Menu

Акылбек Жапаров

Акылбек Жапаров Өзбекстандын Асака шаарындагы «UzAuto Motors» автозаводуна барды

Өзбекстан Республикасында жумушчу сапары менен жүргөн Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров Асака шаарындагы (Анжиян облусу) «UzAuto Motors» акционердик коомунун заводундагы өндүрүш процесси менен таанышты.

Өндүрүш менен таанышуу учурунда Акылбек Жапаров Асака шаарындагы автозавод инвестиция тартуунун жана өндүрүш процессин эффективдүү уюштуруунун жакшы үлгүсү экендигин белгиледи.

«Эки өлкөнүн соода-экономикалык байланыштарын өнүктүрүүнүн алкагында өнөр жай кооперациясын жайгаруу зарыл. Бул багытта алгачкы кадамдар жасалды. Мындан ары түзүлгөн келишимдерди жакын арада ишке ашыруу максатында «UzAuto Motors» заводу менен өз ара пайдалуу кызматташуунун темпин жогорулатуу гана керек», – деп белгиледи ал.

Маалымат үчүн: Асака шаарындагы заводдун курулушу 1994-жылдын июнь айында башталган. 1996-жылдын март айында ишканада Damas унаасын чыгаруу башталган.

Учурда ишкананын конвейеринен Chevrolet бренди менен Spark, Nexia, Cobalt, Lacetti (Gentra), Damas, Labo, Malibu, Tracker, Equinox, Trailblazer, Traverse жана Tahoe сыяктуу автоунаа үлгүлөрү чыгарылууда.

Өткөн жылы завод 327 миң автоунаа чыгарса, быйыл 400 миңге чейин автоунаа чыгаруу пландалууда.

Министрлер кабинети базарда ККМ колдонуу мөөнөтүн жылдыруусу мүмкүн

Министрлер кабинетинин төрагасы Акылбек Жапаров Кыргызстанда ишкерлерге 10 миңдей көзөмөл-кассалык аппараттары (ККМ) бекер таратылып жатканын, дагы 20 миң ККМди сатып алууга акча бөлүнгөнүн билдирди.

Бул тууралуу ал “Ала-Тоо 24” телеканалына салык саясаты боюнча берген маегинде айтты.

“Биз базарда иштегендерге 1-апрелге чейин көзөмөл-кассалык аппараттарды койбой эле койгула деп уруксат бергенбиз. Керек болсо аны жылдыруу мүмкүнчүлүгүн да карайбыз. Бирок бир жылда эмне иш жасалды көрүшүбүз керек. Базардын ээлери, ал жакта иштегендер менен сүйлөшкөм. Силер товарды кимден алып атасыңар айткылачы, андан башка эч нерсе сурабайбыз деп атабыз. Бизде товар ташыган 400гө жакын чоң-чоң компаниялар бар. Алар мурда 1,5-2 млрд. сом патентке төлөчү. Товарды кимге саттың деп сурасак эле баарын патентке берип салганын айтышчу. Ошентип алар 72 млрд. сомду патентке чыгарып коюп салык алынбай калчу. Биз азыр базардагылардан электрондук эсеп фактураны колдонуп товарды кимден алдыңар көрсөтүп койгула деп атабыз”.

Базарларда, жармаңкелерде жана көргөзмөлөрдө соода кылгандар 1-апрелге чейин ККМ колдонбой, патенттин негизинде иштесе болот. Салык кызматынын эсебинде, өлкөдө ККМ колдонушу зарыл болгон ишкерлердин саны 100 миңден ашат. Бул бизнесмендердин ишине жараша бир аз азайып же көбөйүп турат.

Бул аппаратты милдеттүү коюу талабы ишкерлердин нааразылыгы менен коштолуп келет. Бишкектеги, аймактардагы чакан жана орто бизнестин өкүлдөрү ага каршы бир нече жолу акцияга чыгышкан. Расмий маалымат боюнча, ушу тапта 65 миңден ашык ишкер ККМ колдонуп жатат. 2022-жылы ККМге өткөн ишкерлер дээрлик үч эсеге көбөйгөн.

Андан тышкары быйыл 1-январдан тартып Кыргызстанда соода-сатык менен алектенген ишкерлердин товарында товардык-транспорттук коштомо кагаздын электрондук түрү болушу шарт, буга чейин кагаз түрүндөгүсү колдонулуп келген. Ал үчүн соодагер Салык кызматынын маалыматтык системасынан “жеке кабинет” ачып, ар бир товарынын коштомо кагазын электрондук түрдө тиркеп турушу керек.

