18-майдан 20–майына чейин аба ырайынын туруксуздугуна жана күтүлүп жаткан нөшөрлүү жаан-чачынга байланыштуу республиканын тоолуу жана тоо тектериндеги райондордо сел жүрүшү мүмкүн, дарыяларда суунун деңгээли көтөрүлүшү күтүлөт.

Бишкек шаарында 19-май күнү жаан жаап, күн күркүрөшү мүмкүн. Батыштан соккон шамалдын ылдамдыгы секундасына 4-9 метрге чейин жетет. Абанын түнкү төмөнкү температурасы 8…10°, күндүзгү жогоркутемпературасы 18…20° жылуу болушу күтүлөт.

Ош шаарында 19-май күнү жаан жаап, күн күркүрөшү күтүлөт. Батыштансоккон шамалдын ылдамдыгы секундасына 4-9 метрге чейин жетет. Абанын түнкү төмөнкү температурасы 10…12°, күндүзгү жогорку температурасы 20…22° жылуу болушу күтүлөт. 19-май күнү кээ бир райондордо жаан жаап, күн күркүрөшү, бийик тоолуу райондордо кар жаашы күтүлөт. Бийик тоолуу аймактарда жолдор тоңголок, тайгак болушу күтүлөт. Батыштан соккон шамалдын ылдамдыгы секундасына 4-9 метрден, Ысык-Көл акваториясында 15-20 метрге жетиши 20-21- май күнү жаан-чачын күтүлбөйт. Бийик тоолуу аймактарда жолдор тоңголок, тайгак болушу күтүлөт. Батыштан соккон шамалдын ылдамдыгы секундасына 4-9 метрге чейин жетет. 22-23- май күнү жаан-чачын күтүлбөйт. Абанын температурасы жогорулайт.

Бүгүн, 18-майда Бишкекте “Элдик саясат” полиси институту, Бишкек форуму, “Россия” медиа борбору, “Бир дүйнө” жана “Кылым шамы” өкмөттүк эмес уюмдары уюштурган “Атамбаев президенттиктен кеткенден кийин Кыргызстан кандай жол менен өнүгүш керек?” аттуу форум болуп өттү.
Форумда “Кыргызстандын азыркы учурдагы жана Атамбаев доорунан кийинки социалдык-экономикалык абалы”, “Кыргызстандын азыркы учурдагы жана Атамбаев доорунан кийинки эл аралык мамилелери” жана “Кыргызстандын азыркы учурдагы жана Атамбаев доорунан кийинки саясый системасы” аттуу темалардагы билдирүүлөр жасалып, кызуу талкуу жаратты.
Форумга Өмүрбек Суваналиев, Адахан Мадумаров, Төлөйкан Исмаилова, Азиза Абдирасулова, Нарын Айып, Бегалы Наргозуев, Равшан Жээнбеков, Адил Турдукулов, Бейшенбек Бекешев, Александр Банников, Дайырбек Орунбеков, Адилет Айтикеев, Эрнис Кыязов, Элнура Кулуева, Нурдин Урмамбетов сыяктуу инсандар катышып, Атамбаев доорунан кийин Кыргызстан кандай нукта кетиш керек деген темада өз ойлору менен бөлүшүштү. Форумдун жүрүшү боюнча кеңири маалыматтарды жана видеотасмаларды жакынкы аралыкта сиздерге сунуштайбыз.




Булак:Кyrgyztoday.kg

Бүгүн, 18-майда Өзгөн районундагы “Имам Ажал-Сарахсий” медресесинде  “Сулайман-Тоо» кайрымдуулук коомдук уюму каалоочулардын балдарын акысыз сүннөткө отургузуу иш-чарасын уюштурулуп,  ага Ош облусунун казысы Самидин кары Атабаев, райондун башкы имам-хатиби Акжол ажы Козубаев жана жергиликтүү бийлик өкүлдөрү катышышты. Бул тууралуу Ош облусунун мусулмандар казыятынын маалымат кызматы билдирди.

Уюштуруучулардын бири Абдынур Нуркуловдун айтымында балдарды сүннөткө отургузуу аземине райондун тургундары абдан активдүү катышууда. “Ушул тапта Түркиянын Адана шаарынан келген эки дарыгер-хирург үзгүлтүксүз иштеп жатат. Ар бир хирургдун кабыл алуусуна бир эле мезгилде ондон бала киргизилип жатат. Учурда 120дан ашуун бала сүннөткө отургузулду. Дагы ондогон ата-энелер балдары менен кезекте турушат. Мындай жакшы жөрөлгө Өзгөндө эртең 19-майда да уланат. Ал эми 20-21-майда Ош шаарында өткөрүлүп,  андан соң Жалал-Абад, Баткен облустарында да уюштурулмакчы. Иш-чара гигиеналык жана коопсуздук эрежелерин сактоо максатын көздөп, акыркы үлгүдөгү аппараттардын жардамы менен заманбап шартта оорусуз отургузуу ыкмалары менен жасалууда. Анткени балдарын өз алдынча сүннөткө отургузган ата-энелер көп учурда бул эрежелерди таптакыр эске алышпайт экен”, – дейт фонддун өкүлдөрү.

Эскерте кетсек, бул иш-чара былтыр да өткөрүлүп, Кыргызстандын аймагынан 1000 деген балдар сүннөткө отургузулган.

Кадыржан Батыровдун Жалал-Абаддагы үйү толугу менен Санжар Бакиевге өткөрүлүп берилди. Бул тууралуу “Азаттыкка” Сузак райондук соттук аткаруучулар кызмат бөлүмүнүн башчысы Динислам Кожоакматов билдирди.

Анын айтуусунда, Батыров үй-бүлөсү менен 2010-жылга чейин жашап турган үй соттун чечими менен Бакиевге берилди.

Бакиевдердин жакындары 2010-жылы Батыров алардын турак үйүн өрттөгөн деп айыптап, чыгымын өндүрүп берүүнү өтүнүп сотко кайрылган.

Жалал-Абад шаардык соту 2011-жылдын ноябрь айында Бакиевдердин доосун канааттандырып, алардын пайдасына Батыровдон 7,4 млн. сом өндүрүүнү чечкен. Сузак районунун Дмитриевка айылында жайгашкан Батыровдун турак жайы сот аркылуу камакка алынып, эки ирет сатыкка коюлган.

Бирок үй сатылбаган соң облустук соттун ушул жылдын апрель айындагы чечими менен Батыровдун турак жайы толушу менен Санжар Бакиевдин менчигине өткөрүлүп берилди.

17-майда сот аткаруучулар күбөлөр менен бирге үйгө кирип, буюмдарын жакындарына өткөрүп беришкен.

Санжар Бакиев Кыргызстандын 2010-жылы бийликтен кулатылган президенти Курманбек Бакиевдин бир тууган иниси, маркум Жусупжан Бакиевдин уулу.

Булак: “Азаттык”

Мурдагы премьер-министр Амангелди Муралиевдин уулу Алтынбек Муралиев 12 жылга эркинен ажыратылды. Бул тууралуу Жогорку Соттун басма сөз кызматы билдирди.

Маалыматка караганда Алтынбек Муралиев 17-майда Бишкек шаарынын Биринчи май райондук сотунун өкүмү менен КЖКнын 292-беренеси (Мамлекеттик чыккынчылык) боюнча айыпталып, мүлкүн конфискациялоо менен 12 жылга эркиндигинен ажыратылып, жаза өтөө мөөнөтү күчөтүлгөн тартиптеги түзөтүү абагында өтөөсү белгиленди.

