Author Archives: Эргешов Бактыбек

Үстүбүздөгү жылдын 20-август күнү Балыкчы ШИИБне арыз менен Балыкчы шаарынын тургуну Т.К. аттуу жаран кайрылган, ал арызында ушул эле жылдын 2-июль күнү Тилек аттуу жана жанында белгисиз 2 адам  ишеничине кирип,  ага тийешелүү жылкысын сатып-алмаштырып кайра беребиз деп алдап ииз оорду менен  жок болгундугун билдирген. Жабырлануучуга 80 000 сом өлчөмүндө материалдык зыян келтирилген.

Аталган факт Балыкчы шаарынын ИИБнын КБРне  катталып, КЖКнин 209-беренесинин (Урдоо) негизинде кылмыш иши козголгон. 

Жүргүзүлгөн ыкчам-иликтөө иш-чараларынын натыйжасында, Нарын облусуна караштуу Кара-Суу айылынын 1975 ж.т. тургуну К.Т. аттуу жаран  Тоң районунун сырт аймагынан, жазадан жашырынып жүргөн жеринен Балыкчы ШИИБдин кылмыш иликтөө бөлүмчөсүнүн кызматкерлери тарабынан кармалган.  Тергөо-ыкчам иш-чараларынын жүрүүсүндө, шектүү К.Тнын  аталган кылмышка тийешеси бар шериктеринин  өздүктөрү аныкталып колго түшүрүшүрүлгөн,  алар Балыкчы шаарынын 1991 ж.т. А.Т., 1991 ж.т  К.Ө. жана 1976 ж.т. Э. у К. тургундары болуп чыгышты. Андан аркы тергөө-ыкчам иштеринин жүрүшүндө, милиция кызматкерлери кылмышка шектүү катары кармалышкан жарандар Балыкчы  шаарынын аймагынан  дагы ушул сыяктуу 3 факт,  малды алдамчылык жолу менен ээлеп алуу  боюнча  кылмышка тийешеси бар экендигин  аныкташкан. 

Учурда шаардык соттун чечими негизинде шектүүлөргө эки айга үй камагына алуу баш коргоо чарасы кабыл алынып тергөө амалдары уланууда. 

Тергөө кызматы, кылмышка шектүүлөрдүн, башка ушул сыяктуу кылмыштарга катыштыгы бар экенин жокко чыгарбайт жана бул адамдардын алдамчылык аракеттеринин жабыркаган жарандарды, 0701067101, 0394432716, 0394432705 телефон номурлары аркылуу байланышууну өтүнөт.

Бүгүн, 1-сентябрда Бишкек шаарындагы К.Бобулов атындагы №88 мектепке ЮНИСЕФ Япония Өкмөтү тарабынан каржыланган долбоордун алкагында 11 комплект компьютер жана COVID-19 кесепеттеринин алдын алуу үчүн санитардык каражаттарды тапшырды. Бул тууралу Билим жана илим министрлигинин басма сөз кызматы билдирет.

№88 К. Бобулов атындагы орто мектептеги салтанаттуу линейкага жана IT-каанасынын  ачылышына Билим берүү жана илим министринин орун басары Уланбек Мамбетакунов, Жапониянын Атайын жана Ыйгарым укуктуу Элчиси Сигэки Маэда жана ЮНИСЕФтин Кыргыз Республикасындагы өкүлүнүн орун басарынын милдетин аткаруучу Томоя Сонода катышты.

Компьютердик класстын ачылышында У.Мамбетакунов 88-мектептин бүтүрүүчүлөрүнөн атактуу программисттер жана мыкты адистер чыгат деп үмүттөнөрүн белгиледи.

ЮНИСЕФ 100 мектепти жалпы суммасы 600 миң АКШ долларын түзгөн компьютерлер менен жабдыйт. Ал эми 460 мектепти жалпы суммасы 800 миң АКШ доллары болгон термометрлер, кол кургаткычтар, дезинфекциялоочу каражаттар жана оорулардын алдын алуу жана COVID-19 менен күрөшүү үчүн самын сыяктуу гигиеналык каражаттар менен камсыз кылат. Мындан тышкары, бардык мектептер жеке гигиена жана коронавирустун алдын алуу боюнча маалыматтык материалдар менен камсыздалат. ЮНИСЕФтин жаңы долбоору COVID-19 шартында сапаттуу билим берүүнү көздөйт.

