, Генпрокурор: "Кыргыз мамлекетинин келечеги десек бөлүнгөндү, трайбализмди, жердешчиликти токтотолу"

Башкы прокурор Курманкул Зулушев, Министрлер Кабинетинин Төрагасынын орун басары Бакыт Төрөбаев Чүй районунун жана Токмок шаарынын тургундары менен жолугушту.

Жыйында, жарандар укук коргоо органдарынын ишмердүүлүгүнө байланышкан жеке көйгөйлөрүн, коомчулукта орун алган айрым мыйзам бузуучулуктар тууралуу айтышып, тийиштүү чара көрүп берүүнү сурашты.

Башкы прокурор ар бир кайрылуу жоопсуз калбастыгын белгилеп, мыйзам чегинде чукул арада чаралар көрүлөөрүн убадалады.

“Кыргыз мамлекетинин келечеги десеңер бөлүнгөндү, трайбализмди, жердешчиликти токтотолу”, – деп чакырды КР Генпрокурору Курманкул Зулушев.

Жолугушууга Чүй районун жана Токмок шаарынын 500гө жакын тургуну катышты.

 

Кыргызстандын эң алыскы Зардалы айылы интернетке туташты

Баткен облусунун тоо боорундагы алыскы Зардалы айылына интернет орнотулду. Аны Кыргыз Интернет Коому ишке ашырып, уюмдун инженери Ибрахим Халил Билгич бир нече күн-түндүк эмгектенүүдөн кийин «Зардалыда интернет абдан жакшы ылдамдыкта иштеп жатат, жергиликтүүлөрдүн кубанычында чек жок» деп билдирди.

Зардалы Кыргызстандын эң алыскы Баткен облусунун бийик тоолуу айылы. Айылдын кышы абдан катаал, электр жарыгы жок экенинен сырткары, эч кандай логистикалык жолдорго байланышпаган, башка айылдар менен туташтырган жалгыз кууш жана таштак жолду жыл сайын бир нече ирет сел алат. Мындайда Зардалынын тургундары байланышсыз калып, өзгөчө кырдаал учурунда медициналык жардамга жете албай, кээде аялдар төрөтканага жетпей жолдон көз жарган окуялар катталып турат.

UNICEFтин GIGA Accelerate долбоорунун алкагында Кыргыз Интернет коому Зардалыда алгач күн панелин орнотуп, ал айылдын чакан мектебин электр жарыгы менен да камсыз кылып жатат. Бул окуучулардын райондук же шаардык мектептер, мекемелер менен байланышта болуп, сапаттуу, заманбап билим алуусуна өбөлгө түзөт. Андан сырткары, бүт айылды, керек болсо кошуна айылдарга чейин электр жарыгы менен камсыз кыла алат. Ошондой эле түрдүү кырдаалда райондук борбор менен түз байланышта боло алышат.

Бул аркылуу Кыргыз Интернет Коому UNICEFтин GIGA Accelerate долбоорунун алкагында Жашыл экономиканы колдонуп, мектептерге электр жарыгын, интернетти туташтырып, туруктуу өнүгүүнүн жаңы моделине аракет жасоодо.

Project Connect берген маалыматка ылайык, Кыргызстандагы 2080 мектептин 2061и интернетке кошулган жана мектептердин бир пайызы гана интернетсиз отурат. Ушул бир пайызга кирген мектептердин көбү Зардалы сыяктуу жетүүгө оңой болбогон аймактарда, Кызыл-Ой жана Эңилчек сыяктуу алыскы жана тоолуу айылдарда жайгашкан.

Биз жергиликтүү акимиатка, чек ара кызматына, UNICEF уюмуна жана Интернет коомунун (ISOC) Башкы кеңсесине ыраазычылык билдиребиз.

Талибдер Кабулда аялдардын "Нан, жумуш, эркиндик" деген ураан менен чыккан тынч акциясын күч менен таратты

“Талибан” кыймылынын жоочулары “Нан, жумуш, эркиндик” деген ураан менен Кабулдун көчөлөрүнө демонстрацияга чыккан аялдарды күч менен таратты.

13-августта 40ка жакын аял укуктары жана эркиндиктери чектелип жатканына каршы наарызылык акциясын өткөрүү үчүн Билим берүү министрлигинин алдына чогулушкан.

Соцтармактарга жарыялаган видеолордон “Талибандын” жоочулары асманга ок атып жатканын көрүүгө болот. Чогулгандар кача баштаганда алар аялдарды кууп жетип, автоматтардын кундагы менен урушкан.

