КРИМИНАЛДЫК ХРОНИКА ЖАНА ОКУЯЛАР

«Сирияда согушка катышып келди» делген шектүүнүн үйүнөн ок атуучу курал табылды. «20 жаштагы жигит 2016-жылы Россия аркылуу Сирияга барган. Ал «Жамаат Таухид ва Жихад» эл аралык террордук уюмунун атынан Сириядагы согушка катышкан. Ал жакта Мустафа каймана аты менен жүргөндүгү белгилүү болду. Шектүү 2017-жылдын 13-июлунда Стамбул – Бишкек каттамы боюнча Кыргызстанга келген» деп айтылат маалыматта. Шектүү укук коргоо кызматкерлери тарабынан кармалган. Жашаган үйү тинтүүгө алынып, бөлмөсүнөн террордук уюмдар менен байланышка чыгып турган компьютери, ок атуучу курал, дисктер табылып, учурда теологиялык экспертиза дайындалды.

Булак: “Азия Ньюс”

Буга чейин Кыргызстандын паспорту дүйнөлүк денгээлдеги кылмыш өкүлдөрүнөн, бозгундагы казак олигархтарынан, кыскасы, ууру-кескилер менен качкан, тентигендерден табылгандыгы тууралуу көп эле айтылып келчү. Ал тургай былтыр Стамбул аэропортунан кайсы бир чет өлкөгө жөнөгөн 70ке жакын кытайлык уйгурлар да жасалма кыргыз паспорту менен кармалышкан. Кыскасы, паспорт бергендер бул ишти чон акча жасаган “бизнеске” айлантып алышкан. Бирок, бул ирет Иракта жоочулардан бошотулган Тал-Афар шаарынан Борбор Азия жарандарына таандык паспорттор табылганын “РИА Новости” агенттиги маалымдады. 28-август күнү таратылган кабарда аталган интернет басылманын кызматкери жеке булактары аркылуу документтерди көргөнү, арасында Кыргызстандын паспорттору да бар экени жазылат. Андан тышкары, Өзбекстан, Тажикстан, Кытай жана Судан мамлекеттеринен берилген паспорттор болгон. Документ ээлеринин «Ислам мамлекети» экстремисттик тобуна кошулганын тастыктаган жазуулар да чыккан. Бирок ал кагаздарга эч кандай дата коюлган эмес. УКМК азырынча бул маалыматка расмий каттын негизинде жооп берилерин билдирди. Эгер ушул жагдай чындап эле далилденип калса, анда “паспорт мафиясынын”  артында кимдер тургандыгы да ачыкка чыгар бекен?

Булак: “Майдан.kg”

Сүлүктүдө шахта басып калган кенчилердин биринин абалы оор. Бул тууралуу Сүлүктү шаардык ооруканасынан билдиришти.

Маалыматка караганда, шаардагы “Марипов” жоопкерчилиги чектелген коомуна таандык көмүр шахтасында 28-августтун кечинде кен урап төрт шахтерду басып калган.

Алардын үчөө бейтапканага жеткирилген, биринин абалы оор, реанимацияда жатат. Калганынын абалы дурус.

Экологиялык жана техникалык коопсуздук инспекциясынын маалыматы боюнча, быйыл Кыргызстандагы кендердеги кырсыктардан он жети кишинин өмүрү кыйылды. Адам өлүмү менен коштолгон кырсыктардын он экиси көмүр, калганы алтын кендеринде болгон. Жалпы кырсыктын ону Баткен облусунун Сүлүктү шаарындагы көмүр кендерде орун алган.

Булак: “Борбор Азия жаңылыктар кызматы”

Ирактын жоочулардан бошотулган Тал-Афар шаарынан Кыргызстан, Өзбекстан жана Тажикстан жарандарына таандык паспорттор табылды. Бул тууралуу Риа Новости агенттиги жеке булактарына таянып билдирди.

Маалыматтарга караганда, анда табылган жүздөгөн документтер текшерүү үчүн атайын кызматтарга өткөрүлүп берилди.

Орусиялык журналисттер билдиришкендей, алардын көбү Кыргызстандын, Өзбекстандын, Тажикстандын, Кытайдын жана Судандын жарандарына таандык. Арасында документ ээлеринин Ооганстандагы, Сириядагы жана Ирактагы согуштарга катышкан мөөнөттөрү көрсөтүлгөн жазуулар да табылган.

Тал-Афар шаары террорчулардын Ирак менен Сириянын чек арасындагы ири таянычы болуп келген. Ал «Ислам мамлекетинин» бошотулган борбору Мосулдун батыш тарабында жайгашкан.

Булак: “Борбор Азия жаңылыктар кызматы”

Ленин райондук ички иштер башкармалыгына Бишкек шаарынын жашоочусу арыз менен кайрылып, 26-август күнү болжол менен саат 20:00 чамасында Жибек-Жолу, Жаш Гвардия көчөлөрүнүн кесилишинде бейтааныш адам күч колдонуп сумкасын тартып алып, белгисиз тарапка изин жашырып качып кеткенин билдирген. Сумканын ичинде 3000 сом акчасы, жеке документтери бар болгон. Бул туурасында Бишкек ШИИББнин Басма сөз кызматы билдирет.

Милиция кызматкерлери тарабынан жүргүзүлгөн ыкчам иликтөө иш-чараларынын натыйжасында кылмыштын изи сууй электе Чүй облусунун 36 жаштагы тургуну кармалган.

Жогорудагы факты боюнча Кыргыз Республикасынын кылмыш-жаза кодексинин 167-беренесинин (тоноо) негизинде кылмыш иши козголгон.

Кармалган жаран убактылуу кармоочу жайга киргизилип, тергөө амалдары жүрүп жатат.