Эске сала кетсек Алтынбек Муралиев мурда Кыргыз өкмөтүнүн аппаратынын эл аралык кызматташтык бөлүмүнүн башчысы болуп эмгектенген. Ага УКМК кызматтык жашыруун сырды чет өлкөгө берген деген берене менен кылмыш иш козгоп, камакка алган эле.

Алмазбек Атамбаев  бүгүн, 18-майда кол койгон жарлыкка ылайык, Калыкбек Султанов Кыргыз Республикасынын президентинин кеңешчиси болуп дайындалды. Бул тууралуу президенттин маалымат кызматы билдирди.

Ички иштер министрилиги “Элдик парламент” коомдук бирикмесинин өкүлдөрү Жеңиш аянтындагы митингге катыштыруу үчүн жарандарга 1000 сомдон акча сунуштаганын айтып чыкты.

Маалыматка караганда, Жеңиш аянтынын жанынан тартип сакчылары жети адамды кармашкан. Суракка алуу учурунда Рашид жана Съездбек аттуу адамдар каршылык акциясына катыштыруу үчүн жарандарга 1000 сомдон акча сунушташкан.

Кийинчерээк 49 жаштагы Абдурашид аттуу жаран кармалган. Ал жубайы экөө Б.Т аттуу киши жана анын туугандары менен тааныш экендигин айтып берген. Ал Жеңиш аянтында жана УКМК имаратынын алдында митинг уюштуруу үчүн 20 миң сом сунуштаган. Материалдар юридикалык баа берүү үчүн Бишкек шаарынын Ички иштер башкы башкармалыгынын тергөө башкармалыгына өткөрүлүп берилди.

Бүгүн Бишкектеги “Ак кеме” мейманканасында өтүп жаткан “Атамбаев президенттиктен кеткенден кийин Кыргызстан кандай жол менен өнүгүш керек?” аттуу форумда “Бүтүн Кыргызстан” партиясынын лидери Адахан Мадумаров сөз сүйлөп, азыркы бийликтин алешем жооруктарын сынга алды. Ошондой эле убагында УКМКны башкарып турган Бусурманкул Таабалдиевдин орусиялык ишкер Муса Бажаев менен болгон сүйлөшүүсүн тымызын күчтөр тыңшап жазып алуусу жана интернетке жарыяланып кеткенин бүгүнкү бийлик үчүн позор деп атап, бул улуттук коопсуздукка коркунуч алып келерин кошумчалады.
“Эгер Улуттук коопсуздук комитетинин башчысынын жумушчу телефонун тыңшап жатышса бул бизде Улуттук коопсуздук жок экенин далилдейт. Мен бир кезде Кыргызстандын коопсуздук кеңешинин катчысы болуп иштеген киши катары айтарым, УКМКнын жетекчиси телефон аркалуу эмне деген гана мамлекеттик сырларды жетекчилерге кабарлап турат. Демек ошолордун баары чет өлкөлүк чалгындарга Таабалдиевдин телефону аркылуу белгилүү болуп турган. Эгер УКМКнын жетекчисин тыңшап жатса анда президентти, премьер-министрди, министрлерди тыңшабайт деп ким кепилдик бере алат? Маданияттуу өлкөлөрдө мындай уят иштерден кийин көптөгөн жетекчилер отставкага кетет”, – деди Адахан Мадумаров.

Премьер-министр Сооронбай Жээнбеков Ош шаарынын мэринин кызмат ордуна жеке талапкер көрсөтпөө чечимин кабыл алды. Бул тууралуу өкмөттүн басма сөз кызматы билдирди.

Белгилүү болгондой, “Ош шаарынын статусу жөнүндө” КР Мыйзамынын 23-беренесине ылайык, Ош шаарынын мэринин кызмат ордуна талапкерлерди көрсөтүүгө Ош шаардык кеңешинин фракциялары, фракциялар коалициясы жана премьер-министр укуктуу.

«Мамлекетте демократиялык принциптерди мындан ары өнүктүрүү, жергиликтүү өз алдынча башкаруу органдарынын иш-аракеттерин өркүндөтүү жана шаардык депутаттардын жоопкерчилигин жогорулатуу, ошондой эле ачык-айкын шайлоону өткөрүү максатында шаардын мэринин кызматына талапкерди көрсөтпөө жөнүндө чечим кабыл алдым. Шаардык кеңештин депутаттары шайлоочулардын мүдөөсүн эске алып, кесипкөй, тажрыйбалуу иш-билги адамдарды тандап, алар шаар жана шаардыктардын кызыкчылыгы үчүн иштейт деп үмүттөнөм”, – деп айтылат премьер-министрдин Ош шаардык кеңешинин депутаттарына кайрылуусунда.

Өкмөт мыйзамсыз иштеп жаткан компанияны мыйзамдаштырууга аракет кылып жатат. Мындай пикирин бүгүн парламентин жалпы жыйынында “Бир Бол” фракциясынын депутаты Улукбек Ормонов билдирди. Анын айтымында азыркы энергетика тармагын тейлеп жаткан “Улуттук энергохолдинг” комнапиясынын иши мыйзамга каршы келет.

“Электр энергиясын өндүрүү, бөлүштүрүү менен алектенген ишканалардын үстүнөн көзөмөлдөгөнгө Энергохолдингдин укугу жок. Анткени булардын иши мыйзамсыз. Энергохолдинг электр энергиясына болгон баанынын көтөрүлүшүнө гана өбөлгө түзүп жатат. Мунун пайдасынан көрө зыяны көбүрөөк. Андыктан бул компанияны жоюу керек”, – деди эл өкүлү.

Эске салсак, бүгүн Жогорку Кеңеште энергетика тармагындагы абал талкууланып жатат.

Баш прокурор Индира Жолдубаеванын кызматтан кетүү боюнча маселеси мындан бир ай мурун эле катуу талкууга алынган болчу. Чынында эле, Индира айым иштен кетүү боюнча Пре­зиденте арыз жазыптыр. Кызматтан кетүүнүн бир катар жүйөлүү себептери бар. Алардын айрымдары айтылып жатса, эң негизгилери ачыкка чыга элек. Баш прокурордун арызына Атамбаев азырынча кол коё элек. Бирок, жакынкы күндөрү бул маселе боюнча тиешелүү буйрук чыгып калышы толук мүмкүн. Эгер Жолдубаева кетсе, анын ордуна Бишкек шаарынын прокурору, 2014-жылдан бери иштеп жаткан Нур­лан Сулайманов келери тар чөйрөдө кеп боло баштады. Экинчи талапкер катары Ош облусунун прокурору Айбек Турганбаевдин да ысымы айтылууда. Кыскасы, Жолдубаева отставканы көздөй жол алса, ушул эки талапкердин бири келет. Көбүрөөк тараза ташы Сулаймановго ооп турат десек болчудай.

Булак: “Багыт kg”

Жогорку Кеӊеште банк мыйзамдарынын аткарылышына каржы уюмдарынын жоопкерчилигин жогорулатуу максатында иштелип чыккан “КР Администрациялык жоопкерчилик жөнүндө кодексине өзгөртүүлөрдү киргизүү тууралуу” мыйзам долбоору каралып, үчүнчү окууда добуш берүүгө жөнөтүлдү. Бул тууралуу ЖКнын басма сөз кызматы билдирди.

Мыйзам долбоорунун демилгечилери – депутаттар Нурланбек Макеев, Акылбек Жапаров, Абдумажит Юсуров. Демилгечилердин берген маалыматына караганда, мыйзам долбоору мыйзам бузууга жол бергени үчүн жеке жана юридикалык жактардын, банктардын, кызмат адамдарынын жоопкерчилик жолжоболорун оптималдаштыруу жана аларды бири-бирине шайкеш келтирүү максатында иштелип чыккан. Мыйзам бузган жеке жактарга 2 миӊ сомдон 100 миӊ сомго чейин, кызмат адамдарына 3 миӊ сомдон 150 миӊ сомго чейин, юридикалык жактарга 250 миӊ сомго чейин административдик айып салуу чаралары сунушталууда.