Ооганстандагы көз карандысыз журналисттердин бирлиги акцияны чагылдырып жүргөн үч чет өлкөлүк жана бир жергиликтүү журналист кармалганын, дагы эки жергиликтүү журналист жараат алганын билдирди.

Amnesty International эл аралык уюму талибдер тынч акцияны таркатуу үчүн “ашыкча күч колдонгону” тууралуу маалыматтарга байланыштуу тынчсыздануусун билдирди. Уюм “Твиттердеги” баракчасына “аялдар болгону тынч акция өткөрүп, өз укуктарынын сакталышын талап кылганын” жазды.

Былтыр 15-августта Ооганстандагы бийликти басып алгандан кийин “Талибан” аялдар менен кыздардын иштөөгө жана окууга болгон укуктарын чектеген. Ошол эле маалда талибдер түзгөн өкмөттүн мыйзамдарына ылайык, аялдар көчөдө жүзүн толук жаап жүрүп, үйдөн күйөөсүнүн же жакын эркек тууганынын коштоосусуз чыкпашы керек.

Азырынча талибдердин бийлигин дүйнөдөгү бир да өлкө тааный элек. Эл аралык коомчулук бул үчүн “Талибан” өлкөдө инклюзивдүү өкмөт түзүп, аялдар менен кыздарды негизги укуктар жана эркиндиктер менен камсыз кылышы керек экенин билдирип келет.

Кыргызстан биринчи жолу өз эсебинен Airbus H-125 тик учагын сатып алды

Кыргыз Республикасынын Президенти Садыр Жапаров бүгүн, 13-августта, өлкөнүн Өзгөчө кырдаалдар министрлигине (ӨКМ) жаңы атайын техникаларды тапшырды.

Өзгөчө кырдаалдар министрлигинин түзүмдөрүнө Airbus H-125 тик учагы, автобустар, чынжырлуу жана дөңгөлөктүү экскаваторлор, алдыңкы жана айрылуу жүктөгүчтөр, жол тандабастар, 150 мобилдик үйлөр жана башка техникалар тапшырылды.

Мамлекет башчысы өз сөзүндө бүгүнкү күндө мезгилдер өтүп, замандын өзгөрүшү менен жаратылыш, табият да бир топ өзгөрүүлөргө учурап жатканына дүйнө жүзү күбө болуп жатканын белгиледи. Жер жүзүндө жаратылыш кубулуштарынын, табият кырсыктарынын же өзгөчө кырдаалдардын саны өстү, алкагы кеңейди.

«Глобалдык шарттар, климаттын кескин өзгөрүшү күтүүсүз табигый жана техногендик кырсыктарга алып келүүдө. Мунун баары бизден жаратылыш кырсыктарын, мүмкүн болгон башка тобокелдиктерди алдын алууга, кесепеттерин жоюуга колдо болгон күч-аракетерди арттырууну, көбөйтүүнү, жаңылоону талап кылат.

Өрт коркунучу, сел, жер көчүү, жол кырсыктарынан, химиялык, инженердик, медициналык жана башка кооптуу жагдайлардан улам кырдаал андан бетер татаалдашып, адам өмүрүн алып кеткен өтө кейиштүү учурлар да болбой койбойт», – деди Садыр Жапаров.

Президент адам өмүрүнөн өткөн байлык жок экенин баса белгиледи.  Эң негизгиси адамдардын коопсуздугун камсыз кылуу, аларды башка мүнөздөгү өзгөчө кырдаалдардан сактоо милдетин аткаруу , ошол эле учурда кандай гана кырсык болбосун, шашылыш жардамга муктаждык жана тез чара көрүү – ар бир мүнөт маанилүү экенин билдирди.

«Кырсыктардын алдын алуу жана алардын кесепеттерин жоюу – кечиктирилгис зарылчылык. Мындай шартта бизде адамдардын коопсуздугун камсыз кылуу үчүн заманбап, кубаттуу техника жана каражаттар болушу керек.

Зарыл болсо, заманбап технологиялар жардам жана тез жооп жардам берүү үчүн колдонулат. Демек, мунун баары тез арада тиешелүү чечимдерди кабыл алууга мүмкүндүк берет. Албетте, Өзгөчө кырдаалдар министрлиги түзүлгөндөн бери көрүлгөн профилактикалык иш-чаралар миңдеген адамдардын өмүрүн сактап, көптөгөн табигый кырсыктардын кесепеттерин жоюуга шарт түздү.