Электрондук товардык-транспорттук коштомо кагаз (ЭТТН) – бул жөнөкөй тил менен айтканда товарларды жөнөтүүчү, алуучу тарап жана жеткирген автоунаа жөнүндө маалыматтарды камтыган электрондук документ. Бул да ишкерлердин нааразылыгын жаратты.

Түркиядагы жер титирөөдөн кийин Бишкекте мурун курулган үйлөрдүн да бекемдиги текшериле баштады

Министрлер кабинетинин төрагасы Акылбек Жапаров өлкөдөгү көп кабаттуу үйлөрдүн сапаты текшерилип жатканын парламенттин 16-февралдагы жыйынында билдирди.

Ал депутат Марлен Маматалиевдин суроосуна жооп берип жатып, буга чейин курулган имараттар да текшерилерин маалымдады.

“Бетондун бекемдигин текшерген “Молоток Кашкарова” шайманын буйрутма бердик. Андан тышкары, рентген аппараты менен да текшеребиз. Эгерде имараттын кайсы бир жерин бекемдеш керек болсо, куруучусун таап чыгып тапшырма беребиз. Курулганына 10-15 жыл болгон болсо да табабыз. Бул жумушту бир кварталдын ичинде аягына чыгарабыз. Ал эми азыр курулуп жаткан үйлөрдү катуу көзөмөлгө алабыз”, – деди Жапаров.

Түркияда жана Сирия он миңдеген адамдын өмүрүн алган соңку жер титирөөдөн кийин курулуштардын сейсмикалык коопсуздугу боюнча маселе көтөрүлүүдө. Кыргызстанда кабат үйлөр 9 баллга чейинки жер титирөөгө туруштук бере аларын 10-февралда Жогорку Кеңештин “Мекенчил” депутаттык тобунун отурумунда Архитектура, курулуш көзөмөлдөө департаментинин директору Талантбек Иманакун уулу билдирген.

15-февралда президент Садыр Жапаров “Кабар” агенттигине курган маегинде, Кыргызстандагы көп кабаттуу үйлөрдүн сапаты тууралуу суроого жооп берип жатып, бул тармакка көзөмөл акыркы эки жылда гана күчөтүлгөнүн билдирген.

Акылбек Жапаров: "Жакында креативдүү индустриялардын паркы түзүлөт, ал креативдүү экономикалык ишмердүүлүктүн 100 түрүнө салык салуунун эң ыңгайлуу шарттарын камсыз кылат"

Өкмөттөр тез өзгөрүп жаткан дүйнөгө туруштук бере алышы үчүн, мамлекеттик башкаруу системасына жана экономикага жаңылыктарды киргизүү процессин тездетүүгө мүмкүндүк берүүчү реформалардын жаңы ыкмаларын киргизүүсү зарыл. Бул тууралуу, Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров Дубай шаарында (Бириккен Араб Эмираттары) өткөн 9-Дүйнөлүк өкмөттүк саммитинин алкагында (WGS) “Келечекке багытталган тездетүүчү жана шыктандыруучу диалогдор” панелдик сессиясында сөз сүйлөдү.

Министрлер Кабинетинин Төрагасынын сүйлөгөн сөзүнүн текстин тиркейбиз:

“Урматтуу Худа Аль-Хашми айым, берген сөзүңүз үчүн рахмат!

Урматтуу кесиптештер, урматтуу бүгүнкү панелдик сессиянын катышуучулары, сиздерди бүгүнкү иш-чарада көрүп жатканыма кубанычтамын!

Бириккен Араб Эмираттарынын Вице-президенти, Премьер-министри, Дубайдын башкаруучусу Улуу даражалуу шейх Мохаммед бин Рашид Аль Мактумга бийик деңгээлдеги ири иш-чарага – 9-Дүйнөлүк өкмөттүк саммитке катышууга чакыргандыгы үчүн чын дилимден ыраазычылык билдирем.

Бүгүнкү күндө дүйнө кескин өзгөрүүлөргө дуушар болууда. Биздин көз алдыбызда дүйнөлүк экономика, саясат, маданият, аң-сезим, планетанын өзү да өзгөрүп жатат.

Глобалдык маанидеги тез өзгөрүүлөр бизди – дүйнө өлкөлөрүнүн өкмөттөрүн мамлекетти жана коомду башкаруунун жаңыча, жакшыртылган методдорун издөөгө мажбурлайт.

21-кылымдын өкмөтү кандай болушу керек? Менин оюмча, бул суроо бүгүнкү иш-чаранын негизги маселелеринин бири.

