САЯСАТ

Жакында коомчулукка чуулгандуу иштин бетин ачкан кылмыштуу факты ачыкка чыгат экен. Угушубузга караганда, ИИМдин кайсыл бир тергөөчүсү 2010-жылдагы мародерлукка тиешелүү материалдарды жок кылгандыгы боюнча фактылар ачыкка чыгат. Ал тергөөчүгө ошол кездеги министр тарабынан буйрук болуп, кылмыш ишине тиешелүү дело жок кылынган. Учурда бул иш такталып жатыптыр. Демек, тергөөчүнүн көрсөтмөсү менен жакын арада мародерлор камакка алынышы мүмкүн.

Булак: “Ачык саясат”

Мамдуманын ЛДПР фракциясынын лидери Владимир Жириновский Кыргызстандагы иштеген орус журналисттеринин абалы тууралуу маек куруп: “Улуу кыргызды мактаган, орусту боктогон журналисттер гана Кыргызстанда жашай алат”, – деген чалагайым пикирин айтып чыкты. Муну менен кайран эргул Кыргызстанда теңсиздик күч деген жыландын башын чыгарды. Ушундай чагымчылдардын кесепетинен Кыргызстандагы айрым орус улутундагы жарандар Россиянин элчилигинин алдында «укугубуз тепселип жатат» дегенди айтып шоу уюштуруп жатышат да. Жинди кайсы жерде жүрбөсүн жинди экен да…

Булак: “Фабула”

-Эдил байке, депутаттар сөз эркиндиги боюнча мыйзамды талкуулап жатышпайбы, аталган мыйзам, депутаттардын аракети боюнча не айта аласыз?

-Бийликтин массалык маалымат каражаттарына карата айтылган нааразычылыгы, сотко коюлган доо арыздары негизсиз го дейм. Анткени көп учурда бийликти оппозициялык маанайдагы саясатчылар, оппозициядагы депутаттар сындашат. Көчөдөгү адам бийликти сындабайт, сындаса да көчөдөгү адамдын сын-пикири маалымат каражаттары­на жарыяланбайт. Демек ошол саясатчы оппозиционерлердин сын-пикири үчүн маалымат ка­ражаттарына айып коюу туура эмес. Албетте, беш кол тең эмес, туура эмес иш алып барып жаткан маалымат каражаттары деле бар. Бирок жалпылап алганда ошол чакан оппозициялык маалымат каражаттары үчүн аталган мыйзамды кабыл алып жиберүү туура эмес го деп ойлойм. Анын үстүнө президенттин кетээрине деле аз калды. Алты жылдан бери унчукпай келип, аз калганда ушинтип жаткандарына ичим күйүп жатат, тим эле коюшса болмок.

-Өмүрбек Текебаевдин камалышы боюнча кандай пикирдесиз?

-Эки жакка тең тартпайм. Менин тилегеним Атамбаевдин тарапташтары жана Текебаевдики болуп элибиз, мекенибиз экиге бөлүнүп калбаса экен дейм. Азыркы учурда эл, башка саясатчылар мындай талаш-тартышка көңүл бөлбөй, Кыргызстандын мындан аркы келечеги кандай болот, кан­дай жолдо, кантип өнүгөбүз деген маселенин тегерегинде ой жүгүртсө, ошол тууралуу талкуулар уюшулса жакшы болгону турат.

-Адахан Мадумаров, Камчы Ташиев, Ахмат Келдибеков үчөө бириккени, кайра бириге албай, үчөө үч башка иш алып бара турганы айтылууда, үчөө бириге алабы?

-Баарынан кызыгы, үчөө биригип президенттикке бир талапкерди колдоп чыгабы же үчөө үч башка чыгабы ошол болууда. Өтө кызык, үчөөнө ставка койсок да болчудай. Мен мына сага деп, үчөө тең талапкер болуп алышабы деп турам.

