Menu

ФОТОРЕПОРТАЖ

Садыр Жапаров Президенттик ак сарайдын курулушуна капсула салды

Кыргыз Республикасынын Президенти Садыр Жапаров бүгүн, 15-апрелде, Кыргыз Республикасынын Президентинин  администрациясынын Бишкек шаарындагы жаңы имаратынын курулушуна капсула салды.

Мамлекет башчысы бүгүн салтанатка келгендер тарыхый имараттын курулушуна катышып жатканын белгиледи.

Куруучуларга кайрылып, Садыр Жапаров курулуш иштеринин сапаттуу жүргүзүлүшүнүн маанилүүлүгүн, бул имарат кылымдарды карытып, азыркыга эле эмес, кийинки муунга да кызмат кылышы керектигин белгиледи.

Мамлекет башчысы буга чейин бул жерде өткөн кылымдын 50-жылдарында курулган “Ысык-Көл” мейманканасы жайгашканын, анын имараты жараксыз абалга келгенин эске салды. Ушуга байланыштуу бул жерде жаңы имараттын курулушун баштоо чечими кабыл алынган.

Садыр Жапаров жалпы аянты 21 миң чарчы метрди түзө турган жаңы имарат  сапатта салынып, анын дубалдары бекем болуп, көп жылдар бою кызмат кыларына ишенерин жана үмүт артарын билдирди.

Ошол эле жерде Садыр Жапаровго келечекте долбоор боюнча Президенттик Администрациянын имаратынын маңдайында жайгаша турган административдик комплекстин концепциясы көрсөтүлдү.

Жаңы административдик комплекстин курулушу борбордук башкаруу аппаратынын ишин оптималдаштырууга, башкарууну эффективдүү жүргүзүүгө шарттарды түзүүгө, уюмдардын өз ара аракеттенүүсүн тездетүүгө, техникалык тейлөөгө кеткен чыгымдарды оптималдаштырууга мүмкүндүк берери белгиленген. Мындан тышкары, бул мамлекеттик органдардын бир комплексте жайгашуусу чечимдерди иштеп чыгуу процессин тездетет, ордо калаанын борбордук бөлүгүндөгү жол тармагына жүктү азайтат.

Маалым болгондой, административдик имараттардын азыркы жайгашуусу – көпчүлүк мамлекеттик органдар негизинен Бишкектин борбордук бөлүгүндө топтолгон. Муну менен шаардын борборунда жол кыймылына жана тургундарга белгилүү ыңгайсыздыктар жаралууда.

Административдик комплекс заманбап жана көп функционалдуу, өнүккөн инфраструктурасы бар жана пландаштырылган шаардык түзүлүшкө интеграцияланган комплекстердин бири болуп калат.

Белгилей кетсек, курулуш маселелери менен Кыргыз Республикасынын Президентинин иш башкармалыгына караштуу Курулуш, социалдык-экономикалык жана административдик объектилерди реконструкциялоо боюнча түзүлгөн мамлекеттик дирекция алектенет.

ЕККУнун Бишкектеги Программалык кеңсеси Ички иштер министрлигине 9 автоунаа тапшырды