Биринчиден, албетте, 21 кылымдын өкмөтү коомдун бардык катмарлары, анын ичинде этникалык, диний жана башка азчылыктар, ошондой эле мүмкүнчүлүгү чектелген адамдар менен өз ара аракеттенүү үчүн ачык болушу керек. Өкмөт өз жарандарынын ой-пикирин гана эмес, маанайын да түшүнүп, чагылдырышы керек. Ал эки багытта тең иштеген нейрон маалымат берүү тармагы менен заманбап коомдун тереңдигине кириши керек. Бүгүнкү күндө интернет, социалдык тармактар, электрондук добуш берүү сыяктуу заманбап технологиялар дал ушундай кылууга мүмкүнчүлүк берет.

Дүйнөлүк рейтингдерде Кыргызстан мобилдик интернеттин арзандыгы боюнча жана электрондук өкмөттү өнүктүрүү деңгээли боюнча Борбордук Азияда экинчи орунда турат. Ушул жылдын жаз айларында Кыргыз Республикасынын Президенти Садыр Жапаровдун демилгеси менен жергиликтүү бийлик органдарына шайлоолорду аралыктан, электрондук добуш берүү аркылуу өткөрүү пландаштырылууда.

21чи кылымдын өкмөттөрү жакынкы келечекте заманбап технологиялардын жардамы менен өз жарандарынын маанайын заматта сезе билүү менен коом үчүн керектүү чечимдерди тез жана натыйжалуу кабыл алат деп ишенем. Бул учурдагы шарт, көйгөйлөрдү ыкчам чечүүгө жана калктын бардык катмарлары менен макулдашылган, максималдуу түрдө текшерилген башкаруучулук чечимдерди кабыл алууга мүмкүндүк берет.

Андан тышкары, ушул эле заманбап технологиялар дүйнөнү тыгызыраак кылууда. Бүгүнкү күндө дүйнөлүк экономика ар кандай экономикалык чечимдерди кабыл алуу борборлорун байланыштырган электрондук жана соода тармактарынын бирдиктүү системасына айланууда. Ошо сыяктуу эле, нейрон интернет тармактары аркылуу, дүйнөнүн ар кайсы өлкөлөрүнүн өкмөттөрү, биздин көз алдыбызда, саясат, коопсуздук, климат жана табигый кырсыктар боюнча глобалдык деңгээлде тез жана натыйжалуу чечимдерди кабыл алуунун бирдиктүү системасына айланууда.

Экинчиден, акыркы эки кылымда үстөмдүк кылган ресурстук экономика планетаны чарчап-чаалыгууга алып келгенин баары билет, натыйжада биз бүгүн дүйнөнүн ар кайсы бурчтарында өтө кейиштүү окуялар менен коштолгон климаттын өзгөрүшүн баштан кечирип жатабыз. Ушуга байланыштуу,
21-кылымдын өкмөттөрү неоэкономикага өтүп жатышат, анын негизги түркүктөрү “жашыл”, креативдүү жана санариптик экономика болуп саналат, булар экологияга зыян келтирбейт.

Кыргызстанда акыркы жарым кылымда мөңгүлөрдүн 20-30%га жакыны эрип кетти, ал эми ушул кылымдын аягында илимпоздордун терс сценарийине ылайык,  80%га чейин жоготуу коркунучу бар. Ошондуктан 21-кылымдын доорундагы биздин приоритетибиз туруктуу өнүгүүгө өтүү болуп саналат, атап айтканда – энергиянын кайра жаралуучу булактарынын заманбап технологияларын киргизүү, электр транспортун өнүктүрүү, органикалык дыйканчылыкка жана интенсивдүү мал чарбачылыкка өтүү.

Мөңгүлөрдү сактоонун негизги факторлорунун бири бул тоо токойлорунун аянтын көбөйтүү болуп саналат, ошондуктан өткөн жылы Кыргыз Республикасынын демилгеси менен БУУнун Башкы Ассамблеясынын 76-сессиясында 2022-жылды “Туруктуу тоолорду өнүктүрүүнүн эл аралык жылы” деп жарыялоо жөнүндө резолюциясы кабыл алынып, анын алкагында Кыргызстанда “Жашыл мурас” улуттук кампаниясы башталган жана сегиз миллиондон ашык көчөт отургузулган. Бул сан жыл сайын өсө берет.

Мындан тышкары, Кыргыз Республикасынын Президенти Садыр Жапаровдун демилгеси менен БУУнун Башкы Ассамблеясы резолюция кабыл алып, 2023-2027-жылдары “Тоолуу аймактарды өнүктүрүү боюнча иш-аракеттердин беш жылдыгы” деп жарыялаган, анын алкагында Кыргызстан өзүнүн “Жашыл мурас” кампаниясын дүйнөнүн бардык тоолуу өлкөлөрүнө жайылтууну пландап жатат.

