Menu

Адам өлтүрүү

ИИМ милиционерге бычак такап, колуна кишен салып, камактан качып чыккан Кушубек Сабыровго издөө жарыялады

Ички иштер министрлиги (ИИМ) 5-июнга караган түндө, саат 1ден өткөндө Ысык-Ата милициясынын убактылуу кармоочу жайынан качып кеткен адам тууралуу маалымат берди.

Анда 1994-жылы туулган Кушубек Сабыровго издөө жарыяланганы, ага “адам өлтүрүү” өңдүү бир катар оор беренелер менен кылмыш иши козголгону, мурда соттолгону айтылат.

“Ал Кылмыш-жаза кодексинин 165-беренеси (адам уурдоо), 207-беренеси (каракчылык), 169-беренеси (эркиндигинен мыйзамсыз ажыратуу) жана 122-беренеси (адам өлтүрүү) менен айыпталып, кылмыш иши соттун карамагына 30-майда күнү өткөн. Издөөдө жүргөн жаран Балыкчы шаарында туулган, улуту кыргыз, билими орто, үй-бүлөлүү, мурда соттолгон. Кылмышка шектүү саламаттыгы жакшы болбой жатканын айтып нөөмөткер-милиция кызматкерлерине кайрылып, жардам сураган. Милициянын сержанты кармоочу жайдын камерасынын эшигин ачып, өзүнчө бөлмөгө алып кирген. Ошол маалда Сабыров жүрөгү ооруганын, дары берүүнү өтүнгөн. Милиция кызматкери дары алып келген учурда Сабыров ага бычак такап, колуна кишен салып, бутун байлап, оозун таңып качып кеткен”,- деп жазылган ИИМ тараткан маалыматта.

Учурда кылмыш иши козголуп, аны издөө уланып жатат.

УКМК: 2010-жылдагы июнь окуясында милиция кызматкерин өлтүрүүгө шектелип Сузак районунун эки тургуну кармалды

2023-жылдын 27-майында КР УКМК тарабынан Сузак районунун аймагында Жалал-Абад облусунун Сузак районунун тургундары 1984-жылы туулган И.Ш.А жана 1977-жылы туулган Ж.А.Э. аттуу Кыргыз Республикасынын жарандары кармалды. 

Кармалган жарандар 2010-жылдын июнь айында Жалал-Абад облусунда болгон массалык баш аламандыкка активдүү катышканы, ошондой эле Кыргыз Республикасынын ИИМдин милициянын подполковнигин Сузак районундагы Сузак айылында өзгөчө мыкаачылык менен өлтүрүүгө катышкандыгы аныкталды. Бирок 2010-2011-ж тергөө учурунда алардын өздүгү аныкталбай калган.

Кайра козголгон кылмыш ишинин алкагында кармалгандар КР УКМКнын Жалал-Абад облусу боюнча тергөө абагына киргизилди.

Учурда Кыргыз Республикасынын УКМК тарабынан көптөгөн адамдардын өлүмүнө алып келген 2010-жылдын июнь окуяларынын уюштуруучуларын жана активдүү катышуучуларын аныктоо жана жоопкерчиликке тартуу боюнча комплекстүү ыкчам-издөө иш-чаралары жүргүзүлүүдө, ага байланыштуу УКМК 2010-жылдын июнь айында өзгөчө оор кылмыш жасаган адамдарга карата эскирүү мөөнөтү колдонулбай турганын эскертет.

25 жаштагы кызды автоунаасы менен сүзө өлтүрүп, качып кеткен жигит, абакка өзүнүн ордуна майып атасын каматкан

Бишкек шаардык прокуратурасы тарабынан коомдук резонанс жараткан Кыргыз Республикасынын ИИМ Академиясынын курсанты, 1998-жылы туулган Айза Улан кызынын өлүмү боюнча козголгон кылмыш ишинин алкагында У.Э.Н. аттуу жаран кармалды. Ал окуя болгон учурда “Тойота Ранекс” үлгүсүндөгү автоунаанын айдоочусу болгон жана окуя болгон жерден качып кеткен деген негизде башкы шектүү катары каралууда.