Бүгүн, 6-апрель күнү Кыргыз Республикасынын Ички иштер министри милициянын генерал-лейтенанты Улан Ниязбеков менен ЕККУнун Бишкектеги Программалык кеңсесинин башчысы, элчи Алексей Рогов жолукту.
Жолугушуунун жүрүшүндө ЕККУнун Бишкектеги Программалык кеңсеси Кыргыз Республикасынын Ички иштер министрлигине милициянын көчмө кабылдамасы үчүн 7 жана Туристтик-экологиялык милициясына 2 авто унаа тапшырды.
Ал автоунаалар Бишкек шаарынын Ленин жана Биринчи май РИИБне жана облустардын Сокулук, Нарын, Лейлек, Сузак жана Алай райондук Ички иштер “Коомдук коопсуздук демилгеси” долбоорунун алкагында Кыргызстанда
биринчи милициянын көчмө кабылдамалары иштеп баштаган. Алар алыскы аймактарда жашаган жергиликтүү калктарды кабыл алуу үчүн түзүлүп, кылмыштарды жана укук бузууларды алдын алууда өз натыйжалуулугун
көрсөтүүдө.
2011-жылдан баштап бүгүнкү күнгө чейин ички иштер министрлигине ЕККУ тарабынан 39-милициянын көчмө кабылдама унаасы тапшырылганын билдиребиз.
Мунун негизинде Кыргызстанда Кыргыз Республикасынын Ички иштер министрлигинин ички резервинен 10 автоунаа бөлүнүп берилип, жалпысынан Кыргызстанда 49 милициянын көчмө кабылдамасы иштөөдө.
Ички иштер министри Улан Ниязбеков ЕККУга көрсөткөн колдоолору үчүн ыраазычылыгын билдирип, укуктук тартипти жана коомдук коопсуздукту камсыздоо үчүн мындан ары дагы алгылыктуу кызматташууга даяр экендигин
билдирди.
“ ЕККУнун Бишкектеги Программалык кеңсеси Кыргыз Республикасынын ИИМинин негизги өнөктөшү катары бул багытта баа жеткис салым кошууда. Ички иштер министрлигине экологиялык коопсуздукту камсыз кылууда олуттуу колдоо көрсөтө турган Ниссан-Патрол эки авто унаасы өткөрүп берүүдө көрсөтүлгөн туристтик-экологиялык милицияны колдогонуңуз үчүн Элчи мырзага жана ЕККУнун Программалык кеңсесине чын дилимден ыраазычылык билдирем.
Калктын милицияга болгон ишенимин арттырууга жана анын ишмердигинин ачыктыгын күчөтүүгө багытталган ИИМдин күч-аракетине ЕККУнун Бишкектеги Программалык кеңсеси зор салымын кошууда. Биз Сизге жана ЕККУнун жалпы жамаатына көрсөткөн колдоолору үчүн терең ыраазычылыгыбызды билдиребиз.
Өз тарабыман мындан ары дагы кызматташууга даяр экендигибизди билдирем”, – деди министр Улан Ниязбеков.
Милицияны мындан ары өнүктүрүүдө жарандык коом жана эл аралык уюмдардын өкүлдөрү менен тыгыз кызматташуусун бекемдөө боюнча ИИМдин күч-аракетин ЕККУнун Бишкектеги Программалык кеңсеси жогору баалайт.

Бишкекте капиталдык оңдоодон кийин Т.Абдымомунов атындагы кыргыз драма театры ишин жандантты

Кыргыз Республикасынын Мамлекеттик катчысы Сүйүнбек Касмамбетов 27-мартта, Т.Абдымомунов атындагы Кыргыз улуттук академиялык драма театрынын театралдык сезонунун ачылышына катышты.

Белгилей кетсек, театр коронавирус пандемиясынан жана капиталдык оңдоодон улам көпкө чейин көрүүчүлөр үчүн жабык турган.

Театралдык сезондун ачылышы 27-март Эл аралык театр күнүндө Жалил Садыковдун «Манастын уулу Семетей», драмасынын негизинде коюлган «Төлгө» эпикалык спектакли менен белгиленди.

Спектаклди көргөндөн кийин Мамлекеттик катчы Сүйүнбек Касмамбетов куттуктоо сөз сүйлөдү.
Ал театр — улуттун маданияты, каада-салты, агартуучусу экенин баса белгиледи.

«Бүгүн чындыгында кубанычтуу окуя. Узакка созулган оңдоо иштеринен кийин Кыргыз драма театры көрүүчүлөргө эшигин кайрадан ачты. Мындан ары театр көрүүчүлөрдү өзүнүн спектаклдери, чыгармачылык кечелери жана башка коомдук-маданий иш-чаралары менен кубандырат.

Өз кезегинде өлкө жетекчилиги маданият тармагын өнүктүрүүгө ар дайым жетиштүү көңүл бурууда. Бул үчүн бардык зарыл чаралар көрүлүүдө. Биздин Кыргыз драма театрдын эшиги эл үчүн ар дайым ачык болушун каалайм», — деп баса белгиледи ал.

Сүйүнбек Касмамбетов «Төлгө» спектакли тууралуу пикирин билдирип, театрдын сезонду «Манас» эпосунун үзүндүсүнөн баштаганы символикалуу экенин белгиледи.

«Биз Айкөл Манасы бар элбиз, улуу баатырдын урпактарыбыз. „Манас“ эпосу бүтүндөй энциклопедия. Манасчы Саякбай дарыяларда суунун акканын жети күн, жети түн бир эпизод менен айткан. Манас чексиз аалам. Анда баары — экологиялык көйгөйлөрдөн баштап, дүйнө түзүмүнөн тартып, мамлекеттүүлүктү курууга чейин бар. Бүгүн театрда „Төлгө“ спектаклин көрүп, баарыбыз Манас дүйнөсүнө сүңгүп кирдик. Өзгөчө артисттерге ыраазычылык билдирем. Алардын эпостогу тарыхый ролдорду ойногону, эмоциясын, эпостун бүтүндөй драматургиясын бергени абдан жогорку деңгээлде баалоого болот», — деп жыйынтыктады ал.

Иш-чарага Министрлер Кабинетинин Төрагасынын орун басары Эдил Байсалов, маданият, маалымат, спорт жана жаштар саясаты министри Азамат Жаманкулов, ошондой эле бир катар маданият ишмерлери, белгилүү театр жана кино артисттери, жазуучулар жана журналисттер катышты.

