Menu

КРИМИНАЛДЫК ХРОНИКА ЖАНА ОКУЯЛАР

Өзбекстан бала бакчаларында педагогикалык билими жоктор иштен айдалууда

Өзбекстанда март айынан тарта бардык бала бакчаларда текшерүү жүрүп, педагогикалык билими жок кызматкерлер жумуштан бошотулууда. Айрым маалыматтар боюнча мындан ары жогорку  билими барлар гана ишке алынат.

Мектепке чейинки билим берүү мекемелериндеги аттестациялар Сурхандарыя облусунда чыккан жаңжалдан кийин жүргүзүлүүдө.

Билим берүү министрлигинен кабарлашкандай, текшерүү маалында тарбиячылардын балага болгон мамилесине, окутуу методикасына, тарбия берүү ыкмасына көңүл бурулууда.

Бул арада айрым тарбиячылар көп жылдык иш тажрыйбалары эске алынбай, педагогикалык билим жок деген жүйө менен иштен бошотулгандарына нааразы болушууда.

Буга чейин Сурхандарыя облусундагы бала бакчалардын биринде тартылган делген видео интернетке тарап кеткен. Анда тарбиячылар балдарды бычак менен коркутуп, ур-токмокко алып, түнкүсүн имарат “сойкуканага” айланганы көрсөтүлгөн. Мындан соң облустагы 290 бала-бакчада текшерүү жүрүп, 23үндө интимдик кызмат көрсөтүлүп келгени аныкталган.

Булак: “Борбор Азия жаңылыктар кызматы”

Тажик алюминий компаниясы менен орусиялык РУСАЛдын сотуна чекит коюлду

Көп жылдан бери соттошуп келе жаткан орусиялык РУСАЛ компаниясы менен тажикстандык ТАЛКО алюминий компаниясы элдешти. Тажик өкмөтүндөгү өз булак кабарлагандай, тараптар орусиялык олигарх Олег Дерипаскага таандык “Hyatt Regency” мейманканасы менен ”Созидание” бизнес-борборун сатып алуу-сатуу боюнча макулдашууга жетишип, жакынкы арада тиешелүү меморандумга кол коюлат.

Макулдашууга ылайык, ТАЛКО мамлекеттик компаниясы “Hyatt Regency” мейманканасы менен “Созидание” бизнес-борборун $150 млн сомго сатып алат. Каражат РУСАЛ компаниясынын эсебине 10 жыл аралыгында которулат.

РУСАЛ компаниясы Тажикстандагы ишин былтыр октябрда токтоткон. Компания өкүлдөрү мындан ары бул өлкөдөгү иштеринин келечеги жок экенин билдиришкен.

РУСАЛ Тажикстанга Рогун ГЭСин куруу үчүн келген. Миллиардер, Кремлге жакын Олег Дерипаска ГЭСти куруу үчүн $600 млн бөлүүнү убдалаган. Бирок кийинчерээк өнөктөштөр тил табышпай, РУСАЛ Рогун ГЭСин куруудан баш тарткан.

Орусиялык компания 2000-жылы ТАЛКО компаниясына сырьё жеткирүү жана ишканага продукция сатуу мүмкүнчүлүгүнөн ажырагандан кийин соттук дооматтар башталган. Жыйынтыгында Олег Дерипаска ТАЛКО менен араздашуудан баш тартып, жагдайды тынч жол менен жайгарууну чечкен. Тажик тарап орусиялык кесиптештерин канааттандыра турган бир нече бизнес сунуштарды бергени кабарланууда.

