КР Генералдык прокуратурасы үстүбүздөгү жылдын 13-апрелинде КР Бажы кызматынын айрым жетекчилерине ири суммадагы уурдап-тоноолор боюнча кылмыш ишин ачкандыгын биздин укук коргоо органдарындагы ишенимдүү булактарыбыз билдирди. Азыр ошол кылмышка тиешеси бар айрым бажы жетекчилери ал кылмыш ишти жабуу үчүн 500 миң доллар сунуш кылып жатышкандыгы айтылууда.

Генералдык прокуратуранын кызматкерлери иликтеп чыккан маалыматтарда 2015-жылдын 11-сентябрында КР Бажы кызматынын жетекчилери кызмат абалынан кыянаттык менен пайдаланып, өздөрүнө пайда табуу максатында  “Айхан” жеке менчик фирмасына 750.000. даана (850.000. кг ) терини Кытайдагы Urumchi Qapsan International  Trading  LTD компаниясында кайра иштетүүгө уруксат кагазын беришкен.

Бирок “Айхан” фирмасынын жетекчиси Г.Умарова бул уруксат кагазы тууралу билген да эмес. Анын атынан №25-04-11/6518 номурлуу уруксат кагазын бажы кызматынын жетекчилери менен азырынча аты-жөнү белгисиз шылуундар даярдашкан да товар жогорудагы аты аталган Үрүмчүдөгү компанияга эмес, Алашанку шаарындагы “SUE KE” фирмасына жөнөтүлгөн.

Натыйжада Кытайга 6,5 миллион доллардык  товар мыйзамсыз чыгарылып, мамлекеттин казынасына 167 миллион сом бажы төлөмдөрү түшпөй уурдалып кеткен.

Бул фактылар боюнча КР Генпрокуратурасы КР Кылмыш-жаза кодексинин 210; 221; 304- беренелери боюнча кылмыш ишин козгоп, тергөөнү Экономикалык кылмыштар боюнча мамлекеттик кызматтын тергөө бөлүмүнө өткөрүп берген.

Ал кезде, 2015-жылы сентябрда КР Бажы кызматын Адамкул Жунусов жетектеген. 2016-жылы кызматтан бошогондон кийин, июль айынан тартып, Кыргызстандын квотасы боюнча Евразиялык экономикалык комиссиянын Энергетика жана инфраструктура министри болуп, Москвада иштеп жүрөт. Бирок, акыркы жумада Адамкул Жунусов Бишкекте жүргөнү дайын болду.

Булак: Кyrgyztoday.kg

Жогорку Кеӊештин депутаты Наталья Никитенко баштаган калктын аялуу катмарына көрсөтүлүүчү социалдык кызматтарды жакшыртуу максатында мыйзам иштеп чыгуу үчүн түзүлгөн жумушчу тобунун мүчөлөрү 16-күнү Чүй облусунун Москва районундагы “Ак-Ниет” күндүзгү окутуу-калыбына келтирүү борборунун абалы менен таанышышты. Бул тууралу парламенттин басма сөз кызматы билдирет.

Ал жерде окуп жана саламаттыгына байланыштуу ар кандай дарылоо ыкмаларынан пайдаланып жаткан жарандар менен балдардан кабар алган депутат Наталья Никитенко, “Мамлекет калктын аялуу катмарына жөлөк пул берүү же жардамга муктаждарды интернаттарга жайгаштыруу менен гана чектелүүдө. Тилекке каршы, мындай ыкма алардын толук кандуу коомго аралашуусуна жардам бере албай келет. Тагыраагы, өз үйүндө жакындарынын жанында жөлөк пул менен жашагандар толук билим албай калып жатса, интернатка жайгаштырылгандары жакындарынан алыс калып, ар кандай кыйынчылыктарга кептелүүдө. Андыктан, “Ак-Ниет” борбору сыяктуу күндүзгү окутуу-калыбына келтирүү мекемелерин өлкөнүн баардык аймактарына ачуу менен жергиликтүү бийлик органдарынын бул жааттагы мүмкүнчүлүктөрүн кеӊейтүү максатында атайын мыйзам долбоорун иштеп чыгуу мерчемделди”, – деди.

Калктын аялуу катмарына, анын ичинде саламаттыгынан мүмкүнчүлүгү чектелген балдарды жана чоӊ адамдарга, кары-картаӊдарга, эмгек мигранттары менен жумушсуз аялдарга көмөк көрсөтүү максатында 2014-жылы ачылган “Ак-Ниет” күндүзгү окутуу-реаблитациялык борбору жалпысынан 158 адамга социалдык кызмат көрсөткөн. Кыргыз Республикасынын Социалдык өнүктүрүү министрлиги жана башка эл аралык уюмдардын колдоосу менен бардык жардамдарды бекер көрсөткөн мекемеде тогуз кызматкер эмгектенет.

Эске салсак, Жогорку Кеӊештин Социалдык маселелер, билим берүү, илим, маданият жана саламаттык сактоо боюнча комитетинде калктын аялуу катмарына көрсөтүлүүчү социалдык кызматтарды жакшыртуу максатында, өткөн жылдын 16-октябрында атайын жумушчу тобу түзүлгөн.

Транспорт жана коммуникация министрлиги Кара-Балта – Бишкек жолунун 52,2 км. чакырымын оңдоо үчүн 120 миллион 800 миң доллар жумшалаарын билдирди.

Жол куруу иштерине байланыштуу үч миңден ашык дарак кыйылып, 4 300 көчөт отургузулат. Ошондой эле жол жээгиндеги 200дөн ашык кафе, үй, дүкөн сүрдүрүлөт.