Кыргызстан аскердик 50 даана КАМАЗ , 55 даана "Тигр" зооттолгон унаа жана 58 өрт өчүргүч КАМАЗ унааларын сатып алды

Бүгүн, 25-мартта, Бишкек шаарында Кыргыз Республикасынын Президенти Садыр Жапаровдун катышуусунда Кыргыз Республикасынын Өзгөчө кырдаалдар министрлигине жана Кыргыз Республикасынын Улуттук коопсуздук мамлекеттик комитетинин Чек ара кызматына атайын техникаларды тапшыруу аземи болду.

Мамлекет башчысы өрт өчүргүч заманбап атайын техника жана шаймандар менен жабдылган өрт өчүрүүчү унааларды көрүп чыкты.

Бүткүл дүйнөлүк банк тарабынан каржыланган «Кыргызстанда табигый кырсыктардын тобокелдиктерине туруктуулукту жогорулатуу» (ERIK) долбоорунун алкагында 58 даана өрт өчүрүүчү унаалар Кыргыз Республикасынын Өзгөчө кырдаалдар министрлигине өткөрүлүп берилди. Өрт өчүрүүчү унаалардын паркын мындай масштабдуу жаңылоо 2008-жылдан бери болгон эмес.

Андан соң Президент Садыр Жапаров Улуттук коопсуздук мамлекеттик комитетинин Чек ара кызматы үчүн алынган КАМАЗ жана заманбап «Тигр» зооттолгон унааларынын техникалык мүнөздөмөлөрү менен таанышты. 50 жаңы КАМАЗ жана 55 «Тигр» зооттолгон унаалар толугу менен республикалык бюджеттин каражатынын эсебинен сатылып алынган. Өлкөнүн эгемендүүлүк жылдарындагы мындай масштабда жаңы аскердик техниканы сатып алуу биринчи жолу болду.

Мамлекет башчысы «Тигр» зооттолгон атайын унаасын борбордук «Ала-Тоо» аянтында айдап, анын техникалык өзгөчөлүктөрүн өзү сынады.

Президент Садыр Жапаровдун аземдин катышуучуларынын алдында сүйлөгөн сөзүнөн кийин борбордун эски аянтынан катарга тизилген аскерлердин колонналары жана зооттолгон жаңы унаалар өттү.

Жаңы техника өлкөнүн коргонуу жөндөмдүүлүгүн, чек ара коопсуздугун чыңдоо үчүн сатылып алынды жана УКМКнын Чек ара кызматынын бөлүктөрүнө жөнөтүлөт.

УКМКнын Чек ара кызматына жана ӨКМге берилген техникалардын татаал жолдордон өтүү мүмкүнчүлүгү жогору жана климаты катаал шарттарда иштөөгө ыңгайланышкан.

 

Президент Садыр Жапаров УКМКнын Жалал-Абад облусу боюнча башкармалыгынын жаңы имаратынын ачылышына катышты

Кыргыз Республикасынын Президенти Садыр Жапаров бүгүн, 18-декабрда, Жалал-Абад облусуна болгон жумушчу сапарынын алкагында Кыргыз Республикасынын Улуттук коопсуздук мамлекеттик комитетинин Жалал-Абад облусу боюнча башкармалыгынын жаңы имаратынын ачылышына катышты.

Мамлекет башчысы УКМК ардагерлеринин жана кызматкерлеринин алдында сүйлөп жатып, өлкөнүн эң ири облустарынын бири болгон Жалал-Абадда улуттук коопсуздукту камсыз кыла турган орган кызматкерлеринин өз милдеттерин так аткаруусу үчүн ыӊгайлуу шарттардын түзүлүп жаткандыгы кубанычтуу көрүнүш экенин белгиледи.

«Дүйнө жүзү тездик менен өзгөрүп, илим менен техниканын барган сайын өнүгүп жаткан маалында коопсуздукка коркунуч келтире турган улам жаңы чакырыктар байма-бай чыгып жатканы белгилүү», — деп белгиледи. Терроризм, экстремизм, этносторду бири-бирине кайраштыруу, адам сатуу, курал сатуу, баңги заттарын мыйзамсыз жүгүртүү сындуу коопсуздукка олуттуу сокку ура турган көптөгөн мыйзамсыз иш-аракеттерди алдын алуу иш-чаралары талаптагыдай жүргүзүлүп, талаптагыдай аткарылышы керек экенин белгиледи Президент.

«Биз өлкөбүздүн улуттук коопсуздугуна кылдай зыян келтириши мүмкүн болгон жагдайларды дагы көз жаздымда калтырбашыбыз зарыл», — деп билдирген Садыр Жапаров, улуттук коопсуздукту камсыз кылууда УКМК кызматкерлеринин ийгиликтүү иштеши үчүн тиешелүү шарттарды түзүү зарылдыгына өзгөчө көңүл бурду.

