Menu

СПОРТ

Токио-2020: Жөө күлүк Дарья Маслова марафондук жарышта байгеге илинбей калды. Жабылыш аземде тууну балбан Эрназар Акматалиев көтөрүп чыгат

7-августта Токио жайкы олимпиада оюндарынын кыз-келиндер арасындагы марафондук 42 киломерт 195 метр жарыштары Саппоро шаарында өттү. Марафонго  Токио убактысы боюнча саат 7.00дө, бишкек убактысы боюнча таңкы саат 4.00дө  старт берилди.  Марафондук жарышта Кыргызстандын намысын коргогон өлкөгө эмгек сиңирген спорт чебери Дарья Маслова байгелүү орундарга жетпей калды.  Жабылыш аземде Кыргыз Республикасынын туусун эркин күрөш боюнча эл аралык спорт чебери Эрназар Акматалиев көтөрүп чыгат.

Бул тууралуу Токиодон Кыргызстандын олимпиадалык командасынын басма сөз катчысы, спорттук баяндамачы Кабыл Макешов билдирди. 7-августта жеңил атлетика боюнча Азия чемпиону, Азия оюндарынын чемпиону, белгилүү жөө күлүк Дарья Маслова Токио  олимпиада оюндарынын  марафондук жарышына катышты. 42 киломерт 195 метр аралыкка марафондук жарыш Саппоро шаарында өттү. Мелдеште дүйнө жүзүнөн тандалып, Токио олимпиадасына жолдомо алышкан 88 жөө күлүк мөрөй талашты. 21 километр 100 метр жарым марафонду Дарья Маслова 1 саат 15 мүнөт 27 секунда чуркап, топ башындагы жөө күлүктөрдөн калышпай жүгүрдү. Ал эми калган аралыкта ортоңку топто жүрдү. Ошентип  Азия жана Азия оюндарынын чемпиону Дарья Маслова 42 киломерт 195 метр аралыкты 2 саат  35 мүнөт 27 секундда чуркап өтүп, марага 36-болуп келди. Бул марафондук жарышта 27 жаштагы кениялык Перес Депчирчир марага биринчи келип, Токио олимпиадасынын чемпиону аталды. Ал бул аралыкты 2 саат 27 мүнөт 20 секундда чуркап өттү. Перес Депчирчир  жарым марафондук жарышта дүйнө чемпиону да болгон. Экинчи орунду дагы кениялынк Бриджит Косгей ээлеп, марага  2 саат 27 мүнөт 36 секундда келип, күмүш байгелүү болду. Коло байгенин ээси АКШнын өкүлү Молли Зайдель болуп, ал марага 2 саат 27 мүнөт 46 секундда келди. Марафонго катышкан 88 жөө күлүктүн 73ү гана марага жетти. Калган 15 спортчу ара жолдон калып калышты.

Кыргыз Республикасынын жеңил атлетика боюнча улуттук курама командасынын мүчөсү, Азия чемпиону Маслова Дарья Владимировна 1995-жылы 6-майда Каракол шаарында туулган.  Ал жеңил атлетика боюнча Кыргыз Республикасынын эмгек сиңирген спорт чебери. 2014-жылдын уландар арасында  Тайбэй шаарында өткөн Азия  Чемпионатында  3000 жана 5000 метр аралыктагы жарыштарда марага биринчи келип, 2 алтын тагынган.2015-жылдын чондор арасында  Кытайда өткөн Азия  Чемпионатында  3000 метрге жарышта 3- орун ээлеген. 2015-жылдагы  Түштүк Кореяда өткөн Универсиада оюндарында  5000 метрге чуркоодо коло байгелүү болгон.2016-жылы  Рио-Де-Жанейро шаарында өткөн Олимпиада оюндарында  10 км аралыктагы жарышта 19- орунга жеткен. 2017-жылдын чоңдор арасында  Индияда өткөн Азия  Чемпионатында 10 км аралыктагы жарышта  1-орунду ээлеп, Азия чемпиону аталган.  2018-жылы  Индонезиянын борбору Жакарта шаарындагы Азия оюндарында  5 жана 10 км аралыктардагы жарышта  1-орунду ээлеп, Азия оюндарынын чемпиону болуп, 2 алтын медаль тагынган.

Устаты Кыргызстанга эмгек сиңирген машыктыруучу, маркум Виктор Борисов болсо, олимпиадалык марафонго даярдаган учурдагы машыктыруучусу Татьяна Борисова болуп саналат.    4-август күнү Дарья Маслова устаты, Азия оюндарынын чемпиону Татьяна Борисова менен Токио шаарынан Саппоро шаарына учуп кетишкен.

Жабылыш аземде тууну балбан Эрназар Акматалиев көтөрүп чыгат

23-июлда расмий башталган Токио олимпиадалык оюндарына Кыргызстандан 16 спортчу катышууда. Алардын он үчү байге ала албады. Балбандар Айсулуу Тыныбекова менен Акжол Махмудов күмүш байгелүү болсо, Мээрим Жуманазарова коло медалдын ээси болду. Байгелердин жалпы көрсөткүчү боюнча 2 күмүш, 1 коло медалы менен Кыргызстан кечээ  67-орунда турса, учурда  68-орунга жылып калды. Биринчи саптагы Кытай өлкөсүнүн учурда 36 алтын, 26 күмүш, 17 коло медалы бар. Экинчи орунда 31 алтын, 36 күмүш, 32 коло байге уткан АКШ турат. Оюн ээси Жапония 24 алтын, 11 күмүш, 16 коло медаль утуп, үчүнчү орунда келатат. Төртүнчү орунда Улуу Британия турат. Эл аралык олимпиада комитетинин желеги астында катышып жаткан Орусиянын учурда 17 алтын, 23 күмүш жана 22 коло медалы бар. Алар бешинчи тепкичте турат. Борбор Азия өлкөлөрүнөн Өзбекстан алдыда. Алар учурда 2 алтын, 1 коло байгеси менен 35-орунда келатат.Мурдакы олимпиадалык оюндарда ийгилик жаратып келген Казакстандын учурдагы 7 коло байгеси менен 79 орунга илинүүдө. Бир күмүш байгелүү Түркмөнстан 74-орунда келүүдө. Мелдештер жыйынтыкталып жаткандыктан бул орундар дагы жылышып, сандар өзгөрүп кетиши ыктымал.   Олимпиада оюндарына катышкан 206 өлкөнүн 83 мамлекеттин спортчулары байгелүү орундарды ээлеп турушат.

8-августта  олимпиаданын жабылыш аземи болот. Жабылыш аземде Кыргыз Республикасынын туусун эркин күрөш боюнча эл аралык спорт чебери Эрназар Акматалиев көтөрүп чыгат.

Келечегинен үмүткөр кылган 22 жаштагы балбан Эрназар Акматалиев Нарын облусунун Нарын районундагы Орто-Нура айылында төрөлгөн. Жети жашынан бери күрөш менен машыгып келатат. 2015-жылы Индияда өткөн өспүрүмдөр арасындагы Азия чемпионатында коло байге тагынып, чоң спортко тагдырын арнаган.

2018-жылы эркин күрөш боюнча улуттук курама команданын катарына кабыл алынган. Кыргызстандын эркин күрөш боюнча эки жолку чемпиону. 2018-жылы Эрназар жаштар арасындагы Азия чемпионатынын күмүш байгесинин ээси болгон. 2019-жылы Иранда өткөн Тахти кубогунда алтын байге утуп, олжолуу келген.  2021-жылы  Украинада өткөн эл аралык турнирде дагы финалга чейин жетип, күмүш медаль тагынган.

