Кыргызстанда 2016-жылдын 14-мартынан 22-мартына чейин өтүүчү «Бүткүл дүйнөлүк акча жумалыгы» старт алды. Жумалыктын расмий ачылышы боюнча бүгүн Улуттук банкта пресс-конференцияда болду.

Жакынкы жети күндүн ичинде «Бүткүл дүйнөлүк акча жумалыгынын» алкагында бүт Кыргызстан боюнча, алыскы аймактар менен айылдарда да, окуучулар менен студенттер үчүн атайын окутуучу иш-чаралар, көчмө лекциялар, финансылык мекемелерге экскурсиялар жана ошондой эле коммерциялык банктарда, мамлекеттик мекемелерде ачык эшиктер күнү өткөрүлүп, чеберлер классы, тренингдер, тегерек столдор, викторина, олимпиада, сынак жана башка ишчаралар уюштурулат. Жалпысынан 200гө жакын иш-чара уюуштурулат. Анын урааны «Бүткүл дүйнөлүк акча жумалыгы» – «Катыш! Акчаны акылдуулук менен топто!»

Бул компаниянын жүрүшүн Кыргыз Республикасынын Улуттук банкы жетектейт. Уюуштуруучулардан турган демилгелүү топтун катарына Улуттук банк, Бишкек шаардык мэриянын Билим берүү башкармалыгы, Өнүктүрүү саясат институту, Кыргызстандын банктар союзу, Финансылык рынокту жөнгө салуу жана көзөмөлдөө боюнча мамлекеттик кызмат, Жаштардын өнүгүү институту, Депозиттерди коргоо боюнча агенттик жана Эмгек, миграция, жаштар министрлиги кирет.

Кыргыз Республикасынын Улуттук банкынын төрагасы Толкунбек Абдыгуловдун айтымында, пландалып жаткан ишчаралардын негизги максаты – жаш муундарга акчанын, финансылык институттардын, финансылык рыноктун иштешин, алар эмнени түшүндүрөрүн, кредит алат деген жана аманат жасоо деген түшүнүктөрдү чечмелеп берүү болуп саналат. Жумалыктын башкы максаты – жаш муундардын үнөмдөө маданиятын өнүктүрүп, келечекте тең салмактуу финансылык чечимдерди кабыл алууга өбөлгө түзүү боюнча тийиштүү билим берүү болуп саналат.

Кыргызстандагы банктар союзунун башчысы Анвар Абдраев пресс-конференциянын жүрүшүндө Кыргызстанда азыркы учурда карыз алуучулар жана кредиттерди тейлөө боюнча бир катар кыйынчылыктардын жаралып жаткандыгын билдирди. “Биз келечекте мындай көйгөйлөрдүн кайталанбашын каалайбыз. Ошондуктан “Дүйнөлүк акча жумалыгынын” жүрүшүндө биз өсүп келе жаткан муундарга финансылык ресурстарды туура бөлүштүрүү, акчаны жана өздүк киреше менен чыгашаны санай билүү, кредитти туура алуу тууралуу айтып беребиз. Мындай билимди өспүрүм жаштагы балдарга берүү зарыл”, – деп билдирди Анвар Абдраев.

Өнүктүрүү саясат институтунун башкармасынын башчысы Надежда Добрецова, адамдын финансылык бакубаттуулугуна адам өзү гана жооптуу экендигин билдирди. “Биздин муундар советтик пландалган экономикада чоңойгондуктан, акча тууралуу сүйлөшүүгө көнгөн эмес. Биздин жарандар өз жашоосунда финансылык пландаштыруу менен алектенбейт. Жардылык биздин чөнтөктө эмес, башыбызда. Бул жөнөкөй чындыкты мектепте окутпайт. Биздин балдарды финансылык жоопкерчиликке окутушпайт. Бирок убакыт өзгөрдү, бүгүнкү муун башкача. Финансылык сабатсыздык – бул биздин жашообуздагы терс көрүнүштөрдүн түп тамырында жаткан фундаменталдуу көйгөй. Муну менен билим берүү системасы, коом алектениши керек, анткени биз жарандарыбызды финансылык рынокто сабаттуу гана кардар кылып түзбөстөн, өзүнүн жана үйбүлөсүнүн алдындагы жооптуу өкүлдү жаратышыбыз керек. Биз ар бир ата-энени анын баласы өз алдынча финансылык турмуш курууга даярбы деген ойго келишине чакырат элек. Биздин тапшырмабыз билим берүү системасында кеңири масштабда “финансылык сабаттуулукту” жайылтуу болуп эсептелет” – деп белгиледи Надежда Добрецова.