Президент Садыр Жапаров коопсуздук органдарынын кызматкерлеринин кызматтык милдеттерин так жана ырааттуулук менен аткарып, чалгын иштерин жана чалгынга каршы аракеттерди көрүп, паракорчулук, аткезчилик, терроризм, диний экстремизм, нарко-бизнес жана уюшкан кылмыштуулукка каршы күрөшүүдө ийгиликтерди жаратып жатканын белгиледи. «Ага жалпыга маалымдоо каражаттары аркылуу коомчулукка жеткирилген бир катар резонанстык иш-чаралардын жыйынтыктары далил. Жыйынтык бар, демек иш бар», — деп белгиледи.

Мамлекет башчысы УКМК кызматкерлеринде Кыргызстандын элинин тынчтыгы, бейпилдиги үчүн күрөшкөн Манас бабабыздын, Барсбек кагандын, андан берки Курманбек баатыр, Эр Солтоной, Эр Табылды аталарыбыздын жана башкалардын духу жана руху бар экенине ишенимин билдирди.  «Мындай мекенчил уул-кыздарыбыз турганда Кыргызстаныбыздын келечеги ишенимдүү колдо деп айтууга толук негиз бар», — деген ал, мамлекетибиздин, элибиздин жана жарандарыбыздын коопсуздугун кынтыксыз камсыз кылган кызматкерлер ар тараптан колдоого алынып, аларга тиешелүү шарттар менен кошо социалдык кепилдиктер берилиши зарылдыгын белгиледи.

Ошону менен бирге Президент иштин көлөмүнө, аткарган кызматынын оордугуна жараша шарт түзбөй туруп, кызматкерлерден кандайдыр бир натыйжаларды, ийгиликтерди талап кылуу адатынан качуу керектигине токтолду.

Ал өлкөнүн жана УКМКнын жетекчилиги мындан ары да күч түзүмдөрүнүн ишмердүүлүгүнө өзгөчө көңүл буруп, ар бир кызматкердин толук кандуу иштешине колдоо көрсөтөөрүн баса белгиледи.

Президент Садыр Жапаров УКМКнын кызматкерлери үчүн Бишкекте жана Жалал-Абадда көп батирлүү үйлөрдү, Башкармалыктар жана өлкөнүн региондорундагы райондук бөлүмдөргө жаңы имараттарды, ошондой эле заманбап жабдуусу менен аскердик-медициналык борборду жана кызматкерлер менен алардын үй-бүлөлөрү үчүн эс алуу базаларын куруу пландары жөнүндө айтып берди.

«Мамлекет коопсуздук кызматкерлеринин ден соолугуна ар дайым кам көрүшү кажет. Алар үй-бүлөсү үчүн санаа тартпай, бир гана моюнуна жүктөлгөн ишти так аткаргандай болушу керек», — деп түшүндүрдү.

Мындан сырткары, генерал-лейтенант Анарбек Бакаев атындагы академиясынын административдик окуу корпусун, жатаканасын жана спорт комплексин, Киберкоопсуздукту камсыздоо боюнча координациялык борборунун имараттарын куруу пландаштырылууда.

Мамлекет башчысы улуттук коопсуздук үчүн жаңы коркунучтар жаралып жатканын белгилеп, өткөн айда Коопсуздук кеңешинин жыйынында өлкөнүн Улуттук коопсуздук концепциясы жактырылганын эске салды.

«Концепция өлкөнүн улуттук коопсуздугун камсыз кылуу деңгээлин жогорулатууга багытталган көптөгөн практикалык иш-чараларды өзүнө камтыйт. Биз өлкөнүн коргонуу жөндөмдүүлүгүн күчтөндүрүү жана улуттук кызыкчылыктарды сактоо үчүн мыкты методикаларды жана механизмдерди күнүмдүк ишибизге колдонууга киргизишибиз керек», — деген Мамлекет башчысы, мындай максаттар УКМК тарабынан тез жана натыйжалуу ишке ашырыларына ишенимин билдирди.

Сөзүнүн соңунда, Президент Садыр Жапаров УКМКнын кызматкерлерин келе жаткан кесиптик майрамы менен куттуктап, өлкөнүн көз карандысыздыгын коргоо боюнча ишинде ийгиликтерди каалады.

Андан соң Мамлекет башчысы Башкармалыктын эки кабаттуу имаратын, иш орундарын, медициналык пунктун карап чыкты.

Белгилей кетсек, УКМКнын имараттары режимдик мүнөздөгү маанилүү объектилер болуп саналат. Бирок УКМКнын Жалал-Абад шаарындагы административдик имараты 1934-жылы курулуп, талаптарга жооп бербей жана аны коопсуз колдонууда көйгөйлөр болуп келген.

