КРИМИНАЛДЫК ХРОНИКА ЖАНА ОКУЯЛАР

Милиция кызматкерлери 2 килограммдан ашык героинди мыйзамсыз сактап жүргөн жаранды кармашты. Бул туурасында ИИМдин Басма сөз кызматы билдирет.

Ош шаары боюнча ИИМдин кызматкерлери 14-август күнү баңгизатын мыйзамсыз жүгүртүүгө каршы ыкчам-иликтөө иш-чарасын уюштурушуп, “Ош-Ноокат” жолунан 28 жаштагы Ю.А. аттуу жарандын башкаруусундагы “ВАЗ-2106” үлгүсүндөгү жүк ташуучу унааны текшерүү үчүн токтотушкан.

Милиция кызматкерлери унаанын ичин текшерүү маалында баштыкка салыган баңгизатын табышкан. Алынган зат экспертизага жөнөтүлүп, жалпы салмагы 2 килограммдан ашык “героин” баңгизаты экендиги аныкталган.

Жогорудагы факты боюнча Кыргыз Республикасынын кылмыш-жаза кодексинин 247-беренеси (Баңги каражаттарын, психотроптук заттарды, алардын окшошторун же прекурсорлорду башкага берүү максатында мыйзамсыз даярдоо, сатып алуу, сактоо) боюнча кылмыш иши козголду.
Кармалган жаран Ош шаарынын убактылуу кармоочу жайына камалып, тергөө амалдары уланууда.

Кыргызстандан барган наркокурьерге Россиянын соту 11 жылга эркинен ажыратуу өкүмүн чыгарды. Бул туурасында Россиялык ММКлар маалымдашты.

Маалыматтарга ылайык, Киев райондук соту кечээ, 14-августта кыргызстандык жаранга карата өкүм чыгарды, ага ылайык кылмышкер 11 жыл түрмөгө кесилди.

Эске салсак, буга чейин Кыргызстандан Россияга барган жаран фасовкаланган героинди жутуп алып, ашказанында жеткирип барган соң, көкүрөк жагы катуу ооруп, аргасыздан Томсктогу медициналык жардам көрсөтүүчү жайлардын бирине кайрылган. Ал жерде кылмышкерди полиция кармап калган. Наркокурьер жеткирип барган наркотик партияларын сатууну пландаганын айткан.

Милицияга шаар тургуну арыз менен кайрылып, подъездден 16 500 сомдук “Гэлакси” үлгүсүндөгү велосипедин белгисиз адамдар уурдап кеткенин билдирген. Бул туурасында Бишкек ШИИБнин Басма сөз кызматы маалымдайт.

Маалыматка ылайык, ушул сыяктуу арыздар менен Бишкек шаарынын 4 жараны подъездден баасы 16 000, 17 000, 12 000 жана 26 000 сомдук велосипеддерин белгисиз адамдар тарабынан уурдалып кеткенин айтып милицияга кайрылышкан.

Свердлов райондук ИИБнын кызматкерлери тарабынан ыкчам-иликтөө иш-чараларынын натыйжасында жогорудагы кылмышка шектүү делип 1999-жылы туулган А.Э. жана 2000-жылы туулган К.Т. аттуу жарандар кармалган. Иликтөөнүн жыйынтыгында кармалган жарандар жогорудагыдай 13 кылмышка тиешеси бар экендиги белгилүү болгон.

Жогорудагы фактылар боюнча Кыргыз Республикасынын кылмыш-жаза кодексинин 164-беренеси (уурдоо) боюнча кылмыш ишин козголгон. Тергөө иштери уланууда.

Ысык-Көл областында эркек киши өз аялын өлтүрдү. Бул туурасында региондун ИИБнен билдиришти.

Маалыматка ылайык, кечээ КР ИИМинин криминалдык милиция кызматына 49 жаштагы Бишкек шаарынын тургуну Улан А. аялын өлтүрүп алганын айтып кайрылган.

Анын айтымында, 11-августта алар – 36 жаштагы аялы экөө Тамчы айылына эс алууга келишкен. Ал жерден бөлмө алышып, дем алыш күндөрүн ошол жактан өткөрүүнү пландашкан.

12-августта, болжол менен саат 22.30да спирт ичимдиктерин ичип отурган жубайлардын ортосунда чыр чыккан. Мас абалындагы күйөөсү, жини менен аялын колу менен муунтуп салган. Аялынын тирүү эмес экенин байкаган соң ал комнатаны сыртынан бекитип, ээсине дагы бир күнгө акча төлөп Бишкекке чыгып кеткен жана шаарга келип милиция кызматкерлерине жасаган кылмышы тууралуу айтып берген.

КР ИИМинин криминалдык милиция кызматынын кызматкерлери жана Ысык-Көл райондук ИИБнин кызматкерлери турак үйдү карап чыгышып, аялдын жансыз денесин табышкан.

Учурда бул факт менен 97-берене (адам өлтүрүү) боюнча кылмыш иши козголду.

Бул туралуу КР МУКК пресс-борбору маалымдады. МУКК жүргүзгөн ыкчам-издөө иш чараларынын алкагында бир катар кылмыштарды жасагандыгы үчүн мамлекеттер аралык издөөгө алынып, КМШ өлкөлөрүнүн биринде жашырынып жүргөн жигердүү үгүттөөчүлөрдүн бири жана экстремисттик ячейканын лидери, КР жараны “Х.М.” кармалды.

Чет элдик экстремисттик борборлордун тапшырмаларын аткаруу менен «Х.М.» Кыргызстандын областтарынын биринде жаштар арасында үгүт иштерин жүргүзүп, радикалдуу идеологияны таратып, жашыруун ячейка түзүп баштаган.

Учурда кармалган «Х.М.» экстремисттик ишмердүүлүккө тиешеси бар экенин мойнуна алып, козголгон кылмыш ишинин алкагында КР МУКК Тергөө камак жайына киргизилди.

Кыргыз Республикасынын ИИМдин кызматкерлери тарабынан Ысык-Көл облусунун жарандарынан турган кылмыштуу тобун кармоо боюнча иштер жүргүзүлүп жаткан. Бул туурасында ИИМдин Басма сөз кызматы билдирет.

2017-жылдын 12-августунда милиция кызматкерлеринин ыкчам-иликтөө иш-чарасын жүргүзүүнүн натыйжасында “Бишкек-Торугарт” жолунан “БМВ” үлгүсүндөгү автоунаа токтотулган. Автоунаанын ичин текшерүү учурунда Ысык-Көл облусунун жарандарына тиешелүү болгон өзгөчө жыты бар кочкул-жашыл түстөгү суюктук куюлган эки канистр табылган.

кспертизанын жыйынтыгы менен алынган заттын жалпы салмагы 16 килограммдан ашык “гашиш майы” экендиги аныкталган.

Жогорудагы факты боюнча Кыргыз Республикасынын кылмыш-жаза кодексинин 247-беренеси (Баңги каражаттарын, психотроптук заттарды, алардын окшошторун же прекурсорлорду башкага берүү максатында мыйзамсыз даярдоо, сатып алуу, сактоо) боюнча кылмыш иши козголду.
Учурда иликтөө иштери жүрүп жатат.