Талкуу жүрүшүндө Өкмөт бул мыйзам долбоорун колдой турганы белгилүү болду. Ал эми айрым депутаттардан мыйзам долбооруна карата каршы пикирлер келип түшкөн.

Эске салсак, Улуттук банктын берген маалыматы боюнча, ушу тапта 1 миӊден ашуун акча алмаштыруу жайы иштесе, үчтөн бири гана бюро лицензия алып мыйзамдуу иш алпарат. Юридикалык жактын бир алмашуу бюросун ачууда жүгүртүү каражаттарынын минималдуу өлчөмү 1 млн сомдон 500 миӊ сомго чейин төмөндөтүлгөн. Азыр мыйзам бузган акча алмаштыруу жайлары 2 миӊ сом айып төлөп кутулуп кетүүдө. Ошондон улам, алардын жоопкерчилигин жогорулатуу милдети турат.

16-май күнү саат 15:40 чамасында Нарын шаарында жана Ат-Башы районунда катуу шамал катталды. Бул тууралуу ӨКМнын басма сөз кызматы билдирди.

Маалыматка караганда, Ат-Башы районунда ылдамдыгы секундасына 25-27 метрге чейин жеткен куюн аралаш шамал болгон. Натыйжасында турак-жайлардын жана социалдык объектилердин чатырлары жабыркаган. Өзгөчө кардаалдар министрлигинин Нарын облусу боюнча башкармалыгынын ыкчам тобу түзүлүп окуя болгон жерге жөнөп кеттишкен.

Жарандык коргонуу комиссиясынын тактоо иштеринин жыйынтыгында Нарын шаары боюнча жалпысынан 145 шифер жараксыз абалга келген. Нарын району боюнча жалпысынан 72м2 профнастил, 34 шифер шамалга учкан.  Ал эми Ат-Башы району боюнча жалпысынан 1083 шифер, 2008 метр рейка, 87 метр устун жараксыз абалга келген.

Башка тилден келген сөздөрдүн баарын эле кыргызча которо берген туура эмес. Мындай пикирин Жогорку Кеңештин депутаты Кожобек Рыспаев бүгүн жалпы жыйында билдирди.

“Акыркы учурларда башка тилден келген сөздөрдү эптеп эле кыргызчалаткандар көбөйдү. Мисалы, самолётту – учак, телевизорду – сыналгы деп тилди сындырып жатышат. Бизге тилди сындырган кыргызча сөздөрдүн кереги жок деп ойлойм. Тилчилерге айтып, бул маселени чечүү зарыл”, – дейт эл өкүлү.

Кыргыз Республикасынын Улуттук банкы, улуттук валютанын киргизилишинин күнүнө карата жана коллекционерлердин, нумизматтардын коллекциялык нумизматикалык монеталарга талабын канааттандыруу максатында алтын жана күмүш монеталарын сатуу аукциону өткөрөт. Бул тууралуу Улуттук банктын басма сөз кызматы билдирди.

Маалыматта айтылгандай бүгүнкү күндө улуттук валютанын коллекциялык монеталары өзүнүн өзгөчөлүгү менен эле айырмаланбастан, маалыматтын маанилүү булагы жана ошол эле учурда пайдалуу финансылык салым болуп эсептелет. Тажрыйба көрсөткөндөй, Кыргыз монеталарынын чектелүү тиражы алардын жогорку деңгээлдеги раритет экендигин билдирип турат. Эл аралык нумизматикалык рыноктордо, Кыргызстандын сатылып бүткөн коллекциялык монеталары, КМШ монеталарынын ичинен эң көп суроо-талап жараткан монеталар рейтингинде жогорку чекти ээлеп келет.

Аукцион 2016-жылдын 18-майында саат 16.00дө Бишкек шаарындагы Т.Үмөталиев көчөсүндө жайгашкан Улуттук банктын басма сөз борборунда өткөрүлөт.

Лоттун мазмуну:

Жогорку Кеӊештин Укук тартиби жана кылмыштуулук менен күрөшүү боюнча комитети сот реформасынын мыйзамдык базасын өркүндөтүү алкагында иштелип чыккан “Бузууларды, терс жосундарды жана кылмыштарды жасаган жактардын мамлекеттик реестри жөнүндө” мыйзам долбоорунун концепциясын жактырды. Бул тууралуу ЖКнын басма сөз кызматы билдирди.

Сот реформасынын мыйзамдык базасын өркүндөтүү боюнча жумушчу топтун мүчөсү Ирина Летованын берген маалыматына караганда, Ички иштер министрлигинин маалымат борбору тарабынан кылмыш жасаган, ошондой эле мыйзамсыз жосун кылган адамдардын маалымат тизмеси түзүлөт. «Тизмедеги адамар жөнүндөгү маалыматтар ыраатка салынып, белгилүү бир мөөнөткө чейин сакталууга тийиш. Белгиленген мөөнөтү аяктаган соӊ, ал архивге өткөрүлөт», – дейт ал.

Мыйзам долбооруна ылайык, маалыматтан президент, спикер, БШК, судьялар менен прокурорлор, тергөөчүлөр менен укук коргоо органдарынын кызматкерлери пайдалана алат. Ошондой эле, соттолбогон адамдар иштей турган жумуш берүүчү жеке жана юридикалык жактар да өздөрүнө зарыл болгон маалыматтарды суратып ала алат. Жарандар өздөрү тууралуу маалымат алууга укуктуу.

Белгилей кетсек, оор жана өзгөчө оор кылмыш жасагандар адамдар жөнүндө маалымат 40 жылга, анча оор эмес кылмыш жасаган адамдар жөнүндө маалымат 25 жылга, жосундар үчүн 10 жылга, укук бузгандар 1 жылга чейин сакталат. Маалымат тизмесин ишке ашырууга болжол менен 1,5 млн сомдон ашуун каражат талап кылынат.

Премьер-министр Сооронбай Жээнбеков «Мамлекеттик ипотекалык компаниясы» ААК төрагасы Бактыбек Шамкеевди кабыл алды. Бул тууралуу өкмөттүн маалымат кызматы билдирди.

Мамлекеттик ипотекалык компаниянын төрагасы премьер-министрге калкты жеткиликтүү турак жай менен камсыз кылуу багытында аткарылып жаткан иштер жана пландар тууралуу маалымат берди.

Өкмөт башчы буга чейин пландаштырылгандай, ушул жылдын аягына чейин 3 миңге жакын жаранды мамлекеттик программага ылайык турак жай менен камсыз кылууну тапшырды. Ошондой эле Кыргызстанда алгач ирет ишке ашырылып жаткан жеткиликтүү турак жай боюнча мамлекеттик программа чыныгы муктаж жарандарды камтышы керек экендигин баса белигледи. Болбосо, элдин бул программага карата ишеними жоголот, – деди Жээнбеков.

«Мамлекеттик ипотекалык компания өз ишин баштагандан бери биринчи этапта арыз берген 180 жарандын 22си берген арызына жараша турак жай менен камсыз кылынды. Экинчи этапка миңден ашык киши арыз берген. Азыркы тапта арыздар каралып жатат. 2016-жылдын 20-майынан баштап тизмелер каралып, банктарга берилет. Турак жай алууну каалаган жарандардын тизмесин жашаган жерине жана иштеген тармагына байланыштуу мекеме-ишканаларда түзүлөт. Учурда алты банк менен иштешип жатабыз», – деди Бактыбек Шамкеев.

