Menu

Кыргыз-өзбек чек арасы

Ысык-Көлдө кыргыз-өзбек чек арасын тактоо боюнча сүйлөшүү өтүүдө

Кыргызстан менен Өзбекстандын чек арасын тактоо боюнча өкмөттүк делегациялардын сүйлөшүүсү 9-августта Чолпон-Ата шаарында башталды.

Бул тууралуу Министрлер кабинетинин чек ара маселелери боюнча атайын өкүлү Назирбек Бөрүбаев билдирди. Анын айтымында, жолугушууда эки өлкө ортосундагы тактала элек аймактар боюнча сүйлөшүү улантылат.

“Эки өлкө ортосундагы чек аранын 1170 чакырымы такталып, келишимге кирген. Калган аймактарды чечүү боюнча жолугушуу болот. Өзбекстан менен чек араны быйыл тактап бүтөлү деп аракет кылып жатабыз”,-деди Бөрүбаев.

Эки өлкөнүн өкмөт өкүлдөрүнүн Ысык-Көлдөгү жолугушуусу 17-августка чейин уланат.

Кыргызстан менен Өзбекстандын ортосундагы чек аранын узундугу 1378 чакырым. 2017-жылкы макулдашуунун негизинде чек ара сызыгынын 1170 чакырымы (85%), андан бери 13% жакыны такталганы 2021-жылдын февралында расмий айтылган. Андан бери эки тарап чек араны тактоо боюнча утур-утур жолугушууларды өткөрүп келүүдө.

Тышкы иштер министри Жээнбек Кулубаев жакынкы айларда Өзбекстандын президенти Шавкат Мирзиеев Кыргызстанга мамлекеттик сапар менен келерин өткөн аптада билдирген эле.

Өзбекстанга 78 баш малды мыйзамсыз айдап өтүп сатууга аракет кылган адам кармалды

Жалал-Абад облусунун Аксы районунда Өзбекстанга 78 баш майда жандыкты мыйзамсыз айдап өтүүгө аракет кылган адам кармалды. Бул тууралуу Улуттук коопсуздук боюнча мамлекеттик комитетке (УКМК) караштуу Чек ара кызматы кабарлады.

Мекеменин маалыматына караганда, Аксы районундагы Ак-Дөбө айылынын 1998-жылы туулган тургуну А. у. Н. чек арадан айдап өтүүгө аракет кылган малдын болжолдуу баасы 780 миң сомду түзгөн.

Чек арачылар тиешелүү документтерди толтургандан кийин кармалган адам менен ал айдап өтүүгө аракет кылган малды андан аркы териштирүү үчүн компетенттүү органдарга өткөрүп беришти.

24-июлда Аксы районунда Өзбекстанга 36 баш майда жандыкты мыйзамсыз айдап өтүүгө аракет кылган үч киши кармалганы кабарланган.

Анжиянда кыргыз-өзбек мамлекеттик чек арасын демаркациялоонун уюштуруу-укуктук маселелери макулдашылды

Үстүбүздөгү жылдын 4-8-июлуна чейин Өзбекстан Республикасынын Анжиян шаарында Кыргыз Республикасынын жана Өзбекстан Республикасынын алдыдагы кыргыз-өзбек мамлекеттик чек арасын демаркациялоонун уюштуруу-укуктук маселелерин макулдашуу боюнча өкмөттүк делегацияларынын жумушчу топторунун кезектеги жолугушуусу болуп өттү.

Тараптар кыргыз-өзбек мамлекеттик чек арасын демаркациялоо процессин жөнгө салуучу ченемдик-укуктук жана техникалык документтердин долбоорлорун даярдашты.

Жолугушуу достук жана өз ара түшүнүшүү маанайында өттү.

Иш-чаранын жыйынтыгында Протоколго кол коюлду.

Кийинки жолугушуу Кыргыз Республикасынын аймагында өтөт.