Ал 6-августта Азиянын эки жолку чемпиону, Азия оюндарынын чемпиону, дүйнө чемпионаттарынын күмүш жана коло байге ээси, индиялык 27 жаштагы Баджранг Пуния  менен теңата күрөшүп, 3:3 эсебинде тең чыгышып, калыстар артыкчылыкты индиялык балбанга берип коюшту. Ал эми индиялык Баджранг Пуния  жарым финалда утулуп, Эрназар коло байгеге талапкер болбой калды.

Ошентип кыргызстандык спортчулар Токио олимпиадасын 7-августта жыйынтыктады.

Кабыл Макешов, спорттук баяндамачы, Токио олимпиадасындагы пресс-атташе

Токио-2020: Кыргыз балбаны Эрназар Акматалиев тең таймашта утулуп, эми коло байге үчүн талапкер болушу мүмкүн. Айаал Лазарев коло байгеге талапкер болбой калды

6-августта Токио шаарында өтүп жаткан ХХХII жайкы олимпиада оюндарынын эркин күрөш боюнча  65 килограмм салмактагы балбандар  күч сынашып, таймашуулар курч мүнөздө өттү. Кыргызстандын намысын  Эрназар Акматалиев коргоп, тең таймашууда эсеп 3:3 болуп, калыстар жеңишти индиялык балбанга ыйгарып койду. Эркин күрөш боюнча Азия чемпиону Айаал Лазарев 125 килограмм салмакта коло байге талапкерлер таймашуусуна чыгып, түркиялык Таха Акгюлга утулуп калды. Бүгүн, 6-августта кечинде грек-рим жана кыз-келиндер эркин күрөшү боюнча Токио олимпиадасына катышкан кыргызстандык балбандар жана устаттар мекенибиз Кыргызстанга сапар улаганы турушат. Бул тууралуу Токиодон Кыргызстандын олимпиадалык командасынын басма сөз катчысы, спорттук баяндамачы Кабыл Макешов билдирди.

Эркин күрөш боюнча Кыргызстандын чемпиону, эл аралык турнирлердин жеңүүчүсү Эрназар Акматалиев Токиодогу олимпиадалык  мелдешинде  алгач индиялык атактуу балбан Баджранг Пуния менен күрөштү. Эрназар жаш болсо дагы тажрыйбалуу 27 жаштагы Азиянын эки жолку чемпиону, Азия оюндарынын чемпиону, дүйнө чемпионаттарынын күмүш жана коло байге ээси, индиялык Баджранг Пуния  менен теңата күрөштү. Калыс Эрназарды жакшы аракет кылбай койду деген шылтоо менен индиялык балбанга бир упай берди. Анан чабуулга өткөн кыргыз балбаны атаандашын килемден чыгарып, эсеп теңелди.  Биринчи бөлүк 1:1 эсебинде  Эрназардын артыкчылыгы менен аяктап бараткан. 10 секунд калганда индиялык атаандашы Эрназарды килем үстүнөн түртүп чыгарып, 1 упайга ээ болду. Экинчи бөлүктө эки балбан бири бирине ыкма жасоого мүмкүнчүлүк бербей, тирешип турду. Индиялык балбан бир упай алып, эсеп 3:2 болуп, Эрназар болгон аракетин жасап, таймаш аяктап баратканда эсепти 3:3 кылып теңдеди. Акыркы секунддарда Эрназар үстөмдүк кылды. Бирок, калыстар упайлардын сапатына жараша жеңишти индиялык балбанга ыйгарып койду.Эми бүгүн кечинде жарым финалда индиялык балбан жеңип,

Эркин күрөш дүйнөсүнө табышмак болгон кыргызстандык жаш балбан Эрназар Акматалиев да тууралуу спорт күйөрмандарына  учкай баяндай кетейин.

Келечегинен үмүткөр кылган 22 жаштагы балбан Эрназар Акматалиев Нарын облусунун Нарын районундагы Орто-Нура айылында төрөлгөн. Жети жашынан бери күрөш менен машыгып келатат. 2015-жылы Индияда өткөн өспүрүмдөр арасындагы Азия чемпионатында коло байге тагынып, чоң спортко тагдырын арнаган. 2018-жылы эркин күрөш боюнча улуттук курама команданын катарына кабыл алынган. Кыргызстандын эркин күрөш боюнча эки жолку чемпиону. 2018-жылы Эрназар жаштар арасындагы Азия чемпионатынын күмүш байгесинин ээси болгон. 2019-жылы Иранда өткөн Тахти кубогунда алтын байге утуп, олжолуу келген.  2021-жылы  Украинада өткөн эл аралык турнирде дагы финалга чейин жетип, күмүш медаль тагынган.

Эркин күрөш боюнча Кыргызстандын улуттук курама командасынын ага машыктыруучусу, жаштар арасында дүйнө чемпиону Сүймөнкүл Таабалды уулу Эрназар Акматалиевди Токио олимпиадасына даярдап, машыктырып, күрөш сырларын үйрөтүп келди.

Быйыл 2021-жылы  11-апрелде Алматы шаарында өткөн Азия континенталдык квалификациялык жолдомо ойнотулган мелдеште Эрназар алтын медаль тагынып, Олимпиада  оюндарына жолу ачылган.

2021-жыдын17-апрелде  Бириккен күрөш дүйнөсү  Эрназар Акматалиевдин Азиялык квалификациялык олимпиадага жолдомо ойнотулган турнирдеги чейрек финал, жарым финал жана финалдагы таймашынын видеолорун жарыялап, аны эркин күрөштүн ыкмаларын эң мыкты аткарган балбан деп  баса белгилеген.

Кечээ,5-август күнү Токио олимпиада оюндарында эркин күрөш боюнча Азия чемпиону Айаал Лазарев 125 килограмм салмакта  алгачкы атаандашы АКШнын өкүлү 21 жаштагы Гейбл Стивенсонго 10:0 эсебинде утулуп калган.  Амрикалык балбан финалга чыккандыктан Айаал Лазаревге коло байге талапкерлер таймашуусуна мүмкүнчүлүк түзүлгөн. Ал  Рио-де-Жанейро олимпиадасынын чемпиону, дүйнөнүн эки жолку, Европанын жети жолку чемпиону, түркиялык Таха Акгюль менен күрөшүп, 4:0 эсебинде атаандашына алдырып коюп, коло медалга талапкер болбой калды.11 жылдан бери Кыргызстандын намысын коргоп, эки олимпиадага катышкан Азия чемпиону Айаал Лазарев Токиодогу мелдешин жыйынтыктады.

Жеңил атлетика боюнча Азия чемпиону, Азия оюндарынын чемпиону, белгилүү жөө күлүк Дарья Маслова Токио  олимпиада оюндарынын акыркы күнүндө  8-августта марафондук жарышка чыгат.  4-август күнү Дарья Маслова устаты, Азия оюндарынын чемпиону Татьяна Борисова менен Токио шаарынан Саппоро шаарына учуп кетишкен. Себеби 42 километр 195 метр марафондук жарыштар ушул шаарда өткөрүлөт.

