СПОРТ

Эркин күрөш боюнча Кыргызстандын курамындагы эң оор салмактагы балбаныбыз Айаал Лазарев 2015-жылы дүйнө чемпионатына катышкан. Бул мелдеш Бразилияда өтө турган 2016-жылкы олимпиадага жолдомо берчү мелдештердин бири болчу. Биздин балбан бир кадам жетпей токтогонун баарыбыз билебиз.

Кийинки Казаксгандын Астана шаарында жана Монголиянын Улан-Батор шаарларындагы жолдомо алчу мелдештерге катышып жолдуу болгон эмес. Анткен менен Рио шаарындагы олимпиадага жолдомо алган 125 килограмм салмак чениндеги балбандардын арасынан украиналык Алан Завеевдин канынан кызытма табылып, анын аркасы менен биздин Айаал Лазаревге жолдомо 11-май күнү берилип калган. Албетге, олимпиада катышуучусу деген жарлыктын өзү эле кандай мааниге ээ экени айтпаса да түшүнүктүү да.

Булак: “Азия Ньюс”

Кыргызстандыкбалбан Базар Базаргуруев 2008-жылы Пекинде болуп өткөн олимпиадага катышып 5-орунду багындырган эле. Мына кечээ жакында Бириккен күрөш дүйнөсү өздөрүнүн сайтына кыргызстандык Базар Базаргуруев коло медалдын ээси болгонун шардана кылды. Анткени күмүш медалды уткан украиналык балбанды текшергенде канынан допингге байланышкан туринабол заты чыккан. Мына ошондуктан ал күмүш медалдан ажырап, анын ордуна япон балбаны ээ болсо, коло алган япон балбанынын ордуна биздин мекендеш Базаргуруев ээ болуп олтурат. Эгер балбаныбыз 2008-жылы коло медалдын ээси болгондо, ошол кездеги коло байгенин ээси Руслан Түмөнбаевдей болуп 75 миң доллар акчага, 38 миң долларлык жолтандабаска, “Даңк” медалына жана өмүрүнүн аягына чейин мамлекеттик стипендияга ээ болмок. Жашоо бумеранг дегендей, 2016-жылы Рио олимпиадасында мекендешибиз Изат Артыковдон допинг колдонгон деген кине менен коло медалды жулдурсак, мына бүгүн күрөш боюнча коло медалга ээ болуп олтурабыз.

Булак: “Фабула”

1-апрель күнү таңкы саат 5те «Манас» эл аралык аэропортунан кыргыздын намысына жараган волейболчу азамат жигиттерибизди тосуп алдык. Биздин балдар Азия чемпионатынын борбордук аймагында 1-орунду жеңип, алтын медалдуу болуу менен бирге чемпиондук наамды багынтып келишти. Эгемендик алгандан бери кыргыз спортунун тарыхында биринчи жолу ушундай ийгиликке жетишкени чоң сыймык экенин жар салып отурабыз.

Алмаз КАСЕНОВ, мамлекеттик жаштар иши, спорт жана дене тарбия агенттигинин алдындагы олимпиадалык спорттун түрүн өнүктүрүү дирекциясынын директору:

«БИЗДИН ВОЛЕЙБОЛЧУЛАР ЭЛ АРАЛЫК ДЕҢГЭЭЛДЕ ӨЗҮЛӨРҮНҮН КҮЧТҮҮ ЭКЕНИН КӨРСӨТӨ АЛДЫ»

– Балдардын жараткан ийгилигин көптөн күткөнбүз. Мамлекет бу жагынан кам көрүп, волейболчу балдарыбызга колдон келген жардамыбызды аябадык. Эгемендик алган жылдардан бери көп аракеттер болду. Айрыкча Элмурза Сатыбалдиев федерация президенти болгондон бери топко кызыккандардын саны көбөйүп, ченеми жок популярдуулукка ээ болду. Азыр жаш балдардын топко кызыгуусу артып, мектеп курагындагылар ойноп атканы бизди кубантып атат. Демек, волейбол оюну Кыргызстанда өнүгүүнүн үстүндө. Бүгүн Азиянын борбордук аймагын татыктуу багынтып, эл аралык деңгээлде күчтүү экенибизди көрсөтө алдык. Жакынкы арада федерация менен биргеликте азуусун айга жанган күчтүү командаларга татыктуу атаандаш болуу кийинки кадамдарыбыздан болмокчу.
Элмурза САТЫБАЛДИЕВ, КР Волейбол федерациясынын президенти:

