РАСМИЙ КАБАРЛАР

А. Атамбаев “Кыргыз Республикасынын Коопсуздук кеңеши жөнүндө” Кыргыз Республикасынын  Мыйзамына кол койду.

Мыйзам  Кыргыз  Республикасынын  Жогорку Кеңеши тарабынан 2017-жылдын 25-майында кабыл алынган.

Мыйзамдын максаты – Кыргыз Республикасынын Коопсуздук кеңеши тарабынан улуттук коопсуздукту камсыз кылуу  жана    бул чөйрөдө бирдиктүү мамлекеттик тышкы жана ички саясат калыптандыруу маселелери боюнча  чечимдерди кабыл алуу тартибин өркүндөтүү.

Кабыл алынган мыйзамдын жоболору менен Коопсуздук кеңешинин  Кыргыз Республикасынын  конституциялык  түзүлүшүн, эгемендигин,  көз карандысыздыгын жана аймактык бүтүндүгүн азыркы замандын көйгөйлөрүнөн жана коркунучтарынан коргоого, өлкөнү узак мөөнөттүү келечекке туруктуу өнүктүрүүнү камсыз кылууга багытталган тышкы жана ички саясаттагы маселелер боюнча чечимдерди  иштеп чыгуу бөлүгүндөгү ыйгарым укуктары   күчөтүлгөн.

Ошону менен бирге  Коопсуздук кеңешин укуктук статусуна ылайык келтирүү максатында  анын ишмердиги ( милдеттери жана функциялары) төмөндөгүлөргө багытталат:

– улуттук коопсуздукту камсыз кылуу системасын өркүндөтүүгө, инсандын, коомдун жана мамлекеттин турмуштук маанилүү кызыкчылыктарына ички жана тышкы  тобокелдерди аныктоого;

– көйгөйлөрдү жана коркунучтарды божомолдоо, анализдөө жана баалоо боюнча иштерди уюштурууга;

– алдын алуунун жетиштүү чараларын иштеп чыгууга.

Мындан тышкары  каралып жаткан Мыйзамдын жоболоруна ылайык, коргонууну жана коопсуздукту камсыз кылуу боюнча мамлекеттик органдардын ишмердигин практикалык текшерүү Кыргыз Республикасынын Куралдуу күчтөрүн, башка аскердик түзүлмөлөрүн жана укук коргоо органдарын инспекциялоо жолу менен ишке ашырылат.

Кабыл алынган Мыйзамдын ушул жобосу  менен бирге  Коопсуздук кеңешинин курамы жана түзүмү өзгөртүлгөн.

Мыйзамдын  дагы бир жаңылыгы –  тез арада чечим кабыл алууну же кечиктирилгис мүнөздөгү чечимдерди кабыл алууну талап кылган улуттук  коопсуздук маселелерин талкуулоо  төраганын жетекчилиги алдында Коопсуздук кеңешинин кезексиз отурумдарында жана ыкчам кеңешмелеринде тар курамдын катышуусунда  өткөрүлөт.

Мыйзам расмий жарыяланган күндөн тартып күчүнө кирет.

А. Атамбаев бүгүн, 19-июнда мамлекеттик сапар менен Россия Федерациясына жөнөп кетти. Бул туурасында Президенттин Аппаратынын маалыматтык-саясат бөлүмү билдирет.

Сапардын алкагында Мамлекет башчысы Россия Федерациясынын Президенти Владимир Путин, Өкмөттүн Тарагасы Дмитрий Медведев, ошондой эле Башкырстан Республикасынын башчысы  Рустэм Хамитов жана Татарстан Республикасынын башчысы Рустам Минниханов менен жолугушат.

Президент Алмазбек Атамбаевдин сапарынын алкагында Кыргызстандын Россиядагы маданият күндөрү өткөрүлөт. Мындан тышкары сапардын жүрүшүндө  бир катар документтерге кол коюу  болжолдонууда.

Алмаз Атамбаев кол койгон  Жарлыкка ылайык,    Кыргыз Республикасынын  Россия Федерациясындагы жана Финляндия Республикасындагы Атайын жана Ыйгарым укуктуу Элчиси Отунбаев Болот Исакович Москва  шаарындагы резиденциясы менен эки ишти айкалыштыруу боюнча Кыргыз Республикасынын Дания Королдугундагы, Норвегия Королдугундагы,  Швеция Королдугундагы  Атайын жана Ыйгарым укуктуу Элчиси болуп дайындалды.