Кыргызстандын өкмөтү креативдүү экономиканы активдүү өнүктүрүүдө, ал дагы 21-кылымдын неоэкономикасынын түркүктөрүнүн бири болуп саналат. Ошентип, жакынкы күндөрү креативдүү индустриялардын паркы түзүлөт, ал өз түрүндө уникалдуу болот, анткени ал креативдүү экономикалык ишмердүүлүктүн дээрлик 100 түрүнө салык салуунун эң ыңгайлуу шарттарын камсыз кылат.

Ошентип, экономиканын жаңы багыттарын өнүктүрүү менен Кыргызстан 2030-жылга карата парник газдарынын эмиссиясын “Адаттагыдай эле бизнес” сценарийи боюнча парник газдарынын эмиссиясынын деңгээлин 15,97%га жана эл аралык колдоонун алдында 43,62%га кыскартууну пландаштырууда.

Мен Кыргызстан, ошондой эле дүйнө өлкөлөрүнүн өкмөттөрү экономиканын жаңы багыттарын өнүктүрүү менен көмүр кычкыл газынын эмиссиясын азайтып, Бириккен Улуттар Уюмунун Климаттын өзгөрүшү боюнча алкактык конвенциясы менен кабыл алынган макулдашууларга жетише аларына терең ишенем!

Жогоруда мен айткан бардык процесстер коомдун, айрыкча анын жаш өкүлдөрүнүн дүйнө таанымын жана аң-сезимин түп-тамырынан бери өзгөртөт. Азыркы жаштар биздин ордубузга келгенде жаратылышка аяр мамиле кылууга жана жашаган жерине, динине, улутуна карабай адамга боорукердик көрсөтүүгө багытталган баалуулуктарды карманган таптакыр башка коом болуп калат. Биздин келечек муундарыбыз Иммануил Кант, Фрэнсис Фукуяма, Чыңгыз Айтматов сыяктуу улуу ойчулдар кыялданган коомду башкарат.

Бирок өкмөттөр тез өзгөрүп жаткан дүйнөгө туруштук бере алышы үчүн, мамлекеттик башкаруу системасына жана экономикага жаңычылдыктарды киргизүү процессин тездетүүгө жана акселирацияга мүмкүндүк берүүчү реформалардын жаңы ыкмаларын киргизүүсү зарыл.

Биз мындай ыкманы “Өкмөттүк акселераторлор” программасы деп эсептейбиз, ал эң кыска мөөнөттө Бириккен Араб Эмираттарынын экономикасында жана мамлекеттик башкаруусунда көзгө көрүнөөрлүк өзгөрүүлөрдү ишке ашырууга мүмкүндүк берди. Жакынкы арада эмираттык кесиптештерибиздин колдоосу менен “Өкмөттүк акселераторлор” программасы Кыргыз Республикасында ишке киргизилет. Бул программа жашыл, креативдүү жана санариптик экономиканы өнүктүрүү процессин тездетүүгө мүмкүндүк берет деп мен толук ишенем!

Урматтуу кесиптештер жана панелдик сессиянын катышуучулары!

Бүгүнкү күндө глобалдашуунун жана заманбап технологиялардын өнүгүшүнүн натыйжасында дүйнө тар болуп баратат. 21-кылымда дүйнөнүн ар кайсы өлкөлөрүнүн өкмөттөрү глобалдык көйгөйлөрдү чечүүдө кызматташып гана тим болбостон, өз тажрыйбалары, өз өлкөсүнүн жана бүткүл дүйнөнүн келечегине болгон көз карашы менен активдүү бөлүшүүсү маанилүү. Бүгүнкү саммиттин маңызы жана миссиясы ушул, жана бул саммит ушул миссияны ийгиликтүү аткарып жатат деп ишенем. Баарыңыздарга планетабызды сактап калуу жана жаңы мыкты дүйнөлүк коомду түзүү үчүн жемиштүү иш алып барууну каалайм!

Сөзүмдүн аягында Бириккен Араб Эмираттарынын Өкмөтүнө саммитти уюштургандыгы жана биздин делегацияны чакыргандыгы үчүн дагы бир жолу терең ыраазычылык билдирем!

Көӊүл бурганыӊыздар үчүн чоӊ рахмат!”

