КРИМИНАЛДЫК ХРОНИКА ЖАНА ОКУЯЛАР

2017-жылдын 19-сентябрь күнү болжол менен саат 01:10 чамасында Ак-Талаа районунун  Баетов-Нарын унаажолунун 37-чакырымында өздүгү такталбаган, азиат улутундагы жашы болжол менен 40-45 чамасындагы болжол менен жол кырсыгынан каза болгон адамдын жансыз денеси жол үстүнөн табылган. Бул туурасында Нарын ОИИБнин ПМ бөлүмү билдирет.

Ошол замат маркумдун өздүгүн аныктоо жана жол кырсыгына катышкан унааны издөө иштери жүргүзүлө баштаган. Аныктоонун негизинде каза болгон адам Ак-Талаа районунун Ак-Тал айылынын 46 жаштагы О.М. аттуу тургуну болуп чыккан. Ошондой эле жол кырсыгы болгон жерди кароо жүргүзүүдө, болжол менен Ауди унаасынын алдынкы бамперинин астындагы сыныкчалар табылган. Ак-Талаа райондук ИИБи жана Нарын ОИИБнин Патрулдук милиция бөлүмүнүн издөө тобунун кызматкерлери менен биргеликте, үйлөрдүү кыдырып издөөнүн негизинде, 25-чакырым аралыкта турган Нарын районунун Жылан-Арык айылынан 23 жаштагы Ж.М. аттуу тургуну башкарып жүргөн кызыл түстөгү “Ауди-100” үлгүсүндөгү унаасына кароо жүргүзү маалында жол кырсыгынын белгилери табылып, шектүүнү Ак-Талаа РИИБне алып келген. Тергөө учурунда кармалган жаран жол кырсыгына катышканын мойнуна алган.

Топтолгон материалдар Ак-Талаа РИИБнин тергөө бөлүмүнө берилип, экспертиза дайындалып, териштирүү иштери жүргүзүлүүдө.

2017-жылдын 26-август күнү Токмок шаарынын ички иштер бөлүмүнө 33 жаштагы жергиликтүү тургун Ш.Ж., арыз менен кайрылган. Себеби 25- август күнү болжол менен саат 18:00 чамасында белгисиз адамдар көчөдө аркандалып турган ага тиешелүү уйун жана музоосун уурдап кетишкендигин билдирген. Бул туурасында Чүй ОИИББнин Басма сөз кызматы маалымдайт.

Жогорудагы окуя боюнча Токмок шаардык ИИБнин тергөө кызматы тарабынан Кыргыз Республикасынын кылмыш-жаза кодексинин 165-беренелери (мал уурдоо) боюнча кылмыш иши козголгон. Токмок шаарынын ИИБнин жана Чүй ОИИББнин милиция кызматкерлери тарабынан жүргүзүлгөн ыкчам издөө иш-аракеттеринин натыйжасында аталган кылмышка шектүү делип, Токмок шаарынын 32 жаштагы К.Ж. жашоочусу кармалып, тергөө иштери улантылууда.

2017-жылдын 19-сентябрь күнү Жалал-Абад ОИИБнин милиция кызматкерлери тарабынан баңгизатын мыйзамсыз жүгүртүүгө каршы жүргүзүлгөн ыкчам иш-чаралардын натыйжасында Кара-Көл шаарынын Жээн-Кыштоо аймагынан 35 жаштагы Д. У. аттуу жергиликтүү тургун текшерилип, жанынан 500 грамм салмактагы баңгизаты табылган. Бул туурасында Жалал-Абад ОИИБнин Басма сөз кызматы маалымдайт.

Жогорудагы факт боюнча Кыргыз Республикасынын кылмыш –жаза кодексинин 246-беренеси (Башкага берүү максатын көздөбөстөн өзгөчө ири өлчөмдөгү баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү) менен кылмыш иши козголуп, шектүү убактылуу кармоочу жайга киргизилип, иликтөө иштери уланууда.

Милиция кызматкерлери тарабынан жүргүзүлгөн ыкчам-иликтөө иш-чараларынын натыйжасында 15-сентябрь күнү Москва районунун Беловодск айылынын 57 жаштагы П.П. аттуу жашоочусунун үйүнөн 7,62-калибрдеги “Сайга” үлгүсүндөгү ок атуучу куралы табылып алынган. Бул туурасында ИИМдин Басма сөз кызматы билдирет.

Ошондой эле,16-сентябрь күнү Ноокат райондук милиция кызматкерлери жарандар тарабынан мыйзамсыз сакталган ок атуучу куралдарды аныктоо максатында иликтөө иш-чараларын жүргүзүшүп, Миң-Тамыр айылынын 46 жаштагы М.И. аттуу жашоочусуна таандык болгон тиешелүү документтери жок 1959-жылы чыккан “Белка” үлгүсүндөгү сайлуу ок атуучу куралды табышкан.

Ал эми Кемин райондук милиция кызматкерлеринин түшүндүрүү ишинин негизинде Бейшеке айылынын 60 жаштагы Ж.Т. аттуу тургуну 16-калибрдеги “ТОЗ-16” үлгүсүндөгү ок атуучу куралдын стволун өз ыктыяры менен тапшырса, ушул эле күнү Кызыл-Октябрь айылынын 33 жаштагы А.А. аттуу жашоочусу тоодон таап алган 16-калибрдеги “ТОЗ-16” үлгүсүндөгү ок атуучу куралдын стволун өз ыктыяры менен милиция бөлүмүнө тапшырган.

Ушул жылдын 14-15- сентябрында милиция кызматкерлери тарабынан жүргүзүлгөн ыкчам иш- аракеттеринин натыйжасында Базар-Коргон районунун 35 жаштагы А.Н.аттуу тургунуна тиешелүү “Тико” үлгүсүндөгү автунаасын текшерүү учурда 2 килограммга жакын зат алынган. Бул туурасында Жалал-Абад ОИИБнин Басма сөз кызматы билдирет.

Ал эми Сузак районунун милиция кызматкерлери баңгизатын мыйзамсыз жүгүртүүгө каршы иш-чараларынын негизинде Октябрь айылынын 53 жаштагы тургуну 850 грамм баңгизаты менен кармалган. Ошондой эле Орто-Сай айылынын жанынан 24 жаштагы жергиликтүү тургун 660 грамм салмактагы кара куурай менен кармалган.

Жогорудагы фактылар боюнча Кыргыз Республикасынын кылмыш -жаза кодексинин 246-беренеси (Башкага берүү максатын көздөбөстөн өзгөчө ири өлчөмдөгү баңги каражаттарын же психотроптук заттарды мыйзамсыз даярдоо, сатып алуу, сактоо, ташуу же жөнөтүү ) менен кылмыш иши козголуп, тергөө амалдары жүрүүдө.

Ал эми шектүү жарандар райондук ички иштер бөлүмдөрүнүн убактылуу кармоочуу жайына киргизилген.