Калктын финансылык сабаттуулугун жогорулатуу боюнча “Дүйнөлүк акча жумалыгы” кампаниясынын алкагындагы ишчаралар Кыргызстанда 2016-жылдын 22-мартына чейин созулат. Ишчара мектеп окуучулары менен студенттер арасындагы үнөмдөө темасы боюнча “Эң мыкты сүрөт, видеоролик жана эссе” аттуу сынактын жеңүүчүлөрүн сыйлоо менен жыйынтыкталат. Сынактын жеңүүчүлөрүн баалуу белектер күтөт, алардын катарында Кыргызстандын коммерциялык банктарында депозиттердин ачылышы дагы бар.

Урматтуу калың журт!
Урматтуу жүрөгү кыргызмын деп соккон инсан!
Саруу айылындагы жана Каракол шаарында болгон окуялар боюнча биздин балдарыбыздын камака алынганына 3-жыл убакыт өттү. Ошондон бери көптөгөн тергөө жана сот иштери болуп, башында коюлган айыптар аныкталбады. Керек болсо сотко күбө катары чакырылган Э.Каптагаев, күтүлбөгөн жерден «Саруулуктар күнөөлү эмес, накта кылмышкерлерди кармагыла» деп прокурорго карап айтканы, бул иштин жасалма экенине чоң далил болду.
Биздин балдарыбыз Акаев жана Бакиевдердин убагында түзүлгөн, «Кумтөр» долбоорундагы экология, коррупция жана адам укуктарын бузуу маселелерин көтөрүп, Кыргыз элибиздин таламын талашышкан. Бирок бул, бүгүнкү сатылма бийликтин жана эл аралык афиристердин кызыкчылыгына түздөн-түз каршы келгендигине байланыштуу, атайын ыкмаларды жана күчтөрдү колдонуп, чыгаан жигиттерибизди камака алуу амалдарын ишке ашырышкан.
Телевизордон жана интернеттен көрсөтүлгөн акча өндүрүү видеону, Алматыдан өткөрүлгөн экспертизадан монтаж жолу менен жасалган деген анализин жалпы элибиз уга элек. Ал эми 2-жылдан ашык биздин уулубуз Сарыбаев Айбектин же соттолбой, же үй камагына чыгарылбай ГКНБнын СИЗОсунда отурганы кадимки эле мыкаачылык десек жаңылбайбыз.
Эгерде ушунчалык принципиалдуу бийлик болсо, эмнеге кан ичээр Батукаевди мыйзамсыз бошотулганына көз жумуп, расмий адамдай узатышты? Эмне себептен эки адамдын өмүрүн кыйган мурунку шаар башчынын баласы түрмөгө отурган жок, ал эми өзү СДПКдан депутат болуп парламентте отурат? Бирок эң негизгиси, эмне үчүн бүгүнкү күнгө чейин «Кумтөр» маселеси Кыргыз элинин пайдасына чечиле элек?
Урматтуу туугандар!
14-мартта Кыргызстандын жер-жерлеринде боло турган элдик жыйындарды жана 24-мартта Ош шаарындагы курултайды колдоп, ушул кайрылууну жөнөттүк! Кабыл алынуучу резолюцияларга Саруу жана Каракол окуялары боюнча абакта жаткан балдарыбызды бошотуу боюнча талапты кошууңарга ишенебиз!
«Кумтөр» маселеси чечилмейинче башка кен байлыктар ачылбасын!
Урматтоо менен Саруу айлынын тургундары.

Кечээ, 13-мартта белгилүү журналист Эрнис Кыязов Алмас Атамбаевди катуу сынга алып, курч суроолорду камтып, “Алмас Шаршенович, учурдагы бийлик өз абийири үчүн жок дегенде уялабы, айтыңызчы?» деген ат менен Кайрылуу жасаган болчу.
Бүгүн, 14-мартта “Бүгүндөн баштап НТС телеканалынан кызматтан кеттим, Эмне үчүн кеткенимди түшүндүм” деп жазды.