Бул тууралу КР президенттик аппаратынын басма сөз кызматы билдирет.

А. Атамбаев «Аскер кызматкерлерин пенсия менен камсыз кылуу жөнүндө” Кыргыз Республикасынын  Мыйзамына өзгөртүүлөрдү киргизүү тууралуу” Кыргыз Республикасынын  Мыйзамына кол койду. Бул туурасында Президенттик Аппараттын маалыматтык саясат бөлүмү билдирет.

Мыйзам Жогорку Кеңеш тарабынан 2017-жылдын 4-майында аял-пенсионерлерди пенсиялык социалдык камсыздоодо бирдиктүү мамиле жасоону калыптандыруу, ошондой эле «Аскер кызматкерлерин пенсия менен камсыз кылуу жөнүндө” Мыйзамдын айрым жоболорун “Мамлекеттик пенсиялык социалдык камсыздоо жөнүндө” Мыйзамга   шайкеш келтирүү максатында  кабыл алынган.

Аталган максатта «Аскер кызматкерлерин пенсия менен камсыз кылуу жөнүндө” Мыйзамга, тактап айтканда 1,17 жана 26-статьяларына  өзгөртүүлөр киргизилет. Ал өзгөртүүлөрдө  көп жыл эмгек кылгандыгы жана майыптыгы үчүн  пенсияга кошумчалар каралып, «Мать-героиня» жана«Баатыр эне» ордендери менен сыйланган энелердин  эсептик көрсөткүчтүн 1000 процент өлчөмүндө кошумчага укуктарын бекемдеген пункттар кошумчаланат.

Мыйзам расмий жарыяланган күндөн тартып он күн өткөндөн кийин күчүнө кирет. Өкмөткө  үч айлык мөөнөттө өзүнүн ченемдик укуктук актыларын бул Мыйзам(2-статья) менен шайкеш келтирүү милдети тапшырылат.

Президент Атамбаев бүгүн, 16-июнда,  Улуттук коопсуздук комитетинин кызматкерлерине кызматтык милдеттерин абийирдүүлүк менен  жана үлгүлүү аткаргандыгы, ыкчам-кызмат ишмердигинде жакшы жыйынтыктарга жетишкендиги, ошондой эле  Кыргыз Республикасынын улуттук коопсуздугун  камсыз кылуу ишине кошкон салымы үчүн Ардак грамоталарды тапшырып, президенттик сааттар менен сыйлады. Бул туурасында Президенттик Аппараттын маалыматтык-саясат бөлүмү билдирет.

Мамлекет башчысы өз сөзүндө  УКМК кызматкерлерин  сыйлыктары менен куттуктап, Кыргызстан элинин атынан  өз милдеттерин абийирдүүлүк менен аткарып жаткандыгы үчүн ыраазычылык билдирди.

Президент Алмазбек Атамбаев   мамлекеттин  жана анын жарандарынын коопсуздугун камсыз кылуу боюнча зор иштерди аткарган дал ушундай офицерлердин күч-аракети менен  УКМК өлкөнүн реалдуу коргоочусу болуп калгандыгын белгиледи.  Мамлекет болсо Мекен сакчылыгында тургандар жөнүндө ырааттуу камкордук көргүдөй системаны түзүүгө жетишти.

Президент Алмазбек Атамбаев  УКМК кызматкерлерине чың ден соолук, бакыт-таалай жана  жооптуу кызматтарына ийгилик каалап, Кыргыз Республикасынын Ардак грамоталарын жана президенттик сааттарды тапшырды.

Президент Атамбаев “Кыргыз Республикасынын айрым мыйзам актыларына (Кыргыз Республикасынын  Кылмыш-жаза кодексине, Кыргыз Республикасынын Жазык-аткаруу кодексине) өзгөртүүлөрдү киргизүү жөнүндө” Кыргыз Республикасынын Мыйзамына кол койду. Бул туурасында Президенттик Аппараттын маалыматтык-саясат бөлүмү билдирет.

Мыйзам Жогорку Кеңеш тарабынан 2017-жылдын 4-майында кабыл алынган.

Мыйзамдын максаты –  шарттуу түрдө мөөнөтүнөн мурда бошотулган учурда  соттолгон    адам    башка    кылмыш  жасаганда, ошондой эле уюшулган криминалдык топтордун мүчөлөрү үчүн жоопкерчиликти катуулатуу.