6-августта кечинде грек-рим жана кыз-келиндер эркин күрөшү боюнча Токио олимпиадасына катышкан кыргызстандык балбандар жана устаттар мекенибиз Кыргызстанга сапар улаганы турушат.  Олимпиадалык айылда балбандарды  чакан узатуу салтанаты болду.

23-июлда расмий башталган Токио олимпиадалык оюндарына Кыргызстандан 16 спортчу катышууда. Алардын ону байге ала албады. Балбандар Айсулуу Тыныбекова менен Акжол Махмудов күмүш, Мээрим Жуманазарова коло медалдын ээлери болушту. Байгелердин жалпы көрсөткүчү боюнча 2 күмүш, 1 коло медалы менен Кыргызстан кечээ  61-орунда турса, учурда  67-орунга жылып калды. Биринчи саптагы Кытай өлкөсүнүн учурда 34 алтын, 24 күмүш, 16 коло медалы бар. Экинчи орунда 30 алтын, 35 күмүш, 27 коло байге уткан АКШ турат. Оюн ээси Жапония 22 алтын, 10 күмүш, 15 коло медаль утуп, үчүнчү орунда келатат. Эл аралык олимпиада комитетинин желеги астында катышып жаткан Орусиянын учурда 16 алтын, 23 күмүш жана 21 коло медалы бар. Алар бешинчи тепкичте турат. Борбор Азия өлкөлөрүнөн Өзбекстан алдыда. Алар учурда 2 алтын, 1 коло байгеси менен 32-орунда келатат.Мурдакы олимпиадалык оюндарда ийгилик жаратып келген Казакстандын учурдагы 7 коло байгеси менен 76 орунга илинүүдө. Бир күмүш байгелүү Түркмөнстан 73-орунда келүүдө. Олимпиада оюндарына катышкан 206 өлкөнүн 81 мамлекеттин спортчулары байгелүү орундарды ээлеп турушат.

Токио олимпиадасы 8-августта жыйынтыкталат.

Кабыл Макешов, спорттук баяндамачы, Токио олимпиадасындагы пресс-атташе

Улукбек Марипов: Айсулуу алган «күмүш» алтынга тете

Министрлер Кабинетинин Төрагасы Улукбек Марипов Токиодогу XXXII жайкы Олимпиадалык оюндардын жеңүүчүсү, кыз-келиндер арасындагы күрөштө күмүш медалды жеңип алган Айсулуу Тыныбекованы куттуктады.

«Айсулуу, мен сизди Олимпиадалык оюндарда ийгиликтүү оюн көрсөткөнүңүз үчүн чын ниеттен куттуктайм. Жалпы мекендештердин атынан сизге айтаарым – сиз Азаматсыз! Бүгүнкү «күмүшүңүз» алтынга тете. Бул жалпыбызга зор дем берет. Биз сиз жана Олимпиадалык курама команданын жалпы мүчөлөрү менен сыймыктанабыз. Айсулуу, сизге жана сиздин ата-энеңизге жеңиш үчүн, жаркын маанай үчүн, өз өлкөбүз үчүн сыймыктануу мүмкүнчүлүгүн тартуулагандыгыңыз үчүн ыраазычылык билдиребиз!», – деди Улукбек Марипов.

Ал белгилегендей, Олимпиадалык оюндар атамекендик спортчулар үчүн эл аралык аренадагы жаңы жана бийик жеңиштерге секирик жасоо үчүн жол салып, өлкөдө спортту жайылтууга жана ага жаштарды тартууга өбөлгө түзөт.

Эскерте кетсек, Кыргыз Республикасынын Олимпиадалык курама командасында грек-рим стилиндеги балбан Акжол Махмудовдун күмүш медалы жана кыз-келиндер арасындагы күрөштө күч сынашкан Мээрим Жуманазарованын коло медалы бар.

Токио-2020: Азия чемпиону Айаал Лазерев 5-августта беттешке чыгат

5-август күнү Токио олимпиада оюндарында эркин күрөш боюнча Азия чемпиону Айаал Лазарев 125 килограмм салмакта Кыргызстандын намысын коргойт. Бул тууралуу Токиодон спорттук баяндамачы, олимпиадалык делегациянын басма сөз катчысы Кабыл Макешов кабарлады. Күч сынашуулар бишкек убактысы менен саат 8:10до башталат.

Эркин күрөш боюнча 126 кг салмакта   Азия чемпиону Айаал Лазарев 1986-жылы 19-мартта Орусиянын Якутск шаарында туулган.

Учурда ал оттой жанган 35 жашта, улуту-якут. Атасы да эркин күрөш менен машыгып, СССРдин спорт чебери болгон. Айаал Лазаревдин чоң аталары да балбандын тукумдарынан. Үч бир туугандын ортончусу. Агасы илим жолунда, карындашы-студент. Айаал Лазарев Якутиянын Дене тарбия, спорт институтун бүткөн.

2010-жылы Орусиядан Кыргызстанга көчүп келип, Кыргыз Республикасынын жарандыгын алып, 2011-жылдан бери тандалма команданын курамына кабыл алынып, Кыргызстандын намысын коргоп келатат. Эркин күрөш менен 10 жашынан бери машыгат. Кыргызстандын эл аралык спорт чебери.

2013-жылы Индия өлкөсүнүн борбору Нью-Дели шаарында өткөн Азия чемпионатында үчүнчү орунду камсыз кылган.

2015-жылы Катар мамлекетинин борбору Доха шаарында өткөн Азия чемпионатында биринчи орунду ээлеп, Азия чемпиону аталып, алтын медаль уткан.

2016-жылы Таиланд өлкөсүндө өткөн  Азия чемпионатында үчүнчү орунду ээлеп, коло медаль тагынган.

2016-жылы  мурдагы Астана (учурдагы Нур-Султан) шаарында өткөн Азиялык олимпиадалык турнирде  жарым финалда жеңишке жетип, коло байгелүү болгон.

Кийин  аны уткан атаандашы допинг менен кармалып, оңдой берди болуп, 11-майда Айаал Лазаревге  Рио-де-Жанейро олимпиадасына катышууга жолдомо ыйгарылып, жолу ачылып, олимпиадага катышып, 15-орунга илинген.

Айаал Азия чемпионаттарында үч жолу коло байге уткан (2010, 2013, 2016). 2020-жылы Белград шаарында өткөн дүйнө Кубогунда үчүнчү орунду ээлеген. Быйыл 2021-жылы Алматыда өткөн Азия чемпионатында финалга чейин жетип, күмүш байгелүү болгон. Ушул Алматы шаарында өткөн Азия континенталдык олимпиадага жолдомо ойнотулган турнирде Индиянын өкүлүнө жеңилип калып, Токио олимпиадасына жолдомо албай калган. Бирок, индиялык балбандын кызытма колдонгону аныкталып, ал алган жолдомо Айаал Лазаревге ыйгарылган.  Мындай окуя экинчи ирет кайталанып, Айаалдын жолу экинчи ирет олимпиадага ачылып турат. Ал эл аралык турнирлердин  көп жолку жеңүүчүсү болуп саналат.

Өлкөнүн тандалган балбандарынын тобундагы Айаал Лазарев бир нече жолу ийгилик жаратып, Кыргызстандын чемпиону аталган.

Айаал Ысык-Көлдө машыгуудан өтүп, Орусиянын балбандары менен бирге даярдык көрдү.

