КРИМИНАЛДЫК ХРОНИКА ЖАНА ОКУЯЛАР

Президент Гурбангулы Бердымухамедов өкмөттүн жыйынында Түркмөнстанда коррупцияга орун жок экенин айтып, Курулуш жана турак жай-коммуналдык чарба министрин кызматтан бошотту.

Өлкөнүн Коррупцияга каршы күрөшүү мекемесинин маалыматына караганда, акыркы текшерүүлөрдүн жүрүшүндө бир канча жылдан бери жемкорлук менен алектенип келген ондогон кызматкерлер аныкталган. Мекеменин билдирүүсүндө мамлекеттик ишканалардын биринин жогорку кызматтагы аткаминерлери чоң суммадагы акча, миң куту тамеки жана тыюу салынган «Трамадол» дарысы менен кармалгандыгы айтылат. Алардын бири тамеки менен тыюу салынган дары-дармектерди сактоодон сырткары кызмат абалын пайдаланып жол куруучулардан пара да алып келген.

Президент тарабынан кызматтан алынган Курулуш жана турак жай-коммуналдык чарба министри дагы жеке ишкерлерден пара алган курсташын калкалап, кызмат абалын кыянат пайдаланган деп айыпталды.

Банк системасынын ишмердүүлүгүн текшерүү маалында да бир катар коррупциялык кылмыштар аныкталды.

Булак: “Борбор Азия жаңылыктар кызматы”

“Келинчегим тогуз айдын ичинде сегиз жолу УЗИде болгон. Бизде балдардын эгиз экендиги тууралуу алты аныктама бар. Андан сырткары жеке УЗИнин эки аныктамасы бар, аны милиция алган”, — дейт Данияр.

Ал ортодо дарыгерлер төрөт маалында Махабат Намазбековага жергиликтүү гана наркоз куюлганын жана төрөп жатканда аял баарын сезип турганын айтты.

“Белинен наркоз бердик. Аял кадимкидей эле сүйлөп жаткан. Операцияда 3 килограмм 250 граммдык бала чыкты. Баягы биз күтүп жаткан эки килограммга жетпеген эгиздерди алган жокмун. Жанымдагы хирург да карады. Анан тонду алып чыктык. Тон чынында чоңураак экен. Бир бала төрөлгөнүн баарыбыз көрдүк”.

Төрөткө катышкан акушер-гинеколог Гүлзат Нарынбекова алар дагы эгиздерди күтүшкөнүн, бирок бала жалгыз эле төрөлгөнүн ырастады.

Учурда бул окуя боюнча козголгон кылмыш ишинин алкагында териштирүү иштери жүрүүдө. Төрөткананын бөлүм башчысы убактылуу жумушунан четтетилди.

Булак: “Борбор Азия жаңылыктар кызматы”

«Дархан GROUP» компаниясынын мурдагы директору жана «Шымкентпиво» ишканасынын негиздөөчүсү Тохтар Тулешов бул жолкусунда кеңсеси Орусияда жайгашкан «Террордук коркунучтарды анализдөө борборун» жетектеп турганда салык төлөөдөн качкан деп айыпталууда. Андан сырткары ага пара берген деген да айып тагылууда.

Тулешов менен бирге дагы сегиз киши соттолууда. Арасында сыра заводунун мурдагы кызматкерлери да бар.

Иш судья Мырзалы Жорабаевдин төрагалыгы алдында шаардын Енбекшинский райондук сотунда каралууда.

Булак: “Борбор Азия жаңылыктар кызматы”

Маалыматка караганда, окуя июндун башында эле болгон. Кармалган адам Валерий Войтенко деген ысымга жазылган жалпы жарандык паспортту көрсөтүп, ооруп жаткан апасына баратканын айткан. Бирок чек арачылар шек санап, аны текшерүүгө алышкан.