 

Ошто милициянын подполковниги кызганычтан улам өлтүрүлгөн

Ош шаардык ички иштер башкармалыгынын басма саз кызматы милициянын подлолковниги Таирбек Уларовдун адам колдуу болуп өлтүрүлушү тууралуу иликтөөнүн жүрүшү боюнча кошумча төмөнкүлөрдү билдирет:

Мурда маалымдагандай, бул кылмышка шектүү катары төрт адам кармалган эле. Алардын ичинен үй-бүлө башчысы гана, 1972-жылы туулган Ош шаарынын тургуну Д.Ш. учурда Ош шаардык ички иштер башкармалыгынын убактылуу кармоочу жайына киргизилди. Бул өзгөчө оор кылмышка негизги шектүү катары кармалган Д.Ш өз көрсөтмөсүндө бул кылмышка өзү гана баргандыгын, өзүнүн жубайын кызгангандыктан ушундай болгондугун айтып, өз адвокатынын катышуусу менен жүргүзүлгөн суракта күнөөсүн моюнуна алды.

Анын көрсөтмөсүнө ылайык, маркум Таирбек Умаров анын аялы иштеген кичи дүкөнгө көп келип, активдүү кардарынан болгон (Таирбек Уларовдун иштеген мекемеси жакын жерде жайгашкан). Ал өз көрсөтмөсүндө төмөнкүлөрдү билдирди: “21-март күнү айылыбызда сүмөлөк кайнатылып, коңшулар менен отурганбыз. Анан аялымдын телефонуна Таирбек чалып, аны чакырды. “Эмне үчүн чакырып жатат?”-деп сурасам, аялым: “Карызын берет экен” деди. Артынан 20 минутадан кийин барсам, экөө сүйлөшүп турушуптур. Мен азыраак ичимдик ичкен элем. Таирбек кызуу болчу. Экөөбүз айтышып кеттик. Анан ал “эркекче сүйлөшөлү” деди. Экөөбүз Учар тарапка, канал боюна бардык. Ал дагы намысыма тийген ачуу сөздөрдү айтты. Мен ачуумду токтото албай, аны колумдагы балдак менен башка бир чаап жибердим. Футбол ойноп, бутумду кокустатып алгандыктан, убактылуу балдак таянып жүргөм. Ал отура калды… Мен коркуп кетип, колума тийген миздүү таш менен дагы бир нече ирет башка чаап жибердим. Ал жыгылып калды. Бирок, сөгүнүп жаткан. Мен аны арткы орундукка чалкасынан жаткырып, автомашинасынын ключун зажиганиеден сууруп алдым да, чип менен эшиктерди жаптым. Анан кан болгон ташты жана автомашинанын ачкычын сууга ыргытып жиберип, өзүмдүн машинамды айдап, сүмөлөк болуп жаткан жерге келдим. Туугандарыма болсо “Таирбек үйүнө кетти” деп койгонмун. Окуя кызганычтан, кызуу кандуулукка алдыргандан болду, өлтүргүм келген эмес эле”.

Кылмышка шектүү Д.Ш.нын бул көрсөтмөсү дагы терең иликтенет, анын бул кылмышка өзүнүн гана катыштыгы болгондугу текшерилет.

Маалым болгондой, кылмышка шектүү адам маркумдун оор жаратына карабастан жардам көрсөтүүгө ашыккан эмес. Ал мурда, 2008-жылы соттолгондугу жана Бишкек шаардык ички иштер башкы башкармалыгы тарабынан издөөдө жүргөндүгү аныкталды. Эч жерде иштебейт. Бул өзгөчө оор кылмыштын бети Ош шаардык ички иштер башкармалыгынын кызматкерлеринин тынымсыз жүргүзгөн оперативдүү иликтөө, издөө иштеринин натыйжасында, изи сууй электе 24-мартта ачылды.

Булак: “Майданkg”

Германияда Талибандын командири делген ооган жараны кармалды

Германияда америкалык жана ооган аскерлерин өлтүргөн деген шек менен 30 жаштагы ооган жараны кармалды.

Федералдык прокуратуранын 28-марттагы билдирүүсүн ылайык, Абдулла П аттуу жаран террордук уюмга мүчө болгон жана адам өлтүргөн деген шек менен Бавариянын түштүк штатында 23-мартта кармалган.