– Марат Иманкулов деген саясатчы башында турган көмүскө өкмөт дегендин түзүлгөнү маалым болду эле, ал боюнча да оюңузду уксак…

-Көмүскө өкмөт дегенди тамаша оюн катары элестетем. Көмүскө дебей эле, жасалма деп алышса болмок. Көмүскө өкмөттү түзүш үчүн аны түзгөндөр буга чейин парламенттик шайлоого аттанып, элдин колдоосуна анча-мынча болсо да ээ болуп, добуш алыш­са ии дейт элек, анте алышпаса дагы азыркы ички саясат, тышкы саясат, идеология, экономика боюнча альтернативалык ойлорун сунуштаса бир жөн. Анте алышпагандан кийин эмнеси көмүскө өкмөт?

-Президент Атамбаев бийликке жаштар келиши керектигин, саясий элитаны жаңылоо керектигин көп айтчу болду, буга кандай ойдосуз?

-Президент Атамбаев 2011-жылы бийликке “жаны муун” келет, бийлик толугу менен жаныланат деп айткан. Азыр биз жаш жетекчилерди карап көрсөк, алардын бардыгы президенттик аппаратта, Башкы прокуратурада, КТРКда, Улуттук банк, Энергохолдинг ж.б. кызматтарда жүрүшөт. Алар­дын баары 2010-жылы 7-апрелде Ак үйдө отурушкан, көбүнчөсү Максим Бакиевди коштоп, жандап жүрүшкөн. Ошон үчүн бийликке таза, жаңы жаштар келип жатат деп бир беткей айтышка болбойт.

-Президент кийинки пре­зиденттикке өзү таптаган бирөөнү калтырышы мүмкүнбү?

-Президент мураскер катары калтырчу кишиси болсо, анысын эчак эле КСДПнын тизмесинде биринчи номурда кылып, элге тааныштырып, анан алып келип премьер кылып эки жыл иштетип, чет өлкөлөрдү кыдыртса, ага бүгүнкү күнү эл көнүп калмакпыз. Аны Атамбаевден кийинки прези­дент катары таанып калмакпыз. Атамбаев анткен жок. “Мураскер калтырбайм” – деп бир эмес, бир канча жолу айтты. Айтканындай эле болду. Убакыт өтүп кетти, аны жогоруда айткандай мурунтан эле таптап, дайындаш керек эле. Азыр андайга мүмкүнчүлүк жок. Ачык шайлоо болот!

Булак: “Фабула”

Чолпон Султанбековага

Депутат Кубанычбек Жумалиев Өкмөттүн социалдык тармагын тейлеген Чолпон Султанбековага Ак үйдөн жолугуп калып:

– Чолпон айланайын, бая күнү туура эмес иш кылыптырсың, атактуу Сагымбай Орозбаковду кайра-кайра Орозбеков деп.

– Кубанычбек аке, андан эмне болуп кетиптир же согуш чыгып кетиптирби, эми айта элек сиз калдыңызбы? Сиздин эсиңизден чыгып кеткен го, сиз деле премьер-министр болуп турганда Москвага барып, Россиянын премьер-министри Примаков Евгений Максимовичти куттуктап, кайра-кайра Евгений Михаилович дегениңизди ошол кездеги жардамчыңыз Равшан Жээнбеков айтып, элди күлдүрүп жүрбөдү беле? Сиз деле эч нерсе болбой эле депутат болуп жүрбөйсүзбү? – деп мурчуңдап кетип калса, Кубаныч мырза эстен танып, дал болуп туруп калган экен…

Абдыманап Кутушевге

Феликс Кулов Абдыманап Кутушевден:

– Абдыманап, эми ушул туалет, унитаз үчүн эле арызыңды жаза саласыңбы?

– Эй, Феликс аке, театр кийим илгичтен башталат дегендей, Жогорку Кеңешке келген коноктор сөзсүз туалетке кирип чыгышат. Анан мен дагы жаман оюмда биздин туалет дагы орустардын думасыныкындай болсун, биздин депутаттар дагы алар отурган унитазга отурушсун деген тилегим болгон. Дат баскан унитазга отуруп жүрө беришсин, иштери да ошондой болуп жүрө берсин, – деп колун шилтеп басып кетиптир.