Куткаруучулар өз милдеттерин татыктуу аткарып, эл аралык гуманитардык операцияларда чоң тажрыйбага ээ болушту. Бирок учурдун талабына ылайык Өзгөчө кырдаалдар министрлигинин техникалык потенциалын чыңдап, атайын инженердик жабдуулардын, коммуникациялардын жаңы үлгүлөрү менен камсыз кылуу эбак эле артта калды. Куткаруучуларыбызды заманбап кубаттуу техникалар менен камсыз кылуу мамлекеттин кубаттуулугун көрсөтөт,  элдин бийликке болгон ишенимин арттырат, ар кандай кырсыктарда куткаруу кызматын күтүп жаткан жарандардын ажатын ачып, өмүрлөрүн сактап калууда. Биз бул жагдайды жакшы билебиз жана анын үстүндө иштеп жатабыз», – деп белгиледи Малекет башчысы.

Ал бир жыл мурун куткаруучулар заманбап өрт өчүрүүчү машиналар жана атайын инженердик оор техникалар менен камсыз болгондугун эске салды.

«Бүгүн болсо эгемендүүлүккө ээ болгондон бери алынбаган  тик учак жана 34 даана атайын техникалар биринчи жолу  республикалык бюджеттин эсебинен 384 миллион 140 миң сомго сатылып алынды.

Ошондой эле, ушул жыл ичинде республикалык бюджеттин эсебинен 752 миллион 212 миң сомго дагы 1 тик учак сатып алуу планыбызда бар.

Мындан сырткары Өзгөчө кырдаалдар министрлигине Азия өнүктүрүү банкынын колдоосу менен 1 миллион 23 миң 480 долларга 10 даана жол тандабас пикап автоунаалары, 1 даана кичи автобус, 11 даана инженердик оор техникалар алынды.

Мунун баары – мамлекеттин жүзү, күчү, кубаты!

Тиешелүү техникалар менен камсыздоо иш-аракеттери муну менен эле токтоп калбайт, бул багыттагы иштерди мындан ары да улантабыз!», – деп баса белгиледи Садыр Жапаров.

Мамлекет башчысы ошону менен бирге табигый кырсык же кооптуу кырдаал учурунда кандай аракеттерди көрүү керектиги боюнча кеңири маалымат берүү, жарандардын өзүн коргоо жөндөмдүүлүгү үчүн абдан пайдалуу экенин белгилеп, буга байланыштуу коомдун бардык катмарлары үчүн жеткиликтүү болгон өзгөчө кырдаалда кандайча аракеттенүү керектигин окутуу сабактарын сунуштады.

Президент Садыр Жапаров өлкөдө эч качан кырсык-апааттар болбосун, инженердик жана атайын техникалар жарандардын жыргалчылыгы үчүн пайдаланылышын каалады.

Мамлекет башчысы Өзгөчө кырдаалдар министрлигинин аэродромунун кампасын жана административдик имаратын, жабдуулар жана курама мобилдик үйлөр менен таанышты. Ошондой эле Президент Садыр Жапаровго жана  иш-чаранын катышуучуларына Airbus H-125 көп максаттуу тик учагынын учуу мүмкүнчүлүктөрү да көрсөтүлдү.

Журналисттер кыргызстандыктарды Украинадагы согушка тарткан компанияларды таап чыкты

Журналист Али Токтакунов жетектеген “МедиаХаб” коомдук фондунун кабарчылары Борбор Азиядагы өлкөлөрдүн, анын ичинде Кыргызстандын жарандарын Украинадагы согушка тартып жаткан орусиялык компанияларды аныктап чыкты. Бул тууралуу иликтөө Али Токтакуновдун Youtube каналында жарыяланды.

Программада айтылгандай, Инстаграмдагы кыргыз сегментинде жеке күзөт ишканасына жумушчулар керек деген таризде жарыялар пайда болгон. Анда иш издегендерге жакшы айлык акы убадаланып, алар Орусиянын аймактарында иштей турганы белгиленген. Кабарчылар жумуш издеген киши катары байланышкан учурда алар бул орундарга кабыл алуу токтоп калганын айтып, аскердик кызматтарды сунушташкан.

Кат аркылуу баарлашууда уюм Орусиянын Коргоо министрлигинин кызыкчылыгы үчүн иштей турганын билдиришкен. Жарыянын ээлери кайрылгандарды Краснодар аймагынын Молькино айылына барууга чакырат. Андан ары иш издегендер Украинага аскерий операцияларга катышуу үчүн жөнөтүлөт. Аскерий даярдык талап кылынбай турганы, жада калса соттолгон адамдарды да ала беришери көрсөтүлөт.

Маалым болгондой, Молькинонун жанында Орусиянын аскерий базасы жана аскерлерди согушка жалдап иштеген орусиялык “Вагнер” жеке компаниясынын имараты жайгашкан. Ал өз кезегинде «пионерлердин лагери» деп аталчу. Бул тууралуу эл аралык жалпыга маалымдоо каражаттары буга чейин жазып чыгышкан.