Эске салсак, Бишкек ШИИБи тарабынан аталган жол кырсыгы боюнча козголгон кылмыш иши боюнча ички иштер органдарынын мурдагы кызматкери, учурда шектүү У.Э.Н.нын атасы У.Н.А. аттуу жаран кармалып, бирок анын ооруусуна байланыштуу сот үй камагына чыгарган.

Андан кийин Бишкек шаардык прокуратурасы аталган кылмыш ишти өз өндүрүшүнө алып, тергөө амалдарын жүргүзгөн.

Тергөөнүн жүрүшүндө, ички иштер органдарынын мурдагы кызматкери, жазык сот өндүрүшүн жүргүзүү боюнча теориялык билими жана тажрыйбасы бар У.Н.А., уулунун бул кылмышка катыштыгын жашыруу максатында, оорусу жана майыптыгы анын камакта кармалышына алып келбестигин билип туруп, кылмышты өзү жасагандыгы тууралуу көрсөтмө бергендиги жана ошону менен уулу У.Э.Н.ны кылмыш жоопкерчилигине тартуудан сактап калууга далалат кылгандыгы аныкталган.

Сот адилеттигинен качуу максатын көздөп, өлкөдөн мыйзамсыз чыгып кетүүгө аракеттенген негизги шектүү У.Э.Н. тергөө иш-чараларынын натыйжасында прокуратура кызматкерлери тарабынан Бишкек шаарынын аймагында кармалып, Бишкек ШИИБнин убактылуу кармоочу жайына киргизилди.

Учурда прокуратура тарабынан иш боюнча бардык жагдайларды аныктоого жана бардык тиешеси бар адамдарды жоопкерчиликке тартууга багытталган активдүү тергөө аракеттери улантылууда.

Бишкекте аял кишини, анын жаш кызын жана эркек баласын кыйнап өлтүргөн УКМКнын 9-кызматынын мурдагы кызматкери кармалды

Кечээ, 16-февралда Бишкек шаарынын 5-кичи районунда 3 адам өлтүрүү фактысы катталды. Окуя болгон жерге Бишкек шаарынын ИИББнын жана Октябрь РИИБдин тергөө ыкчам тобу менен биргеликте кароо жүргүзүлдү. Аталган даректе энеси, кызы жана уулунун денесине оор залалдар келтирилген жансыз денеси табылган. Бул тууралу ИИМдин басма сөз кызматы билдирет.
 Аталган факт боюнча Кыргыз Республикасынын Кылмыш-жаза кодексинин 122-беренеси (Адам өлтүрүү) менен кылмыш иши козголуп, Бишкек шаарынын Октябрь РИИБде катталган.
 Окуя болгон жерге ИИМдин КИББдин, Бишкек шаарынын ИИББнын жана Октябрь РИИБдин тергөө ыкчам тобу тарабынан толук кароо жүргүзүлүп, анда адамдардын кол тактары, буюм далилдер алынып, тийиштүү соттук-медициналык экспертизалар дайындалды.
 Милиция кызматкерлери тарабынан жүргүзүлгөн ыкчам иликтөө иш чараларынын негизинде кылмышка шектүү катары Баткен облусунун тургуну, 1986-жылы туулган Ч.А. кармалып, Бишкек шаарынын Октябрь РИИБге жеткирилип, учурда тергөө амалдары жүрүп жатат.
 Азыркы убакта бул факт боюнча ар тараптуу, толук кандуу, объективдүү териштирүү иштери колго алынып, тийиштүү экспертизалары дайындалып, ыкчам иликтөө иш чаралар жүрүүдө.
Маалымат боюнча адам өлтүрүү 16-февралдын таңында болгон, коңшулары кечинде гана байкашып милицияга билдиришкен. Шектүү ошол эле түнү кармалган.
УКМК ал шектүү УКМКнын 9-кызматында 2006-2021-жылдары иштеп кеткен деп тастыктады.

УКМК: Кечээ 3 адамды өлтүрүп кармалган адам УКМКнын 9-кызматында 2006-2021-жылдары иштеген

Кечээ, 16-февралда үч жолу адам өлтүрүүгө шектелген жаран мурда КР УКМКда кызмат өтөгөн деген маалымат ЖМКларга жарыяланганына байланыштуу атайын кызмат төмөнкүлөрдү түшүндүрөт:

Өлүмгө шектүү 1986-жылы туулган А.Ч.К. 2006-жылы Мамлекеттик күзөт кызматына жумушка алынып, 2021-жылга чейин кызмат өтөгөн.