Жогорку Кеңештин иш башкармалыгы журналисттерден кечирим сурайт. Бул тууралуу ЖКнын басма сөз кызматы билдирди.

– Кечээ, 17-майда Жогорку Кеңештин Бюджет жана финансы боюнча комитетинин кезектеги жыйыны өтүп жаткан Батыш залында “АКИпресс” маалымат агенттигинин парламентте аккредиттелген эки кабарчысына Жогорку Кеңештин Иш башкармалыгынын кызматкери Курант Медеров тарабынан орой мамиле жасалгандыгы үчүн кечирим сурайбыз. Журналисттер өздөрүнүн кесиптик иш-милдетин аткарып жаткан маалда түшүнбөстүктөр пайда болгон.

Нөшөрлөгөн жамгырдан улам Батыш залдын төбөсүндөгү вентиляциялык люктан суу тамган учурду журналисттер уюлдук телефонуна тартып жатканда Жогорку Кеңештин имаратындагы курулуш жана оңдоо иштерин тейлеген сектордун кызматкери тоскоолдук кылууга аракет жасаган. Жогорку Кеңештин Иш башкармалыгынын жетекчиси Алмазбек Кожомкулов аты аталган кызматкерге катуу эскертүү берип, журналисттерге карата мындай орунсуз мамиле кайталанса, жумуштан кетирээрин маалымдады, – деп айтылат маалыматта.

Бишкек шаардык кеңешинин депутаты Василий Дашков деген жигит бар. Сүйлөгөнү атан төөдөй, шаардык кеңештин депутаттарынан ар дайым чоңсунуп турганы менен эске түшөт. Мына ушул жигитти жакын арада укук коргоочулар “достошууга” чакырып калышы толук ыктымал. Анткени ал темир жолдун “Мостотряд” курулуш ишканасын тээ атам замандан бери жетектеп, бул тармактагы кыбыр эткен курулуш иштерин жалгыз өзү жасап келген. Бирок мамлекеттик сатып алуулар боюнча мыйзамды аттап, курулуш иштери үчүн өзү каалагандай баа бычканы, натыйжада бюджеттин акчасы самандай сапырылып, Дашков жана анын темир жолчу өнөктөштөрүнүн өздүк эсепканаларына түшүп жатканы белгилүү болуп калды. Болбосо башкалар 20 миң долларга курган футбол аянтчаларын Дашковдун ишканасы 100 миң долларга курганы калппы?

Ал тургай бул жигиттин башына бир аз күн түшсө сыртты карай “зыйт” коюу ниети бардыгы, себеби Дашковго чейинки темир жол­дун каржылык булактарын башкаргандар качып кеткени тууралуу маалыматтар бар.

Булак: “Фабула”

Премьер-министр Сооронбай Жээнбековд кол койгон буйрукка ылайык, Монолдоров Дамир Черикович Өкмөттүн Ысык-Көл облусундагы ыйгарым укуктуу өкүлүнүн биринчи орун басары болуп дайындалды. Бул тууралуу өкмөттүн маалымат кызматы билдирди.

Легендарлуу парламенттин экс-спикери Ме­деткан Шеримкуловдун баласы Марат Шеримкуловдун катыштыгы бар делген жол кырсыгынан На­зира аттуу айымдын омурткалары, ийни, кабыргалары сынып, баса албай майып болуп кал­ды. Жол кырсыгы 2014-жылы болгон. Назираны “пешеходдо” өтүп баратканда сүзүп кеткен. Бүгүнкү күндө жабырлануучу бутунан тура албай, травматолгия жана ортопедия борборунда жатат. Эки жылдан бери отура да, баса да албай калган Назиранын дарылануусуна 1 миллион сомдон ашык каражат кеткен. Учурда ден-соолугун калыбына келтирүү үчүн дагы бир канча оор операция жасалууга тийиш. Кимдир бирөөнүн кароосуна аргасыз болуп ооруканада жатканы аз келгенсип, үйүндө секелек кызы менен инвалид апасы да жардамга муктаж. Каражаттын жоктугунан эми апасы кызынын дарылануусу үчүн баш калкалаган үйүн сатууга мажбур болууда. Назиранын ушундай абалга келишине бирден-бир себепкер делген Шеримкуловдордон эч жардам жок. Учурунда соттук териштирүү болгондо, болгон жардамыбызды аябайбыз, эмне зарыл болсо баарын алып беребиз дешкен Шеримкуловдор болгону 1 жарым миң доллар беришип, ошол бойдон куйрук түйүшкөн. Бүгүнкү күндө “бээ көрдүңбү жок, төө көрдүңбү жок” дегендей болушуп, билмексен. Тиешелүү органдар ушул жагдайга көңүл буруп, бир үй-бүлөнүн тагдырын талкалап, эч нерсе болбогондой басып жүргөн айыпкерди кармап жазасын бериши абзел.

Булак: “Фабула

Жогорку Кеӊештин Транспорт, коммуникациялар, архитектура жана курулуш боюнча комитети сот тутумунун реформалоо алкагында иштелип чыккан Кыргыз Республикасынын Бузуулар жөнүндө кодексинин долбоорунун концепциясын жактырды. Бул тууралуу ЖКнын басма сөз кызматы билдирди.

Кодекс долбоорунун демилгечиси депутат Галина Скрипкинанын айтымында, азыркы учурда иштеп жаткан Кылмыш кодекси менен Административдик кодексте СССР доорунда эле иштелип чыгып, анда өтө көп ченемдик жоболор камтылып калгандыктан, аларды ыӊгайына жараша кайра бөлүштүрүү зарылдыгы келип чыккан. Алардын бири – Бузуулар жөнүндө кодекс. Ошону менен бирге, эл аралык тажырыйба менен күндөлүк сот ишинде топтолгон тажырыйба да эске алынды.

Ал эми жумушчу топтун берген маалыматына караганда, жаӊы кодекс укук бузуу жаатындагы иштерди ыкчам жана так карап чыгууга мүмкүнчүлүк берет. Ал 39 гана беренеден туруп, анда жеке жана юридикалык жактарга байланыштуу укук бузуу жоболору камтылды. Кодексте эскертүү, айыппул жаза чаралары каралган. Кошумча укуктук чаралар – үстөкпул менен мүлкүнөн ажыратуу.

Депутаттар бир эле айыптык жаза чараларынын ортосунда чоӊ айырма болуп калганын, мындай айырма коррупцияга жол ачарын белгилешти. Демилгечи айтылган сунуштарды экинчи окуу жүрүшүндө эске алууга убада берди.

Буга чейин инспекция эмес, өкмөт даабай кел ди эле, бул сапар Мам­лекеттик экологиялык жана техникалык инспекциясынын башчысы Канат Муратбеков катуу кетти. Тагыраагы, жакында аталган инспек­ция “Кумтөр” компаниясынын тээ 1996-жылдан берки экологиялык техникалык зыяндарын эсептеп чыгып, орто эсеп менен 7 миллиард АКШ доллары өлчөмүндө доо коюп, компанияны сотко берди. “Мейли алар да мыйзамдык жол менен сотторго, эл аралык сотторго кайрылышсын. Бирок мен өз ишимди жасап жатам, канча убакыттан бери экологиялык мыйзамдар бузулуп, техникалык эрежелерден тыш иштер жүрсө да унчукпай келишкен. Бул жолу биз саясий эрк көргөзүү менен мыйзамдуу алкакта өз милдетибизди аткарабыз”,- дейт Канат Муратбеков. Ошонтип учурда райондор аралык сот бул доо арызды ушул айдын аяк ченинен тарта карай турган болууда.

