Menu

Акылбек Жапаров

Министрлер Кабинетинин башчысы Акылбек Жапаров «Торугарт» көзөмөл-өткөрүү пунктуна барды

Кыргыз Республикасынын Министрлер Кабинетинин Төрагасы Акылбек Жапаров Нарын облусуна жумушчу сапарынын алкагында «Торугарт – Автожол» көзөмөл-өткөрүү пунктуна барды.

Акылбек Жапаров «Фантузи» контейнердик кранынын иши менен таанышып чыгып, мындан ары карай жүктөө «Арка» районунда эмес, «Торугарт» көзөмөл-өткөрүү пунктунда ишке ашырылаарын жана жүк ташуучу унаалардын саны көбөйтүлөөрүн белгиледи.

Министрлер Кабинетинин башчысы ошондой эле дезинфекциялык барьердин абалы менен таанышып, аталган пункттун инфраструктурасын жакшыртууну тапшырды.

Мындан тышкары, Акылбек Жапаров Тайлак Баатыр атындагы чек ара аскер бөлүгүнүн заставасынын абалы менен таанышты.

Акылбек Жапаров: Президенттин администрациясынын түзүмү жана иши толугу менен кайрадан каралып чыгат

Кыргыз Республикасынын Министрлер Кабинетинин Төрагасы – Президенттин Администрациясынын Жетекчиси Акылбек Жапаров Кыргыз Республикасынын Президентинин Администрациясынын кызматкерлери менен жумушчу кеңешме өткөрүп, Администрациянын жакынкы келечекке карай ишинин негизги багыттарын белгиледи.

Ал билдиргендей, Кыргыз Республикасынын Президенти тарабынан Президенттин Администрациясына негизги милдет – мамлекет башчынын чечимдеринин аткарылышын так көзөмөлдөөнү камсыздоо коюлган, мында чоң жоопкерчилик тармактык министрликтерге жүктөлөт.

«Мен мамлекеттик кызматтын бардык тепкичтерин басып өткөм жана буга дейре Президенттин жана Өкмөттүн Администрациясында иш кандай жүргүзүлгөндүгүн билем. Иш процессин уюштуруу принциптерин ыкчам жана натыйжалуу чечимдердин кабыл алынышы максатында толугу менен карап чыгуу зарыл. Бир дагы документ Президенттин Администрациясында «кептелип» калбашы керек. Ар бир кызматкер кесипкөй сапаттарга ээ болуп, мамлекеттин келечеги үчүн командада ыкчам, ырааттуу жана толук кандуу иш алып барууга тийиш», – деп белгиледи Акылбек Жапаров.

Министрлер Кабинетинин Төрагасы белгилегендей, алдыда чоң өзгөрүүлөр турат, масштабдуу социалдык, экономикалык, технологиялык милдеттерди чечүү зарыл, аларды ишке ашырууда бийликтин бардык деңгээлинде, республикадагы айыл өкмөттөн жогорку жетекчиликке дейре мамлекеттик башкарууга жаңыча мамиле кылуу талап кылынат.

Министрлер Кабинетинин башчысы Президенттин Администрациясынын түзүмдүк бөлүмдөрүнүн жетекчилерин алдыдагы бир катар амбициялуу пландарды ишке ашыруу үчүн күч-аракеттерди бириктирүүгө чакырды жана чечим кабыл алуунун эпсиз жана натыйжалуулугу төмөн тутумунан баш тартып, жоопкерчиликтүү милдеттерди эффективдүү чече турган жогорку денгээлдеги кесипкөй адистерден турган мобилдүү жана ишке жөндөмдүү Президенттин Администрациясын түзүү мезгили келип жеткендигин белгиледи.

КР Министрлер Кабинетинин Төрагасы – Президенттин Администрациясынын Жетекчиси жана Министрлер Кабинетинин мүчөлөрү ант беришти

Кыргыз Республикасынын Министрлер Кабинетинин Төрагасы – Президенттин Администрациясынын Жетекчиси Акылбек Жапаров жана Кыргыз Республикасынын Министрлер Кабинетинин мүчөлөрү ант беришти.