Эрнис Кыязовдун кечээги кайрылуусу:
АЙТЫҢЫЗЧЫ?..
“..передачасын көргөн сайын ..Эрнис сага дайыма ыраазы болом да, уялбай барып туалетине чейин барып киресиң, көргөзөсүң, чын эле позор да.. Силердин (өкмөттүн) атыңардан Эрниске белек берейинчи бир,.. ичинде камчысы бар, жанакыдайларды камчы менен чапсын дагы..”.
(премьер-министр Алмазбек Атамбаев, 2007-жыл)
****
…Курманбек Бакиевдин буйругу менен дайындалган премьер-министр Алмазбек Атамбаев 2007-жылы менин КТРдеги “Багыт” автордук көрсөтүүмдө козголгон туризм, Ысык-Көлдүн жол боюндагы дааратканалардын абалы боюнча темадан кийин өкмөттүк чогулуштардын бирине мени чакырып, ыраазылык айтып, чын дилден алкап камчы белекке берген эле, “камчылап тур..” деп. Ошонку премьер министр Алмаз Шаршеновичтин илгерки өтүнүчү ар убак эсимде, такай камчылабасам да, кээ-кээде ошол аманатты эстеп, а киши президентке айланганда да колдон келишинче камчылап коюп келе жатам. Алмаз Шаршенович “..дайыма ыраазы болуп көрчү Багыт передачасы” ырас азыр эч бир телеканалдан чыкпаганы менен, Сүкөрбергдин Фейсбугу аркылуу камчы-салам узатып коюп турам. Бул жолку камчылоом да өзүңүз белекке берген камчынын деми менен жазылды урматтуу Президент, анда баштадык…
Айтыңызчы, урматтуу президент..
1). Акаев менен Бакиев кескин, батыл реформаларды жасай алышкан жок дешет. Парламентаризм терисин жамынган азыркы президентчил бийлик келечек муундар көп жылдар бою айта жүрчү көзгө жарк этип көрүнгөн олуттуу, уникалдуу кандай реформа жасады, манжалап санап айтыңызчы?
2). Мурунку президенттер бийликтин баарын бир колго топтоп алган авторитарлар катары мүнөздөлүп келет, азыркы өкмөттүн, парламенттин, соттордун куурчак ойноткуч жиптери сиз — президент Алмазбек Шаршеновичтин колунда болбосо кимде, айтыңызчы?
3). Акайып, Бакийип режимдерде көз каранды сот, көз каранды өкмөт, көз каранды парламент болгон экен,.. а азыр өкмөт, парламент, сот Атамбаевден көз карандысыз, өз алдынча иш алып барып жатышабы, айтыңызчы?
4). «Алга Кыргызстан», «Ак жол» деген бийликке ляппай деген партиялар жашап өткөн экен илгери, а азыркы КСДП жана бийликтин батасын алып парламенттик орун алган көз каранды партиялары бар Жогорку кенеш мурунку режимдердеги кол жоолук партиялардын эмне айырмасы бар, айтыңызчы?
5). Мурункулар чече албай келген: Кумтөр, Энергетика-тарифтер, Мегаком, чек ара, сот реформасы сыяктуу маселелерди бүгүнкү Атамбаевдик бийлик чече алдыбы, чечсе кантип чечти, айтыңызчы?
6). Мейли Атамбаевди аялы башкарбайт экен, мейли Семетей, Сейтек деген уулдары, күйөө баласы саясатка кийлигишпей өзүнүн таланттарына жараша оокат кылып атышкан имиш, анда мурунку айдоочусу Икрам Илмиянов, мурунку жан сакчысы Мамбеталиев, УКМК башчысы Абдил Сегизбаев, кенешчиси Фарид Ниязовдор кимдердин ролун аткарып жатышат, айтыңызчы?
7) Акаевдик, Бакиевдик кадр саясатынан Атамбаевдин кадр саясаты идеалдуу болуп кеттиби? Европадагы, Батыштагы атактуу Оксфорд, Кембридж сыяктуу окуу жайларды бүткөн, ар кайсы мамлекеттерде иштеп тажрыйба топтогон жаңы, жаш, таза кадрлар ак үй, көк үйдө иштеп жатабы, айтыңызчы?
8). Атамбаев оппозицияда кезинде КТРди эле сындап, “туура эмес көрсөтөт” дечү эле, азыр коомдук деген көз боёмой күрмөнү жамынган КТРК башкача болуп, президенттин да, өкмөтүн да, башкасын да агы-көгүнө карабай сындаган, ачык, түз айткан, ак үйгө көз каранды эмес каналга айланып кеттиби, айтыңызчы?
9). Убактылуу өкмөт учурунда банк ячейкаларынын акчалар, алтындар сырдуу жоголгонун, Батукаевдин көз көрүнөө качырылышын, Оштогу Мырзакматовду атайылап жыдытыш үчүн өткөрүлгөн мэр шайлоонун бетпак мүнөзүн, бийликтин тымызын өкүмзордугу менен Омбудсмен шайлоо өнөктүгү өтө ыплас өткөнүн моюнга алып — учурдагы бийлик өз абийири үчүн жок дегенде уялабы, айтыңызчы?
10). Атамбаевчил бийлик алгач бийликке отурган жылдары “иштейли десек акайыпчылар, бакийичилер жолтоо болуп атат..” дегенсип күңк-мыңк этип атты эле, азыр ошол Акайып, Бакийип деген “желмогуздар” жок, бүтүндөй бийликти топтоп алган Атамбаевдин колунда азыр баары бар – соттор, өкмөт, парламент, күч органдары, УКМК,.. канакей реформа? Реформа болбосо да кур дегенде элдин аң сезиминде “ушулар бирдеме жасай алат окшойт..” деген үмүт жарата алдыбы, ачык айтыңызчы?
урматтоо менен, сиз бир кезде “ыраазы болуп, передачасын улам көргөн” журналист
Эрнис Кыязов.