Алардын ээлерине компенсация төлөөгө 2 миллион доллар сарпталат. Ошондо бул жол эң кымбат турган жол болот. Бир километр жолго 2 миллион доллардан ашык каражат жумшалат. Бул оңбогондой чоң каражат. Адистер бир километр жол кыйын болсо 500-700 миң доллар болмоктугун айтып келишет. Демек алкы бузуктар такыр эле кулкундарын тыя албай калышкан. Министр Жамшидбек Калилов күптүү болбогон неме көрүнөт. Мамлекет жол салууга ири көлөмдө карыз алып жатса, анын теңинен көбү «кузгундардын» кулкунуна кирип кетип жатса жакшы эмес го. Тиешелүү органдар жол тармагындагы коррупцияны аныктап, кустурчуларын кустуруп камабаса, эл ырыскысына кол салгандардын ыйбаа кыла турган түрлөрү жок.

Булак: “Фабула”

КР ИИМдин Уюшкан кылмыштуулукка каршы күрөшүү башкы башкармалыгы мыйзамсыз ок атуучу куралдарды ок-дарылары менен сактоо жана алуу фактысын ачыктады. Бул туурасында КР ИИМдин Басма сөз кызматы маалымдайт.

Ыкчам-тергөө иш- чараларын жүргүзүү маалында милиция кызматкерлери 9 мм калибрдеги 16 огу менен Макаров үлгүсүндөгү тапанчасын алуу фактысын каттады. Куралдарды сатууга Сокулук районунун жашоочусунун тиешеси бар экендигин тастыктаган. Ушул жылдын 11-июнунда атайын операция жүргүзүлгөн. Натыйжада 1885-жылы туулган Ош областынын Алай районунун М. К. аттуу шектелүүчү жараны кармалган. Уюшкан кылмыштуулукка каршы күрөшүү башкы башкармалыгынын маалыматы боюнча А. Анапияевдин жакын тууганы жана уюшкан кылмыштуу топтун мүчөлөрүнүн бири катары ИИМдин каттоосунда турган.

Ыкчам-тергөө ишинин жүрүшүндө шектелүүчү Чүй областынын Сокулук районунда жашаган жеринен мыйзамсыз сакталган ок-дарылар табылып, 9 мм калибрдеги 16 ок алынды. Бул факт боюнча КР Кылмыш-жаза кодексинин 241-беренеси (ок атуучу куралдарды, ок-дарыларды мыйзамсыз алып жүрүү, сактоо жана ташуу) боюнча кылмыш иши козголду. Тергөө амалдары жүрүп жаткан учурда, соттун чечими менен шектелүүчү адамды убактылуу жайга камоо чарасы көрүлдү.

Жалал-Абад областынын ИИБнын кылмыш иликтөө кызматкерлери Ноокен районунда 2014-жылдын башында болгон оор кылмыш ишинин бети ачышты. Бул туурасында КР ИИМдин Басма сөз кызматы маалымдайт.

2016-жылдын башында милицияга 2014-жылы 1- январда Ноокен районунун Достук айыл Окмөтүнүн жашоочусу жарандык аялын катуу сабап, өлүгүн жерди казып, көмүп салгандыгы боюнча ыкчам маалымат келип түшкөн.

Адам өлтүрүү фактысын тактоо максатында Ноокен районунун РИИБнын кызматкерлери өткөн жылы ыкчам-тергөө иш-чарасын жүргүзүшкөн. Бирок, белгиленген жерден аялдын сөөгү табылбагандыктан шектүү жакты кылмыш жоопкерчилигине жана кылмыш ишин козгоого баш тартылган. 2017-жылы июнь айында бул факт боюнча Жалал-Абад областынын ИИБнын кылмыш иликтөө кызматкерлери ыкчам маалымат алгандан кийин, тергөө иши күчүнө кирген.

Божомолдонгон маалымат боюнча 2011-жылдан бери Достук айыл өкмөтүнүн жашоочусу 1990-жылы туулган Т. Н. Өзбекстандын Наманган областынын тургуну 1990-жылы туулган Минаввар аттуу кыз менен жарандык никеде жашап жүргөн. 2015-жылы белгисиз жагдайда жоголуп кеткенде биринчилерден болуп күйөөсүнүн туугандары тынчсызданышып, келинин өлтүрүп коюу мүмкүн экендиги боюнча милиция кызматкерлерине кайрылышкан. 2017-жылы июнь айында кылмыш ишин иликтөө иш-чарасын кайрадан уланта башташкан.

Кылмыш иликтөө кызматкерлери толук тергөө максатында кранды пайдаланышып, Ноокен районунун божомолдонгон жеринен 5 метр тереңдикте көмүлгөн аялдын сөөгүнүн калдыктарын табышкан. Бул сөөктүн өздүгү такталып, Өзбекстандын Наманган областында 1990-жылы туулган И. Минаввархон экени аныкталды.

Бул факт боюнча соттук-медициналык, жана башка экспертизалар жүргүзүлүп, күбөлөрдүн оорлугунан кийин шектүү жак кылмышка катыштыгы бар экендигин мойнуна алды. Кыргыз Республикасынын Кылмыш-жаза кодексинин 97-беренеси (адам өлтүрүү) боюнча кылмыш иши козголуп, мурда соттолгон Ноокен ройонунун жашоочусу 1990-жылы туулган Т. Н. азыркы учурда убактылуу кармоочу жайга камалган. Божомолдоо маалыматы боюнча кылмыш иши урушуу учурунда келип чыккан. Кызганчаактыгынын айынан жарандык аялын катуу соккуга алып, кылмыш ишин жашыруу максатында өлүгүн үйүнөн алыс эмес жакка көмүп салган. Бул факт боюнча тергөө иши жүрүп жатат.