Мурдагы административдик имаратта өрткө каршы жабдуулар жок жана өзгөчө кырдаалдар учурунда өздүк курамды эвакуациялоо үчүн тиешелүү шарттар түзүлгөн эмес.

Буга байланыштуу бардык талаптарга жооп берген жаңы административдик имаратты куруу зарылчылыгы келип чыккан.

Азыр жаңыдан курулган административдик имарат керектүү заманбап жабдуулар, кызматкерлер үчүн эмеректер менен толук жабдылган, эмгек шарттары талаптарга жана стандарттарга жооп берет.

Учурда облустук атайын кызматтардын бөлүмдөрүнүн материалдык-техникалык базасын жаңылоо жана чыңдоо иштери улантылууда.

 

 

Фото - Чүй облусунун экс-губернатору Туйгуналы Абдраимовдун мыйзамсыз баюу фактылары боюнча 16 квартирасы, 5 жер тамы, 18 жер тилкеси, 16 автомашинасы, 3 дыйкан чарбасы, 2 автоунаа токтоочу жайы аныкталып, кылмыш иши козголду

КР УКМК тарабынан мамлекеттик кызматкерлер арасындагы коррупцияны аныктоо жана ага бөгөт коюу боюнча көрүлгөн иш-чаралардын алкагында Өкмөттүн Чүй облусундагы мурунку ыйгарым укуктуу өкүлү “А.Т.Д.” мыйзамсыз баюу фактыларын аныктады.

Тергөө учурунда, аталган «А.Т.Д.» жогорку мамлекеттик кызматтарда иштеп жаткан учурунда, кызматтык абалын кыянаттык менен пайдаланып мыйзамсыз баюу жана материалдык пайдалар менен артыкчылыктарга ээ болуу үчүн, мыйзамсыз түрдө активдерин көбөйткөндүгү,  легалдаштыруу максатында Бишкек шаарынын жана Чүй облусунун аймагында өзүнүн расмий кирешесинен бир нече эсе жогору турган кыймылдуу жана кыймылсыз мүлктүн кымбат объектилерин сатып алгандыгы, жана ошондой эле Кыргыз Республикасынын бир катар коммерциялык банктарына финансылык инвестицияларды салгандыгы аныкталды. Ошол эле учурда кылмыш жоопкерчилигинен качуу үчүн бул активдерди башка адамдардын атына катталган.

Белгиленген мыйзамсыз аракеттердин натыйжасында, “А.Т.Д.” жакын туугандарына жана аффилирленген адамдарга 16 батир, 18 жер тилкеси, 2 уна токтотуучу жай, 5 турак жай, 3 дыйкан чарба, 16 авто унаа, жана ошондой эле ошондой эле «Ысык-Ата» курортунун территориясында бүтпөгөн курулуш объектилерди каттаган.

Белгилей кетсек, “А.Т.Д.” жана анын жакын туугандары активдери, киреше жок болгон учурда да кескин көбөйүп, 250 миллион сомдон ашык бааланган.

КР УКМК чогулткан материалдардын негизинде Кыргыз Республикасынын Кылмыш-жаза кодексинин 323-беренесинин 2-бөлүгүнүн 1-пунктту (мыйзамсыз баюу) фактысы боюнча сотко чейинки өндүрүшкө катталып, бул иштин алкагында бул кылмышты жасоого тиешеси бар адамдарды жана алар мыйзамсыз алган мүлктү аныктоого багытталган ыкчам-тергөө иш-чаралардын комплекси жүргүзүлүүдө.

 

Фото - Бишкек шаарында Эне жана баланы коргоо боюнча улуттук борбордун балдар онкологиясы жана онкогематологиясы бөлүмү ачылды

Кыргыз Республикасынын Президенти Садыр Жапаров бүгүн, 18-сентябрда, Бишкек шаарындагы Эне жана баланы коргоо боюнча улуттук борбордун аймагында курулган жаңы 5 кабаттуу балдар онкологиясы жана онкогематологиясы бөлүмүнүн расмий ачылыш аземине катышты.

Мамлекет башчысына жаңы балдар онкологиясы жана онкогематологиясы бөлүмү тууралуу маалымат берилди. Анын курулушу жана бардык зарыл жабдуулар менен камсыздоо, анын ичинде долбоордук-сметалык документациясы, эмерек жана жабдыктарды сатып алуу «Ас-Сафа» коомдук бирикмеси тарабынан каржыланган.