Убактылуу депутаттык комиссиянын мүчөлөрү жана Министрлер Кабинетинин башчысы Акылбек Жапаров Кумтөр кенине барышты

«Кумтөр Голд Компани» жабык акционердик коомунун Кыргыз Республикасынын менчигине өткөндөн берки ишин, алтындын казып алынышын жана сатылышын иликтөө боюнча убактылуу депутаттык комиссиянын мүчөлөрү Кыргыз Республикасынын Министрлер Кабинетинин Төрагасы Акылбек Жапаров менен биргеликте Ысык-Көл облусундагы Кумтөр кенине барды.

Иш сапардын жүрүшүндө алар негизги карьердин, Петров көлүнүн, калдык сактоочу жайлардын абалы менен таанышып, ошондой эле алтынды бөлүп алуу фабрикасында болушту.

Эл өкүлдөрүнө ишканада жүргүзүлүп жаткан иштер, өндүрүштөгү абалды реалдуу убакыт режиминде көзөмөлдөөчү жана алтынды өндүрүүнүн технологиялык чынжырчасынан уурдоо жана алтынды кенден тышкары уруксаатсыз алып чыгуу мүмкүнчүлүгүн жокко чыгарган коопсуздук жана көзөмөл системасы тууралуу маалымат берилди.

«Алтындын ар бир граммы көзөмөлдө», – деп белгиледи ишкананын жетекчилиги.

2022-жылы алтынды бөлүп чыгаруучу фабрика 17,3 тонна алтын өндүргөн. 2023-жылы 14 тонна алтын өндүрүү планы коюлган.

Акылбек Жапаров 2022-жылдагы үч маанилүү окуяны атады

Министрлер кабинетинин төрагасы Акылбек Жапаров “Кабар” маалымат агенттигине курган маегинде өткөн жылдагы маанилүү үч окуя катары Кумтөрдүн мамлекетке алынышын, Кемпир-Абад жана Баткендеги чек ара маселелерин атады.

Ал Кумтөрдүн толугу менен мамлекетке өтүшү экономикалык эле эмес, руханий жактан да утуш болгонун, муну “элдин мүлкүн басып алган тышкы душманды гана эмес, ички душманды да – өз коркуусу, өз күчүнө ишенбөөчүлүк менен жеңүү” деп баалаган.

Кемпир-Абад боюнча да туура чечим кабыл алынганын, бул маселени шылтоо кылып, бийликке келүүнү көздөгөндөр болгонун айткан.

“Баткен аскердик конфликт катары эл, мамлекет үчүн чоң жана чыгашалуу сыноо болду. Биз андан татыктуу өттүк. Жабыркагандарга жардам берүү үчүн мамлекет керектүү каражаттарды табууга жетишти”, – деди Акылбек Жапаров Баткен тууралуу айтып жатып.

Ал былтыр бюджеттин кирешеси көбөйгөнүн, куралдуу күчтөрдү күчтөндүрүү иштерин жана айлык, пенсиялардын жогорулаганын өкмөттүн жетишкендиги катары белгилеген.

  • Канадалык “Центерра Голд” компаниясы менен бирге башкарып келген кенди Кыргызстан өз карамагына 2021-жылдын май айында алып, 2022-жылдын апрелинде “Кумтөр Голд Компанинин” 100% акциясы Кыргызстанга өткөн. Кыргызстан менен “Центерра Голд” доо арыздардан баш тартуу жана ортодогу талаш маселелерди чечүү боюнча келишимге жетишкен. Ага ылайык, Кыргызстан “Центерра Голдго” акциялардын 26 пайызын өткөрүп берип, бардык экологиялык жана каржылык доодон баш тарткан.
  • Президент Садыр Жапаров 29-ноябрда кыргыз-өзбек чек арасын тактоо жана Кемпир-Абад суу сактагычын чогуу пайдалануу тууралуу эки мыйзамга кол койгон. Суу сактагычтын жеринин берилишине каршы чыккан 20дан ашуун адам ушу тушта “төңкөрүш жасоого аракеттенген” деген жүйө менен камакта отурат.
  • Былтыр 14-17-сентябрда кыргыз-тажик чек арасындагы масштабдуу жаңжал ондогон адамдын өмүрүн алган. Эки тарап бири-бирин “агрессияга” айыптаган окуядан Кыргызстан бери дегенде 63 жаранынан айрылып, жараат алгандардын расмий эсеби 200гө жакындады. Тажикстандын Тышкы иштер министрлиги чек арада 41 жараны каза тапканын билдирди. “Озоди” радиосу өз булактарына таянып, 83 кишинин тизмесин жарыялады. Эки тараптан тең кагылышуудан каза тапкандар арасында балдар бар

Акылбек Жапаров: Жыл аягына чейин республика боюнча 85 жаңы мектеп пайдаланууга берилет