“Жапония өкмөтү менен ЮНИСЕФ коопсуз чөйрөдө сапаттуу билим алуу ар бир баланын укугу деген баалуулукту карманат”, – деп белгиледи Жапониянын Кыргыз Республикасындагы Атайын жана  Ыйгарым укуктуу Элчиси Шигеки Маэда.

Долбоорду ишке ашырууга долбоордун өкмөтү 2,7 млн АКШ долларын бөлгөн.

Долбоор 2024-жылдын августуна чейин уланат жана ал Туруктуу өнүгүүнүн 4-максатына: инклюзивдүү жана адилеттүү билим берүүнү камсыздоого жана бардык адамдардын өмүр бою билим алуу мүмкүнчүлүктөрүн кеңейтүүгө көмөктөшөт.

ЮНИСЕФтин Кыргыз Республикасындагы өкүлүнүн милдетин аткаруучу Томоя Сонода “COVID-19 шартында окуу кризисинин алдын алып, балдарды билим жолуна кайтарыш үчүн биз мектептердин коопсуздугун жана ачыктыгын камсыз кылышыбыз керек”, -деп билдирди.

Бүгүн, 1-сентябрда Кыргыз Республикасынын Эгемендүүлүгүнүн 31 жылдыгын утурлай, 30 жогорку окуу жайында “Бизнес-инкубаторлор” ачылды. Бул тууралу Билим жана илим министрлигинин басма сөз кызматы билдирет.

“Түзүлүп жаткан бизнес-инкубаторлордун иши Кыргызстандын экономикалык коопсуздугун камсыздоого жана өлкөнүн технологиялык көз карандысыздыгын калыптандырууга багытталат”, – деп билдирди Министрлер Кабинетинин төрагасы Акылбек Жапаров онлайн тартипте өткөн стартап борборлорун ачуу аземинде.

Министрлер Кабинетинин төрагасынын айтымында, студенттер ар кандай тармактарда стартаптарды түзүүгө жана алдыга жылдыруучу идеяларды иш жүзүндө колдонууга мүмкүнчүлүк алат. Аларга тажрыйбалуу насаатчылар жардам берет.

Ал эми Билим берүү жана илим министри Алмазбек Бейшеналиев Билим берүү чөйрөсүндөгү мамлекеттик саясаттын артыкчылыктуу багыттарынын бири – жаштарды жана келечек муундарды окутуу үчүн ыңгайлуу, заманбап шарттарды түзүү экендигин белгиледи.

“Студент биринчи курстан баштап конкреттүү бир бизнес идеяны акыл-оюнда бышырса, акыркы курста стартап форматында ишке ашырса, анын натыйжасында коом үчүн жаңы жана өтүмдүү болгон бир продукт өндүрүүнү жолго койсо, бул чоң ийгиликке жетүү болуп саналат”, – деди министр.

Министр Алмазбек Бейшеналиев май айынын башында республикадагы он жогорку окуу жайдын (КУУ, КУАУ, КММА, КМТУ, ОшМУ, Нарын МУ, ЫМУ, ЖАМУ, БатМУ) ректорлору жана көз карандысыз эскперттер менен биргеликте Америка Кошмо Штаттарына иш сапары менен барып, жогорку билим берүүгө инновацияларды киргизүү жана билим берүү стартаптарын ишке ашыруу тажрыйбасы менен таанышып келген. Аталган 31 бизнес-инкубаторлор ушул иш-сапардын алкагында ишке ашты.

Кошумчалай кетсек, буга чейин Билим берүү жана илим министрлиги “Кыргыз Патент” Кыргыз Республикасынын министрлер кабинетине караштуу интеллектуалдык менчик жана инновациялар мамлекеттик агенттиги менен биргелешкен иш планын түзгөн. Анын негизинде студенттик стартаптарды өнүктүрүү, аларды акселерациялоо иш-чаралары жүргүзүлүүдө.

