Бүгүн, 28-мартта Жогорку Кеңеште “КР жергиликтүү өз алдынча башкаруу органдарына шайлоолор жөнүндө” мыйзам долбоору боюнча парламенттик угуу өтүп жатат. Бул тууралуу Жогорку Кеңештин Басма сөз кызматы маалымдады.
Мыйзам долбоорунун демилгечиси депутат Кенжебек Бокоев элеттиктердин маселесинде аймактардагы элдин ой-мүдөөсүн жеринде барып билүү үчүн республиканын бир катар облустарында парламенттик угууларды өткөрүп келгендигин билдирди. Демилгечи өз сөзүндө КР Башмыйзамында жергиликтүү өз алдынча башкаруу органдары өзүнчө институт экени белгиленгендигин, андам улам жер-жерлердеги башкаруу органдарынын бухгалтерлери Каржы министрлигинин алында каражат сурап жүрбөшү керектигин баса белгиледи. “Демек, финансылык децентралдаштырууну аягына чыгаруу керек”,- дейт демилгечи.
Депутат Кенжебек Бокоев мыйзам долбооруна киргизилип жаткан жаңы түзөтүүлөр катары жергиликтүү кеңештер менен айыл өкмөт башчыларын шайлоонун бир мыйзамга жыйнаштырылып жатканын, айыл өкмөт башчыларын түз шайлоо керектигин чечмелеп берди. Ал айыл өкмөт башчыларын жергиликтүү кеңештин депутаттары шайлап койгон учурда калың элдин катмары кандай адам айыл өкмөт башчысы болгондугу боюнча кабарсыз калып, нааразычылыктар жаралгандыгын кезинде өз башынан өткөргөнүн билдирди. Бул мыйзам долбоору боюнча жер-жерлерде өткөрүлгөн парламенттик угууларда жарандар айыл өкмөт башчыларын шайлоодо программалардын күрөшү болбой жатканын сынга алышкандыгын баса белгиледи. “Жергиликтүү кеңештердин 11 депутатын колго алып коюу толук мүмкүн экендигине ынандык”,- дейт К.Бокоев.
Демилгечинин маалыматы боюнча мыйзам долбоорундагы жаңы сунуштардын бири -жарандар айыл өкмөт башчылыгына өзүн өзү көрсөтө алышы. Ошону менен катар жергиликтүү кеңеш депутатарын шайлоону 4 жылдык мөөнөттөн 5 жылдык мөөнөткө алмаштыруу сунушталууда. К.Бокоев мындай түзөтүүнү дээрлик жыл сайын эле шайлоо өткөрөр бербей, Жогорку Кеңеш менен жергиликтүү кеңештердин шайлоосун бир жылга тууралоо максатка ылайык боло тургандыгы менен негиздеп берди.
“Айыл өкмөт башчысын түз шайлоону БШК тарабынан өткөрүлүп, каржылык чыгымдар кетери долбоордун терс жагы болгону менен мында уюшкан кылмыш топтору сындуу ар кандай күчтөрдүн жергиликтүү кеңеш депутаттарына болгон кысымдары түз шайлоодо болбойт”,- дейт мыйзам долбоорунун демилгечиси Кенжебек Бокоев.
Баяндамадан соң парламенттик угууга келгендер мыйзам долбоору боюнча ой-пикирлери менен бөлүшүүдө.
Белгилей кетсек, аталган парламенттик угууга Жогорку Кеңештин депутаттары, тармактык министрликтер менен ведомстволордун, жогорку окуу жайлардын тармактык факултеттеринин жана Чүй облусунун жергиликтүү өз алдынча башкаруу органдарынын өкүлдөрү катышууда.
Эске салсак, Жогорку Кеңештин депутаты К.Бокоев демилгелеген жана 2017-жылдын 16-февралында Жогорку Кеңеш тарабынан биринчи окууда кабыл алынган “КР жергиликтүү өз алдынча башкаруу органдарына шайлоолор жөнүндө” жана “КР айрым мыйзам актыларына өзгөртүүлөрдү киргизүү жөнүндө” (“Жергиликтүү өз алдынча башкаруу жөнүндө”, “Борбордун статусу жөнүндө”, “Ош шаарынын статусу жөнүндө”, “Жергиликтүү кеңештердин депутаттарынын статусу жөнүндө” мыйзамдарга) мыйзам долбоорлору боюнча кеңири талкууну камсыз кылуу максатында жер-жерлерде өткөрүлүп келе жатат.