Жыл аягына чейин республика боюнча 85 жаңы мектеп пайдаланууга берилет. Бул тууралуу Министрлер Кабинетинин Төрагасы Акылбек Жапаров Кыргыз Республикасынын Жогорку Кеңешинин жалпы жыйынында сүйлөгөн сөзүндө билдирди.
«Бүгүнкү күндө республика боюнча 1 млн 407 миң мектеп окуучусу бар. Билим берүү системасынын керектөөлөрүн канааттандыруу үчүн жыл сайын 25ке жакын мектеп куруу зарыл. Учурда билим берүү тармагына тиешелүү 261 объектиде, анын ичинде 133 авариялык мектепте курулуш иштери жүрүп жатат. Жыл аягына чейин 85 жаңы мектеп пайдаланууга берилет», – деди ал.
Ошондой эле Министрлер Кабинетинин башчысы мындан ары аймактардын билим берүү мекемелерин курууга карай муктаждыктарын аныктоо жаатындагы саясатты түздөн-түз Кыргыз Республикасынын Билим берүү жана илим министрлиги ишке ашыра тургандыгын белгиледи.
«Бишкекте жалпы билим берүүчү мектептердин жетишсиздиги чоң көйгөй болгон. Кыргыз Республикасынын Президенти быйылкы жылдын күз айларына чейин 15 мектептин жана 1 бала бакчанын курулушун жыйынтыктоо тапшырмасын койгон. Бул максатта мамлекеттик бюджеттен – 2,5 млрд сом, шаардык бюджеттен – 450 млн сом, жалпысынан 3 млрд сом бөлүнгөн. Ырааты менен маселе чечилүүдө. Акыркы 10 жылда Бишкекте 9 гана мектеп курулса, быйыл 17 мектеп курулуп бүттү, анын 15и – республикалык жана жергиликтүү бюджеттин эсебинен жана 2 мектеп донордук уюмдардын эсебинен курулду», – деп белгиледи Акылбек Жапаров.

Акылбек Жапаров: Бишкекте 30 жыл ичинде жалпысынан 28 мектеп курулса, быйыл бир жылда 16 мектепти курдук

Кыргыз Республикасынын Министрлер Кабинетинин Төрагасы Акылбек Жапаров, Бишкек шаарынын мэри Эмилбек Абдыкадыров Бишкек шаарындагы «Көлмө» жаңы конушундагы №78 мектеп-гимназиясынын жаңы корпусунун ачылыш аземине катышты.

Министрлер Кабинетинин башчысы белгилегендей, статистикалык маалыматтарга ылайык, борбор калаанын, Сокулук жана Аламүдүн райондорунун жалпы калкынын саны 2005-жылы 1, 1 млн адамдан ашса, ал эми 2016-жылы Бишкек шаарынын өзүндө гана 1 миллиондон ашык адам катталган.

«Мектептердин жетишсиздиги чоң көйгөйгө айланып, бул маселе Кыргыз Республикасынын Президентине борбор калаанын негизги көйгөйлөрүнүн бири катары айтылган. Буга байланыштуу 2022-жылы 16 жалпы билим берүүчү орто мектеп куруу чечими кабыл алынган. Белгилей кетсек, буга чейин мектептердин курулушуна көпчүлүк учурда 5-6 млн сомдун тегерегинде акча каражаты бөлүнүп, капсулалар салынып, курулуш иштери бир нече жылдарга созулуп кеткен. 30 жыл ичинде жалпысынан 28 мектеп курулса, быйыл бир жылда 16 мектепти курдук. Мектептердин жетишсиздиги өзгөчө көйгөй жараткан жаңы конуштарга өзгөчө көңүл бурулду», – деп белгиледи Министрлер Кабинетинин башчысы.

Белгилей кетсек, аянты 2309 чарчы метр болгон мектептин жаңы имаратынын долбоордук кубаттуулугу 380 окуучуга ылайыкталган.

Жаңы корпуста 15 окуу кабинети, жыйындар залы, китепкана, спорт залы, футбол, баскетбол жана волейбол аянтчалары бар.

Учурда Бишкектеги №78 мектеп-гимназиясы 1564 окуучуга эсептелген.

Акылбек Жапаров: "Биз жаңы дүйнө тартиби орноп жаткан мезгилде жашап жатабыз, калыптанып калган евроцентризмден алыстап, Азияга көңүл буруу керек"

Кыргыз Республикасынын Министрлер Кабинетинин Төрагасы Акылбек Жапаров Ош шаарына болгон жумушчу сапарынын алкагында кыргыз-орус инвестициялык форумуна катышты.