Бизнес-инкубаторлор ачылган жогорку окуу жайлардын тизмеси:

• Ж. Баласагын атындагы Кыргыз улуттук университети
• И. Арабаев атындагы Кыргыз мамлекеттик университети
• И. Раззаков атындагы Кыргыз мамлекеттик техникалык университети
• К. Карасаев атындагы Бишкек мамлекеттик университети
• Кыргыз мамлекеттик дене тарбия жана спорт академиясы
• И. Ахунбаев атындагы Кыргыз мамлекеттик медициналык академиясы
• К. Скрябин атындагы Кыргыз улуттук агарадык академиясы
• Кыргыз Республикасынын эл аралык университети
• Б. Бейшеналиева атындагы Кыргыз мамлекеттик маданият жана искусство университети
• Кыргыз-Түрк «Манас» университети
• Б. Ельцин атындагы Кыргызстан-Россия-Славян университети
• М. Рыскулбеков атындыгы Кыргыз экономикалык университети
• К. Дыйканбаев атындагы  КРнын ТИМдин алдындагы Дипломатиялык акдемиясы
• И. Абдраимов атындагы Кыргыз авиациялык институту
• Ош мамлекеттик университети
• М. Адышов атындагы Ош технологиялык университети
• А. Мырсабеков атындагы Ош мамлекеттик педагогикалык университети
• Б. Сыдыков атындагы Кыргыз-Өзбек эл аралык университети
• Б. Осмонов атындагы Жалал-Абад мамлекеттик университетинин
• Баткен мамлекеттик университети
• К. Тыныстанов атындагы Ысык-Көл мамлекеттик университети
• С. Нааматов атындагы Нарын мамлекеттик университети
• Талас мамлекеттик университети
• АДАМ университети
• Борбордук Азиядагы Америка университети
• Эл аралык Алатоо университети (МУ Алатоо)
• Эл аралык инновациялык технология университети (МУИТ)
• Салымбеков университети
• АВС Академиясы
• Борбордук Азиядагы эл аралык университети
• ОИӨК “Кыргызстан эл аралык университети”
• МАУПФиБ

Кыргыз Республикасынын Президенти Садыр Жапаров бүгүн, 1-сентябрда, Бишкек шаарындагы балдардын медициналык тез жардам ооруканасынын жаңы имаратынын курулушуна старт берди.

Мамлекет башчысы өз сөзүндө азыркы дүйнө жүзүндө эң маанилүү маселе саламаттык сактоо, ден соолукту чыңдоо, сергек жашоо мүнөзүн адатка айлантууга тарбиялоо болуп эсептелерин, андыктан өлкөнүн мамлекеттик саясаты жарандардын ден соолугун коргоо жана чыңдоо үчүн бардык шартттарды түзүүгө багытталганын белгиледи.

Садыр Жапаров белгилегендей, элдин саламаттыгын бекемдөө маселеси 2026-жылга чейинки Улуттук өнүктүрүү программасындагы негизги артыкчылыктуу багыттардын бири болуп саналат жана бүгүнкү күндө өлкөбүздүн келечеги саналган балдардын саламаттыгына кам көрүү, ден соолугун чыңдоо маселеси мамлекеттин көңүл чордонунда турат.

Ал Өнүктүрүү программасы сергек жашоо мүнөзүн камсыз кылууга, ден соолукту чыңдоого, анын ичинде балдардын ооруларынын негизги себептерин алдын алуу менен оорулардын көрсөткүчүн төмөндөтүүгө багытталганын кошумчалады.

Садыр Жапаров Бишкек шаарындагы балдардын тез жардам ооруканасынын жаңы имаратынын курулушу сапаттуу медициналык кызмат көрсөтүүдө маанилүү аспект болот деп белгиледи.

Президент Садыр Жапаров Сауд өнүктүрүү фонду тарабынан бөлүнгөн каражатка  балдар үчүн заманбап жогорку технологиялык медициналык жабдуулар менен ыңгайлуу шарттар түзүлгөн жаңы оорукана 2025-жылга чейин курулуп бүтөрүнө ишеним артты.