Мыйзамда Кыргыз Республикасынын  Кылмыш-жаза кодексине жана  Кыргыз Республикасынын Жазык-аткаруу кодексине  эгерде  буга чейин сот  шарттуу түрдө мөөнөтүнөн мурда бошотуу тууралуу  чечим кабыл алган соттолгон  адамга, ошондой эле уюшулган криминалдык топтордун мүчөлөрүнө карата шарттуу түрдө мөөнөтүнөн мурда бошотуу кайрадан колдонулбастыгы  тууралуу өзгөртүүлөр киргизилген.

Мыйзам  өмүр бою эркинен ажыратылып, бирок ырайым жасоо иретинде жазасы эркиндигинен ажыратуу менен алмаштырылган  соттолуучу, өмүр бою эркинен ажыратылган мезгилде  жаңы кылмыш жасаса, ага  карата шарттуу түрдө мөөнөтүнөн мурда бошотуу тууралуу  чечим кабыл алууга тыюу салат.

Мыйзам расмий жарыяланган күндөн тартып он күн өткөндөн кийин күчүнө кирет.

Кыргыз Республикасынын Президенти Алмазбек Атамбаев   бүгүн, 15-июнда өлкөдө миссиясы аяктагандыгына байланыштуу ПРООНдун  Кыргызстандагы туруктуу өкүлү Александр Аванесовду кабыл алып, Кыргыз Республикасы менен Бириккен Улуттар Уюмунун ортосундагы  кызматташууну чыңдоого кошкон олуттуу салымы үчүн “Даңк” медалы  менен сыйлады. Бул туурасында Президенттик Аппараттын маалыматтык-саясат бөлүмү билдирет.

Жолугушуунун жүрүшүндө Мамлекет башчысы   Александр Аванесовго Кыргызстандагы жемиштүү иши үчүн ыраазычылык билдирип, өлкөнүн БУУ менен кызматташууну чыңдоого кошкон жеке салымын жана  өлкөдө маанилүү реформаларды  жана  кайра түзүүлөрдү жүргүзгөн мезгилде  көрсөткөн жардамын баса белгиледи.

Президент Алмазбек Атамбаев менен ПРООНдун туруктуу өкүлү  Александр Аванесов  Кыргызстандын түйүндүү тармактарындагы  жүргүзүлүп жаткан реформаларды, анын ичинде коррупцияга каршы күрөштү, сот, шайлоо жана укук коргоо системаларындагы реформалардын жүрүшү, өлкөнүн жарандык секторун мындан ары өнүктүрүү маселелерин талкуулашты. Ошондой эле  БУУнун Баш катчысы Антониу Гутеррештин жакында Кыргызстанга жасаган сапарынын жыйынтыктары  талкууланды.

Жогорку сыйлык үчүн ыраазычылык билдирип, Александр Аванесов  ПРООНдун Кыргызстандагы өкүлчүлүгү  өз ишинде  ар дайым өлкөнүн  Президентинин жеке  колдоосун сезип тургандыгын белгиледи. “Биз көп иштерди аткардык, айрыкча  тынч турмушту камсыз кылуу жагынан бир топ иштерди жасай алдык”, – деп баса белгиледи ал.

Атамбаев бүгүн, 14-июнда,  Улуттук энергетикалык  холдинг компаниясынын төрагасы Айбек Калиевди кабыл алды. Бул туурасында Президенттик Аппараттын маалыматтык-саясат бөлүмү билдирет.

Жолугушуунун жүрүшүндө Мамлекет башчысына  өлкөнүн энергетикалык системасын  алдыдагы жылытуу мезгилине даярдык көрүү боюнча жүргүзүлүп жаткан комплекстүү жумуштар, ошондой  эле  өлкөнүн энергетикалык тармагын өнүктүрүүгө инвестиция тартуу боюнча көрүлүп жаткан чаралар  туурасында маалымат берилди.

Айбек Калиев  Президентке  модернизациясын  аяктап, Бишкек шаарынын ТЭЦин  ишке киргизүү боюнча даярдык туурасында маалымдады. Модернизациядан кийин энергообьекттин кубаттуулугу  жогорулап,  жергиликтүү көмүрдү пайдалануу менен иштеп, натыйжалуулугу өсөт. Ошондой эле  Токтогул ГЭСин реконструкциялоо боюнча жумуштардын жүрүшү тууралуу  дагы айтып берди.