Министрлер Кабинетинин башчысы сөзүн улуу колбашчы жана акын Бабурдун ыр саптары менен баштады.

,,Бөтөн жерде унуттасың, адамзат! Адам гана жалгыз өзүн жооткотуп. Жер кезүүдө бир саам кубанычка батпадым! Сүйүктүү Ата-Журтту дегдеп келет адамзат”.

Мен сиздердин көз алдыңыздарга далай кыйынчылыктарды башынан өткөргөн, жамаачы кийим кийген сүргүндөгү байкуш дервиштин образы тартылды деп ойлойм, силер туура баамдадыңыздар, себеби, бул ыр саптарында алыста калган мекенге болгон кусалык сезими даана жана таасирдүү берилген. Ошол эле учурда бул саптар Индостан аралына, азыркы Пакистан жана Афганистандын учу кыйырсыз аймактарына ээлик кылган адамга тийиштүү. Бул адам эбегейсиз байлыкка, ага катар дүйнө жүзүнө атагы чыккан британ империясынын таажысынын негизги жасалгасы – ,,Кохинур” алмазына ээлик кылган.

Бул адамдын аты Захиреддин Мухамед Бабур, ал – Улуу Моголдор империясынын негиздөөчүсү”, – деп белгиледи Акылбек Жапаров.

Министрлер Кабинетинин башчысы бул жолугушуу бекер жерден орун албагандыгын айтты, анткени, дал ушул жерден биздин белгилүү мекендешибиздин улуу сапары башталган.

“Биз байыркы кытайлыктар татаал деп эсептеген өзгөрүү доорунда жашап жатабыз. Биздин жолугушуубуз дүйнөлүк тарыхтагы жана геосаясаттагы тектоникалык өзгөрүүлөр орун алып жатканда өтүүдө.  Кылымдар бою калыптанган түшүнүктөр бузулуп, анын ордуна жаңы дүйнө тартиби орноп жатат. Ооба, бул жеңил эмес, кээде кооптонуу жаратат, ошентсе да бул жаңы мүмкүнчүлүктөрдү жана жаңы жолдорду ачууда. Бул кризис, бирок кризис деген тарыхтын жана прогресстин кыймылдаткыч күчү. Учурда биз болуп жаткан нерселерге дал ушундай көз караш менен карообуз керек”, – деди Акылбек Жапаров.

Министрлер Кабинетинин Төрагасы өзүнүн поэтикалык саптарга кайрылуусун Бабурдун алдында бир эшик жабылса, ал экинчи эшикти ача алгандыгы менен түшүндүрдү.

“Ал беш жүз жыл мурун көрсөткөн жол азыр да чоң мүмкүнчүлүктөрдүн жолу болуп саналат. Биздин алдыбызда эбегейсиз рыноктордун мүмкүнчүлүгү турат. Болгону калыптанып калган евроцентризмден алыстап, Азияга көңүл буруу керек. Бул Ош , Фергана жергесинен Борбор Азиянын гана эмес, бүткүл Азиянын өнүгүүсү, ошондой эле цивилизациялык өздөштүрүлүшү башталышы мүмкүн. Тынчтык, өз ара пайдалуу кызматташтык жана жакшы коңшулук принциптеринде өнүгүү. Ал эми бул жерде жаңы көз-караш жана мурдагы тарыхый парадигмалардан такыр айырмаланган Россиянын чоң бизнесинин ролу биздин өлкөлөр жана бүткүл Евразия үчүн абдан келечектүү жана эки тарапка тең пайдалуу болушу мүмкүн», – деди Министрлер Кабинетинин Төрагасы жана россиялык ишкерлерди азия рыногунун мүмкүнчүлүктөрүнө көңүл бурууга чакырды.

“Ал эми биз үч улуу цивилизациянын тогошкон жери катары жемиштүү өз ара аракеттенүү жана кызматташуу үчүн бардык күч-аракетибизди жумшайбыз. Бул үчүн бизде өз көз-карашыбыз, ачыктыгыбыз жана саясий эркибиз бар”, – деп жыйынтыктады Акылбек Жапаров.

Белгилей кетсек, кыргыз-орус инвестициялык форуму 7-октябрда Баткен шаарында өз ишин баштаган. 8-октябрда форумдун иши Ош шаарында уланууда. Форумга росиялык ишкерлер катышууда.

Форумдун жыйынтыгында 20дан ашык долбоорлорго кол коюу пландалууда.

