Menu

ДҮЙНӨ ЖҮЗҮНДӨ

Кореяда Кыргызстандын Соода үйүнүн расмий ачылышы болуп өттү

Түштүк Кореянын борборунда соода-экономикалык кызматташтыкты активдештирүү максатында 2022-жылдын 24-июнунда Корея Республикасында Кыргыз Республикасынын Соода үйүнүн расмий ачылышы болуп өттү.

Соода үйү Кыргызстандын Кореядагы элчилигинин демилгеси менен Кыргызстандан келген мекендешибиз, NAG Group компаниясынын президенти Надырбекова Гүлшайырдын жардамы менен түзүлүп, кыргыз продукциясын Корея рыногуна жылдыруу ниетин билдирген.

Расмий аземге Кыргыз Республикасынын Элчиси Аида Исмаилова, Корея импорттоочулар ассоциациясынын (KOIMA) президенти Бён Кван Ким, Кыргыз Республикасынын Корея Республикасындагы ардактуу консулдары Ким Джон Гу жана Ким Хосонг, ошондой эле Кыргызстандын жана Кореянын жарандары катышты. Элчи Аида Исмаилова өз сөзүндө Корея Республикасы менен соода-экономикалык кызматташтыкты өнүктүрүүнүн маанилүүлүгүн белгилеп, жакынкы арада Кыргызстандын продукциялары Корея Республикасынын ири соода борборлорунда сатылат деген ишенимин билдирди. Өз кезегинде, KOIMA президенти Бён Кван Ким кореялык ишкерлер кыргыз продукциясынын сапатын жогору баалаарын белгилеп, кореялык рынокко органикалык продукцияны жеткирүүгө кызыкдар экенин билдирди.

Соода үйүндө 23-июндан 25-июнга чейин «Import Goods Fair 2022» Эл аралык көргөзмөсүнө катышкан компаниялардын кийизден жасалган буюмдары, табигый бал, варенье жана башка продукциялары менен Кыргызстандын органикалык продукциялары коюлган.

ТИМ: Түркияда адам колдуу болуп өлтүрүлгөн кыргыз жаранынын сөөгү Бишкекке жөнөтүлөт

Үстүбуздөгү жылдын 20-июнунан 21-июнуна караган түнү Түркиянын Гиресун провинциясынын токоюнан адам колдуу болуп каза болгон аялдын жансыз денеси табылып, ал 1982-жылы туулган Кыргыз Республикасынын жараны К.Н. болуп аныкталды. Бул тууралу ТИМдин басм а сөз кызматы билдирет.

Учурда укук коргоо органдары тарабынан ыкчам-иликтөө иш-чаралары жүргүзүлүп, адам өлтүрүүгө шектелген түрк жарандары М.А. жана Х.Ч. кармалды. Башкы консулдук тарабынан жүк-200дү Кыргызстанга жөнөтүү маселеси иштелип жатат.

Бул жагдай Министрликтин көзөмөлүндө турат.

Финляндия Куралдуу күчтөрүнүн башкы командачысы: Орусия кол салса согушууга даярбыз

Орусия Финляндияга кол салууну чечсе, өлкө армиясы аларга каршылык көрсөтүүгө даяр. Бул тууралуу Финляндиянын Куралдуу күчтөрүнүн башкы командачысы, генерал Тимо Кивинен билдирди.

Анын айтымында, Финляндия ондогон жылдар бою учурда Украинада болуп жаткандагыдай согушка даярдыгын сактап келген. Кивинен өлкө НАТОго киргенден кийин да аймактык бүтүндүгүн сактоо үчүн негизги жоопкерчилик Финляндиянын өзүндө каларын белгиледи.

