Кыргыз Республикасынын Президенти Сооронбай Жээнбеков бүгүн, 10-январда Нарын облусунун Жумгал жана Кочкор райондоруна иш сапар менен барып, райондордун жашоочулары менен жолугушту.
Кыргызстанда кезиктирүүгө мүмкүн боло турган өзгөчө сулуулукка ээ, экзотикалык канаттуу Кызыл канаттын сүрөттөрү фейсбук социалдык тармагына жарыяланды. Аны жарыялаган кесипкөй сүрөтчү Иван Турковский.
Кыргызстандын канаттууларуу тууралуу кыскача аңгемелерди жазып келген сүрөтчү бул жолу Кызыл канат (Обыкновенный фламинго (рус), Phoenicopterus roseus (Pallas, 1811) (лат), Greater flamingo (анг) тууралуу жазды.
“Ооба, бир караганга таңгалычтуу бирок, бул экзотикалык канаттууну бизде сезондук миграция убагында жана кыштоо учурунда Ысык-Көлдө кезиктирүүгө болот. Мен ошол жактан жолуктургам. Аянычтуусу мен алардын так ордун айта албайм, аны көрүүнү каалагандар канаттууга зыян келтиришеби деп кабатырланып жатам”, – деп жазат ал.
Автор мындан сырткары канаттуулардын өң-келбеттери, дене түзүлүшү тууралуу дагы жазган.
“Узун буттуу жана узун моюндуу, чоң, ылдыйга ийилип турган мурду бар канаттуу. Эркек менен ургаачысынын өңдөрү окшош, эркектери кичине чоңураак. Салмагы 2-4 кг, узундугу 125-145 см, канаты 31,0-35,4 см, канат керүүсү 140-160 см”, – деген Турковский.
“Биз өзүнүн табийгый өзгөчөлүгү жана улуулугу менен таңгалдырган укмуштуу өлкөдө жашайбыз, ушуну эстей жүргүлө жана этияттык менен мамиле кылгыла”, – деп кошумчалаган фотограф.
Бүгүн, 4-январда Ысык-Көлдүн Тоң районуна караштуу Кажы-Сай айылындагы баптисттердин “Бардык элдердин сыйынуу үйүн” өрттөп кетишкен. Караңгы түндөн пайдаланган белгисиз адамдар сыйынуу үйүнүн терезесин талкалап, ал аркылуу үйдүн ичине бензин чачып, анан от коюшкан. Бул тууралу маалыматты Владимир Цай аттуу блогер сүрөттөрү менен жарыялады.
Баптисттердин сыйынуу үйү Кажы-Сайга 1998-жылы курулуп, ошондон бери иштеп келаткан.
Бүгүн, 3-январда атак даңктуу америкалык киноактриса, модель, ырчы жана дизайнер Пэрис Хилтон өзүнүн социалдык тармактардагы баракчаларына жигити, киноактер Крис Зилка ага күйөөгө чыгууну сунуш кылган учурунан тартылган видеотасманы жарыялады.
https://www.youtube.com/watch?v=y4T-p1L6vgY
Анда Пэрис Хилтон менен анын жигити, теги украиналык Крис Зилка АКШнын Колорадо штатындагы Аспене тоосунда эс алып жүрүшөт. Бир учурда Крис Пэристин алдына чөгөлөй түшүп, чөнтөгүнөн атайын Пэрис үчүн даярдалган, баасы 2 миллион доллардык бриллиант шакекти алып чыгат. Пэрис аны манжасына кийгизишин күтүп турбай шашкалактап, жигити Кристин мойнунан кучактай калып, шакекти ала коюп өзүнүн манжасына өзү салып, кубанганын жашыра албай жаткандыгы тартылган.
Пэрис менен Крис жакынкы учурда үйлөнүү үлпөтүн өткөрүү боюнча да макулдашышкан. Алар 8 жылдан бери тааныш болушкан жана акыркы 2 жылда кыз-жигит катары сүйлөшүп жүрүшүшкөн.
Пэрис Хилтон 36 жашта, ал эми Крис Зилка 32 жашта. Крис Зилка киноактер жана модель катары белгилүү, ошондой эле 2011-жылдан тартып жыл сайын ал “Эң сексуалдуу телекиноактер” рейтингинде стабилдүү 19-орунду ээлеп келет.
Пэрис Хилтон бир кезде «Hilton Hotels» дүйнөлүк мейманканалар тармагынын ээси , миллиардер Бэррон Хилтондун мураскери болгон. Бирок чоң атасынын талаптарын аткарбагандыгы үчүн Пэрис мураскерликтен ажыратылган. Ага Пэристин мас абалында машина айдап, полицияга түшүп, 23 күн абакта жатканы себеп болгон. Ачууланган чоң атасы Пэристи 60 миллион доллардык мурастан эле ажыратып тим болбостон “биздин урукту уятка калтырдыңар” деп, бардык мураскерлерин кур жалак калтырып, 2,5 миллиард долларды кайрымдуулукка жумшарын билдирген.