Билдирүүдө ошондой эле шектүү 2002-жылы «Талибан» кыймылына кошулуп, 2004-жылы командирликти атасынан өткөрүп алганы айтылат.

Прокурорлордун маалыматына караганда, ал чет өлкөлүк жана ооганстандык аскерлерге каршы көптөгөн миссияларга, анын ичинде 16 америкалык жана ооган аскеринин өмүрүн алган аскерий конвойго кол салуу операциясына да катышкан.

Шектүү 2009-жылы Пакистан качып, 2011-жылы мигрант катары Германияга барганы кабарланууда.

Булак: “Борбор Азия жаңылыктар кызматы”

Казакстандын Тараз шаарында антитеррористтик машыгуулар өттү

Тараз шаарынын полициясы антитеррористтик машыгуулар өтүп жатканын билдирип, шаар тургундарын дүрбөлөңгө түшпөөгө чакырды.

Полициянын билдирүүсүндө «Наурыз Антитеррор» аталышындагы антитеррордук машыгуулар терроризмге каршы күрөшүү боюнча облустук ыкчам штабдын жана анын бөлүмдөрүнүн биргелешкен ишин жөнгө салуу максатында өткөрүлүп жатканы айтылган.

Андан сырткары машыгуулардын жүрүшүндө кабар берүү системасы жана терродук чабуул болгон делген аймакка ыкчам штабдын күчтөрү менен техникаларын жеткирүүнүн уюшкандыгы текшерилет.

Казакстанда аскердик машыгуулар 2016-жылы июнда Актөбө шаарында болгон кол салуудан кийин көп өткөрүлө баштады. Айрым машыгуулар маалында коомдук объекттерге кирүү мүмкүндүгү чектелген учурлар да болууда.

Булак: “Борбор Азия жаңылыктар кызматы”

Тажикстанда жоокердин өлүмү боюнча лейтенант соттолду

Дүйшөмбү гарнизонунун Аскердик оту катардагы жоокер Жахонгир Курбоновдун өлүмү үчүн чек ара аскерлигинин офицери Ёрибек Саидовду 9 жылга эркинен ажыратты.

Офицер «кызмат абалын кыянат пайдалануу» беренеси боюнча күнөөлүү деп табылды. Буга чейин прокуратура аны «опузалоого» жана «жарандардын тең укуктуулугун бузууга» айыптап, соттон офицерди 14 жылга эркинен ажыратууну өтүнгөн.

Соттун мындай чечимине эки тарап тең макул болгон жок. Офицердин адвокаттары чечим боюнча жогорку баскычтагы сотко кайрыла тургандыктарын билдиришти. Жоокердинтуугандары да соттун Жахонгир Курбонов өз жанын кыйган деген чечимин туура эмес деп эсептешип, анын өлтүрүлгөнүн айтышты.

Прокуратуранын маалыматы боюнча, 2016-жылдын 9-сентябрында жоокерлер Жахонгир Курбонов менен Мехрожиддин Бехзоддун нөөмөтү маалында Дүйшөмбүдөгү аскер бөлүгүнөн электр жылыткычы жоголгон. Буга байланыштуу лейтенант Ёрибек Саидов аскер кызматкерлерине жаман сөздөрдү айткан. Анын эртеси Жахонгир Курбонов аскер бөлүгүнүн отунканасына барып асынып алган.

«Тажикстандагы жарандык эркиндик кеңсеси» укук коргоо уюму кылмыш ишиндеги материалдарга таянуу менен Саидов «электр жылыткычтын уурдалышын эки жоокерден көрүп, алардан акча талап кылгандыгын» кабарлаган.

Булак: “Борбор Азия жаңылыктар кызматы”

УКМК мародерчулук боюнча экс-депутат Райкан Төлөгөновду кармады

Бул тууралуу Улуттук коопсуздук комитетинин коомчулук менен байланыш бөлүмү билдирди. Маалыматка караганда, атайын кызматтын Тергөө башкармалыгы 16-марттан тарта 2010-жылдын апрель окуясындагы талап-тоноо, мародерчулук боюнча козголгон кылмыш ишти иликтеп жатат.