Акылбек Жапаров: Үстүбүздөгү жылдын 5 айында Бишкекте 15 мектеп курулду, бир кезде борбор калаада жаңы мектептер таптакыр курулбай калган учурлар болгон

Кыргыз Республикасынын Министрлер Кабинетинин Төрагасы Акылбек Жапаров Бишкек шаарындагы №20 мектеп-гимназия окуу-тарбия комплексинин кошумча имаратынын ачылышына катышты.

«Бүгүн спорт залы, спорт аячнтчасы жана башка тийиштүү имараттары каралган 500 орундуу үч кабаттуу мектептин имаратын ачып жатабыз. Курулуш иштери быйыл 30-апрелде башталган. Объекттин курулушуна – 347 млн сом, ал эми техникалык жабдуусуна 13,2 млн сом жумшалган. Мен балдарды, ата-энелерди жана мугалимдерди бул кубанычтуу окуя менен куттуктайм. Ошондой эле мугалимдерди өтүп кеткен кесптик майрамы менен куттуктайм», – деди Акылбек Жапаров.

Министрлер Кабинетинин башчысы белгилегендей, 2005-жылы борбордо 1,1 миллиондон ашык адам жашаса, ал эми 2016-жылы Улуттук статистикалык комитет билдиргендей, шаардын өзүндө эле 1 млн адам жашаган. Эң курч көйгөйлөрдүн бири мектептердин жетишсиздиги жана жүктөмдөрдүн оордугу болгон, буга байланыштуу Кыргыз Республикасынын Президенти Министрлер Кабинетинин жана Бишкек шаарынын мэриясынын астына бул маселени чечүү тапшырмасын койгон.

«Жаңы конуштарга 5 жаңы мектеп салынды, калган мектептерде жаңы мектептерден кем калышпаган кошумча имараттар курулду. Бизде №75 жана №76 – эки авариялык мектеп болгон, учурда мында жаңы мектептер иштеп жатат. 1950-1959-жылдары Фрунзе шаарында 11 мектеп курулган, ал индустриялаштыруу мезгили болчу, бул мезгилдерди Исхак Раззаков менен байланыштырганбыз. Ал эми 1960-1969-жылдары 31 мектеп курулган, бул Турдакун Усубалиевдин учуру. 2022-жылы 5 айдын ичинде Бишкекке 15 мектеп, 1 бала бакча курдук. Менин оюмча, качандыр бир кезде биздин балдар бул учурду Садыр Жапаров менен байланыштырышат.

Бишкекке бир дагы мектеп курулбай калган учурлар болгону эсибизде, мисалы 2011, 2013, 2014, 2016, 2019 жана 2020-жылдар. Демократиялык жарылуунун туу чокусу, эң чоң ички миграция жүрүп, бир дагы мектеп курулган эмес. Жаңы конуштарга дагы 7 мектепти куруубуз керек, алар жакынкы жылдары курулат. 5 айдын ичинде бизге жаңы мектептерди куруп берген куруучуларга ыраазычылык билдирем», – деди ал.

Акылбек Жапаров ошондой эле шайлоо алдында добуш алгысы келген жеке адамдар айрым жерлерге мектеп курууну өз кызыкчылыгы үчүн колдоно турган көрүнүштөр кайталанбай турганын баса белгиледи.

«Мектептердин жайгашуу ордун Билим берүү жана илим министрлиги аныктайт. Балдарыбыздын 4 тилден ашык тил билүүсү, анын ичинде мамлекеттик, расмий, англис, кытай жана программалоо тилин жакшы билиши жана атаандаштыкка жөндөмдүү муундун өсүп чыгуусу үчүн мугалимдерден сапаттуу билим берүүнү суранабыз. Биз 7 миллионунчу жарандын төрөлүшүн күтүп жатабыз. Ошондуктан жыл сайын балдардын билим алуусуна жакшы шарттарды түзүү үчүн жаңы мектептерди куруу зарыл. Балдарды жаркын келечек күтүп турат. Алар өнүккөн өлкөдө жашашат», — деп жыйынтыктады Министрлер Кабинетинин Төрагасы.

Маалымат үчүн: Жаңы үч кабаттуу комплексте 20 окуу классы каралган. Имарат 500 окуучуга ылайыкталган.

Имараттын биринчи кабатында башталгыч класстар, хореографиялык зал, 285 чарчы метр болгон спорт зал жана ашкана бар. Экинчи кабатта: башталгыч класстар, 110 орундуу 277 чарчы метр аянттуу жыйындар залы бар. Үчүнчү кабатта предметтик кабинеттер жана лабораториялар жайгашкан. Имараттын жалпы аянты 5035 кв.метр. Мектептин аймагында футбол, баскетбол жана волейбол аянтчалары, чуркоо үчүн аянтча жана воркаут аянтчасы курулган.

Меню