Төрт кабаттуу хирургиялык имараттын курулушу Сауд өнүктүрүү фондунун (Сауд Арабия Королдугу) жеңилдетилген насыясынын эсебинен каржыланат. Жаңы имаратта 212 керебет жана 8 операциялык бөлүм болот: шашылыш хирургия, нейрохирургия, неонаталдык хирургия, хирургиялык инфекция, көкүрөк хирургиясы ж.б.у.с. болот.

Ошондой эле имаратта радиология, реанимация проктологиясы жана токсикология, жаңы төрөлгөн ымыркайлардын реанимациясы, урология, травматология бөлүмдөрүн, морфологиялык кабинет, лабораториялык блок ж.б. жайгаштыруу пландалууда.

Ушул эле жерде Мамлекет башчысы медициналык мекеменин жамааты менен баарлашып, орун алган көйгөйлөрдү сурады. Дарыгерлер эмгек акынын жогорулашына ыраазычылыгын билдиришип, саламаттыкты сактоо тармагындагы актуалдуу маселелер тууралуу айтып беришти.

Кечээ, 31-августта Түркия Республикасынын Кападокия аймагынын Үчхисар муниципалитетинде Кыргыз Республикасынын Эгемендүүлүк күнүнө карата, Кыргызстан жана Түркия элдеринин ортосундагы достуктун жана маданий жалпылыктын символу катары «Кыргызстан» паркынын салтанаттуу ачылыш аземи болуп өттү.

Ачылыш аземине Элчи Кубанычбек Омуралиев, Невшехир аймагынын Губернатору Инжи Сезер Бежел, Невшехир шаарынын Мэри Мехмет Савран, Кыргызстан-Түркия Парламенттик достук группасынын Башчысы, Түркиянын Улуу Улуттук Жыйынынын депутаты Сабри Өзтүрк жана Үчхисардын Башчысы Осман Сүслү катышышты.

Боз үйлөр тигилип, парктын аталышы жана анын ачылыш тарыхы менен стела тургузулган “Кыргызстан” паркынын ачылышына арнап, иш чаранын коноктору “Достук дарагын” отургузушту.

Ошондой эле Эгемендүүлүк майрамына карата Кыргызстандын Мамлекеттик желеги 800 метрден ашык бийиктикте учкан шар менен көтөрүлүп желбиретилди.

Эгемендүүлүк күнүнө карата майрамдык иш-чаралардын алкагында, Үчхисардын тарыхый мунарасында (туристтер эң көп зыярат кылган жай) кыргыз элинин маданияты, каада-салты жана жашоосу, ошондой эле Кыргыз Республикасынын тарыхый жерлерин чагылдырган сүрөт көргөзмөсү уюштурулду.

Ошондой эле, бир күн мурда, Үчхисар мунарасынын түбүндө кыргыз жана түрк өнөрпоздорунун катышуусунда майрамдык концерт өттү. Концерттин жүрүшүндө мунарага Кыргызстандын жана Түркиянын мамлекеттик желектери жана эки өлкөнүн лидерлери Садыр Жапаров менен Режеп Тайип Эрдогандын сүрөттөрү чагылдырылды.

Невшехир аймагына болгон иш сапарынын алкагында Элчи Кубанычбек Өмүралиев Невшехир аймагынын Губернатору Инжи Сезер Бежел, Невшехир шаарынын Мэри Мехмет Савран, Невшехирдин Соода-өнөр жай палатасынын Торагасы Ариф Пармаксыз жана палатанын мүчөлөрү менен жолугушту.

Өткөн жолугушууларда региондор аралык мамилелердин алкагында Кыргызстан менен Түркиянын ортосундагы эки тараптуу кызматташтыкты мындан ары өнүктүрүү, соода жүгүртүүнү көбөйтүү жана инвестиция тартуу маселелери талкууланды. Ошондой эле тараптар Невшехирде жүргөн Кыргыз Республикасынын жарандарынын укуктарын жана кызыкчылыктарын коргоо маселелерин  сүйлөшүштү. Кыргызстандын Элчиси мекендештердин аталган аймактагы жашоосуна ыңгайлуу шарттарды түзүү үчүн аларга максималдуу көмөк көрсөтүү өтүнүчү менен кайрылды.