УКМК төрагасы Камчыбек Ташиев менен Өзбекстандын Мамлекеттик Коопсуздук Кызматынын төрагасы Абдусалом Азизов чек арадагы макулдашыла элек Гавасай участкасын тик учак менен кыдырышты

Бүгүн, 2022-жылдын 17-майында, Кыргыз Республикасынын Улуттук коопсуздук мамлекеттик комитетинин төрагасы генерал-лейтенант Камчыбек Ташиев менен Өзбек Республикасынын Мамлекеттик Коопсуздук Кызматынын төрагасы генерал-лейтенант Абдусалом Азизов жолугушту. Бул тууралу УКМКнын басма сөз кызматы билдирет.

Эки өлкөнүн атайын кызматынын төрагалары биргеликте Жалал-Абад облусунун Ала-Бука районундагы чек ара тилкесиндеги макулдашыла элек Гавасай участкасын тик учак менен кыдырышты.

Тараптар тийиштүү маселелер боюнча өз ара пикир алмашты. Жолугушуу жылуу достук маанайда өттү жана тиешелүү чечимдер кабыл алынды.

Кыргызстан менен Өзбекстан чек араны демаркациялоо жараянын баштады

5-7-май күндөрү Бишкекте кыргыз-өзбек чек арасын тактоо боюнча жумушчу топтордун алгачкы жолугушуусу өтүп, анда демаркацияны жөнгө салуучу документтин долбоору талкууланды.

Маалыматка ылайык, жумушчу топтор кыргыз-өзбек чек арасын демаркациялоону уюштуруу жана укуктук маселелерди макулдашуу үчүн жолугушкан. Жыйынтыгында чек араны демаркациялоонун ченемдик-техникалык документинин долбоорун макулдашты.

Министрлер кабинетинин чек ара маселелери боюнча атайын өкүлү Назирбек Бөрүбаев такталган аймактарга белги орнотуу иштери жайында башталарын маалымдады.

“Делимитация болгон чек араны демаркациялоо боюнча биринчи жолугушуу өттү. Бул деген сөз жайында чек ара сызыктарына казык кагып, белгилөө деп түшүнсөк болот. Такталган аймактарга чыгып белгилөө башталат. Калган такталбаган сызыктар боюнча эми сүйлөшүү жүрөт”.

Бөрүбаев чек арадагы кайсы аймактарды чек ара белгилери коюларын тактаган жок. Анын айтымында, кийинки жолугушуу Өзбекстанда өтөт. Кыргызстан Өзбекстан менен Ош, Жалал-Абад, Баткен облустары аркылуу чектешет. Эки өлкө ортосундагы чек аранын узундугу 1378 чакырымды түзүп, 2017-жылдагы макулдашуунун негизинде анын 1170 чакырымы (85%), андан бери дагы 13% такталган.

Президент Садыр Жапаров 2021-жылы март айындагы Өзбекстанга мамлекеттик сапарында өзбек лидери Шавкат Мирзиёев менен чек арадагы негизги маселелерди үч айлык мөөнөттө чечүүнү макулдашкан.

Кыргызстандын Улуттук коопсуздук боюнча мамлекттик комитеттин төрагасы Камчыбек Ташиев бул сапардын жыйынтыгында “кыргыз-өзбек чек арасы 100% чечилип, эми расмий бекитүү гана калганын” маалымдаган эле.

Бирок кыргыз бийлигинин Кемпир-Абад суу сактагычына байланыштуу позициясы социалдык тармактарда сынга кабылып, Оштун Кара-Суу жана Өзгөн райондорунда жергиликтүү тургундардын катуу нааразычылыгы менен коштолгон. Ошондон кийин расмий Бишкек Кемпир-Абад суу сактагычынын плотинасын Өзбекстанга берүү макулдашуусунан баш тартарын жарыялаган.

Эки өлкө башчылар чек араны тез арада чечебиз деп айткан бир жылдан бери эки тараптан тең жергиликтүү эл чогулуп, бир-эки жолу майда түшүнбөстүктөр орун алды.