Бүгүн, 14-мартта Агрардык саясат, суу ресурстары, экология жана регионалдык өнүктүрүү боюнча комитетинин жыйынында “2015-жылдын 8-июнунда Бишкек шаарында кол коюлган Кыргыз Республикасы менен Европа реконструкциялоо жана өнүктүрүү банкынын ортосундагы “Баткен шаарындагы суу менен камсыз кылуу жана каналдаштыруу тутумдарын реабилитациялоо” жөнүндө Насыялык макулдашууга жана ЕБРРдин уюштуруучуларынын Атайын фонду тарабынан берилүүчү инвестициялык грантка карата Кыргыз Республикасынын, Баткен шаарынын мэриясынын, “Таза-Суу” муниципалдык ишканасынын жана Европа реконструкциялоо жана өнүктүрүү банкынын ортосундагы Грант жөнүндө макулдашууну” ратификациялоо тууралуу” мыйзам долбоору каралды.

Архитектура, курулуш жана туракжайкоммуналдык чарба агенттигине караштуу Суу менен камсыз кылуу жана жеткирүү департаментинин жетекчиси Аскар Токтошевдин берген маалыматына караганда, Келишимге ылайык, Баткен шаарынын суу тутумун жакшыртуу багытында Европа реконструкциялоо жана өнүктүрүү банкы (ЕРӨБ) тарабынан 5,020 млн евро каражат каралууда, анын ичинде: 1,5 млн евро ЕРӨБ насыялык каражаты; 2,5 млн евро, ЕРӨБ атайын уюштуруучу фондунун инвестициялык грантты; 1,020 млн евро, грант түрүндө долбоорду ишке ашырууга техникалык колдоо. Насыянын мөөнөтү 1 пайыздык үстөгү менен 15 жыл, 3 жылдык жеңилдетилген мөөнөт болуп саналат.

Бул каражатка Баткен суу каналы модернизацияланып, суу эсептөөчү шаймандар, суу насостору жана башка тиешелүү техникалары дагы сатылып алынат. Ошону менен катар консультанттарга да каражат каралган.

Жыйын жүрүшүндө долбоорду ишке ашырууда өткөрүлө турган тендерди Баткен шаардык мэриясы аныктаары, шаарды таза суу менен камсыздоо системасынын жарымы жаңыртылаары белгилүү болуп, консультанттарга каралган каражат боюнча маселе көтөрүлдү.

Ратификациялык мыйзам долбоору 1-окууда жактырылды.

Белгилей кетсек, Баткен шаарын суу менен камсыз кылуу тутуму калыбына келтирүүгө муктаж. Баткен шаарынын суу менен жабдуу тутумун куруу 1955-жылы башталып, калктын өсүшүнө байланыштуу 1960-1970- жылдары кайрадан кеңейтилген. Бүгүнкү күндө суу түтүктөрү эскилиги жеткен.

“Алмас Атамбаев “кара” президент болду, анын бийлиги азыр “каралардын”, бандиттердин колдоосу астында гана сакталып турат. Алмас Атамбаев тезинен отставкага кетиш керек!”, – деп сүйлөдү бүгүн, 14-мартта Жалал-Абадда өткөн бийликтин элге каршы саясатына нааразычылык митингинде бир кездеги Атамбаевдин санаалашы, азыркы оппозиционер Бектур Асанов.
“Он күндөн кийин, 24-мартта Ошто элдик Курултай өтөт. Алмас Атамбаев өз эрки менен отставкага кетип калыш үчүн 10 күн убакыт беребиз. Эгер өз эрки менен кетпесе анда мыйзам жолу менен кетиребиз!”,- деди 2010-жылдын 7-апрелиндеги куралдуу мамлекеттик төнкөрүштөн кийин Убактылуу өкмөт тарабынан Жалал-Абад облусуна губернатор болуп дайындалган Бектур Асанов.
Митингдин катышуучулары бүгүнкү бийликтин социалдык саясатын кескин сынга алып, электрэнергияга, газга тарифтерди кайра төмөндөтүүнү, мугалимдерге жана врачтарга айлыкты көбөйтүүнү, Жалал-Абадда топтолгон салыктардын көбүн Бишкекке алып кетпей облуста калтырууну талап кылышып, бийликке 10 күн убакыт беришти.
Булак:Кyrgyztoday.kg