Булак: “Фабула”

Жогорку Кеӊештин Транспорт, коммуникациялар, архитектура жана курулуш боюнча комитети тармактык комитеттин төрагалык кызмат ордуна КСДП фракциясынан депутат Марат Аманкуловдун, анын орун басарлыгына атамекенчи Эмил Токтошевдин талапкерлигин жактырды. Бул тууралуу ЖКнын басма сөз кызматы билдирди.

Белгилей кетсек, Транспорт, коммуникациялар, архитектура жана курулуш боюнча комитетинин мурдагы төрагасы Иса Өмүркулов КСДП парламенттик фракциясынын лидерлигине шайланган.

Жарандык активисттер Президентти, Жогорку Кенешти жана Өкмөттү азыркы этапта мамлекеттин алдында турган кыйынчылыктарды жеңүү үчүн диалогго жана күчтү бириктирүүгө чакырат.  Коомчулуктун пикирин сурамжылоо көрсөткөндөй бүгүнкү күндө элди жумушсуздук тынчсыздандырат. «ВСП+» программасынын перспективалары туурасында калкты жана бардык кызыкдар тараптарды маалымдар кылуу максатында Жогорку Кеңеште парламенттик угууларды өткөрүү зарыл.

Коомчулуктун пикирин сурамжылоо ошондой эле укук коргоо органдарына  ишенимдин абдан төмөн экендиги улантылып жаткандыгын көрсөтүп жатат.   Кыргызстан жолдордогу адам өлүмү боюнча дүйнөдөгү алдыңкы катарда. Элди чегара коопсуздугу маселеси кооптондурат. Жарандык эксперттер Жогорку Кеңешти коопсуздук секторун саясаттан ажыратуу жаатындагы мыйзам долбоорлорун кабыл алууга жана Конституцияга ылайык укук коргоо органдарына парламенттик контролду жакшыртууга чакырат.

Кыргызстан эли өз тарыхын калыбына келтириши керек, андыктан өлкөдө эс тутум саясатын түзүү зарыл. 2016-жылы күзүндө жалпы жергиликтүү кеңештердин шайлоонун, 2017-жылдагы президенттик шайлоонун алдында шайлоо процесстерин мындан ары дагы жакшыртуу үчүн жана биргелешип республиканын мамлекеттик түзүмдөрүн аксатууга алып келүүчү шайлоочулардын добушун сатып алуу коркунучун жеңүү үчүн президенттин, парламенттин жана жарандык коомдун кызматташуусун күчөтүү керек.

Тилекке каршы, Конституцияда жазылган бийлик менен элдин биримдигин камсыздоонун ордуна, президент жана анын аппараты жарандык секторго карата эмоцияга алдырып, белгилүү укук коргоочуларга куру жалаа жаап жатат.

Укук коргоочу өзүнүн укук коргоочулук макамына ылайык (2015-жылдын 18-ноябрында кабыл алынган укук коргоочунун ролун таануу жана аларды коргоо туурасындагы БУУ Башкы Ассамблеясынын Декларациясы)  укук коргоочу адам укугуна коркунуч келтирилиши мүмкүн болгон бардык жерде, анын ичинде митинг жана жыйындарга мониторинг жүргүзөт, ошол эле учурда ал процесстин катышуучуларынын позициясын бөлүшпөсө дагы.

Президентти сабырдуулукка жана акыл калчоого чакырабыз. Президент А.Ш.  Атамабаевге жалпы коопсуздукту бекемдөө, экономиканы жакшыртуу, жумушсуздукту жана миграцияны азайтуу, улуттук эс-тутумду калыбына келтирүү боюнча жалпы улуттук диалогду жетектөөнү сунуштайбыз.

Жарандык коом, бизнес, академиялык чөйрө биргелешип приоритеттүү керектөөлөрдү аныктап, бардык бийлик бутактары үчүн өз сунуштарын иштеп чыккан жана баарлашууга, кызматташууга даяр экендигин билдирет.

Динара Ошуракунова,

Бурул Макенбаева,

Эркина Убышева,

Рита Карасартова,

Гульзада Медералиева,

Алмаз Алжамбаев,

Марат Мусуралиев.

Балыкчы-Корумду жолун куруу боюнча чыккан чырдын айынан кызматтан кетишкен мурунку өкмөт башчы Темир Сариев менен мурдагы Транспорт жана комму­никация министри Аргынбек Малабаев өткөн жумада Жогорку Кеңеште эл өкүлдөрүнүн астында бири-биринин айыбын чукууга аябай аракет кылышты. Депутаттар кимисине ишенээрин билишпей баштары маң болуп, бул ишти тиешелүү укук коргоо органдары иликтеп, жыйынтык чыгарсын деген менен чектелишти. Бирок Сариевдин отставкага кетишине болгон аракетин жумшаган “Кыр­гызстан” фракциясынын лидери Канатбек Исаевди КСДП менен “Ата Мекен” фракцияларынын депутаттары аябай кодулашты. “Мавр өз ишин жасады…” дегендей эле болду. Мындай мамилеге Канаттын учурда ичинен кан өтүп турган кез.

Булак: “Фабула”

Ала кыштан бери эле Нарын облусунун башчысы Аманбай Кайыпов кайып болуп кеткендей дайыны чыкпайт. Башка облус жетекчилери шымаланып жазгы жарыш менен алек болуп күжүлдөп, борборго каттап, бюджеттен кошумча каражат сурап, Жогорку Кеңешти желкелеп жүрүшөт. А Аманбай мырза болсо Нарын суусунун боюнда балык кармап отуруп алганбы, дегеле эч бир чогулуш, жыйындан көрүнө элек. Баса, угушубузга караганда ушу тапта Бишкек-Торугарт жолунун реконструкциясын аягына чыгаруу иши кечеңдеп, ошондой эле Нарын ГЭСтериндеги курулуштун токтошу, Борбордук Азиядагы Ага-Хан университетинин салынышына каршы мусулмандар арасындагы нааразы кептер облус башчысынын маанайын чөгөрүп, өзү дагы кызматтан кеткиси келип жатканын уктук.

Булак: “Фабула”

Алмазбек Атамбаев бүгүн, 17-майда өлкөнүн тышкы иштер министри Эрлан Абдылдаевди кабыл алды. Бул тууралуу президенттин маалымат кызматы билдирди.

Жолугушууда Атамбаев өлкөнүн тышкы саясый ишмердиги, анын ичинде тышкы саясаттын орчундуу багыттарын өнүктүрүү, эки тараптуу жана көп тараптуу жолугушууларда жетишилген келишимдерди аткаруу боюнча маалыматтарды укту.

Эрлан Абдылдаев алдыда боло турган тышкы саясый иш чараларга даярдыктар тууралуу айтып берди. Президент Тышкы иштер министрлигине тышкы саясаттын артыкчылыктуу багыттарын өнүктүрүүгө, алдыда боло турган тышкы саясый иш чараларга байланыштуу тапшырмаларды берди.

Премьер-министр Сооронбай Жээнбеков кол койгон буйрукка ылайык Адыл Сапаров Нарын облусундагы Жумгал районунун мамлекеттик администрациясынын жетекчиси – акими болуп дайындалды. Бул тууралуу өкмөттүн маалымат кызматы билдирди.

Аталган чечим Кыргыз Республикасынын «Жергиликтүү мамлекеттик администрациясы жөнүндө» Мыйзамынын 14-беренесине ылайык кабыл алынган.