“Финляндия пландуу түрдө өзүнүн коргонуу жөндөмдүүлүгүн арттырып келет. Бүгүнкү күнгө карата өлкө 370 чакырым алыстыкка уча турган канаттуу ракеталарды алды. Ошондой эле жаңы төрт аскердик кемеге жана F-35 үлгүсүндөгү 64 согуштук учакка буйрутма берди. Мындан тышкары Финляндия 2 миңге чейин учкучсуз учактарды, абадан коргонуу каражаттарын сатып алууну жана Орусия менен чек арасына дубал курууну пландап жатат”, – деди Кивинен.

Финляндия ХХ кылымдын 40-жылдарында Советтер Союзу менен эки жолу согушкан: 1939-1940-жылдары болгон “кышкы согушта” өлкө өз аймагынын бештен бир бөлүгүн жоготуп, бирок эгемендигин сактап калган. Экинчи жолу Финляндия менен Советтер Союзу Экинчи дүйнөлүк согуш маалында согушкан. Бул эки согуштун жыйынтыгында 100 миңге жакын финн аскери курман болгон.

Экинчи дүйнөлүк согуштан кийин Финляндия нейтралдуу өлкө болууну чечкен. Ошондон бери нейтралдуулукту сактап келген финн бийлиги быйыл февралда Орусия Украинага кол салгандин кийин НАТОго кирүү ниетин билдирген. Учурда Финляндияны Түндүк атлантикалык альянска кабыл алуу боюнча сүйлөшүүлөр жүрүп жатат.

Орусиянын өкүлдөрү Финляндиянын НАТОго кирүүгө болгон аракетин айыптап келишет.

Финляндия жыл сайын коргонууга улуттук бюджетинин 2%га жакынын бөлөт.

Түштүк Кореянын Канвондо жана Чолла-Намдо провинциялары кыргыз жарандарын сезондук айыл чарба жумуштарына чакырууга даяр

16-июнда КР жарандарын чет өлкөлөргө ишке орноштуруу  борборунун өкүлдөрү Кыргызстандын Түштүк Кореядагы элчилигинин жардамы менен Канвондо, Чолла-Намдо провинцияларынын жана Улсан шаарынын өкүлдөрү менен жолугушту. Бул тууралу ТИМдин басма сөз кызматы билдирет.

Жолугушууларда КР жарандарын Түштүк Кореянын провинцияларында жана шаарларында келишимдик жумуштарга орноштуруу маселелери талкууланды.

Жергиликтүү бийлик органдары кыргыз тарап тартуулаган маалымат менен таанышып чыккандан кийин азыркы учурда аларга жумушчу күчтөрү керек экендигин баса белгилешти. Ошондой эле кыргыз жарандарын сезондук айыл чарба жумуштарына тартууга даяр экендиктерин билдиришти.

Бул жолугушууну элчилик Кореянын губернаторлорунун ассосациясынын (GAOK) жардамы менен уюштурду.

Андан башка да элчи Аида Исмаилова Кореянын «SEEDON» компаниясынын президенти Сон Хён Юль мырза жетектеген делегация менен жолугуп, кыргыз жарандарын сезондук айыл чарба жумуштарына тартуу мүмкүнчүлүктөрүн сүйлөштү.

Майндагы Франкфурт шаарында кыргыз диаспорасынын жолугушуусу болуп өттү

11-июнда Гессен федералдык аймагындагы Майндагы Франкфурт шаарынын паркында кыргызстандыктардын „Frankfurt Kyrgyz Community“ коому тарабынан уюштурулган иш-чара болуп өттү. Бул тууралу ТИМдин басма сөз кызматы билдирет.

Жолугушууга Германиянын ар кайсы шаарларынан келген 200гө жакын кыргызстандыктар, анын ичинде Майндагы Франкфурт шаарындагы Кыргыз Республикасынын Консулдук агенттигинин өкүлү катышты.

Катышуучуларга уюштуруучулар кыргыз ырчыларынын катышуусундагы музыкалык программа тартуулап, анда кыргыздын ыр-күүлөрү жаңырды, ар түрдүү улуттук тамак-аштар, суусундуктар берилди. Ошондой эле улуттук жана спорттук оюндар, ар кандай викториналар, сынактар ​​уюштурулду.