Элдин бийлике болгон нааразычылыгы көбүнчө эки себептен улам келип чыгат. Бириничиси, бийликтин акыйкатсыздыгы ал эми экинчиси мамлекеттеги экономикалык кризис. Мамлекетибиздеги кризис жакында боло турган митингдерге шылтоо болуп жатат десек болот.

Себеби, бийлик акыйкатсыздык кылды деп эсептелген орой, элин кыжырын келтире турган деле далилдер жок. Бирок, эконмикалык, өнөр-жай тармагын тейлеген буга чейинки өкмөттөр сыяктуу эле Сариев башкарган министрлер курамынын чабалдыгынан ушул кырдаал жаралды десек жарашчудай.

Темир Сариевди мыкты экономист деп айтайын десек өзү мамлекеттеги эконмикалык абалды өзгөртүүгө мүмкүчүлүк бере турган кызматтарда иштегенине 5 жылдын тегереги болуптур, бирок, экономикабыз алакан чаап сүйүнө турган кадамдарды жасай элек экен. Бакиевдин мезгилинде электр энергиясын кымбаттатпагыла, элге салык салып кыйнабагыла деген маанидеги ураандарды колуна микрофон тийери менен тамагы айрылганча кыйкырчу эле.

Азыр Темир Аргенбаевич жалгыз отурган кезинде эрдин тиштеп “кеч түшүндүм, жөн эле куру кыйкырык кылыпмын” деп кайгырып жатса керек. Жер-жерлерге барып “иштебей жатасыңар, иштегиле” деп кыйкыруудан маселе чечилбей турганын качан сезет болду экен. Бажы биримдигине киргенден кийин ага жараша иштеш керек экенин иш билги эксперттер, коомчулук жакшы эле консультация кылды эле. Бажы биримдигине жетелеп кирген Сариев тоого эмес аңгеке жетелеп кирип баратканын билбей турабы же билсе дагы алы келбей жатабы? Эмнеси болсо дагы акыркы беш жылдагы экономикалык абалга Темир Аргенбаевич жооп берээрин унутпаса гана болгону…

Булак: “Эгемен”

Бүгүн, 14-мартта Аксы районунун борбору Кербен шаарында тынчык митинги болуп өттү деп маалымдады өкүлдүн басма сөз катчысы. Тынчтык митингине 400гө жакын эл катышты. Митингдин катышуучуларынын алында Аксы районунун акими Медет Айдаралиев чыгып сүйлөп, Кыргыз Өкмөтү жана жергиликтүү бийлик тарабынан буга чейинки Кара-Жыгачта болгон тынчтык митинги жана анда эл тарабынан коюлган талаптардын аткарылышы боюнча кеңири маалымат берди.

Тынчтык митингин уюштургандардын бири, Кашка-Суу айылдык кеңештин депутаты Шекербек Камчыбек уулу жөлөк пулдарын алууну жеңилдетүү, электр энергиясына 700 кВаттан кийинки жогорулатылган бааларды азайтуу, турак-жай менен автоунааларга болгон камсыздандырууну убактылуу токтотууну, Өзбекстан Республикасы менен болгон чек ара маселесин демаркациялоо жана делминтациялоо маселелерин тездетүү талаптарын билдирди.

– Жерге болгон социалдык фонд төлөмү мурдагы баасында өзгөрүүсүз  калды. Ал эми балдарга төлөнчү жөлөк пулдар боюнча жаңы мыйзам иштелип жатат. Ал эми чек ара маселеси боюнча КРнын Өкмөттүк комиссиясы тарабынан демаркациялоо жана делминтациялоо иштери жүргүзүлүп жатат,- деди Аксы районунун акими Медет Айдаралиев.

Аксы районунун акими Медет Айдаралиев карапайым элди пайдаланып азгыргандарга алданбоого, элди биримдик менен ынтымакчылыкка үндөп кетти. Элди саясий оюндун куралына айландырбастан жаз жарышын уюшкандыкта баштоого чакырды.