5-майда Жалал-Абад облусунун Ала-Бука районунун 48 жаштагы тургуну, 22-24 жаштардагы эки баласы менен өзбек чек арачыларынын огуна каза тапты. Бир ай мурун, 5-апрелде да өзбек аскерлеринин огунан кыргызстандык эки бир туугандын өмүрү кыйылган. Өзбек тарап алар мыйзамсыз жүк өткөрүүгө аракет кылган деп түшүндүрүүдө. Акыркы жылдары өзбек-кыргыз чек арасында ок атылган, адам өмүрү кыйылган кырдаал орун алган эмес.

Кыргыз-өзбек чек арасындагы окуяда ок атылып, эки киши каза болду

Кыргызстан менен Өзбекстандын чек арасындагы куралдуу чыр-чатакта эки адам көз жумду. Окуя 5-апрелде кечке жуук болгонун Кыргызстандын Улуттук коопсуздук мамлекеттик комитетинин Чек ара кызматы билдирди.

Каза болгондордун бири 37, экинчиси 31 жашта. Алар Өзбекстанда туулуп өскөнү, 2012-жылы Кыргызстандын жарандыгын алганы, өзбек паспортун да сактап жүрүшкөнү кабарланды.

Баштапкы маалыматтарга ылайык, Жалал-Абад облусунун Аксы районуна караштуу Дейрес айылында бир нече кыргыз жараны атчан Өзбекстандын аймагына жүк алып өтүүгө аракет кылып, кошуна өлкөнүн аймагына 500 метр киргени аныкталган. Өзбек чек арачыларынын токтотуу талабына баш ийбей, аларды кармоо учурунда чыр чыккан.

“Өзбек чек арачылары өз өмүрүн жана саламаттыгын сактап калуу үчүн курал колдонуп, эки жаран каза болгон. Калгандары Кыргызстандын аймагына качып кетүүгө үлгүрүшкөн”, – деп айтылат Чек ара кызматынын маалыматында.

Өзбек чек арачылары алар жалпы суммасы 20 000 АКШ долларынан ашык жүктү аткезчилик менен алып өтүүгө аракет кылышканын маалымдаган.

Окуя болгон жерде эки өлкөнүн чек ара өкүлдөрү жолугуп, кырдаалды талкуулашты. Жыйынтыгында ар бир тарап өз алдынча иликтөө жүргүзө турган болду.

Жалал-Абад облустук администрациясы каза болгон жарандардын сөөгү Маданият өткөрүү пункту аркылуу Кыргызстанга алып келинерин кабарлады.

Өзбекстан азырынча расмий маалымат тарата элек.

УКМК: Өзбек жарандарынын кыргыз-өзбек чек арасында мыйзамсыз текшерүүгө жана чек арачылардын опузасына кабылып жатабыз деген билдирүүлөрү чындыкка дал келбейт

Өзбек жарандарынын кыргыз-өзбек чек арасында мыйзамсыз текшерүүгө жана чек арачылардын опузасына кабылып жатабыз деген билдирүүлөрү чындыкка дал келбейт. Бул тууралуу Улуттук коопсуздук комитетинин (УКМК) Чек ара кызматы 31-июлда билдирди.

Маалыматка караганда, социалдык тармактарда тарап жаткан кайрылуулардын негизинде тиешелүү текшерүү жүргүзүлүп, анын жыйынтыгында айтылгандар тастыкталган эмес.

Чек ара кызматы 2021-жылдын июнь айындагы буйрукка ылайык, кыргызстандык жана чет өлкөлүк жарандар чек арадан өтүүдө санитардык-карантиндик посттордун кызматкерлерине ПЧР-тесттин терс жыйынтыгын же COVID-19га каршы эмдөө сертификатын көрсөтүшү керек экенин маалымдайт.

Ошол эле учурда, акыркы убакта жасалма маалымкат менен чек арадан өтүү аракеттери көбөйгөндүгү айтылат.

Буга чейин өзбекстандык жарандар чек арадан өтүүдө негизсиз текшерүү көп болуп жатат деген нааразылыктарын билдиришкен.

Меню