“Кылмыш иштин алкагында жүргүзүлгөн тергөө жана ыкчам-иликтөө иштеринин жүрүшүндө 2010-жылдын 7-апрелинен 10-апрелине чейинки аралыкта кеңселерди, турак жайларды, анын ичинде Бакиевдин жана анын жакындарынын үй-бүлөсүнө таандык мүлктөрдү талап-тоноо “Ата Мекен” партиясынын мурдагы депутаты Райкан Төлөгөновдун түздөн-түз башкаруусу алдындагы топ тарабынан жасалганы аныкталды. Тергөөдө материалдар жана бул кылмышка катышкан бир катар күбөлөрдүн көрсөтмөлөрү бар”, – деп айтылат УКМКнын билдирүүсүндө.

28-мартта Райкан Төлөгөновго “талап-тоноо уюштуруу”, “атайылап мүлктү жок кылуу жана зыян келтирүү”, “куралдарды, жардыргыч заттарды мыйзамсыз алуу, сактоо” беренелери боюнча кылмыш иши козголуп, Биринчи май райондук сотунун чечими менен тергөө бүткүчө УКМКнын тергөө абагына камакка алынганын кошумчалады атайын кызмат.

Райкан Төлөгөнов 2010-2015-жылы “Ата Мекен” партиясынын Жогорку Кеңештеги депутаты болгон. “Ата Мекендин” лидерлери буга чейин талап-тоноочулукка тиешеси бар деген айыптоолорду четке кагып, курулай жалаа экенин билдирип келишкен.

Булак: “Борбор Азия жаңылыктар кызматы”

Белгилүү тележурналист Ислам Каримовдун көңүлдөшү болгонун четке кагууда

Кезинде Өзбекстандын маркум президенти Ислам Каримовдун басма сөз катчысы болуп иштеген совет доорундагы белгилүү өзбек тележурналисти Лола Хатамова мамлекет башчы менен болгон сүйүү мамилелери тууралуу айтылган ушактардан улам коомчулуктан четтегенин билдирди.

Лола Хатамова «Азаттыктын» өзбек кызматына курган эксклюзивдүү маегинде Ислам Каримов менен чырдашкандан кийин алгач жумуштан бошоп, кийин АКШга көчүп кеткенин билдирди. Ал өлкөнүн туңгуч президенти менен сүйүү мамиледе болбогонун, бирок Каримовдун ага карата мамилеси жана анын 1990-жылдардагы карьералык өсүүсү түрдүү ушактарды жаратып, жыйынтыгында президенттин аппаратынан кетишине себеп болгонун айтты.

“Ал кезде мен жаңы гана иштеп баштаган жаш кадр болгом жана мамлекет башчынын көңүлүнө жаккыдай эч нерсе деле кылган эмесмин. Анан да ал кезде өзбек коомчулугунда улутчулдук көз караштар күчтүү болгон. Көпчүлүгү Ислам Каримовдун аялынын орус улутунан экенин жакшы билишчү. Ошондуктан айрым орустар айтып жүрүшкөндөй ал орус аялы менен ажырашып, өзбек аял алат деп ойлошкондур. Мен мындай кептердин кайдан чыкканын билбейм, бирок алар менин жумуштан бошошума себеп болгону чын”,- деди Хатамова.

Ал Ислам Каримов бүтүндөй бир мамлекеттин башчысы болуп алып кичинекей баласы бар жалгыз аялга болгон күчүн көрсөткөнүн айтып, ага карата таарынычын билдирди.

Лола Хатамова дагы деле Өзбекстандын жараны экенин жана мекенине тез-тез барып, жаңы мамлекет башчысынан жакшы өзгөрүүлөрдү гана күтүп жатканын айтты.