«БИЗДИН КОМАНДА ЧЕМПИОН БОЛГОНУН УГУП, КӨЗҮМӨ ЖАШ АЛДЫМ»

– Ойлогон оюма, көздөгөн максатыма жеттим. Федерацияны жаңыдан түптөп аткан кезде келечекке карай кыялдануу бар эле. «Качандыр бир күндөрү биздин Кыргызстандын волейболчулары Азиянын аймагында чемпион болушат. Анүчүн болгон күч аракетимди жумшайм» деген изги тилегим бар болчу. Кечээ досумдун туулган күнүндө отурсам, телефон шыңгырап, «Элмурза, Кыргызстан командасы түркмөндөрдү утуп, борбордук аймакта чемпион болушту, куттуктайм!» деген үндү угуп алып, сүйүнүчүм жонтериме батпай, кубанганымдан көзүмө жаш алдым. Ал көз ирмемди азыр сөз менен жеткире албайм. Эгер бүгүнкү күндө «волейбол федерациясын жетектейм, азыркы деңгээлден түшүрбөйм, мындан ары да өстүрөм, өркүндөтөм» деген азамат табылып калса, мен сыймыктануу менен бул кызматты өткөрүп берүүгө даярмын.

Бек БОРБИЕВ, КР эмгек сиңирген артисти:

«ЭЛМУРЗАНЫ ФЕДЕРАЦИЯ БАШЧЫЛЫГЫНА МЕН АПКЕЛГЕМ»

– Топ ышкыбоздору арасында болобу, волейбол ойногон чеберлер арасында болобу, качандыр бир кездерде көкүрөгүндө уялаган жагымдуу окуя болот. Ал окуя менде да бар. Бүгүн биздин волейболчулар Азия чемпионатынын борбордук аймагында 1-орунду алышты. Эсимде, 2009-жылы Жеңиш Кызалаков досума бардым, анткени ошол убакта кыргыз волейболу сууга чөгүп бараткан кеме абалындагыдай болчу. Барганымдын себеби, федерация президентине бир кишини табыш керек эле. Андай адамды мен билчүмүн. Экөөбүз Элмурза Сатыбалдиевге келип, «федерацияны жетектеп бер» дедик. Элмурза досубуз «ээ достор, бул иш менин колуман келбейт»деп бир аз кыйшаңдады. Экөөбүз эки жактан чыгып, «башында оор болот, анан көнүп кетесиң» деп атып араң көндүргөнбүз. Айткандай эле башында оор болду, кийин көнүп кетти. Элмурза сазга батып бараткан федерацияны сууруп чыкты. А бүгүн болсо кылган эмгегинин акыбети кайтып, Кыргызстан курама командасы тарыхта болуп көрбөгөн ийгиликке жетишип отурат.
Жеңиш КЫЗАЛАКОВ, КР Волейбол федерациясынын вице-президенти:

«КЫРГЫЗ ВОЛЕЙБОЛУ АКЫРКЫ ҮЧ ЖЫЛДА УКМУШТУУДАЙ СЕКИРИК ЖАСАДЫ»

– Бек жакшы нерсени эстетип койду. Чындап эле Бек Борбиев 2009-жылы мага келип, «Элмурза Ракиевичти федерация президенти кылалы, азыркы учурда топ чапкыч балдарыбызга мындан артык күйө турган киши табылбайт. Өзү да топтон алыс эмес, волейболду жакшы ойнойт, макул кылабыз» деди. Бул жагдайды мен да эстеп отурам. Анан чынын айтыш керек, ошол 2009-жылдагы волейбол менен азыркыны салыштырып болбойт. Акыркы эле үч жылды алып көрөлү, 2015-жылы Азия чемпионатында байгелүү орундарга караандаган эмеспиз. Былтыр 2-орунду камсыз кылуу менен күмүш медалдуу болдук. Ал эми быйыл болсо чемпион болуп отурабыз. Салыштырмалуу Казакстанда 17 млн. Өзбекстанда 30 млн. эл бар. Ал эми бизде болгону 6 млн. Ошого карабастан ушундай ийгиликке жетишип турганыбыз биз үчүн зор бакыт.