Табияты боюнча эмгекчилердин укуктарын коргой ала турган бирден-бир уюм бул профсоюздар, алар тарыхта чоң изин калтырып, коомго бир топ өзгөрүүлөрдү кылышты, ошону менен бирге мурунку учурларда Кыргызстандын профсоюздары дагы карапайым адамга дайым тирек-жөлөк болчу эле. Азыр алар кандай болуп калганы боюнча профсоюздар боюнча эксперт Тимур Саралаев менен маектештик.

– Учурда профсоюздар кандай иштеп жатышат?

– Профсоюздар чынында эле алдыга жылбай, доор алмашкандан баштап, 1992-жылдан бери эч кандай реформа кылган жок. Менчикти (профсоюздук мүлк – имараттар, санаторий, мейманканалар, эс алуу жана балдарды эс алдыруу борборлору, ред.) сактап калдык деп жатышат, аны сактап калмак тургай, алар таралып, четинен кетип жатат. Коргоо функциялары дагы иштебейт, анткени структурасынан, мыйзамдарынан жана нормативтик документтерден баштап өзгөртпөсө, 30 адам олтуруп алып, профсоюздарын «каймагы» болуп алып эле, эч жакка эч нерсени жылдырбай, өзгөрүүлөргө жолтоо болуп жатышат. Калыстык үчүн айта кетиш керек, баардык профсоюздар начар эмес, жакшынакай иштегендер деле бар, алардын эмгектерин жууп салган дагы болбойт. Бирок балык башынан сасыйт дегендей, азыр профсоюздар жетекчилик жагынан начар болуп калды.

Негизи профсоюздар эмгекчил адамдын укугун коргоо уюму болгондон кийин, съезд тескериче өтүп, жетекчилер туура эмес шайланып калды. Профсоюздардын соңку съездти тарыхта кала тургандай эле болду, анткени мындай съезд эзели өткөн эмес, эртен менен башка жайда башталып, кечинде башка жайда аягына чыкты. Съезд жабык форматта өттү, бир дагы кабарчы, эл аралык уюмдардан жана өнөктөштөр чакырылган жок. 200 ашуун делегат катышып, анын ичинен болгону 11 адам 35 жашка чейинки делегаттар болду. Мен жаш болуп туруп, профсоюздардын ак-сакалдары менен көк-сакалдардын съездеги бири-бирин чукулап, жамандап, шыбырашып, улам кирип чыгып соодалашып, бири-бирин алдап, элди укпай жанталашып трибунага чыгып алып сүйлөгөн сөздөрүн угуп алып жакамды кармап турдум.
Кыргызстан профсоюздар Федерациясы өлкөбүздө курамы жана мүчөлөрү эң чоң уюм болгондуктан съезде өзүнүн абройлуу деңгээлин көргөзүш керек эле, бирок абдан деңгээли төмөн экинин жашырбай көргөзүп койду. Эң кызыгы профсоюздар иш берүүчү адамды төрага кылып шайлап алышты, профсоюздардын мүнөзү жана эл аралык стандарттар боюнча, эч убакытта иш берүүчү адамды шайлабаш керек эле. Соодалашуулар аркылуу ар кайсыл профсоюздун ичиндеги жетекчи чалдар Абдырахмановту төрага кылып коюшту, ал киши ага чейин төраганын орун басары эле (коомдук башталышта), бирок иш берүүчү адам орун басар дагы болбош керек эле. Мисалы, ал кишиге ушунча жылдан бери эмнени кыйратыңар деп суроо берсе, ал жооп бере деле албайт. Ал болгону «Достук» мейманканасында мүдүр болуп турганда 150 кызматкерди кетирип, туш-тушун арендага берген. Андан тышкары, Кыргызстан профсоюздар федерациясынын төрагасынын орун басарлары дагы туура эмес шайланып калды, мисалы ошол эле Бабаева Рысгүл ал профсоюздардын жобосуна карама-каршы кетти, болгону 33% добуш алыптыр, ал эми жободо жазылып турат, көпчүлүк менен алыш керек деп, ал болсо 51% кем эмес деген сөз. Бабаева Бакиевдин заманында жеп-ичерлердин командасында абдан тыгыз иштешкен, ошол эле азыркы төрага дагы Бакиевдер менен иштешкен. Ошолордун баарын шайлап алып, азыр профсоюздар тупикте такалып турат.

1-майга карата бир дагы иш-чара болгон жок, мурун миңдеген адамдар катышкан жөө жүрүштөр болчу эле, ал эми азыр анын бири жок, бул нерселер азыркы учурдагы профсоюздардын деңгээлин көргөзүп жатат. Булардын максаты менчик эле болуп калды. Ал буга чейин реформаларды кылыш керек деп кыйкырган сөздөр жөн эле шылтоо экен. Ошол шылтоо менен мурунку төраганы дагы кетириш үчүн реформаларды кылыш керек деп, эки жумушчу топ түзүшкөн, ал топтор профсоюздардын жобосуна өзгөртүүлөрдү, системалык реформаларды кылабыз деп сунуштарды иштеп чыкмак эле, бирок алар аягына чыккан жок. Ал түгүл, съезде делегаттар менен кабыл алынган насыяттардын бири дагы аткарылган жок. Ошондо азыркы авантюристтер айтышты эле, бир айдын ичинде жаңы жобону кабыл алып, аны ишке киргизмек, ал дагы жок. Анткени жобого көп карама-каршы нерселерди жазып алышыптыр. Мисалы, профсоюздар ишкерчилик менен алектенсе болот деген. Профсоюздар эзели ишкерчилик менен алек болгон эмес, профсоюздардын функциясы, миссиясы такыр башка, ал укуктарды жана эмгекчилердин кызыкчылыктарын коргоодо. Булар болсо профсоюздарды «частная лавочка» катары түшүнүп жатышат. Бул жобону съездин делегаттары туура эмес деп чыкса, съезд дагы туура эмес деп чыгып калышы толугу менен ыктымал. Анткени бул профсоюздарга туура эмес келген нормалар.

– «Достук» мейманкасы кандай жол менен акционердик коомго айланып калган жана профсоюздарга кандай салым кошту, Абдрахманов жетектеп келгенден бери?

– 1992-жылы «Достук» салынып бүткөндөн кийин, КМШ өлкөлөрүнүн Жалпы профсоюздук конфедерациясынан Москвадан Кыргызстан профсоюздар федерациясына өткөрүлүп берилген. Бирок эмне үчүн акционердик коомго өтүп кеткенин жана канча пайызы жеке менчикке берилип калганы айталбайм. Анткени бул маселе азыркы күнгө чейин жабык, ачыкка чыгарышпайт, азыр дагы профсоюздук көпчүлүк билбейт канча пайызы профсоюдардыкы, канчасы жеке тараптыкы жана “Достуктан” канча дивиденд төшөөрүн. Мурун 9-10 жыл бою 1 млн. сомго жакын жыл сайын профсоюздар дивиденд алып турчу эле. Анын баарын “Достуктун” акционерлери кайра артка алышты, 9-10 жылдын ичинде туура эмес акча профсоюздарга берилген деген шылтоо менен 2013 жылы 10 млн. сом кайра артка Кыргызстан профсоюздар федерациясынан өндүрүп алынды. Ал акчалар албетте сот аркылуу берилген, бирок бул жерде шектенүү пайда болбой койбойт, себеби жакшы деген жетекчи профсоюздардын кызыкчылыгын колдоп, соттон утулбаш керек эле, негедир “Достук” миллион деген исктерге утулуп, аны кайра Кыргызстан профсоюздар федерациясы төлөгөнгө туура келди.