Камчыбек Жолдошбаевге:

Акылбек Жапаров Камчыбек Жолдошбаев байкесине эркелеп:

– Камчыбек байке, сизден үлгү алса болчудай, туруп-туруп эле 120 депутаттын мээлерине келбеген нерселерди айтып таштайсыз. Мисалы өгүнү айткан сөзүңүздүн мааниси тереңде жатат. Камчыбек Жолдошбаев:

– Кайсынысын айтып жатасың? Ушул жердеги бай депутаттардын байлыгын чогултса дагы миллиардга жетпейт дегениңиз.

– Ой, ал эчтеке эмес, жакында дагы айтам.

– Эмне деп?

– Бул чакырылыштын депутаттарынын 97 пайызы кедейлердин, итке минген томаяктардын тукумдарынан куралган. Буларыңдын бизнеси тургай, денелеринде биттери жок деп. А.Жапаров:

– Оо, Камчыбек байке, сизди колдойм, сөзсүз айтыңыз-деп чебелектеп, кудуңдап чуркап кеткен экен.

Жыпар Жекшеевге

Равшан Жээнбеков Жыпар Жекшеевдин жанына келе калса Жыпар:

– Равшан, бу саясат дегениң төрткө бөлүнөт, сен кайсынысына киресиң десе,

– Анчага бөлүнөөрүн билбейт экенмин, айтып бериңиз – деп Жыпарга жабышып калат. Жыпар:

– Билбесең угуп тур, сасык саясатка, бок саясатка, көң саясатка, анан кө… болуп. Мен көң саясатка кирем…

– Жыпар ава, кандайча? – деп Равшан сураса,

– Ал көң деген жакшы, биринчиден отун, экинчиден жыты жакшы, айыл жыттанып турат – деген экен.

Булак: “Фабула”

27-мартта боло турган Жогорку Кеӊештин Социалдык маселелер, билим берүү, илим, маданият жана саламаттыкты сактоо боюнча комитетинин кезектеги жыйынында Кыргыз Республикасынын Коомдук телерадиоберүү корпорациясынын Байкоочу Кеңешинин курамына талапкерлерди көрсөтүү жөнүндөгү маселе каралары күтүлүүдө. Бул тууралуу Жогорку Кеӊештин Басма сөз кызматы маалымдады.

Эске салсак, КТРКнын учурдагы Байкоочу кеӊешинин курамы КР Жогорку Кеӊешинин 2012-жылдын 18-апрелиндеги №1850-V токтому менен бекитилген. Ал эми “Кыргыз Республикасынын Коомдук телерадиоберүү корпорациясы жөнүндөгү” мыйзамдын 13-беренесинин 3-бөлүгүнө ылайык, Байкоочу кеӊештин жаӊы курамына талапкерлерди көрсөтүү, мурдагы Байкоочу кеӊештин ыйгарым укуктары бүтөрүнө үч ай калганда Жогорку Кеӊеш тарабынан жалпыга маалымдоо каражаттарына жарыяланат.

Кошумчалай кетсек, КТРКнын Байкоочу кеӊеши 15 мүчөдөн туруп, 5 жылга шайланат. Алгач КР Президенти, Жогорку Кеӊеш жана жарандык коом тарабынан сунушталган талапкерлер комитетте каралып, кийин жалпы депутаттардын кароосуна чыгарылат.

 

Кечээ, 24-мартта Бишкекте Сөз эркиндигин коргоо комитети менен Конституциялык кеңешме кыймылы уюштурган Эркиндик форуму болуп өттү. Форумга журналисттер, жарандык активисттер жана саясатчылар катышышып, Кыргызстанда кысымга дуушар болгон сөз эркиндиги жана саясый укуктар тууралу талкуулашты. Күч структуралары жана сот органдары сөз эркиндигин кысымга алууда бийликтин куралына айланып калгандыктан канткенде аларды саясаттан ажыратууга (десаясатташтыруу) жана сөз эркиндигин кысымга алуууга катышып жаткан мамлекеттик кызматкерлерди люстрациялоого болот деген суроо жыйындын негизги өзөгүн түздү.

Видео: “Азаттык”