Митинг тынч өттү жана тараптар өз ойлорун ачык айтуу мүмкүнчүлүгүнө ээ болушту. Аксы районунун борбору Кербен шаарында 25 112 калк жашайт. Ал эми жалпы Аксы районунда 134 миң калк жашайт.

Жолдошбай Осмонов, журналист

Жалал-Абад шаарында учурда митинг өтүүдө. Мамлекеттик администрациянын жанындагы Барпы театрынын алдында чогулган элге саясатчы Бектур Асанов сөз сүйлөп, президент Атамбаевдин мөөнөтсүз отставкасын талап кылды.

Айтымында, бүгүнкү митингдердин уландысы 24-мартта Ош шаарында болот.Ошол учурда эл арасынан чыккан эки киши Асановдун колундагы микрофонун тартып алып, дарегине туура эмес пикирлерин айтууга аракеттеништи.

Эске салсак, бүгүн митинг Талас, Жалал-Абад жана Аксы жергелеринде өткөрүлүп атат.

Булак: “Саясат.кж”

Кыргыз Республикасынын Өзгөчө кырдаалдар министрлигинин Гидрометеорология боюнча агенттиги берген маалыматына ылайык 2016-жылдын 14-мартынан 18-мартына чейин аба ырайынын болжолдоо баракчасы.

Бишкек шаарында 14-март күнү мезгил-мезгили менен катуу жаан жаашы күтүлөт. Батыштан соккон шамалдын ылдамдыгы секундасына 4-9 метрден, 14 метрге чейин жетет. Абанын түнкү төмөнкү температурасы 2…4° жылуу, күндүзгү жогорку температурасы 6…8° жылуу болушу күтүлөт.

Ош шаарында 14-март күнү мезгил-мезгили менен жаан жаашы күтулөт. Батыштан соккон шамалдын ылдамдыгы секундасына 4-9 метрге чейин жетет. Абанын түнкү төмөнкү температурасы 5…7° жылуу, күндүзгү жогорку температурасы 10…12° жылуу болушу күтүлөт.

14-март күнү жана 15-март күнү түнкүсүн жана эртең менен көпчүлүк аймактарда жаан жаап, тоо этектеринде карга айланышы, тоолуу райондордо кар жаашы күтүлөт. Чүй, Талас, Ош, Жалал-Абад, Баткен облустарынын айрым жерлеринде жаан-чачын катуу жаашы күтүлөт. Тоолуу аймактардын автожолдорунда жолдор тоңголок, тайгак болот. Батыштан соккон шамалдын ылдамдыгы секундасына 4-9 метрден, айрым жерлерде 15-20 метрге чейин жетет.

15-март күнү күндүз айрым жерлерде жаан жаап, тоо этектеринде жаан карга айланышы, тоолуу райондордо кар жаашы күтүлөт. Тоолуу аймактардын автожолдорунда жолдор тоңголок, тайгак болот. Батыштан соккон шамалдын ылдамдыгы секундасына 4-9 метрден, Ысык-Көл акваториясында 19-24 метрге чейин жетет.

16-март күнү түнкүсүн жаан-чачын күтүлбөйт, күндүз айрым жерлерде жаан, тоолуу райондордо кар жаашы күтүлөт. Тоолуу аймактардын автожолдорунда жолдор тоңголок, тайгак болот. Батыштан соккон шамалдын ылдамдыгы секундасына 4-9 метрден, айрым жерлерде 15-20 метрге чейин жетет.

17-18-март күндөрү мезгил-мезгили менен жаан, тоолуу райондордо кар жаашы, кээ бир райондордо жаан-чачын катуу жаашы күтүлөт.

Абанын температурасы  абдан төмөндөйт.

Кечээ, 13-март күнү Ош облусунун мусулмандар казыяты жана “Ыйман” диний маданиятты өнүктүрүү фонду биргеликте уюштурган дин кызматкерлери үчүн “иш кагаздарын жүргүзүү” аталышындагы семинар болуп өттү. Аталган семинарга райондордун баш имам-хатибдери, диний окуу жайлардын мүдүрлөрү жана айыл өкмөттөрдүн жооптуу имам-хатибдери катышышты. Бул тууралуу Ош облусунун мусулмандар казыятынын маалымат кызматы билдирди.

Семинарда Ош облустук казыяттын маалымат жана кадрлар бөлүмүнүн  башчысы Нургазы Каримов тарабынан дин тармагында иш кагаздарын жүргүүзүү процесстери, кат жазуунун эрежелери жана иш-кагаздарын каттоо боюнча мастер-класс өтүлдү. Мындан сырткары райондук хатипчиликтердин атайын фирмендик бланктарын жасоо, буйруктарды, каттарды жазууда жана аткарууда  КРнын өкмөтү тарабынан бекитилип берилген типтүү нускаманын үлгүлөрү үйрөтүлдү. Жыйынтыгында катышуучуларга сертификаттар тапшырылды.