Белгилүү болгондой, Мамлекеттик күзөт кызматы 2010-жылдан кийин жоюлуп, түзүмдүк бөлүм катары УКМКга киргизилген.

2021-жылы А.Ч.К. пенсияга эмгек стажына байланыштуу УКМКнын 9-кызматынан бошотулган.

Кадамжайда 14 жаштагы кызды өлтүргөнгө шектелгендердин экөөсү абактагы ажатканада асынып алышкан

Башкы прокуратуранын басма сөз кызматынын жетекчиси Сирожиддин Камолидинов Ош шаарындагы №5 тергөө абагында шектүүлөрдүн өлүмү боюнча териштирүү иштери башталганын билдирди.

Анын айтымында, камакта жаткандардын экөө 4-декабрга караган түнү саат экилерге жакын дааратканада шейшептерине асынып алган.

“Жазаларды аткаруу кызматынын кызматкерлери боюнча материалдар катталып, текшерүү иштери башталды. Биринчи кароо жүргүзүлүп, каза болгондордун денесинен эч кандай залал аныкталган жок. Денелери таза. Соттук-медициналык экспертиза да жүргүзүлүп жыйынтыгы чыгарылат”, – деди Камолидинов.

Расмий маалыматка ылайык, Баткен облусунун Кадамжай районунда 14 жаштагы кыздын өлүмүнө шек саналып кармалган төрт айыпталуучунун үчөө Кадамжай райондук сотунун чечими менен 1-декабрда Оштогу №5 тергөө абагына которулган. Буга алардын сот иши башталганы негиз болгон. Ал эми шектүүлөрдүн дагы бири Жалал-Абад облусундагы жашы жете электер кармала турган мекемеге өткөрүлгөн.

Быйыл 5-сентябрда Кадамжай районунда киши колдуу болгон 14 жаштагы кыздын сөөгү табылган. Факт боюнча Кылмыш-жаза кодексинин “Адам өлтүрүү” беренеси менен кылмыш иши козголгон.

Буга байланыштуу Кадамжай районунун Исхак-Полотхан (ред: мурдагы Халмион) айыл аймагынын 24, 25 жана 27 жаштагы тургундары кармалып, убактылуу кармоочу жайга киргизилген. 8-сентябрда кыздын өлүмүнө байланыштуу жашы жете элек дагы бир адам кармалган.

Ноябрь айында алардын камактагы мөөнөтү 2023-жылдын 4-январына чейин узартылган.

Тергөө абагында каза болгондордун жана азыр камакта жаткан эки шектүүнүн адвокаттары менен жакындары комментарий бере элек.

Кара-Балтада белгисиз бирөөлөр зергерди атып кетти

1-декабрда саат 7:48де Кара-Балта шаарындагы “Батыш” деп аталган аймакта башына ок жеген белгисиз адамдын сөөгү жатканы тууралуу маалымат Жайыл райондук милициясына түшкөн.

Райондук ички иштер бөлүмүнүн (РИИБ) кызматкерлери окуя болгон жерге барып, маркум 48 жаштагы Х. И. аттуу жаран экенин аныкташкан.

Бул факт Жайыл РИИБүндө Кылмыш-жаза кодексинин 122-беренеси (“Адам өлтүрүү”) менен катталып, кылмыш иши козголгон. Учурда иш боюнча керектүү экспертизалар дайындалып, ыкчам-иликтөө иш чаралары жүргүзүлүүдө.

Бул окуяга күбө болгондор социалдык тармакка жазышкандай, маркум алтындан зер буюмдарын жасап саткан ишкер болгон. 1-декабрда таң эрте белгисиз бирөөлөр анын автоунаасын торой токтотуп, башына атып кетишкени айтылууда.

Москвада кыргыз жаранынын өлүмүнө шектүү кармалды

Москвада кыргыз жаранынын өлүмүнө шектүү кармалды. Бул тууралуу 22-ноябрда Кыргызстандын Тышкы иштер министрлиги (ТИМ) билдирди.