Балдар онкологиясы жана онкогематологиясы бөлүмү биринчи жолу  балдардын атайын клиникасынын шартында ачылды. Ал 70 жатуучу орундан туруп, анын 10у интенсивдүү терапия палатасына карайт. Ошондой эле, жандандыруучу бөлүм жана эки операция жасоочу палата бар. Мындан сырткары, биохимиялык, жалпы клиникалык, бактериологиялык, иммунофенотиптик цитогенетикалык жана башка лабораториялар жабдылган.

Балдар онкологиясындагы өлүмдөрдүн көпчүлүгү терапиянын татаалдашынан жана балдарды дарылоо шарттарынын жоктугунан болгондугунан улам. Эми балдар онкологиясынын колунда биринчи жолу өздөрүнүн гемодиализ үчүн аппараты менен реанимациясы болот. Баш мээсинде залал шишиги бар бейтаптарга жардам көрсөтүү мүмкүнчүлүгү пайда болду. Андай бейтаптар бардык оорулуулардын 30% түзөт. Тар багыттагы адистер менен консультация жүргүзүү мүмкүндүгү менен жилик чучугун трансплантациялоого шарттар түзүлдү. Дүйнөлүк тажрыйба көрсөткөндөй, балдар онкологиясын атайын балдар клиникасына которгондон кийин гана, жалпы балдар онкокызматын өнүктүрүүдө оң жылыштар жана өлүм санын азайтуу мүмкүн.

Жаңы бөлүмдүн ачылыш аземине Кувейт, Катар жана Сауд Арабиясынан меймандар катышты.

Өз сөзүндө Президент бүгүнкү иш-чаранын өлкөбүздүн саламаттык сактоо тармагынын тутуму үчүн маанилүүлүгүн белгиледи.

Анын айтымында, азыркы тапта онкологиялык оорулар көбөйүп, дүйнө жүзүндө, анын ичинде Кыргызстанда да бул боюнча кырдаал курч бойдон турат.

Садыр Жапаров акыркы жылдарда балдардын онкологиялык ооруларынын көбөйүшү байкалып жатканына тынчсыздануусун билдирип, бул кырдаалды

дартка даба болуучу дарыларды сатып алуу жана тиешелүү ооруканаларды керектүү технологиялар менен жабдуу көйгөйлөрү, онколог-дарыгерлердин жетишсиздиги курчутуп жатканын кошумчалады.

Президент белгилегендей, залалдуу шишиктерден каза болуулардын санын илимий изилдөөлөргө негизделген максаттуу программаларды иш жүзүнө ашыруу менен төмөндөтүүгө жетишүүгө болот.

«Эне жана баланы коргоо боюнча улуттук борбордун атайын клиникасынын базасында балдар онкологиясы жана онкогематологиясы бөлүмүнүн ачылышы балдар онкологиясынын ишин өнүктүрүүдө чоң кадам болуп саналат. Аталган бөлүм аркылуу алдын ала дарылоо жана кичинекей бейтаптарыбыздын жашап кетүү мүмкүнчүлүгүн жогорулатуу жакынкы келечекте ийгиликтүү жүзөгө ашарына ишеним артабыз», — деди Садыр Жапаров.

Ал ошондой эле, залал шишикти дарылоонун кийинки баскычтарында иш жүргүзүү зарылдыгын белгиледи.

«Ар бир муктаж балага кол сунуп, алардын өмүрү үчүн күрөшүүдө колубуздан келгендин баарын жасашыбыз керек! Ал үчүн заманбап медициналык технологияларды тартып, жаңы ыкмаларды пайдаланып, илгери үмүт жана терең ишеним менен балдар онкологиясынын ишин өнүктүрүүгө милдеттүүбүз», — деп белгиледи Мамлекет башчысы.

Садыр Жапаров калктын саламаттыгын сактоо багытындагы жүргүзгөн ишмердиги жана кайрымдуулугу үчүн, «Ас-Сафа» кайрымдуулук фондунун жетекчиси Мухаммад Абдурахман Аль-Шаяга Кыргыз Республикасынын ардакт грамотасын тапшырды.

Ошондой эле, Мамлекет башчысы жаңы имаратты карап чыгып, орнотулган атайын жабдуулар менен таанышып, медицина кызматкерлери менен баарлашты.

Мындан сырткары, Президент Эне жана баланы коргоо боюнча улуттук борбордун курулушу 1995-жылдан бери бүтпөй турган балдар кардиохирургиясынын имараты менен таанышты.