Назарбаев Путин менен жолукту

Казакстандын мурдагы президенти Нурсултан Назарбаев Москвада Орусиянын президенти Владимир Путин менен жолугуп, аны Орусия  күнү менен куттуктады. Бул тууралуу Назарбаевдин расмий сайты кабарлады.

Билдирүүдө Назарбаев менен Путин эки өлкө ортосундагы мамлелердин түптөлгөнүнүн 30 жылдыгына байланыштуу бири-бирин куттукташты.

“Тараптар бири-бирине бекем ден соолук, амандык тилеп, ортодогу достук байланышы мындан ары да Казакстан менен Орусия элининин жыргалчылыгы үчүн улана берерине ишеним артышты”, – деп белгиленген кабарда.

Казакстан Кремлди “Орусия күнү” менен куттуктаганы тууралуу маалымат Акордонун сайтына жарыяланган жок.

Назарбаев менен Путиндин жолугушуусу мурдагы президенттин мамлекеттик башкаруудагы таасири алсыраган учурга туш келди. Өткөн аптадагы референдумдан кийин күчүнө кирген Конституцияда туңгуч президент жөнүндөгү бардык сөздөр алынган. Мындан тышкары парламент сенатынын төрагасы Маулен Ашимбаев азыркы өлкө башчы эми Нурсултан Назарбаев менен “акылдашпай” турганын маалымдаган.

Ал ортодо ушул аптада Касым-Жомарт Токаев Орусияга барат деп күтүлүүдө. Акордонун билдиришинче, 17-июнда ал Владимир Путиндин чакыруусу менен 25-ирет өтө турган Петербург эл аралык экономикалык форумуна катышат.

Украин коргоо министри: күнүгө жүз чакты жоокерибиз набыт болууда

Украинанын коргоо министри Алексей Резников майданда күнүгө жүз чакты украин жоокери набыт болуп жатканын билдирди.

“Кармаш талаасындагы абал өтө оор. Күнүнө жүздөй жоокерибиз окко учуп, 500 чактысы жарадар болууда. Кремл аскерлеринин саны менен алып, чоң жоготууларга учурап, туруштукка туш болгону менен айрым тилкелерде алга жылууга кудуретүү”, – деп жазды министр Фейсбукка.

Резников постун башка өлкөлөрдөн курал-жарак алуу маселесине арнаган. Атап айтканда, польшалык “Краб” деген гаубицалар пайдаланууга даяр турганын маалымдады.

Согушкан тараптар өз жоготуулары тууралуу статистикасын чанда ачыкка чыгарат. Орусиянын Коргоо министрлиги акыркы жолу март айында бир жарым миңден көп аскери мерт кеткенин билдирген. Ошондон бери маалымат тарата элек.

Апрелде украин президенти Владимир Зеленский Орусия басып киргенден бери 2,5-3 миң украин аскери курман болгонун айткан. Июндун башында президент күн сайын армия 60-100 аскерин жоготуп, дагы 500дөйү жараат алганын билдирген.

Согушутун шартында тараптардын жоготуулары тууралуу маалыматтарды текшерүү мүмкүн эмес.

Украинадагы согуштан дагы бир тажикстандык өлдү

Украинада орус армиясынын катарында кызмат өтөгөн дагы бир Тажикстан жараны курман болду. 22 жаштагы исфаралык Сулаймонхужа Набиевдин сөөгүн жакындары 8-июнда Ростов облусундагы моргдон алып кетишти.

“Сулаймонхужа 2017-жылдан бери Орусияда иштеп жүргөн. Эки ай мурун ал орус жарандыгын алган жана Санкт-Петербургда каттоого турган. Ал жерден аны армияга алып кетишкен. Мен билгенден, ал Чеченстанда Гронныйдагы аскер бөлүктөрүнүн биринде кызмат өтөгөн. Качан Украинадагы согушка жөнөтүшкөнүн билбейбиз”, – деди маркумдун агасы Мерож Солиев.