Эскерте кетсек, казыят тарабынан райондук хатипчиликтер, диний окуу жайлар жана мечиттер кагаз иштерин жүргүзүүнү толук жолго коюуусу милдеттендирилди.

2015-жылдын аягында жыл жыйынтыгын чыгарып жатып өткөргөн бриффингде Кыргыз Республикасынын Президенти А.Атамбаевдин:  “журналисттер  менин энем менен агамдын өлүмүнө себепкер болду” деп айтканы бар эле. Жалган  жалаа жапкан жаман сөздүн октон да  катуу тиерин түшүнгөн  адамдар, туура эмес болсо да, Президенттин сөзүн унчукпай кабыл  алышкан.

Бирок акыркы мезгилде өздөрүн оппозициябыз деп атаган аттуу-баштуулардын дарегине  Президентке караштуу “кол бала” гезит, сайттар: Fokus.kg, “Фабула”, “Жаңы Агым”,  “Аят”, Багыт.kg, Fakt.kg аркылуу жалган жалаалар жабылып, адам оозуна алгыс ыплас сөздөр менен мазактоо күч ала баштады. Эмки кезекте “кара жашиктердин”  каралоосу күтүлүүдө.

Биздин көз карашыбызда  бардык материалдарды Ак  үйдүн жетинчи кабатында олтуруп алып, же ГКНБнын бөлмөсүндө бекинип алып бир эле адам даярдап  Президенттин басылмаларына, сайттарына берип жаткандай. Эгер ишенбесеңер 2016-жылдын 9-10-мартында  жарык көргөн Атамбаевдин аталган гезит, сайттарына чыккан коендой окшош  макалаларды карагыла.

А.Атамбаев  оппозицияда жүрүп, каралоонун зыянын жакшы эле өз терисинен өткөрдү эле. Тилекке каршы, ишембиликте жүрүп: «Элди чогултуп төңкөрүш кылам дегендер оппозиция эмес, алар эл бузарлар, алар чындап эл душманы. Бир балээ болуп кетсе чөнтөгүмдү толтурайын деген эле ой бар аларда. Кыйкыргандардын артында жалаң кан же уурулук бар. Ачык айтайын, алар канга тойбогон кузгунга окшош бузукулар»–деп айтканы бул адамдын оңолбой турганын дагы бир ирет көрсөттү.

Оппозиция, “Эл үнү”  коомдук кыймылынын демилгеси менен   2016-жылдын 24-мартында Ош шаарынын борборунда Элдик Курултай өткөрүүнү пландап, күн тартибине өлкөдөгү саясий, социалдык-экономикалык абалды, мамлекеттик бийликтин тагдырын талкуулоо боюнча  ачык айтып, Президентти баш кылып, бийлик бутактарынын баарын чакырды.

Оппозиция мамлекеттик бийлик башчыларынын  анын ичинде Президенттин жеке турмушун талкуулоо, жамандоо, каралоо үчүн  Курултай чакырган жок.

Президент Элдик Курултайга барып,  калк турмушун оңдоп жаткан алгылыктуу иштери болсо айтып,  эл менен арай көзү чарай  сүйлөшүүнүн ордуна  өзүнүн “дүжүр” гезит, сайттары аркылуу оппозицияны каралап кириши 2005-жылдагы Акаевди, 2010-жылдагы Бакиевди  элестетип турат. Анткени мунун артында ошол эле А.Сегизбаев, О.Ибраимов, Ф.Ниязов, А.Карашев ж.б. турганы белгилүү.

Эки сөзүнүн биринде “кудайды күбө тартып” сүйлөгөн Атамбаев  сайтка жазгандай, “досторунун”  “миллион долларларды” жымырып алганы чын болгондо  алда качан эле  каматып салбайбы! Ушактын да чеги болот, кудай баарын көрүп турат.

Кыргызда “кыздын сыры төркүнгө маалим” деп коет эмеспи.  Алмазбек Шаршенович, оппозицияда деле сиздин “кухняңызды” жакшы билген, “алыс”, “жакын” “досторуңуз” жүрөт.   Атамбаев тууралуу деле жаза турган толгон-токой  материалдар бар. Болгону оппозиция түштүк эли айткандай, азырынча “пастыкка” барбай турат.