Кыргызстанга келгенден берки жеке устаты- жаштар арасында дүйнө чемпиону,  тандалма команданын улук машыктыруучусу Сүймөнкул Табылды уулу.

Башкы устат- Азия чемпионаттарынын жеңүүчүсү Руслан Маджинов кеп-кеңешин айтып жүрөт.

Токио олимпиадасындагы Айаал Лазаревдун алгачкы атаандашы АКШнын өкүлү 21 жаштагы Гейбл Стивенсон болмокчу. Ал жаш болсо дагы Панамерикалык оюндардын чемпиону болуп саналат. Эгерде Айаал утуп алса, анда чейрек финалда канадалык же түркиялык балбан менен күч сынашат.

Ошондой эле 6-августта эркин күрөш боюнча Токио олимпиадасында  65 килограмм салмакта  Эрназар Акматалиев күчүн сынашууга катышат. Анын атаандаштары 5-августта түштөн кийин анык болот.

Жеңил атлетика боюнча Азия чемпиону, Азия оюндарынын чемпиону, белгилүү жөө күлүк Дарья Маслова Токио  олимпиада оюндарынын акыркы күнүндө  8-августта марафондук жарышка чыгат.  4-август күнү Дарья Маслова устаты, Азия оюндарынын чемпиону Татьяна Борисова менен Токио шаарынан Саппоро шаарына учуп кетишти. Себеби 42 километр 195 метр марафондук жарыштар ушул шаарда өткөрүлөт.

23-июлда расмий башталган Токио олимпиадалык оюндарына Кыргызстандан 16 спортчу катышууда. Алардын ону байге ала албады. Балбандар Айсулуу Тыныбекова менен Акжол Махмудов күмүш, Мээрим Жуманазарова коло медалдын ээлери болушту. Байгелердин жалпы көрсөткүчү боюнча 2 күмүш, 1 коло медалы менен Кыргызстан  61-орунда турат. Биринчи саптагы Кытай өлкөсүнүн учурда 32 алтын, 22 күмүш, 16 коло медалы бар. Экинчи орунда 26 алтын, 31 күмүш, 23 коло байге уткан АКШ турат. Оюн ээсши Жапония 21 алтын, 7 күмүш, 12 коло медаль утуп, үчүнчү орунда келатат. Борбор Азия өлкөлөрүнөн Өзбекстан алдыда. Алар учурда 2 алтын, 1 коло байгеси менен 30-орунда турат.Мурдакы олимпиадалык оюндарда ийгилик жаратып келген Казакстандын учурдагы 4 коло байгеси 75 орунга илинүүдө. Бир күмүш байгелүү Түркмөнстан 71-орунда.

Токио олимпиадасында Эл аралык Олимпиада комитети  тарабынан спорттун 33 түрү боюнча рекорддук 339 комплект медаль ойнотулуп жатат. Алардын ичинде спорттун жаңы беш түрү бар жана жалпысынан жаңы 34 иш-чара өткөрүлүүдө. Жайкы оюндарга катышып жаткан спортчулардын 48.8% кыз-келиндер түздү.

Спорттун жаңы беш түрүнө каратэ, скейтбордиң, спорттук альпинизм, бейсбол/софтбол жана сөрфиң кирген. Бейсбол менен софтбол Олимпиаданын программасында негизинен “жаңы” деле эмес, бирок аталган оюндар боюнча Бээжин шаарында 2008-жылы өткөн Олимпиададан бери мелдеш өткөрүлө элек болчу.

Токио олимпиадасы 8-августта жыйынтыкталат.

Кабыл Макешов, спорттук баяндамачы, Токио олимпиадасындагы пресс-атташе

Акжол Махмудов менен Мээрим Жуманазарованы президент куттуктады

Президент Садыр Жапаров Токиодогу Олимпиада оюндарында күмүш жана коло медал алган кыргыз спортчулары Акжол Махмудов менен Мээрим Жуманазарованы куттуктады.

“Мындай жетишкендик улуттук спорттун тарыхында көп деле болгон эмес, ошондуктан бул ийгилик жалпы кыргызстандыктар үчүн өтө маанилүү жана өтө баалуу”, – деди Махмудовго жолдогон куттуктоосунда.

Ал эми Жуманазарованы куттуктаганда таланттуу спортчу кыздар улуттук спорттун тарыхында жаңы барак ачып, өлкөнү дүйнөлүк деңгээлде даңазалаганын белгиледи. Бул тууралуу президенттин басма сөз кызматы кабарлады.

Жапониядагы Жайкы Олимпиадада 3-август күнү грек-рим күрөшүнөн Акжол Махмудов күмүш, кыз-келиндер күрөшүнөн Мээрим Жуманазарова коло байге алып, өлкөнүн рейтинги жогорулады. 4-августта Айсулуу Тыныбекова алтын үчүн күрөшөт.

Жапониянын борборунда 23-июлда расмий ачылган Олимп оюндарында 200дөн ашуун мамлекеттен 12 миңге жакын спортчу барды. Анда спорттун 33 түрү боюнча 339 медалдар топтому ойнотулат.

Эл аралык мелдешке Кыргызстандан 16 спортчу аттанган. Алардын тогузу байге ала алган жок. Мамлекет алтын медал тагынгандарга 10 миллион сом, күмүшкө жети миллион сом, коло үчүн беш миллион сом сый акы убада кылган.

Олимпиада 8-августта жыйынтыкталат.

Токио 2020 олимпиадасынын күндөлүгү : Акжол Махмудов күмүш жана Мээрим Жуманазарованын коло медалы

3-августта Азия чемпиону Акжол Махмудов Жапониянын борбору Токио шаарында өтүп жаткан  32-жайкы Олимпиада оюндарында грек-рим күрөшү боюнча 77 килограмм салмакта күмүш, айымдар эркин күрөшү боюнча 68 килограмм салмакта Мээрим Жуманазарова коло медаль утуп, кыргызстандык спорт күйөрмандарын кубанычка бөлөдү.  Бул күндүн жыйынтыктары тууралуу  Токиодон спорттук баяндамачы, Кыргызстандын олимпиадалык делегациясынын басма сөз катчысы Кабыл Макешов маалымдайт.

 Акжолдун алтынга тете күмүш байгеси

Кыргызстандын дүйнөгө тааныткан атактуу балбан Акжол Махмудов 3-августта грек-рим күрөшү боюнча 77 килограмм салмакта финалда  Лондон Олимпиада оюндарынын күмүш медалынын ээси, дүйнө  чемпиону жана Европа чемпионатынын беш жолку чемпиону, венгриялык Тамаш Лоринс менен күч сынашып, 2:1 эсебинде бир упай айырма менен атаандашына алтынды алдырып коюп, Токио олимпиадасынын күмүш медалын тагынды. Акжол Махмудов Токио  Олимпиадасында төрт беттеш өткөрдү.  Ал алгач тунистик Ламьед Маафини 11:0 эсеби менен мөөнөтүнөн мурда уткан. Чейрек финалда дүйнө чемпионатынын күмүш, Дүйнө кубогунун алтын, күмүш, коло байге ээси, Европанын эки жолку чемпиону, 33 жаштагы азербайжандык Рафиг Хусейновду 9:1 эсеби менен мөөнөтүнөн мурда артыкчылык менен жеңген.