Президент Алмазбек Атамбаев   күз-кыш мезгилинде калкты   энергия  менен туруктуу камсыз кылуу  үчүн алдыдагы жылытуу сезонуна сапаттуу даярдык көрүүнүн маанисин баса белгилеп,  өлкөдөгү энергетикалык долбоорлорду өз мезгилинде жана сапаттуу ишке ашыруу боюнча бир катар тапшырмаларды берди.

Атамбаев кечээ, 12-июнда, өлкөбүзгө сапар менен келген  Европадагы  коопсуздук жана кызматташтык уюмунун Баш катчысы Ламберто Занньер менен жолугушту. Бул туурасында Президенттик Аппараттын маалыматтык-саясат бөлүмү билдирет.

Жолугушуунун жүрүшүндө Президент ЕККУ Баш катчысын жылуу кабыл алып, өлкөгө көрсөткөн колдоосу үчүн ыраазычылык билдирди. Мамлекет башчысы  шайлоочуларды идентификациялоонун биометрикалык системасын колдонуу менен Кыргызстанда  парламенттик шайлоолорду  уюштуруудагы  жана өткөрүүдөгү ЕККУнун көрсөткөн жардамын баса белгиледи. Бул жаңы система шайлоо процессинин ачыктыгын жогорулатып, коомдун  ишенимин камсыз кылды. “Эми биз  заманбап технологияларды колдонуу менен президенттик шайлоолорду өткөргөнү даярданып жатабыз. Жарандарга  жаңы электрондук  биометрикалык паспорттор бериле баштады”, – деп маалымдады Алмазбек Атамбаев.

Баш катчы Ламберто Занньер жылуу кабыл алгандыгы үчүн ыраазычылык билдирип,  ЕККУ мындан ары дагы  Кыргызстандагы демократиялык кайра түзүүлөрдү колдойт деп ишендирди.  Алдыдагы президенттик шайлоолорго жакшы даярдык көрүүнүн маанисине токтолуп, Ламберто Занньер ЕККУнун байкоочулар миссиясын жөнөтүүгө даяр экендигин баса белгиледи.

ЕККУнун Баш катчысы “Таза коом” санариптик трансформация долбоорунун башталышы менен куттуктап, Кыргызстандагы ЕККУнун программалык ишмердиги  дагы ушул долбоордун максаттарына жана милдеттерине ылайык келээрин белгиледи.

Жолугушууда Кыргызстан менен ЕККУнун ортосундагы кызматташуунун актуалдуу маселелери талкууланды.

Атамбаев бүгүн, 13-июнда  өлкөнүн баш прокурору Индира Жолдубаеваны кабыл алды. Бул туурасында Президенттин Аппаратынын маалыматтык саясат бөлүмү билдирет.

Жолугушуунун жүрүшүндө Мамлекет башчысына  өлкөбүздүн укук коргоо органдарынын системасын реформалоонун алкагында надзордук органга өткөрүлүп берилип жаткан милдеттер   – кылмыштарды каттоону жүргүзүү, кылмыш-укуктук статистиканы калыптандыруу, анализдөө, чараларды иштеп чыгуу жана өлкөдөгү кылмыштуулуктун абалын  прогноздоо боюнча жүргүзүлүп  жаткан иштер туурасында маалымат берилди.

Индира Жолдубаева ошондой эле мамлекеттик бийлик   жана башкаруу органдарындагы  коррупцияга каршы күрөшүү боюнча көрүлүп жаткан  чаралар, ишкерлердин укуктарын коргоо чөйрөсүндөгү ишмердик жөнүндө  маалымдады.

Президент Алмазбек Атамбаев   мамлекеттин алдында турган бардык чөйрөдөгү милдеттерди натыйжалуу ишке ашыруу үчүн мыйзамдын артыкчылыгын жана мыйзамдуулукту сактоону камсыз кылуунун маанисин баса белгиледи.

Мамлекет башчысы  көзөмөлдөөчү орган  укук коргоо органдарынын ишмердигин мындан ары өркүндөтүү жана кылмыштуулуктун алдын алуу боюнча иштиктүү чараларды көрүш үчүн кылмыштарды каттоонун жана анализдөөнүн системасынын иши сапаттуу аткарылышын камсыз кылууга тийиш экендигин белгиледи.