Киши колдуу болгон сөөк табылганына байланыштуу окуя тууралуу кыска маалымат берген мекеме ал адам Кыргызстандын 50 жаштагы жараны экенин, Москвада такси айдоочусу болуп иштеп жүргөнү аныкталганын маалымдады.

Факты боюнча Москванын Кунцево райондор аралык тергөө бөлүмүндө Орусиянын Кылмыш-жаза кодексинин 105-беренеси (“Адам өлтүрүү”) менен иш козголуп, тергөө жүргүзүлө баштады.

Кыргызстандын миллиондон ашуун жараны бүгүнкү күндө Орусияда эмгек мигранты болуп жүрөт.

ТИМдин расмий маалыматына караганда, былтыр Кыргызстанга четтен 540 “Жүк-200” келсе, быйыл алгачкы беш айда 292 мигранттын сөөгү мекенине жеткирилди.

Сузакта киши колдуу болгон кыздын жакындары жол тосушту

Жалал-Абад облусунун Сузак районуна караштуу Сасык-Булак айылында бүгүн 21-ноябрда адам өлтүрүүгө шектелип кармалган жергиликтүү тургунга каршы акция өттү.

Журналисттер жеринен маалымдагандай, акцияга Базар-Коргон районунан барган элүү чакты адам катышты. Коопсуздукка милиция кызматкерлери көз салып турду.

Акциянын катышуучулары шектүүнүн үй-бүлөсү менен чогуу башка жакка көчүп кетүүсүн, аны өмүрүнүн аягына чейин эркинен ажыратууну талап кылып кылышты.

Алар талаптарын аткарууну өтүнүп, маселеге коомчулуктун жана бийликтин көңүлүн бурдуруу максатында Бишкек-Ош жолунун ошол айылдын тушундагы тилкесин тороо аракетин көрүштү. 5-10 мүнөттөн кийин жол кайра ачылды.

Окуя Ноокен районунда 8-ноябрда болгон. Милициянын маалыматына караганда, суу аккан сайдан 19 жаштагы кыздын киши колдуу болгон сөөгү табылган. Кыз Базар-Коргон районунун тургуну болгону аныкталып, аны өлтүрүүгө шек саналган 58 жаштагы адам кармалган жана Кылмыш-жаза кодексинин 122-беренеси (Адам өлтүрүү) менен кылмыш иши козголгон.

Окуяны иликтөөгө Жалал-Абад, Ноокен, Базар-Коргон, Сузак райондук бөлүмдөрдүн кызматкерлери тартылып, шектүү катары кармалган киши буга чейин зордуктоо жана башка иштер үчүн бир нече жолу соттолгону, 2021-жылы баңгизатка байланыштуу кылмыш жоопкерчилигине тартылганы аныкталган.

Тергөө учурунда шектүү кылмыш жасаганын айтып, окуя кандай болгонун жеринен көрсөтүп бергени да айтылган.

47 жаштагы жаранды бычактап өлтүргөн Чүй районунун 21 жаштагы тургуну кармалды

жылдын 13 ноябрь күнү Чүй районунун аймактык ооруканасына денесине бычак сайылып жаракат алган Кайырма айылынын тургуну 1975-жылы туулган А.Б. жеткизилип, жандандыруу бөлүмүнө жаткызылган. Бирок доктурлардын көрсөткөн жардамына карабай, алган жаракаты оор болгондуктан, ээсине келбей каза болуп калган.
Аталган окуя боюнча Чүй РИИБнүн тергөө кызматында Кыргыз Республикасынын КЖКнин 130-статьясында (денеге оор залал келтирүү, өлүмгө алып келгенде) көрсөтүлгөн кылмыш курамы менен кылмыш иши козголгон.
Жүргүзүлгөн ыкчам-тергөө амалдарынын натыйжасында, бул кылмышты жасаган адам 2001-жылы туулган У.А. болуп такталып, Кыргыз Республикасынын ЖПкнин 96-беренесинин талаптарына ылайык шектүү катары кармалып, убактылуу кармоо изоляторуна киргизилди.
Кылмыш туугандар арасында болгон уруштун айынан болгондугу аныкталды.
Өлгөн адам урушуп жаткан адамдарды арачалайм деп жатып бычак менен жаракат алган. Ал шектүү болуп камалган адамдын жездесинин досу болуп чыкты.
Тергөө уланып жатат.

Меню