Бул жерде кандайдыр бир деңгээлде ошол учурдагы “Достуктун” директору Жанадил Абдрахмановдун кызыкчылыгы болушу толугу менен ыктымал. Акырында профсоюздар “Достук” мейманканасынан эч кандай пайда жок, аны тармактык профсоюздардын менчиги дегени менен, андан аларга пайда жок. Мунун баарын баштаган мурунку профсоюздардын жетекчилери, анын ичинен учурдагы КПФын төрагасы, анын орун басарлары, кеңешчилери, табакташтары. Учурда “Достук” кимдин менчиги экенин дагы териштириш керек жана бул нерселер ачыкка чыгышы керек.

– Кыргызстандын профсоюздарынын кадрлар саясатын кандай бааласа болот?

– Негизи, учурда Кыргызстан профсоюздар Федерациясында кадр саясаты – нөл. Профессионалдуу кадрларды даярдоо саясаты профсоюздардын маанилүү тармактарынын бири болуп эффективдүү иштеп жатканынын көрсөткүчү болуш керек эле, бирок азыр андай эмес. Тескериче, жаш күжүрмөн, адискөй, билимдүү кадрларды кармап ала албайт, анын ордуна кошоматка жакын, позицияларга жана демилгелерге жарыбаган, ишти так аткара албаган кадрларды колдошот. Коңшу өлкөлөрдүн кадр саясатына карасак, алар квота кылып, адистерди өстүрүшөт, алардын тажрыйбасынын жогорулашына шарт түзүп берет, ал эми бизде өстүрүү эмес Абдархманов бут тосуп жатпайбы. Тармактык профсоюздардын жетекчилери болуп 80 чыккан абышкалар олтурат, анан кайдагы кадр саясаты?!
Булар кантип элди коргой алат, толук иш күн олтурбаса, коомдо болуп жаткан эмгекчилерге түздөн-түз тиешеси бар болгон маселелерге үн катпаса, моюн сунуп эле олтурушса? Кадр маселеси Кыргызстан профсоюздар федерациясында азыркы мезгилде таптакыр эле жок деп эсептесе болот, анткени бул маселеге таптакыр көңүл бурбай калды. 70 жашка чыккан кишилерди жумушка алып жатышса, мурун ыплас иштерге аралашып жаткан адамдар тартылып жатса, жаштар жок болсо алардын арасында профсоюздук мафиялык айлампа болуп калганын көрсөткүчү. Мунун баары эмнени билдирип жатат? Мунун баары Кыргызстан профсоюздар федерациясы ачык-айкын иштебегенин, жамынып алып, көшөгө аркылуу иш кылып жатканын көрсөтүп турат.

– Соңку суроо, азыркы жетекчилик профсоюздарда реформалар жөнүндө көп айтышкан, ошол ураан менен келишкен, бирок ал реформалар көрүнбөйт, жыйынтыгы деле чыкпайт окшойт. Эмне кылыш керек эле?

– Жобонун комиссиясына Кыргызстан профсоюздар федерациясын кеңешинин мүчөлөрүнөн эмес, жөнөкөй, профсоюздардын күжүрмөн, прогрессивдүү адамдарынан кошуш керек эле. Мына ошол комиссиянын курамына ошондой адамдар болгондо, алар киргизишмек жаңы жана олуттуу өзгөрүүлөрдү. Ал эми баягылар эле жүрүшсө, алар өз кызыкчылыктарын гана коргоп жүрүшкөндөй, анан каяктан реформа болот?
Мисалы коңшу Казакстандын профсоюздар федерациясын алсак, алардын кеңешинде 100дөн ашык мүчөсү бар, ал жерден тымызын бир нерселерди өткөрүш кыйыныраак, ал ачык уюм. Демократия, демократия деп айтканыбыз менен, учурда биздин Кыргызстан профсоюздар федерациясы эң автаритардуу жана адам укуктарын одоно бузуп, тебелеген уюм болуп калды. Азыр, бул уюм Кыргызстандагы адам укуктарына шек келтирип турат, ал деңгээлге жеткирген азыркы жетекчилик жана анын кеңешчилери. Бир нерсе болсо эле, шудуңдап Кеңештин 10 чакты кишиси сүйлөшө калып, сценарий боюнча кол көтөрө калып эле, жабык форматта жыйындарын өткөрө салышып, көмүскөдө иштерди жүргүзгөндү жакшы үйрөнүп калышты.

Кыргызстан профсоюздар федерациясынын кеңешин чоңойтуш керек, жок дегенде үч эсе, мисалы 90 киши болсо булардын мыйзамсыз иштери өтпөй калат, көп киши болуп, иштер ачык-айкын жүрө баштайт, квотоларды киргизиш керек (жаштардан, аялдардан, кызматкерлерден ж.б.), ошондо прогрессивдүү адамдар келип, ыплас иштерге жол бербейт. Бул эң чоң реформа болот эле. Жобого, профсоюздар мыйзамына өзгөртүүлөрдү киргизиш керек. Профсоюздарды азыркы учурда чектеш керек, ал же ишкерчилик менен алек болуш керек (мейманкана, курортторуна жолдомо бөлүштүрүп иш кылып), же эмгекчил адамдын кызыкчылыктарын, укугун коргош керек. Эки жакка бөлүш керек фукнцияларын, булар болсо көп функцияларды аралаштырып алып иштеп жатышпайбы, ошол үчүн проблема болуп жатат. Азыркы жетекчилик профсоюздардын мүлкү менен эле иш алып барып калды, башка кызыкчылыгы жок.
Дагы бир булардын кемчилиги, учурдагы төраганын кеңешчилеринин бири мүлктүн баарын акционерлештириш керек деген демилгени көтөрүп чыкты. Бул деген сөз, баарын бөлүштүрүү, шылтоолорду табуу, андан ары аукцион аркылуу жиликтемей. Элдин байлыгын, элдин мүлкүн өзүм билгендикке салып, каалагандай колдонуп, каалаганын кылганы жатышат. Мына булардын жасаган реформалары…

Эртеби же кечби коомчулук жыйынтык чыгарыш керек, профсоюздардын ишмердүүлүгү боюнча. Анткени кыргыздарга мындай профсоюздар кереги жок, булар же жолдомолорду туура бөлүштүрбөйт, же эл берген мүлктү жакшы башкара албай, аталарынан калган мурастай түшүнүшөт, же укук коргобойт. Тескериче мыйзамдарды тебелеп, тепсеп жатышат, аларга кайрылган эмгекчилдерди кой, ичинен кызматкерлерин ай сайын басым көрсөтүп, мыйзамсыз кетирип, орундарын башкаларга берип, кайдагы бир шылтоолорду табышып, бири-бирине «донос» менен алек. Анан бизге мындай профсоюздар кереги барбы?!

Тимур Саралаев, жарандык активист

Өзгөчө кырдаалдар министрлигинин маалыматына караганда 17-майдан 19-майга чейинтүнкүсүн көпчүлүк аймактарда жаан жаайт, күн күркүрөп, бийик тоолуу райондордо кар жаашы, кээ бир райондордо жаан-чачын катуу жаашы күтүлөт. Бийик тоолуу аймактарда жолдор тоңголок, тайгак болот. Кээ бир райондордо батыштан соккон шамалдын ылдамдыгы секундасына 17-22 метрге жетиши күтүлөт.

Абанын температурасы төмөндөп 18-19-майда Чүй, Талас облустарынын дыйканчылык аймактарында 12…17°, Ош, Жалал-Абад облустарынын өрөөндөрүндө жана Баткен облусунун дыйканчылык аймактарында 15…20°, Ысык-Көл ойдуңунда жана Нарын облусунун дыйканчылык аймагында 10…15°, тоо этектеринде 9…14°, тоолуу райондордо 0…5° жылуулукка чейин болушу күтүлөт. 19-майда түнкүсүн Чүй, Ош, Жалал-Абад облустарынын өрөөндөрүндө жана Баткен облусунун дыйканчылык аймактарында 4…9°, Талас, Кемин өрөөндөрүндө жана тоо этектеринде 2…7° жылуу.

Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.

20-майга чейин аба ырайынын туруксуздугуна жана күтүлүп жаткан нөшөрлүү жаан-чачынга байланыштуу республиканын тоолуу жана тоо этектериндеги райондордо сел жүрүшү мүмкүн, дарыяларда суунун деңгээли көтөрүлүшү күтүлөт.

14-майда укук коргоочулар Азиза Абдирасулова менен Төлөйкан Исмаиловалар эгер Алмаз Атамбаев дүйшөмбү күнгө чейин алар тууралу тараткан жалааларын жана ушактарын жокко чыгарбаса Атамбаевди сотко беришерин билдиришти.
«Биз Атамбаевдин бизге таккан айыптарына таң калып жатабыз, анын сөзү боюнча биз «Элдик парламенттин» бир бөлүгү экенбиз жана азыркы Кыргыз Республикасынын бийлигине каршы күч колдонууга даярданып жаткан имишпиз. Ал укук коргоочулардын жана журналисттердин статустары тууралу унутуп калса керек, биз бийликтин да, оппозициянын да баардык жыйындарына катышууга жана байкоо салууга акылуубуз. Кыргызстанда мыйзамдуулуктун сакталышына көмөктөшүү жана калыс байкоо жүргүзүү — бул укук коргоочулардын негизги миссиясы.
Алмаз Атамбаев да Кыргызстандын Конституциясын жана мыйзамдарын сактоого милдеттүү. Эч ким, анын ичинде Атамбаев да бирөөгө далилсиз жалаа жапканга жана айыптоого акысы жок. Соттун чечими болмоюнча юридикада презумпция деген түшүнүк бар.
Урматтуу президент, биздин шашылыш билдирүүбүзгө жеке өзүңүздүн жооп беришиңизди суранабыз, ошондой эле Кыргызстандын Конституциясын жана мыйзамдарын сактоого, бирөөлөргө жалаа жаппоого чакырабыз. Кыргызстандын ички-тышкы көйгөйлөрүн объективдүү изилдеп, терең анализдөөнү жана туура жыйынтык чыгарууну сизге сунуш кылабыз.
Бирөөлөргө жалаа жабууну жана каралоону токтотушуңузду талап кылабыз! Дүжүр саясат талдоочуларга, серепчилерге, журналисттерге жана атайын кызматтын кызматкерлерине шыкак болбоңуз.
Эгер дүйшөмбү күнгө чейин биз тууралу айткандарыңызды жокко чыгарбасаңыз биз сизди сотко берүүгө даярбыз!»- деп айтылат билдирүүдө.
Эсиңиздерге сала кетсек, Атамбаев кечээ, 14-майда Энелер күнүнө карата чыгып сүйлөп, 12-май күнү камакка алынган “Элдик парламент” уюмунун мүчөлөрүн сындап, мындан ары бийликти күч менен басып алуу аракеттери аёосуз жазаланарын эскерткен. «Өлкө элинин эмес, өз айылынан керектүү добуш алууга көзү жетпегендер бүгүн бийликти күч менен басып алууну көздөп жатышат. Мындан ары бийликти күч менен басып алуу аракеттери аёосуз жазаланат. Антпесе булар эсирип кетишти. Буларды абак аябай сагынып, күтүп жатат. “Элдик парламенттин” форумунда кимдер гана болгон жок. Талгарбеков баш болгон акаевчилер, Калматов баш болгон бакиевчилер, Мотуев баш болгон “игилчилер” жана грантка келген акчаларын актап жаткан Төлөйкан Исмаилова, Азиза Абдирасулова баштаган бейөкмөтчүлөр катышты. Ал жерде “Элдик парламентпиз” дегендер артыбызда чет өлкөлүк жашыруун кызматтардын генералдары, полковниктери турат деп, алардан акча келгенине өз ара мактанып атышат. Булардын аты бирөө эле – чыккынчылар. Өз мекенинин саткындары», — деп ызырынган.
Булак: Кyrgyztoday.kg

Кыргызстанда электр энергиясына жаңы тарифтер 1-июндан тарта киргизилет. Бул тууралуу бүгүн Отун-энергетика комплексин жөнгө салуу боюнча мамлекеттик агенттиктин жетекчиси Нурбек Элебаев билдирди. Анын айтымында, тарифтер орто эсеп менен алганда 20% жогорулайт.

Жаңы тарифке ылайык азыр 1 киловатт/саатына 70 тыйын төлөп жаткандар 84 тыйын төлөйт. 700 киловатт/сааттан ашык пайдалангандар ар бир киловаттына азыр 2 сом 5 тыйын төлөп жатса, эми 2 сом 20 тыйындан төлөйт. Жаңы тарифтер өкмөт бекиткенден кийин күчүнө кирет. Өкмөт энергияга таңсыктыкты чечүүнүн жолун тарифтерди жогорулатууга байланыштырууда.

Элебаевдин ырастоосунда, баалар коротулган энергияны актай ала турган өлчөмдө болсо, анда чакан ГЭС курууга кызыкдар тараптар көбөйүп, таңсыктык жоюлат. Тарифтерди жогорулатуу мезгилдин талабы экендигин айткан Элебаев, бааларды көтөрүү менен бул тармакка алынган насыялар төлөнөөрүн эскертет.
Токтогул суу сактагынчында суунун көлөмү кескин азайып, Кыргызстан өткөн жылдан бери энергеткикалык каатчылыкка кептелген. Мындан чыгуу максатында өлкө сырттан электр энергиясын импорттой баштаган. Өткөн жылда бир гана Казакстанда сатып алса, быйыл Тажикстандан да сатып алуу пландалууда. Отун-энергетика комплексин жөнгө салуу боюнча агенттиктин статс-катчысы Миргүл Айдарова,чектөөлөр болбошу үчүн электр энергиясын импорттоого мажбур дейт.

Маалыматтар боюнча Кыргызстан быйыл сырттан 1 млрд 200 млн кватт электр энергиясын сатып алат.
Учурда Токтогул ГЭСинде суунун көлөмү кызыл чекке жакындап калган. Өкмөт өкүлдөрү күзгө чейин кырдаал калыбына келет деп ишендирүүдө. Ал эми серепчилер жакынкы жылдары керектөө мындан да өсүп, электр кубатынын тартыштыгы дагы жогорулашын болжошууда.

Булак: maralfm.kg

Алмазбек Атамбаевдин кол койгон буйругуна ылайык Курманбек Исаков Мамлекеттик чек ара кызматынын төрагасынын орун басары болуп дайындалды. Бул тууралуу президенттин маалымат кызматы билдирди.

Алмазбек Атамбаев бүгүн, 16-майда кол койгон Жарлыкка ылайык Абдикарим Алимбаев мурда ээлеген кызматынан бошотулуп, Мамлекеттик чек ара кызматынын төрагалыгына дайындалды. Бул тууралуу президенттин маалымат кызматы билдирди.

Жогорку Кеӊештин Бюджет жана финансы боюнча комитетинде Мамлекеттик ипотекалык компания” ачык акционердик коомунун толук кандуу иштөөсү үчүн финансы ресурстары менен камсыз кылуу каралып жатканда, Дүйнөлүк банк Сот департаментине грант түрүндө 490 миӊ доллар өлчөмүндө гранттык каражат бөлө турганы белгилүү болду. Каражат толугу менен сот турумунун ишин жакшыртуу багытында жумшалмакчы.