Кыргыз Республикасынын эли, Кыргыз Республикасынын Президенти жана Кыргыз Республикасынын Жогорку Кеңешинин депутаттарынын алдында төмөнкүлөр ант беришти:

Акылбек Жапаров — Министрлер Кабинетинин Төрагасы – Президенттин Администрациясынын Жетекчиси;

Арзыбек Кожошев — Министрлер Кабинетинин Төрагасынын биринчи орун басары;

Азиз Аалиев — Министрлер Кабинетинин Төрагасынын орун басары;

Эдиль Байсалов— Министрлер Кабинетинин Төрагасынын орун басары;

Камчыбек Ташиев — Министрлер Кабинетинин Төрагасынын орун басары – Улуттук коопсуздук мамлекеттик комитетинин төрагасы;

Алмаз Бакетаев – финансы министри;

Данияр Амангелдиев — экономика жана коммерция министри;

Бактыбек Бекболотов — коргоо министри;

Аяз Баетов — юстиция министри;

Алымкадыр Бейшеналиев — саламаттык сактоо министри;

Болотбек Купешев — билим берүү жана илим министри;

Азамат Жаманкулов — маданият, маалымат, спорт жана жаштар саясаты министри;

Кудайберген Базарбаев — эмгек, социалдык камсыздоо жана миграция министри;

Бообек Ажикеев — өзгөчө кырдаалдар министри;

Улан Ниязбеков — ички иштер министри;

Эркинбек Осоев —транспорт жана коммуникациялар министри;

Доскул Бекмурзаев — энергетика министри;

Аскар Жаныбеков — айыл, суу чарба жана аймактарды өнүктүрүү министри;

Динара Кутманова — жаратылыш ресурстары, экология жана техникалык көзөмөлдөө министри.

Кыргыз Республикасынын тышкы иштер, тышкы соода жана инвестициялар министри Руслан Казакбаев чет элдик командировкада болгондугуна байланыштуу ант берүү аземине катыша алган жок.

«Кыргыз Республикасынын Министрлер Кабинети жөнүндө» Кыргыз Республикасынын конституциялык Мыйзамына ылайык, Кыргыз Республикасынын Министрлер Кабинетинин мүчөлөрү өз милдеттерин аткарууга киришүү алдында Кыргыз Республикасынын Жогорку Кеңешинде Кыргыз Республикасынын Президентинин жана парламент депутаттарынын катышуусунда ант беришет.

Акылбек Жапаров КР Министрлер Кабинетинин Төрагасынын - КР Президентинин Администрациясынын Жетекчисинин милдетин аткаруучу болуп дайындалды

Кыргыз Республикасынын Президенти Садыр Жапаров кол койгон Жарлыкка ылайык, Кыргыз Республикасынын Конституциясынын 71-беренеси менен, Жапаров Акылбек Үсөнбекович Кыргыз Республикасынын Министрлер Кабинетинин Төрагасынын – Кыргыз Республикасынын Президентинин Администрациясынын Жетекчисинин милдетин аткаруучу болуп дайындалды.

2021-жыл 12-октябрь

Женевада кыргыз өкмөтү менен "Центерра Голддун" сүйлөшүүсү аяктады

28-30-сентябрда өткөн Швейцариянын Женева шаарындагы кыргыз өкмөтүнүн өкүлдөрү менен буга чейин Кумтөр алтын кенин иштеткен “Центерра Голд” компаниясынын жетекчилеринин биринчи сүйлөшүүсү аяктады.

Кыргызстандын делегациясын экономика жана финансы министри Акылбек Жапаров менен Улуттук коопсуздук мамлекеттик комитетинин төрагасы Камчыбек Ташиев жетектеп барган. Делегация курамында Кумтөр кенине тыштан башкаруучу болуп бекиген Тенгиз Бөлтүрүк, башкы прокурор Курманкул Зулушев жана башка адистер бар. Сүйлөшүүгө “Центерра Голд” компаниясынын башкы аткаруучу директору Скотт Пери баштаган топ катышты.