Тоң райондук ички иштер бөлүмүнүн кызматкерлери тарабынан бир катар мал уурулук жасагандыгы үчүн шектелип 46 жаштагы Бөкөнбаев айылынын тургуну Ж. Нурбай кармалды. Бул туурасында Ысык-Көл ОИИБнин Басма сөз кызматы билдирет.

21-июнь күнү мал уурулук үчүн шектелип кармалган Ж. Нурбай, “Кашка-Суу” жайлоосуна барып, өзүнүн топоздорун айылга түшүрүп жатып, Туура-Суу-2 айылынын тургундарына тиешелүү болгон 3 баш топоздорун уурдап кеткен. Уурдалган малдарды айылына алып келгенден кийин, кылмышты жашыруу максатында малдарга басылган тамгаларын өзгөрткөн.

Аталган 3 факты боюнча Тоң РИИБнин тергөө бөлүмү тарабынан Кыргыз Республикасынын кылмыш-жаза кодексинин 165- беренеси (мал уурдоо) менен кылмыш иштери козголгон. Уурдалган малдар ээлерине кайтарылып берилип, кылмышка шектүү катары кармалган Ж. Нурбай, эч жакка кетпөө тил катында калтырылды.

Козголгон кылмыш иштеринин негизинде тергөө амалдары жүрүп жатат.

2017-жылдын 29-август күнү Сокулук районунун ички иштер бөлүмүнүн жана Чүй облусу боюнча патрулдук милиция башкармалыгынын кызматкерлери тарабынан жүргүзүлгөн иш-чараларынын натыйжасында, ыкчам маалымат алынып, ал боюнча Сокулук-Арал автожолунан Сокулук районунун 23 жаштагы А.Б. аттуу жашоочусунун башкаруусунда “Хонда-Фит” үлгүсүндөгү автоунаа токтотулган. Бул туурасында Чүй ОИИББнин Басма сөз кызматы билдирет.

Текшерүү учурунда унаанын ичинен өзгөчө жыттаган зат табылган. Алынган зат экспертизага жөнөтүлүп, жалпы салмагы 2 килограммды түзгөн кара-куурай (марихуана) баңгизаты экендиги аныкталган. Учурда тергөө иштери жүргүзүлүүдө.

2017-жылдын 26-август күнү болжол менен саат 21:30 чамасында, Ноокен районунун Беш-Жыгач айылынан 20-25 жаштагы бейтааныш жаран, О.С. аттуу жергиликтүү тургунду «Хюндай Портер» үлгүсүндөгү автоунаасын айылдын тааласына жалдап айдатып барып, ашкана бычагы менен коркутуп, автоунаасынын ачкычын берүүсүн талап кылган. Бул туурасында Жалал-Абад ОИИБнин Басма сөз кызматы билдирет.

Маалыматка ылайык, жабырлануучу автоунаасынын эшигин жаап жиберип, окуя болгон жерден качып кеткен.

Ал эми шектүү автоунаанын техпаспортун, айдоочулук күбѳлүгүн, жарандык паспортун алып кетип калган.

Ноокен райондук ички иштер бөлүмүнүн кызматкерлери тарабынан жүргүзүлгөн ыкчам иликтөө иш-чараларынын натыйжасында кылмышка шектүү катары ушул районго караштуу Мамбеков айылынын 21 жаштагы М.М. аттуу тургуну кармалып, убактылуу кармоочу жайга киргизилди.
Учурда Кыргыз Республикасынын кылмыш- жаза кодексинин 168-беренесинин (каракчылык) негизинде кылмыш иши козголуп, тергөө амалдары жүрүүдө.

Казакстанда белгилүү журналист жана жарандык активист Жанболат Мамайдын соту уланууда. Ал БТА банктын мурдагы жетекчиси, Европада бозгунда жүргөн Мухтар Аблязов банктан уурдаган мыйзамсыз акчаларды адалдаштырган деп айыпталууда. Сотко экинчи жолу чакырылган БТА Банктын менежерлеринин бири Жаксылык Жарымбетов Мамай менен Аблязов аркылуу 2011-жылы таанышканын айтты.

– 2011-жылы Мухтар Аблязов Жанболат Мамайды мага сырттан, Skype аркылуу тааныштырды. Ага бериле турган алгачкы акчанын суммасын Аблязов өзү айтты. Бирок кийинкилерин өзүм бердим. Себеби Жанболат Мамай ал кезде азыркы “Трибуна. Саяси калам” гезитин чыгарбаса да, журналисттик кесип менен олуттуу алектенерин билчүмүн. Анын үстүнө Жаңы-Өзөн окуясына байланыштуу 2012-жылы өткөн соттон кийин Жанболат Мамай кыйналып жүрдү. Андыктан мен ал акчаны көмөк көрсөтүү иретинде бердим”,-деди ал.

Жанболат Мамай сотто Аблязов менен тааныш эмес экенин жана эч качан жолукпаганын билдирди. Журналист Жарымбетов менен интернет аркылуу 2013-жылы “ортомчусуз” таанышканын, кийин Венада жолугушуп, Skype аркылуу байланышып турганын кошумчалады.

Мамай Жарымбетовдон каржылык жардам алганын четке каккан жок жана бул ырааттуу түрдө болбогонун белгиледи. Ал газетасы кыйынчылыкка дуушар болгондо акча алууга макул болгонун билдирди. Мамай бул жардамды “арам акчаны адалдоо” деп эсептебейт.

Мамай өзү ага тагылган айыптарды четке кагып, кылмыш ишинин саясий жүйөсү бардыгын айтып келүүдө.

Булак: “Борбор Азия жаңылыктар кызматы”