Кыргыздын чоюн билек балбаны Бекдөөлөт Расулбеков Токио олимпиадасында 6-орунду ээледи

31-июлда оор атлетика боюнча Токио  шаарынын  Токио эларалык Форум имаратындагы олимпиадалык мелдешине  кыргыз спорт чебери Бекдөөлөт Расулбеков катышты. Аны устаттары Өмүржан Молдодосов менен Камбар Токтоналиев коштоп акыл-насааттарын айтып турушту. Ал   96 кг салмактагы чоюн билек 10 балбан менен олимпиадалык байге үчүн  күч сынашты. Бул салмакта 15 спортчу мөрөй талашса, анын ону «А» тобундагы балбандар  болду. Мелдеш бишкек убактысы боюнча 16.50дө башталды. Бекдөөлөт жулкуп көтөрүүдө алгач 162 кг салмакты багындырды. Экинчи жолку аракетинде 165 кг салмакты көтөрө албай койду. Үчүнчү жолку чыгууда  166 кг салмакты көтөрдү. Бул көнүгүүдө канадалык Сантай Роберт 178 кг салмакты көтөрүп топ башында турду. Түртүп көтөрүүдө Бекдөөлөт  алгач 200 кг салмакты багындырды. Кийинки чыгууда 208 килограмм салмакты көтөрдү. Соңку чыгууда 216 кг салмакты көтөргөнү менен сол колу ооп кетип, штанга помостко түшүп кетти. Ошентип ал жалпы 374 килограмм салмакты багындырды.

1-орунду Катардын спортчусу Элбах Фарес Ибрахим алды. Ал 402 килограмм салмакты көтөрүү менен Олимпиаданын рекордун да жаңыртты. Спортчу булкуп көтөрүүдө 177 килограмм, түртүп көтөрүүдө 225 килограммды көтөрдү.

Күмүш жана коло байгелерди 387 килограммды эсебине жазган Венесуэла спортчусу Кейдомар Валенилья (177 кг, 210 кг.) менен Грузиянын өкүлү Антон Плесной жеңип алды.

Бекдөөлөт Расулбеков 1996-жылы Токтогул районунун Кайрак айылында туулган. 2011-жылдан бери оор атлетика менен машыгып,  94, 96 жана 102 килограмм салмак категорияларында өлкө намысын коргоп келатат. 2016-жылы өспүрүмдөр арасындагы Азия чемпионатынын коло медалынын ээси болгон. 2019-жылдагы Дүйнө чемпионатында ал алдыңкы ондукка кирген. Билими боюнча – программист. Техносфера коопсуздугу боюнча экинчи адистикти алган.

Бекдөөлөт 2021-жылы февраль айында Ирандагы жана Өзбекстандагы турнирлердин жеңүүчүсү болуп саналат. Март айында ал атаандаштарынан  80 килограммга озуп, Кыргызстандын беш жолку чемпиону болгон эле.

– Жаш кезинде таятам машыккан экен. Бул анын хоббиси болчу. Ал кесипкөй оор атлетчи болууну  кыялданган, бирок мүмкүнчүлүк болгон эмес. Анын кыялын ишке ашыргым келип, оор атлетчи болдум. Жеңиштеримди таятама жана кыргыз элине арнап келген. Бирок тилегим орундалбай калды. Эмдиги жылы Азия оюндары болот. Ошондо дагы тажрыйба топтоп, кийинки Париж шаарында өтө турган олимпиадага жолдомо алып, бул жолку каталыктарымды оңдоого аракет кылам. Токио олимпиадасына биринчи ирет катышып жаткандыктан катачылыктар кетип калды. Кыргызстанды эл аралык аренага тааныткан оор атлетчилер Митал Шарипов, Улан Молдодосов, Бекзат Осмоналиев агайлардай болгум келип, бул спортту тандап алгам. Аягына чейин чыгып, бир натыйжага ээ болгум келет,-дейт Бекдөөлөт Расулбеков.

Эгемендүү өлкө болгону 2000-жылы Сидней олимпиадасына Митал Шарипов менен Бакыт Ахмедов катышып, 16-орунду ээлеген. 2004-жылкы Афина жана 2008-жылкы Бээжин олимпиадаларына Улан Молдодосов катышып, 10-11-орун менен чектелген. 2012-жылы Лондон олимпиадасында Бекзат Осмоналиев байгелүүң орунга илинбей калган. 2016-жылы Рио-де-Жанейро олимпиадасына кыздардан Жаңыл Океева катышып, 10-орунга жеткен. Ал эми 69кг салмакта коло байге уткан Иззат Артыковдун кызытма пайдалаганы билинип калып, байгесинен айрылып, оюндан четтетилген.

Ошентип эгемен өлкө болгону Бекдөөлөт Расулбеков олимпиадалык оюндарда байгелүү делип, атайын упай жана сертифиат берилген 6-орунду ээлегени дагы дурус көрсөткүч. Токиодогу спорт адистердин айтымында Бекдөөлөттүн келечеги кең, алдыда дагы Азиялык, дүйнөлүк таймашуулары турат. Башты жерге салба, Бекдөөлөт!!!