Жарым финалдык Акжолдун беттешүүсүнүн биринчи бөлүгүндө алгач бир упайды Европа чемпионаттарынын коло байге ээси, Европа оюндарынын жеңүүчүсү армян балбаны Карапет Чальян алганга үлгүрүп, андан соң  Акжол Махмудов катары менен упайларды алып, эсепти 6:1ге жеткирип, өзүнүн чеберчилигин, шамдагайлыгын көрсөткөн эле. Мелдештин экинчи бөлүгүндө армениялык балбан бир упай алганга үлгүрүп, Акжол Махмудов артыкчылыгын бекемдеп, андан ары атаандашына ыкма жасоого мүмкүнчүлүк бербей артыкчылыгын сактап калган болчу.

Токио олимпидасынын күмүш байге ээси Акжол Махмудов 22 жашка чыгып, баралына жетип, табына келип турган учуру. Ал уландар  арасында Азиянын эки жолку,жаштар арасында дүйнөнүн бир жолку чемпиону аталган. 2017-жылы жаштар арасында Азия чемпиону аталып, дүйнө чемпионатынын күмүш байгесин  утуп алган. 2018-жылы чоңдор арасында Азия чемпиону болуп, Азия оюндарында күмүш медалын тагынган. Ушул эле жылы жаштар арасында дүйнө чемпионатында коло байге утуп келген.

2019-жылы январь айында чоңдор арасында Кыргызстандын чемпионатын жеңип, бир айдан кийин сол тизесинен жаракат алып көп мелдештерге катыша албай Германиядан операция жасатып келген. Жаракатына байланыштуу 2020-жылдагы Кыргызстандын чемпионатына катышкан эмес.

2021-жылы Кыргызстандын чемпионатын жеңип, быйыл март айында Казакстандын Алматы шаарында өткөн Азиялык квалификациялык олимпиадага жолдомо ойнотулган мелдеште алтын байге утуп, Токио олимпиада оюндарына жолу ачылган.

-Акжол кыргыз тарыхында грек-рим күрөшү боюнча олимпиада оюндарында күмүш байге уткан  эң жаш балбан болуп саналат. Буга чейин кыргыз спортчуларынан грек-рим күрөшү боюнча 2008-жылы Бээжин олимпиадасында финалга Канат Бегалиев гана чыгып, ал дагы күмүш байгелүү болгон,-дейт Кыргыз Республикасынын Улуттук олимпиада комитетинин биринчи вице-президенти Канат Аманкулов.

Мелдештен кийин Акжол Махмудовго жолукканымда ал бул жеңишин, күмүш байгесин кыргыз элине, ата-энесине, досторуна арнаганын, президентибиз Садыр Жапаров өзү телефон чалып куттуктаганын айтып, жалпы күйөрмандарга терең ыраазычылыгын билдирип, 4-августта финалда алтын медаль үчүн күрөшө турган Айсулуу Тыныбековага, коло байгеге талапкер Атабек Азисбековго ийгилик, жеңиш каалады.

Мээнеткеч Мээрим Жуманазарованын коло медалы

3-августта Азия чемпиону, Дүйнө кубогунун ээси Мээрим Жуманазарова Токио Олимпиада оюндарында  айымдар эркин күрөшү боюнча 68 кг салмакка чейинки категорияда коло байге утуп, Кыргызстандын  калкын сүйүнтү.

Кечээ 2-августта  Мээрим Жуманазарова алгачкы беттешүүдө Европа чемпиону, Европа оюндарынын күмүш байге ээси, болгариялык Мими Николова Христованы 7:5 эсебинде  артыкчылык менен жеңип алган. Чейрек финалда Африканын 10 жолку чемпиону, Ислам тилектештик оюндарынын чемпиону, 33 жаштагы нигериялык Блессин Оборудудуга 2:3 эсеби менен бир упайга утулуп калган. Кечинде оңдой берди болуп нигериялык спортчу финалга чыгып,  Мээримге коло байгеге талапкерлердин беттешүүсүнө чыгууга мүмкүнчүлүк ачылган эле. Ал дүйнө чемпионатынын коло байге ээси, Европа чемпиону 24 жаштагы  азербайжандык Элис Манолова менен күч сынашып, аны утуп, коло байге үчүн күрөшкө жолун ачыкан.  Андан соң Лондон Олимпиада оюндарынын коло медалынын ээси, дүйнөнүн эки жолку  чемпиону жана Азия чемпиону, 30 жаштагы монголиялык Баттсетсег Соронзонболд менен Токио Олимипиадасынын коло байгеси үчүн күч сынашып, 10:1 эсебинде мөөнөтүнөн мурда жеңип алды.

-Мээрим Жуманазарова 2020-жылы дүйнө кубогунун  жеңүүчүсү болгон, ал эми ага чейин Азиянын коло жана алтын байгелерин утуп, жаштар арасында дүйнө чемпонаттарынын жеңүүчүсү аталган. Азия чемпиону болуп саналат. Ага алгач күрөш сырларын үйрөткөн атасы, Кыргызстанга эмгек сиңирген машыктыруучу Дүйшөн Жуманазаров агайыбыз. Спорттук бийиктиктерге, жеңиштерге жеткирген устаты өлкөбүздүн дене тарбия жана спортуна эмгек сиңирген ишмер жана Кыргызстанга эмгек сиңирген машыктыруучу Нурбек Изабековдун мээнети тоодой. Мээрим устатынын акыл-насааттарын угуп, кеп-кеңешин туура аткарып, ийгиликке жетти , -дейт Жогорку Кеңештин депутаты, КР айымдар күрөш федерациясынын вице-президенти, улук машыктыруучу Байгазы Кенжебаев.

Токио олимпиадасынын коло байгесин уткан Мээрим Жуманазарова менен жолукканымда ал алтын медаль утууну максат кылып келгенин, бир аз каталык кетип, ал мүдөөсүнө жетпей калганын, куру кетпей коло байге менен мекенине баратканын, бул ийгилик жети-сегиз жылдык мээнеттин үзүрү экенин, алдыда Азия оюндары, Париж олимпиадасынын таймашуулары турганын, жеңишин кыргыз элине, ата-энесине арнаганын айтып,  алыста болсо дагы сүрөөнгө алып турган жалпы күйөрмандарга ыраазычылыгын билдирди.

Айсулуу Тыныбекова алтын медаль үчүн күрөшөт  

Кыздар арасында эркин күрөш боюнча дүйнө чемпиону Айсулуу Тыныбекова Олимпиаданын финалына жолдомо алып, 4-августта 62 килограмм салмакта Токио олимпиадасынын алтын медалы үчүн  күч сынашат.

Айсулуу  жарым финалда дүйнө чемпионатынын күмүш байге ээси, Европа чемпиону, украиналык Ирина Коляденкону 10:0 эсебинде мөөнөтүнөн мурда артыкчылык менен жеңип алган.  Ал эми чейрек финалда румыниялык спортчу Кристина Тунде менен беттешип, 6:2 эсебинде далысын килемге таза тийгизип уткан. Ага чейин биринчи атаандашы 31 жаштагы Европа чемпиону, Европа оюндарынын жеңүүчүсү жана дүйнө чемпионатынын байге ээси, латвиялык Анастасия Григорьеваны 8:0 эсебинде мөөнөтүнөн мурда артыкчылык менен жеңип алган.