Булак: “Азия Ньюс”

2017-жылдын 1-апрелинде Талас областтынын жергиликтүү соттор арасында волейбол жана кичи-футбол боюнча мелдеш өттү. Бул тууралуу Талас облустук сотунун басма-сөз кызматы маалымдады.

Мелдешке Талас областтынын жергиликтүү курама командалары катышты. Мелдеш  Талас райондук  соту тарабынан  уюштурулуп, мелдешке Талас областтык  сотунун, Талас шаардык, Талас, Бакай-Ата, Кара-Буура, Манас райондук сотторунун курама командалары катышышты.

Мелдештин жыйынтыгында кичи-футбол боюнча Бакай-Ата райондук сотунун курама командасы, волейбол боюнча Манас райондук сотунун курама командасы байгелүү орундарга ээ болушту.

Байгелүү орундарды ээлеген курама командаларга дипломдор жана акчалай сыйлыктар тапшырылды.

Өлбөгөн жанга жаз келди. Аны менен кошо футбол оюну боюнча Азия кубогу-2019 мелдешинин иргеп алуу алгачкы мелдештери жанданды. 28-март күнү Дөлөн Өмүрзаков атындагы ордо калаанын борбордук стадионунда 10 миңге жакын топ куйөрмандардын катышуусунда Кыргызстан командасы менен Макао курамы футболдук талаага чыгышты. Биздин кыргыз топ тепкичтери «А» тайпага туш келгенине байланыштуу жоопкерчилик да катуу жуктөлгөн. «Өлсөң-талсаң да, кашык каның калгыча салгылаш, Макао комаңдасын ут!» деген. Таймаштын алгачкы мүнөттөрүнөн баштап биздин топ тепкичтер атаандаштын дарбазасына карай байма-бай чабуул жасап, бирок ийгиликке жетише албай турду. Мирлан Мурзаев жакшы эле жарым талаадан дарбазаны карай улам-улам адырандап кирип барганы менен же топту таамай тебе албай, же өнөгүнө топту жемиштуу өткөзүп бере албай атканы бир канча жолу кайталанып кетти. Ал учурда макаолуктар да жөн жатпай 1-2 жолу биздин дарбазага чабуул жасап үлгүрдү. Дарбазачы Павел Матяш чеберчилик менен топту эки курдай кылдат тосуп калды. Оюндун биринчи бөлүгү кыргызстандыктардын үстөмдүгүндө болгону менен топ күйөрмандары голду көргөн жок. Баш насаатчы Александр Крестинин тыныгуу учурунда команданын оюн тактикасын өзгөрткөнү бизге байкалып,
ыраактан топ өткөрүп берүү жагына ыкташып, атаандаштарды бир аз ыңгайсыз абалда калтырып атканы көзгө таамай көрүнүп турду. 69-мүнөттө атаандаштар оң канаттан оюн эрежесин бузуп, биздикилер айып тобун тебүү мүмкүнчүлүгүнө ээ болушту. Ахлидин Исраилов дарбазаны көздөй көкөлөтө чыгарып берген тобун команданын каптитаны Азамат Байматов башы менен таамай сүзүп гол киргизип кетти. Стадион күйөрмандардын кубаныч кыйкырыгынан жарылып кете жаздады. Дүйнөлүк мыкты бомбардирлер быякта калгансыды. Көптөн күткөн топ эле. Жыргай эле түштүк , бир аз демди басып.

Эгер статистикага абай салсак, биздин топ тепкичтер Макао командасы менен канча жолу беттешпесин, эч качан утулган эмес экен. Бу жолу ошону дагы бир жолу тастыктап, коноктордун эсебин берди. Ошентип биздин Кыргызстан командасы жаңы футболдук сезонду жеңиш менен баштады. Ал эми «А» тайпасындагы берки Индия командасы менен Мяньма курама ортосундагы мелдеш индиялык каратору топ тепкичтеринин жеңишинде (1:0) аяктаганынан кабардар болдук. Эми кийинки мелдеш 13-июнда Индия курама командасы менен сыртта ойнойт. Азыртан эле айтып коёюн, бизди аябагандай чоң сыноо күтүп турат. Андыктан топ тепкичтерибизге ийгилик каалайлы.

Булак: “Азия ньюс”