Украин басылмалары тараткан маалыматка караганда, Украинада орус армиясынын курамында борбор азиялык 6 миңдей киши согушууда, алардын арасында 100дөй тажикстандык бар. Иш жүзүндө канча тажикстандык жортуулда экени белгисиз. Ушул күнгө чейин кеминде он тажикстандык Украинада окко учту. Бул маалыматты алардын жакындары ырасташууда.

АКШ чалгыны Путин апрелде рактан дарыланганын аныктады

Орусия президенти Владимир Путин апрелде  рактын акыркы стадиясынан дарыланган. Бул тууралуу Newsweek үч анонимдүү жогорку кызматтагы өз булагына таянуу менен билдирди.

Басылманын маалыматына караганда, апрелдин аягынан баштап, майдын ортосуна чейин америкалык атайын кызмат Путин катуу ооруп жатканын, өлүп калышы мүмкүн экенин айткан. Сыягы, коронавируска каршы обочолонуу анын чыныгы абалын жашырууга жардам берген.

Апрелдин башында “Проект” басылмасы 69 жаштагы президенттин сапарларын калкан бездеги ракка адистешкен лор менен хирургдар коштоп жүрө баштаганын жазган.

Кремль президенттин саламаттыгы боюнча билдирүүлөргө адатта комментарий бербейт. Бирок Путиндин басма сөз катчысы Дмитрий Песков “Проекттин” макаласына жооп берип жатып, материал ойдон чыгарылганын жана президенттин дени сак экенин айткан.

Булак: Борбор Азия жаңылыктар кызматы

Германиянын Вальдбрунн айылында “Кымыз майрамы” болуп өттү

29-майда Германиянын Баден-Вюртемберг федералдык аймагындагы Вальдбрунн айылында жергиликтүү кыргыз диаспорасы тарабынан уюштурулган “Кымыз майрамы” болуп өттү.

Бул иш-чара Германиядагы кыргызстандыктардын “Данек” атуу коому тарабынан уюштурулду жана ага Кыргыз Республикасынын Германиядагы Элчиси Өмүрбек Текебаев катышты. Элчи майрамга келген кыргызстандыктарды жана жергиликтүү немис тургундарын “Кымыз майрамы” менен куттуктап сөз сүйлөдү.

Бул майрамга Германиядан, Австриядан, Чехиядан келген 200 гө жакын кыргызстандыктар катышты. Иш-чарада Германияда жана Австрияда жашап жаткан таланттуу музыканттардын аткаруусунда кыргыз элдик күүлөр жаңырып, кыргыз улуттук оюндар тартууланды. Майрамга келген конокторго кыргыз улуттук тамактары жана кымыз сунуш кылынды.

Мындай иш-чара Германиядагы жана Европадагы кыргызстандыктардын ынтымагын мындайн ары да бекемдеп, кыргыздын улуттук каада –салтын, маданиятын немец жергесинде жайылтууга салым кошот.

Кымыз майрамы Вальдбрунн айылында Цольманн аттуу үй-бүлөлүк жылкы чарбасында болуп өттү. Бул чарба көп жылдан бери кымыз жасап, бээнин сүтүнөн ар кандай косметикалык жана медициналык азыктарды чыгарып, немец калкына тартуулап келе жатат.

Андан тышкары Элчи Ө.Текебаев Кирхард шаарында жайгашкан “RID GmbH” компаниясына барып Башкы директору В.Редер мырза менен жолугуп, компаниянын ишмердүүлүгү менен таарышты.

Жолугушуу учурунда Элчи Ө.Текебаев Башкы директор В.Редер менен Кыргызстанда ишти кеңейтүү боюнча маселелерин  талкуулады.

“RID GmbH” компаниясы электр генераторлорду чыгаруу жаатында иштейт жана 2019-жылы Кыргызстанда кыргыз-герман биргелешкен ишканасын ачып, азыркы тапта ийгиликтүү иштеп келүүдө.

Меню