-Атактуу балбан Айсулуу Тыныбекова кыздар арасында эркин күрөш боюнча дүйнөлүк рейтингде биринчи орунда турат. Ал кыздар арасында эркин күрөш боюнча дүйнөнүн чемпиону (2019) жана дүйнө биринчилигинде коло байгенин ээси (2017), Азиянын 3 жолку чемпиону (2016, 2017, 2019), Азия Оюндарынын чемпиону (2018) жана коло байгесинин ээси (2014), Дүйнө биринчилигинин Кубогунун чемпиону (2020), эл аралык турнирлердин жеңүүчүсү болуп саналат. Айсулууну дене тарбияга жана спортко эмгек сиңирген ишмер жана эмгек сиңирген машыктыруучу Нурбек Изабеков машыктырып, ушундай даражага жеткирип келеатат. Кыргыз спортчуларын колдоп, бүгүн борбор калаабыздагы аянтка жүздөгөн эл чогулганын Токиодон угуп, биз дагы кубанып турабыз. Эми финалдык беттеште дагы Айсулуунун атын атап, дем-күч берип, сүрөп, колдоп туралы,-дейт Дүйнөлүк күрөш биримдигинин Азия континенти боюнча вице-президенти, Кыргызстандын эркин күрөш федерациясынын президенти, ардагерлер арасында дүйнө чемпиону, генерал Мелис Турганбаев.

Атабек Азисбеков коло байге үчүн талапкер

Олимпиадага грек-рим күрөшү боюнча 97 кг салмак боюнча катышып жаткан Азия чемпиону Үзүр Жусупбеков чейрек финалда мурдагы Олимпиада оюндарынын жеңүүчүсү, армениялык Артур Алексанян менен күрөшкөн. Армениялык спортчу кыргыз балбанын 4:1 эсебинде жеңип алган. Ал Үзүр Жусупбековдон кийин дагы 2 атаандашын утуп, финалга чейин жеткендигине байланыштуу Үзүр Жузупбеков коло байгеге талапкерлердин беттешине чыгууга укук алган.

Жусупбеков коло медаль үчүн беттешке чейин Финляндиянын  тажрыйбалуу балбаны Арви Мартин Саволайненди жеңсе, анда коло байге үчүн иран спортчусу Мухамедхажы Сарави менен күрөшмөк. Тилекке каршы, спортчу 1:4 эсебинде финляндиялык балбанга алдырып коюп, байгелүү орунга илинбей калды.

-Кыргызстандын олимпиадалык командасынын капитаны Атабек Азисбеков грек-рим күрөшү боюнча 1/8 финалда дүйнө жана Европа чемпионаттарынын жеңүүчүсү, венгриялык Виктор Лоринцке 1:6 эсебинде утулуп калды. Оңдой берди болуп Виктор Лоринц финалга чейин жете турган болсо, Атабектин коло үчүн таймашууга мүмкүнчүлүгү пайда болду. 4-августта Атабек Азисбеков коло байгеге талапкерлердин таймашында Рио-де-Жанейро олимпиадасынын коло байге ээси, дүйнө чемпонаттарында күмүш жана коло медаль уткан, Европа чемпионаттарынын жеңүүчүсү, германиялык Денис Максимилиан Кудла менен күч сынашат. Аны утса коло медаль үчүн күрөшүүгө жолу ачылат.-дейт Кыргыз Республикасынын Улуттук олимпиада комитетинин башкы катчысы, олимпиадалык команданын жетекчилеринин бири Саламат Эргешов.

Беттешүүлөр Бишкек убактысы боюнча саат 08:00дө башталат.

3-августта Токио олимпиадасынын жеңил атлетика боюнча мелдштерине кыргызстандык эл аралык спорт чебери Нурсултан Кеңешбеков да катышты. Ал 5000 метр аралыктагы жарыштарда мөрөй талашып, финалдык топко кошулбай калды.

Кыргызстандан жалпы 16 спортчу спорттун 7 түрү боюнча Олимпиадага жолдомо алган. Мамлекет алтын медаль алгандарга 10 миллион сом, күмүш байгеге жети миллион сом, коло медаль үчүн беш миллион сом сый акы убада кылган.

23-июлда башталган Токио-2020 Олимпиада оюндары 8-августта жыйынтыкталат.

Токио олимпиадасынан пресс-атташе Кабыл Макешов

Токиодо дүйнө чемпиону Айсулуу Тыныбекова жарым финалга чыкты

Бүгүн, 3-августта Токио Олимпиада оюндарынын таймашуулары курч мүнөздө улантылып жатат.  Кыргызстандык күйөрмандардын үмүтүн жандырган балбан кызыбыз, дүйнө чемпиону Айсулуу Тыныбекова кыз-келиндер күрөшүнөн жарым финалга чыкты. Бул тууралуу Токиодон олмпиадалык делегациянын басма сөз катчысы, спорттук баяндамачы Кабыл Макешов билдирди. Айсулуу  62 килгограмм салмакта алгачкы атаандашы, латвиялык,  31 жаштагы Анастасия Григорьева Европа чемпиону, Европа оюндарынын жеңүүчүсү жана дүйнө чемпионатынын байге ээси Анастасия Григорьеваны 8:0 эсебинде мөөнөтүнөн мурда утуп, чейрек финалга чыкты. Чейрек финалда Азия жана дүйнө чемпиону  Айсулуу Тыныбекова румыниялык Криста Тунде Инже менен күрөшүп,аны дагы мөөнөтүнөн мурда далысын килемге таза тийгизип, чеберчилигин көрсөтүү менен   утуп алды. Ошентип Айсулуу жарым финалга чыкты. Жарым финалда украиналык, Европа чемпиону, дүйнө чемпионатынын күмүш байге ээси Ирина Коляденко менен күрөшөт. Айсулуу бул атаандашын 2019-жылы Нур-Султан шаарында өткөн дүйнө чемпионатында утуп алган.

Ушул күнү грек-рим күрөшүнөн 87 килограмм салмакта эл аралык спорт чебери, Кыргызстандын олимпиадалык командасынын капитаны Атабек Азизбеков мелдешти баштап, венгриялык, Европа чемпиону, дүйнө чемпионаттарынын күмүш жана коло байге ээси, 31 жаштагы Виктор Леринцке 1:6 эсебинде утулуп калды. Эгер Виктор Леринц финалга чыкса, Атабек Азизбеков коло байге үчүн талапкерлердин таймашында күч сынашат.

3-августта кыз-келиндер күрөшүнөн 68 клограмм салмакта Мээрим Жуманазарова  коло байге үчүн талапкерлердин таймашында азербайжандык, Европа чемпиону, дүйнө чемпионатынын коло байге ээси 25 жаштагы Элис Манолованы 4:1 эсебинде жеңди. Эми ал кечинде коло байге үчүн монголиялык Батцецег Соронзонболд менен күрөшөт.

Грек-рим күрөшү боюнча Азия чепиону балбан Үзүр Жусупбеков грек-рим күрөшүнөн 97 килограмм салмакта  коло байге үчүн талапкерлердин беттешинде финляндиялык, жаштар арасында дүйнө чемпиону, 22 жаштагы Арви Мартин Совалайненге жеңилди.