“Форбс” журналынын маалыматы боюнча Пэрис Хилтон өзү иштеп тапкан 4 миллион фунт-стерлинг акчасы быйыл 16 миллион фунт-стерлингге жетүүсү мүмкүн.
Иран ислам республикасында 5 күндөн бери бийликке нааразы болгон эл толкуп, наразычылык акциялары улам кеңейип баратат.
Алгач 28-декабрда чыккан акциялар тоок эти менен жумуртканын кымбатташына каршы болсо ал тез эле от алып, 29-декабрда өлкөдөгү коррупцияга каршы, 30-декабрдан баштап саясый талаптарга айланып кетти. Эми демонстранттар жакырчылыкка, теңсиздикке, экономикадагы кризиске, Иран бийлигинин Россия менен союздаш болуп, мусулман өлкөлөрү Сирия жана Ирактагы согуштарга катышуусуна каршы чыгып жатышат.
Бүгүнкү күнгө чейин митингдер өлкөнүн 90 шаарына жайылып, борбору Тегеранга чейин жетти, акцияларда 20 адам каза болду.
Митингичилер полициянын машиналарын өрттөп, өздөрүн ташбараңга алышууда. Ирандын Жогорку лидери Али Хаманеинин сүрөттөрүн айрып, портреттерин өрттөп, эстеликтерине сийип жатышат. “Хаменейге өлүм!”, “Россияга өлүм!” деген чакырыктар көбөйүүдө.
Полиция ушу күнгө чейин 400дөн ашык митингичилерди камакка алганына карабастан митингичилердин саны улам көбөйүп баратат.
https://www.youtube.com/watch?v=DIIJePaG_7U
https://www.youtube.com/watch?v=Qlpc_1FBlKc
https://www.youtube.com/watch?v=E9fFLmvktv0
Кыргыз Республикасынын Президенти Сооронбай Жээнбеков бүгүн, 30-декабрда Жаңы жыл алдында Кыргыз Республикасынын Премьер-министри Сапар Исаков, Жогорку Кеңештин Төрагасы Дастанбек Жумабеков жана Жогорку соттун Төрайымы Айнаш Токбаева менен жолугушту.
Мамлекет башчысы аларды Жаңы жыл менен куттуктап, бардык бийлик бутактарына жакшылыктарды жана мамлекетти өнүктүрүп, кыргызстандыктардын бакубатчылыгын жогорулатууга багытталган ишмердигине ийгиликтерди каалады.
«Өткөн жыл татаал болсо да, жалпысынан жакшы болду. 2017-жыл өлкөнүн баардык жашоо тармагында кыйла өсүш жана олуттуу жетишкендиктер менен жыйынтыкталууда. 2018-жылга карата алдыда чоң милдеттер турат, биргелешкен аракеттер менен өлкөнү өнүктүрөбүз, туруктуулукту бекемдейбиз жана кыргызстандыктардын социалдык-экономикалык абалын жакшыртабыз», – деп белгиледи Президент Сооронбай Жээнбеков. Мамлекет башчысы Кыргызстанга гүлдөп өнүгүү жана кыргызстандыктарга бакубатчылык каалады.
Бүгүн, 29-декабрда Сөз эркиндигин коргоо комитетинин аткаруучу директору Адил Турдукулов КР Жогорку сотунун алдында бийлик тарабынан куугунтукка алынган журналисттерге жардам иретинде акча жыйноо акциясын өткөрдү. Бул акцияны өткөрүүгө милиция каршы чыкканына карабай Турдукулов Кыргызстанда сөз эркиндигин басмырлоо күчөп жаткандыгына коомчулуктун көңүлүн бурдуруу аракетин жасады.
Адил Турдукулов бул акцияны ушул жуманын башында социалдык тармактарда баштап, Элсом электрондук капчыгын ачкан: 0555750882.
Натыйжада бүгүнкү күнгө чейин ал капчыкта 20 миң сом акча жыйналды.
Кыргыз Республикасынын Президенти Сооронбай Жээнбеков кечээ, 25-декабрда Казакстан Республикасына жасаган расмий сапарынын алкагында Казакстан Республикасынын Президенти Нурсултан Назарбаев менен тар курамда жолугушту.
Кыргызстандын Президенти Сооронбай Жээнбеков Казакстандын Президенти Нурсултан Назарбаевге Казакстанга расмий сапар менен келип кетүүгө чакыргандыгы жана жылуу кабыл алган меймандостугу үчүн ыраазычылык билдирди.
“Бул жыл биздин өлкөлөрүбүз жана элдерибиз үчүн абдан маанилүү жыл болуп эсептелет. Биз мамлекеттерибиздин ортосунда дипломатиялык мамилелер орнотулгандыгын 25 жылдыгын чогуу майрамдап жатабыз. Чындыгында элдерибиздин ортосундагы мамилелер кылымдарды карыткан, бизди тууганчылык мамилелер, салттардын, тилдин жана маданияттын жалпылыгы ажырагыс кылып байланыштырып турат. Эгемендик жылдары кыргыз-казак мамилелери стратегиялык өнөктөштүктүн жана союздаштыктын маанайында өнүгүп келатат. Кыргызстан мурдагыдай эле Казакстан менен эки тараптуу мамилелерди тереңдетүүгө жана активдештирүүгө багытталган тышкы саясатын жүргүзө берет”, -деди Президент Сооронбай Жээнбеков.