“Центерра Голд” компаниясы менен сүйлөшүүлөрдүн биринчи раунду ийгиликтүү аяктады. Эки тарап сүйлөшүү столуна отуруп, бири-бирине нааразылыктарын ачык айтышты. Тараптар сүйлөшүүнүн маңызын, деталдарын позицияларын ачыктай албагандыктан, сүйлөшүүнүн жыйынтыгына канааттангандыгыбызды билдире алабыз. Кыргызстандын мамлекеттик делегациясы улуттук кызыкчылыкты коргоодо өз позициясында бекем турду. Сүйлөшүүлөр уланат”, – деди сүйлөшүүгө катышкан ишенимдүү булак.

Ташиев менен Жапаров баштаган делегация Кумтөр маселесине байланыштуу Женевага учуп кеткени тууралуу маалымат 27-сентябрда тараган.

Кумтөр кенинин ишин иликтеген мамлекеттик комиссия “Центерра Голд” Кыргызстанга салык жана экологиялык санкция түрүндө 4 миллиард 252 миллион доллар төлөшү керек деген бүтүм чыгарып, 17-майда Жогорку Кеңеш “Кумтөр Голд” компаниясына убактылуу сырттан башкаруу киргизген. Ошондон бери өлкөдөгү эң ири алтын кенди кыргыз бийлиги өзү иштетип келатат.

Канадалык “Центерра Голд” компаниясы кыргыз өкмөтүн Стокгольмдогу Эл аралык арбитражга жана Нью-Йорктогу банкроттуулук боюнча сотко берген. Ушул тапта Нью-Йоркто соттук териштирүү жүрүп жатат. Сотто Кыргызстандын кызыкчылыгын Arnold & Porter Kaye Scholer юридикалык фирмасы коргойт.

Каржы министри Акылбек Жапаров, элчи Ибрагим Жунусов Ташкентте «Борбордук жана Түштүк Азия: Аймактык өз ара байланыш. Тобокелдиктер жана Мүмкүнчүлүктөр» аттуу конференцияга катышууда

Бүгүн, 2021-жылдын 16-июлунда, Ташкент шаарында, Кыргыз Республикасынын министрлер кабинетинин орун басары – Кыргыз Республикасынын экономика жана каржы министри Акылбек Жапаров, Кыргыз Республикасынын Жогорку Кеңешинин Эл аралык иштер, коргоо жана коопсуздук боюнча комитетинин төрагасынын орун басары Абдывахап Нурбаев жана Кыргыз Республикасынын Өзбекстан Республикасындагы Атайын жана Ыйгарым укуктуу Элчиси Ибрагим Жунусов «Борбордук жана Түштүк Азия: Аймактык өз ара байланыш. Тобокелдиктер жана Мүмкүнчүлүктөр» деген аталышта Эл аралык жогорку деңгээлдеги конференциясынын ачылыш аземине катышууда.

Ачылыш аземи Өзбекстан Республикасынын Президенти Шавкат Мирзиёев, Афганистандын Президенти Ашраф Гани, Пакистандын Премьер-министри Имран Хан, Борбор Азия, Россия, Кытай Эл Республикасынын Азербайжан, Беларуссия, Сауд Аравия Королдугу жана Түштүк Азия өлкөлөрүнүн тышкы иштер министрлеринин, ошондой эле БУУ, КМШ, ЭКО, ТМКК, ШКУ, Азиядагы өз ара аракеттенүү жана ишеним чаралары боюнча конференция, Түрк тилдүү мамлекеттердин кызматташтык кеңеши, ЕБ, БУУнун билим берүү, илимий жана маданий уюму сыяктуу эл аралык уюмдардын башчылары катышууда.

Жогорку деңгээлдеги Эл аралык конференциянын максаты – транспорттук жана логистикалык, энергетика, соода, өндүрүш, инвестиция, технологиялык жана маданий-гуманитардык чөйрөлөрдө «Борбордук Азия – Түштүк Азия» өз ара пайдалуу стратегиялык байланыш моделин көп тараптуу талкуулоо үчүн саясий жана эксперттик аянтчаны түзүү.

Меню