Бүгүн, 3-августта кечинде кыргызстандык күйөрмүандардын үмүтүн жандырып турган Азия чемпиону, уландар арасында дүйнө чемпиону, Азия оюндарынын жеңүүчүсү Акжол Махмудов грек-рим күрөшүнөн 77 килограмм салмакта финалда алтын медаль үчүн күрөшөт. Акжолдун финалдагы атаандашы Лондон олимпиадасынын күмүш байге ээси, дүйнө чемпиону, Европанын беш жолку чемпиону, венгриялык Таман Леринц  болуп саналат. Финалдык таймаш 3-августта Бишкек убактысы боюнча саат 15:15тен өткөндө башталат.

Ошондой эле 3-августта жөө күлүк Нурсултан Кеңешбеков да  5000 метр аралыкка жарым финалда чуркап, мөрөй талашат. Элүүдөн ашуун күлүктөн 15и тандалып, финалдык жарыштары 6-августта болмокчу.

Балбандарды жана жөө күлүктү сүрөөнгө алып, колдоп туралы.

Токио олимпиадасынан пресс-атташе Кабыл Макешов

Токио олимпиадасынын күндөлүгү: Акжол Махмудов финалга чыкты, Мээрим Жуманазарова менен Үзүр Жусупбеков коло байге үчүн күрөшөт

Бүгүн, 2-августта Азия чемпиону Акжол Махмудов Жапониянын борбору Токио шаарында өтүп жаткан  32-жайкы Олимпиада оюндарында грек-рим күрөшү боюнча 77 килограмм салмакта Азия чемпиону, кыргызстандык Акжол Махмудов армениялык атаандашы Карапет Чальянды жарым финалдык таймашууда 6:2 эсебинде жеңип, финалга жолун ачып, баш байгеге талапкер болду. Бул күндүн жыйынтыктары тууралуу  Токиодон спорттук баяндамачы, Кыргызстандын олимпиадалык делегациясынын пресс атташеси Кабыл Макешов билдирет.

Жарым финалдык Акжолдун беттешүүсүнүн биринчи бөлүгүндө алгач бир упайды Европа чемпионаттарынын коло байге ээси, Европа оюндарынын жеңүүчүсү армян балбаны Карапет Чальян алганга үлгүрдү. Андан соң  Акжол Махмудов катары менен упайларды алып, эсепти 6:1ге жеткирип, өзүнүн чеберчилигин, шамдагайлыгын көрсөттү. Мелдештин экинчи бөлүгүндө армениялык балбан бир упай алганга үлгүрүп, Акжол Махмудов артыкчылыгын бекемдеп, андан ары атаандашына ыкма жасоого мүмкүнчүлүк бербей артыкчылыгын сактап калды.

Эртең менен Акжол Махмудов буга чейин үч беттеш өткөргөн. Алгач тунистик Ламьед Маафини 11:0 эсеби менен мөөнөтүнөн мурда уткан. Чейрек финалда дүйнө чемпионатынын күмүш, Дүйнө кубогунун алтын, күмүш, коло байге ээси, Европанын эки жолку чемпиону, 33 жаштагы азербайжандык Рафиг Хусейновду 9:1 эсеби менен мөөнөтүнөн мурда артыкчылык менен жеңген.

Алдыда алтын байге үчүн Лондон олимпиадасынын күмүш байге ээси, дүйнө чемпиону, Европанын беш жолку чемпиону, венгриялык Таман Леринц менен күрөшөт. Финалдык таймаш 3-августта Бишкек убактысы боюнча саат 15:15тен өткөндө башталат.

Финалга чыккан  Акжол Махмудов 22 жашка чыгып, баралына жетип, табына келип турган учуру. Ал уландар  арасында Азиянын эки жолку,жаштар арасында дүйнөнүн бир жолку чемпиону аталган.

2017-жылы жаштар арасында Азия чемпиону аталып, дүйнө чемпионатынын күмүш байгесин алган. 2018-жылы чоңдор арасында Азия чемпиону болуп, Азия оюндарында күмүш медалын тагынды. Ушул эле жылы жаштар арасында дүйнө чемпионатында коло байге утуп алган.

2019-жылы январь айында чоңдор арасында Кыргызстандын чемпионатын жеңип, бир айдан кийин сол тизесинен жаракат алып көп мелдештерге катыша албай Германиядан операция жасатып келген. Жаракатына байланыштуу 2020-жылдагы Кыргызстандын чемпионатына катышкан эмес.

2021-жылы Кыргызстандын чемпионатын жеңип, быйыл март айында Казакстандын Алматы шаарында өткөн Азиялык квалификациялык олимпиадага жолдомо ойнотулган мелдеште алтын байге утуп, Токио олимпиада оюндарына жолу ачылган.

Ушул  2-август күнү күрөштүн ушул грек-рим түрүнөн 97 килограмм салмактагы Азия чемпиону Үзүр Жусупбеков армениялык, учурдагы олимпиада чемпиону Артур Алексанянга утулуп калды. Бирок армениялык балбан финалга чыккандыктан Үзүр Жусупбеков коло байгеге талапкерлер менен 3-августта эртең менен күрөшкө чыгат.

2-августта кыз-келиндер эркин күрөшүнөн 68 килограмм салмакта Токио олимпиадасына катышып жаткан Мээрим Жуманазарова чейрек финалда Африканын 10 жолку чемпиону, Ислам тилектештик оюндрынын чемпиону, 33 жаштагы нигериялык Блессин Оборудудуга 2:3 эсеби менен утулуп калды. Азия чемпиону, дүйнө кубогунун жеңүүчүсү  Мээрим Жуманазарова алгачкы беттешүүдө Европа чемпиону, Европа оюндарынын күмүш байге ээси, болгариялык Мими Николова Христованы 7:5 эсебинде жеңип алган. Кечинде оңдой берди болуп нигериялык спортчу финалга чыгып,  Мээримге коло байгеге талапкерлердин беттешүүсүнө чыгууга мүмкүнчүлүк ачылды. Ал дүйнө чемпионатынын коло байге ээси, Европа чемпиону 24 жаштагы  азербайжандык Элис Манолова менен күч сынашат. Аны утса коло байге үчүн күрөшкө жолу ачылат.

2-августта Токиодо өтүп жаткан Олимпиадада кыз-келиндер эркин күрөшүнөн 76 килограмм салмакта килемге чыкккан жаштар арасындагы дүйнө чемпиону, Азия чемпионаттарынын жеңүүчүсү Айпери Медет кызы коло байге үчүн күрөштө дүйнө чемпиону, Европанын 4 жолку чемпиону, 29 жаштагы түркиялык Ясемин Адарга жеңилип, 5-орунду ээледи.

Айпери Медет кызы таймаштарын 1-августта баштап, алгач Рио-де-Жанейро олимпиадасынын коло байге ээси, Азия чемпиону, 29 жаштагы  казакстандык Элмира Сыздыкованы 6:1 утуп алган. Ал эми чейрек финалда Лондон олимпиадасынын чемпиону, Рио-де-Жанейро олимпиадасынын күмүш байге ээси, Европанын үч жолку чемпиону,30 жаштагы орусиялык Наталья Воробьеваны 12:0 эсебинде мөөнөтүнөн мурда жеңип алган. Жарым финалда дүйнөнүн беш жолку чемпиону, америкалык Аделин Мариа Грейге 2:3 эсеби бир упай айырма менен жеңилген.

Бүгүн, 2-августта эртеңки 3-августтагы таймаштардын чучукулагы тартылып, 62 кг салмакта  дүйнө чемпиону Айсулуу Тыныбекова алгачкы беттешүүдө латвиялык Анастасия Григорьева менен күрөшөрү анык болду.Спортчулар 1/8 финалдан баштайт.  31 жаштагы Анастасия Григорьева Европа чемпиону, Европа оюндарынын жеңүүчүсү жана дүйнө чемпионатынын байге ээси болуп саналат.