Украин жергесине кол салгандан кийин көпчүлүк эксперттер орус президенти Владимир Путин койгон милдеттерди армия кошумча мобилизациясыз аткара албай турганын белгилешкен. “Вагнер” же, “ЧВК Вагнер” сыяктуу жеке менчик аскердик компаниялар “жашыруун мобилизациянын” варианттарына айланып калган. Ыктыярчылар дагы, жалданмачылар дагы аскерлер сыяктуу Орусиянын Коргоо министрлиги менен иштеп жатышат.

 

ИИМ: Жөнөкөй жаранга күч көлдонуп машинасын тартып алган “положенец” макамына ээ УКТнын мүчөсү кармалды

Жакында  Жалал-Абад облусунун тургуну милицияга арыз менен кайрылып, 2018-жылдын күзүндө адегенде коркутуу жолу менен акча талап кылып, акча ала албай калганда күч колдонуп, «ВАЗ-2106» үлгүсүндөгү унаасын тартып алган чала тааныш жаран “Н” карата тиешелүү чараларды көрүп берүүнү суранган.
Бул факты боюнча Кыргыз Респубюликасынын Кылмыш-жаза кодексинин 206-беренеси (тоноо) менен кылмыш иши козголгон.
Жалал-Абад облусунун Алабука районунда жүргүзүлгөн ыкчам-иликтөө иш-чараларынын жүрүшүндө ИИМдин Кылмыш иликтөө башкы башкармалыгынын түштүк региону боюнча уюшкан кылмыштуулукка каршы күрөшүү бөлүмүнүн ыкчам кызматкерлери Ош облусунун ИИБнын атайын операциялар отрядынын кызматкерлери менен биргеликте  бул кылмышка шектүү катары  мурда бир нече жолу соттолгон, уюшкан кылмыштуу топтун мүчөсү катары ИИМдин ыкчам каттоосунда турган  жана “положенец” макамына ээ Алабука районунда 1990-жылы туулган А.Н. кармашкан.
Учурда кармалган жаран Жалал-Абад шаарындагы убактылуу кармоочу жайга киргизилди. Учурда тергөө иштери жүрүп жатат.

Акылбек Жапаров: Кытайдын кредитин төлөй албасак Бишкек ТЭЦи, Датка-Кемин электр түйүнү жана Түндүк-Түштүк альтернативалуу жолу Кытай банкынын колуна өтөт

2021-2032-жылдарга учурдагы тышкы карызды тейлөө жана төлөө боюнча бардык төлөмдөрдүн 83% туура келет.

Анын 50%ын Кытай Эл Республикасынын Эксим банкынан алынган насыяларды тейлөө жана төлөө түзөт. Бул тууралуу Кыргыз Республикасынын Министрлер Кабинетинин Төрагасы Акылбек Жапаров Кыргыз Республикасынын Жогорку Кеңешинин жыйынында билдирди.

Ал абдан маанилүү жана жоопкерчиликтүү мезгилге кирип жатканыбызды, 2023-жылга тышкы карыздын көпчүлүк бөлүгүн төлөөгө туура келерин кошумчалады.

«Мен эч кимди коркутпайм, бирок карызды төлөй албасак, Кытайдын Экспорт-импорттук банкы башкаруучу компанияны киргизип, Бишкек ТЭЦин башкаруу, Даткан-Кемин электр түйүнүн башкаруу жана Түндүк-Түштүк альтернативалу жолу сыяктуу стратегиялык объектилерибиз Кытай банкынын колуна өтөт. Биз ушундай моюнга илинген жиптен кутулушубуз керек. Кудай сактасын деп отура бербей, баарыбыз бир туунун астында биригип, бир багытта иштешибиз керек! Көз карандысыздыгыбызды сактап калалы! Мен экономикалык көз-караштан алып караганда туруштук бере алабыз деп ишенем”, — деди Акылбек Жапаров жана кытай компаниялары башка мамлекеттердеги объектилерди башкарууну көзөмөлгө алган мисалдар бар экендигин кошумчалады.

Эсиңиздерге сала кетсек, 2011-2017-жылдарда, президент Алмаз Атамбаевдин учурунда Бишкек ТЭЦин модернизациялоого, Датка-Кемин электр түйүнүн жана Түндүк-Түштүк альтернативалуу жолун курууга Кытайдан 1 млрд доллардан ашык кредит жогорку үстөк менен алынып, эгер төлөй албасак, аталган объектилер Кытай банкынын колуна өткөрүлүп берилет деп келишимге кол коюлган.

 

Меню