Мамлекет башчысы Сооронбай Жээнбеков Казакстан Кыргызстандын стратегиялык өнөктөшү экендигин, эки өлкөнүн союздаштык мамилелерин чыңдоого жана өнүктүрүүгө бардык күч аракетин жумшаарын баса белгиледи.
Казакстандын Президенти Нурсултан Назарбаев өз кезегинде Кыргызстандын Президенти Сооронбай Жээнбековдун Казакстанга келгенине кубанычта экендигин белгиледи. “Кыргыз эли Сизге ишеним көрсөтүп, өзүнүн Президенти кылып шайлады. Казакстанга кош келиңиз, биз Сизди меймандос казак жеринде көргөнүбүзгө курсантпыз. Биз келебиз, кетебиз, эл калат. Ошондуктан бир туугандык, достук мамилелерди аздектеп, кийинки муунга калтырып кетиш – биздин милдетибиз”,- деп баса белгиледи Нурсултан Назарбаев.
Ал Минскиде 2017-жылдын 30-ноябрында болгон жолугушууда эки тараптуу өз ара аракеттенишүүнүн бир катар маселелери чечилгендигин белгилеп, Казакстан Республикасына расмий сапар менен келген Сооронбай Жээнбековго жылуу сөздөрдү жолдоду.
Казакстандын Президенти Нурсултан Назарбаев Кыргызстандын Президенти Сооронбай Жээнбековго Кыргызстандын жаркын келечеги, эки өлкөнүн элдеринин достугу жана жыргалчылыгы үчүн жоопкерчиликтүү кызматында ийгиликтерди каалады.
Бүгүн, 26-декабрда Сөз эркиндигин коргоо комитети 2017-жылдын жыйынтыктарын чыгарып, сөз эркиндигин коргоо жаатында жылдын мыктыларын атады:
Ооганстандын Памиринен эки ай мурун Нарынга көчүп келген Ширинбүнү “Спутник Кыргызстан” маалымат агентигинде иштеген кесиптештер Бишкекте белгилүү дизайнер Замира Молдошеванын Мода үйүнөн кийим тандап кийинтип, “Люкс” салонунун визажисттерине макияж жасатышкан. Натыйжасы бизди таңгалдырды. Сиздичи?
Улуу жана Кичи Памирди жердеген кандаштарыбыздын Кыргызстанга көчүп келгенине эки айга чукулдап калды. Учурда Нарын жергесинде жашап жаткан 41 адамдын сегизи — кыз-келиндер. Бүгүн алардын бири, сырдуу жана уялыңкы жылмайган Ширинбү Абдулбаит кызы менен маектешип, кепке тарттык.
Sputnik Кыргызстан алыскы Афганистан аймагындагы Памир тоолорунда өскөн Ширинбүнү окурмандарга башка өңүттө көрсөтүүгө аракет кылды.
Ширинбү Абдулбаит кызы учурда 18 жашта. Турмушка чыкканына үч ай болду. Күйөөсү Фазылхак Абубакир уулу экөө тең Кичи Памирде туулуп өскөн. Жаш келин үй-бүлөсү, кайындары, атасы менен кошо келген, учурда Куланак айылында жети киши болуп жашайт.
Ширинбү билим алууга умтулуп, айылдагы лицейде окуп, тамга таанып жатат.
Ширин башкалары менен ошол айылдагы лицейде билим алып, ариптерди таанып жаткан кези. Ал эми кожойке катары кыргызстандыктардын ашканасын өздөштүрө баштагандыгын айтты.
“Салаттарды, манты, бешбармак жасайм. Боткону жана гречкадан тамак жасаганды үйрөндүм. Памирде колго жууйт элек. Азыр кирди машинеге салып коём”, — деди Ширинбү.
Ал Кыргызстан, Нарын жаккандыгын, жашоо-шарттын жакшылыгын, климат жумшак экендигин айтып отурду.
Анткен менен биздин памирлик бул келин туулуп өскөн жерин, курбуларын сагынып жаткандыгын жашырган жок.”Кыздарды, сиңдилеримди, жеңелеримди улам эстеп коюп жүрөм. Алар менен сүйлөшкөн бир кызык эле. Бирге сууга барып, бирге топоз сааган, торпок байлаган учурларды сагындым”, — деди ал.
Биздин каарман ооз комузда ойноп жана бир нече күүлөрдү черте аларын айтып берди.
“Ооз комузда ойнош оңой эмес. Жеңелерим менен сууга барганда же эч ким жок болгондо, аялдар өзүбүз калганда ээн-эркин отуруп алып, кагат элек”, — деп эстеди Ширинбү.
Ширинбүгө кийимдерди Замира Молдошеванын Мода үйү тандап, “Люкс” салонунун визажисттери иштеди.