Текшерүү маалында анын жашыруун чөнтөгү бар экени аныкталган. Анда Преднестровьянын кызматтагы адамдары жана андагы орусиялыктар тууралуу маалыматтар, алардын телефон номурлары жазылган кагаз, «Кызыл жылдыз» ордени, смартфон жана флеш-карталар табылган. Алардын ичинде Донецктеги жикчилдердин кармалган талаа командирлери Михаил Толстых менен Арсен Павловдун Донбасста тартылган сүрөттөрү, ошондой эле чалгындоо иш-чараларын өткөрүү боюнча материалдар болгон.

Украин бийлигинин версиясы боюнча, 52 жаштагы кармалган адам – полковник Валерий Гратов. Ал Украианын коопсуздук кызматына өткөрүлүп берилди. Азырынча Гратовдун кармалгандыгы боюнча Орусия тарап эч нерсе билдире элек.

Булак: “Борбор Азия жаңылыктар кызматы”

Паянж дарыясынын наркы жээгинде Халимовдун туугандарын “Ислам малмекети” экстремисттик тобунун жоочулары күтүп турганы айтылууда. Өз булактын кабарлашынча, мурагы полковниктин алыскы тууганы жана кошунасы Насим Рахматов ИМдин Ооганстандагы жоочуларынин бири менен дайыма байланышта болуп турган.

Бир тууган Халимовдор 4-июлда түштөн кийин эки унаа менен Хамадони районун көздөй бет алышкан. Аларды кармоо операциясына Дүйшөмбүнүн ИИБ кызматкерлери кошулган. Халимовдор тобокелчиликке барбай, чек арага жакын жайгашкан Чубек айлына эл сейрек каттаган жол менен жетүүнү чечишкен. Бирок Ибрати кыштагынан алыс эмес жерде аларды милиция күтүп турган.

Ал жерде кагылышуу болуп, топту жетектеп бараткан 53 жаштагы Султонмурод Халимов менен иниси Фозил Халимов жана мурдагы полковниктин айылдаштары – Афзал Абдурашидов, Насим Рахматов өлтүрүлгөн. Дагы үчөө – Али Халимов, Комил Халимов жана Назир Халимов кармалган. Атайын операция учурунда ИИМдин уюшкан кылмыштуулукка каршы күрөшүү башкармалыгынын жетекчи орун басары Анвар Хусейнов жаракат алган.

42 жаштагы полковник Гүлмурод Халимов Тажикстан ОМОНнун командири кезинде, 2015-жылдын апрелинде жоголуп кеткен. Кийин Сирияда жүргөнүн билдирген. Акыркы кабарларга караганда ал өткөн жылы Ирак менен Сирияда «Ислам мамлекети» террор тобунун аскер министрлигине дайындалган.

Тажик бийлиги аны мекенге чыккынчылык кылды деп Интерпол аркылуу издөөгө алган. Кошмо Штаттары анын жүргөн жери тууралуу маалымат бергендерге 3 млн доллар убада кылган.

Булак: “Борбор Азия жаңылыктар кызматы”

Прокуратура өкүлүнүн билдиришинче, Nexia унаасынын жарылуусунан станциянын 24 жаштагы кызматкери каза болуп, төрт адам ооруканага жеткирилген. Алардын экөөсүнүн абалы өтө оор.

“Учурда тергөөчүлөр газ баллон орнотулган унаанын жарылуусуна эмне себеп болгонун териштирип жатышат. Ал газдын сызылып чыгуусунан же аны толтуруу маалындагы эреже бузуулардан улам жарылган болушу мүмкүн”, – деп билдирди облустук ички иштер башкармалыгынын өкүлү.

Каза болгон жарандын туугандары жарылуунун себептерин аныктап, күнөөлүү адамдардын жазаланышын талап кылышууда. Өзбекстанда бензиндин тартыштыгынан жана кымбаттыгынан улам унаалардын, автобустардын жана жүк унааларынын көбү газ баллондорун орнотуп алышкан. Буга байланыштуу газ менен жүргөн автоунаалар жарылган учурлар да көбөйүүдө.

Булак: “Борбор Азия жаңылыктар кызматы”