Булак: “Борбор Азия жаңылыктар кызматы”

Ысык-Көлдө 13 жаштагы өгөй кызын зордуктаган адам 15 жылга соттолду

2017-жылдын 14-февралында Ысык-Көл областтык сотунда 1968-жылы Ысык-Көл областынын Түп районунда туулган, билими орто, никеси жок, эч жерде иштебеген, мурда соттолбогон М. Бекташовдун жазык иши каралды. Бул тууралуу Ысык-Көл областтык сотунун басма сөз кызматы маалымдады.

Кыргыз Республикасынын Кылмыш-жаза кодексинин 129-бер. (Зордуктоо) 3-бөл. 1, 3 бөлүкчөлөрү боюнча күнөөлүү деп табылып, 15 (он беш) жылга эркинен ажыратылган. Жазасын күчөтүлгөн тартиптеги абакта өтөөсү белгиленген.

М. Бекташов 2011-жылдын 2-ноябрында болжол менен саат 08:00-09:00 үйдө эч ким жоктугунан пайдаланып өзүнүн 13 жаштагы өгөй кызын зомбулук көрсөтөм деп коркутуу менен алсыз абалынан пайдаланып, анын каалоосуна жана эркине каршы жыныстык катнашта болуп зордуктаган. Кийин дагы ал: “Апаңды, сени өлтүрүп коём,” – деп коркутуп зордуктоону уланткан. Натыйжада 2012-жылдын 7-майында ал кыздын 24 жумалык бала боюнда болуп калганы билинген. Туугандарынын чечими менен 2012-жылдын 14-майында 25 жумалык жетилбеген эркек баланы алдын ала төрөтүү менен боюнан түшүп, төрөлгөн бала жетилбегендиктен өлүп калган.

Биринчи инстанциядагы соттун өкүмү менен макул болбой соттолуучу М. Бекташов апелляциялык тартипте даттануусу менен областтык сотко кайрылган.

Ысык-Көл областтык сотунун соттук коллегиясы иштин ичиндеги материалдарды изилдеп чыгып, апелляциялык даттануунун жүйөөлөрүн талкуулап, процесстин катышуучуларынын көрсөтмөлөрүн угуп биринчи инстанциядагы соттун өкүмү өзгөртүүсүз, ал эми М. Бекташовдун апелляциялык даттануусу канааттандыруусуз калтырылууга жатат деген жыйынтыкка келген.

Ысык-Көл областтык сотунун соттук коллегиясынын 14.02.2017-жылдагы өкүмү менен Каракол шаардык сотунун 07.09.2015-жылдагы М. Бекташов жөнүндөгү өкүмүн өзгөртүүсүз, апелляциялык даттануу канааттандыруусуз калтырылган.

Өкүм жарыяланган күндөн тартып күчүнө кирет жана мыйзамда көрсөтүлгөн тартипте нааразы тарап Кыргыз Республикасынын Жогорку сотуна даттанууга укуктуу.

Тумандан улам Уфа-Хожент каттамын аткарган учак Кулябга конду

«Урал аба жолдору» авиакомпаниясынын Уфадан Хожентке учкан учагы коюу тумандан улам Куляб шаарынын аэропортуна конууга аргасыз болду.

Хожент эл аралык аэропортунан билдиришкендей, Уфа-Хожент каттамын аткарып жаткан «Аэробус 320» учагы түнкү саат үчтө аэропорт аймагына келип, бирок коюу тумандан улам коно алган эмес. Андан соң учкуч Куляб шаарына барып конуу чечимин кабыл алган.

Аэпорттун маалыматына караганда, учак туман тарагандан кийин Хожентке кайтып келип, саат 5те 115 жүргүнчүсү менен кайра Уфага учуп кеткен.

Хожент эл аралык аэропортунун жетекчилиги учактын экипажы адашып кетип, Кулябга конгону тууралуу айтылган ушактарды четке какты.

Булак: Борбор Азия жанылыктар кызматы

Меню