Токио олимпиадасынан пресс-атташе Кабыл Макешов

Баткенде кыргыз-тажик чек ара жаңжалында өрттөлгөн мектептин ордуна жаңы мектеп курулуп бүттү, бала бакча жана үйлөр 70%га бүткөрүлдү

Кыргыз Республикасынын Министрлер Кабинетинин Төрагасы Улукбек Марипов жумушчу сапарынын жүрүшүндө Баткен облусунун Лейлек районундагы Максат айылына барып, Баткен облусундагы кыргыз-тажик мамлекеттик чек арасында 2021-жылдын 28-30-апрелиндеги окуялардын натыйжасында жабыркаган турак-жайларды жана социалдык объектилерди калыбына келтирүү иштеринин жүрүшү менен таанышты.

«Финансылык маселелер чечилген. Каражат бөлүнгөн. Объектилердин курулушун гана жыйынтыктабастан, инфраструктураны, анын ичинде негизги көчөлөрдү асфальтташтыруу жана жарыктандыруу маселесин чечүү зарыл. Тургундар ыңгайлуу жашоо үчүн бардык зарыл шарттар менен камсыздалышы тийиш», – деди Улукбек Марипов.

Андан соң Министрлер Кабинетинин башчысы кыргыз-тажик мамлекеттик чек ара тилкесиндеги окуялардын жүрүшүндө жабыркаган Лейлек районунун Максат айылындагы чек ара постуна барды.

Учурда аскер объектисин калыбына келтирүү боюнча активдүү иш жүрүүдө.

Ошондой эле Улукбек Марипов кыргыз-тажик мамлекеттик чек ара тилкесиндеги окуялардын жүрүшүндө талкаланган Максат айылындагы орто мектепке барды.

«Мектептин калыбына келтирүү иштери толугу менен бүткөрүлгөн. Мектеп 1-сентябрда окуучуларды тосуп алууга даяр», – деп белгиледи Улукбек Марипов.

Баткен облусуна сапарынын жүрүшүндө Министрлер Кабинетинин Төрагасы Лейлек районунун Кулунду жана Сада айылынын тургундары менен жолугушуп, алардын көйгөйлүү маселелерин укту.

Белгилей кетсек, Максат айылында фельдшердик-акушердик пункттун курулушу жыйынтыкталуу алдында турат, милициянын аймактык бөлүмүнүн имараты капиталдык ремонттон өткөрүлдү, Максат айылындагы мектеп толугу менен калыбына келтирилген, ал эми 100 орунга эсептелген «Сейтек» балдар бакчасынын курулушу 70%га жыйынтыкталган.

Мындан тышкары, 10 турак жайдын курулушу жыйынтыкталып, 40 турак жайдын курулушу 70%га бүткөрүлгөн. Баткен облусунун Лейлек районунун Максат айылында жалпысынан 83 турак-жай объекти курулмакчы.

Президент Садыр Жапаров “Кумтөр” алтын кенинин иши менен таанышты. Кен кыргыз тарапка өткөндөн бери 44 миң унций алтын сатылып, $40 млн киреше түшкөн

Кыргыз Республикасынын Президенти Садыр Жапаров бүгүн, 15-июнда, “Кумтөр” алтын кениндеги убактылуу тышкы башкаруу киргизилгенден кийинки абал менен таанышты.

Мамлекет башчысына алтын кендин үзгүлтүксүз, штаттык режимде иштеп жаткандыгы, “Кумтөр Голд Компани” ЖАКынын кызматкерлери тышкы башкаруунун киргизилишин түшүнүү менен кабыл алышкандыгы, айлык маяналар өз убагында жана толук көлөмдө төлөнүп, өлкөнүн бюджетине түшүүчү бардык төлөмдөр жана салыктар планга ылайык жүргүзүлүп жаткандыгы тууралуу маалымат берилди.

Мындан сырткары, жогорку окуу жайлардын студенттеринин практикалык билим алуусу үчүн, ошондой эле аталган тармакта кадрлар резервин камсыз кылуу максатында, компания жайкы практика программасын жана өлкөнүн ЖОЖдорунун бүтүрүүчүлөрү үчүн эки жылдык тажрыйбадан өтүү программасын ишке киргизген.

Президент алтын ылгоочу фабриканы көрүп чыкты. Анда бир айга жетпеген убакытта убактылуу тышкы башкаруу мезгилинде “Кумтөр Голд Компани” 44 миң унций алтын сатып, анын натыйжасында 40 миллион АКШ доллары өлчөмүндө дүң киреше түшкөнү белгиленди.
Ишкананын кызматкерлеринин белгилешинче, кен мол чыккан жерди казуу иштери башталса алтындын көлөмү көбөйөт.

Ошондой эле Садыр Жапаров карьерге да барып, тоо-кен иштерин жүргүзүүдө коопсуздук талаптарын сактоонун зарылдыгына токтолду.

Меню