Ошондой эле  3-августта күрөшө турган грек-рим күрөшүнүн балбаны Атабек Азисбековдун да биринчи атаандашы аныкталып,  ал венгриялык Виктор Лёринц менен күч сынашат. Алар дагы  87 килограмм салмактагы күрөшүн 1/8 финалдан баштайт.

Беттешүүлөр Бишкек убактысы боюнча саат 08:00дө башталат.

3-августта Токио олимпиадасынын жеңил атлетика боюнча мелдештерине кыргызстандык эл аралык спорт чебери Нурсултан Кеңешбеков да катышат. Ал 5000 метр аралыктагы жарыштарда мөрөй талашат.

 

Токио олимпиадасынан пресс-атташе Кабыл Макешов

Улукбек Марипов: Биздин Олимпиадачылар, биз сиздер менен сыймыктанабыз!

Кыргыз Республикасынын Министрлер Кабинетинин Төрагасы Улукбек Марипов Токио (Япония) шаарындагы XXXII жайкы Олимпиадалык оюндарга катышып жаткан Кыргыз Республикасынын Олимпиадалык курама командасынын мүчөлөрүнө кайрылды.

«Кымбаттуу спортчулар,

Бүтүндөй өлкө Олимпиада оюндарындагы сиздердин катышууңуздардагы оюндарды толкундануу менен кунт коюп көрүүдө. Олимпиадалык оюндарга катышуу – бул ар бир спортчу үчүн чоң намыс, ошол эле учурда анын кесипкөйлүгүн жана сиңирген эмгегинин таанылышы.

Биздин Олимпиадалык курама командабыз машыктыруучу курам менен биргеликте сыймактынууга татыктуу. Сиздер өлкөбүздүн намысын мыкты деңгээлде коргоп жатасыздар. Сиздер өжөрлүгүңүздөргө, эмгекчилдигиңиздерге жана тайманбас духуңарга жараша олимпиадалык деңгээлге татыктуу экендигиңиздерди далилдей алдыңыздар.

Сиздердин ар бириңиздер – күжүрмөн жоокерсиздер, биз сиздерге ишенип, ар бир жыйынтыкка кубанып турабыз. Сиздер биз үчүн жеңүүчү жана баатырсыздар! Биз сиздердин жеңишке ишенебиз жана бул таймаштарда Кыргыз Республикасынын желеги дагы да желбирейт деп үмүттөнөбүз!», – деди Улукбек Марипов».

Азия чемпиону Акжол Махмудов олимпиаданын жарым финалына чыкты

Бүгүн, 2-августта Токио шаарындагы Макухари Мессе Борборунда олимпиада оюндарында  спорттук күрөш боюнча кыргыз балбандар Мээрим Жуманазарова, Акжол Махмудов жана Үзүр Жусупбеков күч сынашууларга катышып, Азия чемпиону Акжол Махмудов жарым финалга чыкты. Бул тууралуу Токио шаарынан Кыргызстандын олимпиадалык командасынын басма сөз катчысы, спорттук баяндамачы Кабыл Макешов  билдирди.

Грек-рим күрөшү боюнча 77 кг салмакта Кыргыз Республикасынын эл аралык спорт чебери Акжол Махмудов 1/8 финалда Тунис өлкөсүнүн өкүлү Ламьед Маафин менен күч сынашып, атаандашын мөөнөтүнөн мурда 11:0 эсеби менен утуп алды.

Чейрек финалда кыргызстандык Акжол Махмудов  33 жаштагы дасыккан балбан, Дүйнө чемпионатынын күмүш байге ээси, Европанын эки жолку чемпиону,дүйнө кубогунун жана Европа оюндарынын жеңүүчүсү, азербайжандык Рафиг Хусейновду дагы мөөнөтүнөн мурда 9:1 эсеби менен жеңип, жарым финалга чыкты.

Эми кечинде Акжол Махмудов жарым финалда  27 жаштагы Европа чемпионатынын жана Европа оюндарынын күмүш байге ээси, армениялык Карапет Чальян менен күрөшөт.

22 жаштагы Акжол Махмудов эл аралык класстагы спорт чебери, Азия чемпиону жана Азия оюндарынын күмүш медалынын ээси. 2015-2016-жылдары өспүрүмдөр  арасында Азиянын эки жолку чемпиону  жана 2016-жылы өспүрүмдөр  арасында Дүйнө чемпиону аталган. 2017-жылы Азия чемпиону болуп, ошол 2017-жылы  жаштар арасында Дүйнө биринчилигинин күмүш байге ээси болгон. Кыргызстандын көп жолку чемпиону.2018-жылы Азия чемпиону жана Азия оюндарынын күмүш медалынын ээси болгон.

Быйыл апрель айында Алматыда өткөн континенталдык жолдомо ойнотулган турнирде Токио Олимпиадасына жолдомо уткан.

Ал эми 97 кг салмакта Токио олимпиадасына катышып жаткан  Азия чемпиону Үзүр Жузупбеков 1/8 финалда армениялык, олимпиада чемпиону Артур Алексанян менен алгачкы беттешүүгө чыгып, атаандашына алдырып койду.Эгерде армениялык балбан финалга чыкса Үзүр Жусупбеков коло байгеге талапкерлердин бири болуп, дагы күрөшүп калышы мүмкүн.

Бүгүн, 2-августта кыз-келиндер эркин күрөш боюнча 68 килограмм салмакта Токио олимпиадасына катышып жаткан Азия чемпиону Мээрим Жуманазарова алгачкы атаандашы 2021-жылы Европанын чемпиону, болгариялык Мими Николова Христованы  7:5 эсебинде утуп алды.  Мээрим 5:4 эсебинде утулуп жатып, акыркы секундада эки упай алып жеңишти жетти.

Тилекке каршы Мээрим  Жуманазарова чейрек финалда нигериялык атаандашы Блессинг Оборудудуга 2:3 эсеби менен утулуп калды.

Бул Мээрим Жуманазарованын алгачкы Олимпиадасы болуп саналат. Эми нигериялык кыз финалга чыкса, Мээрим коло байге үчүн күрөшүүгө мүмкүнчүлүк алат.

Бүгүн, 2-августта эртеңки 3-августтагы таймаштардын чучукулагы тартылып, 62 кг салмакта  дүйнө чемпиону Айсулуу Тыныбекова алгачкы беттешүүдө латвиялык Анастасия Григорьева менен күрөшөрү анык болду.Спортчулар 1/8 финалдан баштайт.  31 жаштагы Анастасия Григорьева Европа чемпиону, Европа оюндарынын жеңүүчүсү жана дүйнө чемпионатынын байге ээси болуп саналат.

Ошондой эле  3-августта күрөшө турган грек-рим күрөшүнүн балбаны Атабек Азисбековдун да биринчи атаандашв аныкталып,  ал венгриялык Виктор Лёринц менен күч сынашат. Алар дагы  87 килограмм салмактагы күрөшүн 1/8 финалдан баштайт.

Беттешүүлөр Бишкек убактысы боюнча саат 08:00дө башталат.

Токио олимпиадасынан пресс-атташе Кабыл Макешов

Меню