Же, болбой эле тилиңер кычышып жатса, аркадан “катын ушак” таркатпай,  КТРК, ЭлТР  телеканалдарыңар аркылуу түз эфир менен  теледебатка чыккыла, кимдин-ким экенин,  чындыгында кимдердин “миллиондорду жымырып жатканы” тууралуу ачык айтышалы, эл билсин.

Ошондуктан оппозиция маалымат согушун  баштай электе токтотуңуз, Алмазбек Шаршенович!  Оппозиция сиз айткандай “ички душман” эмес. Сиздин саясатыңызга  оппонент. Кийин кеч болуп калып, тигил же  бул тууганыма журналисттердин зыяны тийди деп наалып жүрбөңүз. Бул эскертүү  Президентке жетпей калса,  “дүжүр” сайт, гезиттер жеткирип коюшуңарды өтүнөбүз.

“Эл үнү” коомдук кыймылы

2010-жылдан кийин Ак үй алдында саналуу гана митинг өттү. Анын эң эле шойкомдуусу экс-депутат Камчыбек Ташиевдин Ак үй тосмосунан аттаганы эле. Ошону менен нааразылык акциялары тыйылгандай болду. Ал арада экс депутат Равшан Жээнбеков оппозициянын башын бириктирүүгө бир нече далалат жасап, ар кандай оппозициялык кыймылдардын түзүлгөнүн жарыялады. Бирок ал күткөндөй майнап чыгып, таасирдүү кыймылга айланбады. Бир сөз менен айтканда, оппозициялык күчтөрдүн аракетин эл жапырт колдого алып кетпеди.

Анын башкы себеби бийлик парламенттик шайлоону да, президенттик шайлоону да мурдагыларданалда канча таза өткөрүүгө умтулганы, коррупция менен күрөшүүдөгү
аракеттери, анын ичинде жогорку кызматтагы аткаминерлердин сот жообуна тартылышы, тарифтердин жүйөсүз кескин көтөрүлбөгөнүнө байланыштуу эле. Ал эми экинчи себеби, оппозиция өкүлдөрүнүн алсыздыгы, элдин ишеничине ээ болбогону менен түшүндүрүүгө болот. Ошого карабай кече жакында кайрадан «Оппозициялык күчтөрдүн бирикмеси» (ОКБ) деген ысым менен кыймыл түзүлдү. Чү деген эле жерден айта кетчү нерсе бул кыймыл түзүлгөнү боюнча расмий чакырык таштап, бийликке 7 бөлүктөн турган талап койгондон. Анын башкысы бүгүнкү кризиске өкмөт менен кошо аны түзгөн КР Жогорку Кеңешинин башкаруучу коалициясы да отчет берип, жыйынтыктарына толугу менен жоопкерчилик тартуу, Жерүйдү, «Мегакомду» сатууну токтотуу сыяктуу өкмөттүн талуу жерине тийген көйгөйлөр. Бирок ОКБны түзгөндөр жаңы саясатчылар эмес. Алар “Бишкек форумунун” атынан форумдун төрагасы Адахан Мадумаров, “Каршылык Көрсөтүү Кыймылынын” атынан теңтөрагалар Өмүрбек Суваналиев, Бегалы Наргозуев, “Бүтүн Кыргызстан” партиясынын атынан төрага орун басары Дүйшөмбү Сооронбаев жана “Ата журт” партиясынын атынан теңтөрагасы Камчыбек Ташиев.

Адахан Мадумаров Оппозициялык кыймылдын бирикмеси түзүлгөн форумда: «Өлкөдө түптөлүп калган үч чоң саясый партия бул бирикмеге кошулуу ниетин билдирди. Жакынкы күндөрү бул тууралуу толук жарыялайбыз. Биз жөн эле бийлик үчүн күрөшүү эмес, Кыргызстанды учурда батып бараткан саздан кантип сактап калабыз деген бир гана саясый платформанын астында биригип жатабыз. Биз аягына чейин талкаланып бараткан кадр саясатын оңдоп, экономикалык кургуйга түшүп бараткан абалды жөнгө салуунун жолдорун бирге издейбиз» деп түптөлүп калган 3 чоң саясый партиянын атын атабады. Чындыгында эле ОКБ чет өлкөлүк долбоор болушу мүмкүнбү деген суроону талдай турган болсок, анын кандайдыр бир деңгээлде чындыгы бардай сезилет. Биринчиден, Кыргызстан акыркы мезгилде Россияга ыктап, АКШ менен бир тараптуу мамилесин үзгөн. Ошондон улам саясат таануучу Марс Сариев «Бул толук мүмкүн, себеби Президент Атамбаев күтүүсүз Москвага учуп кетти. Ал өлкөдө кандайдыр бир толкундоолорду болтурбоо үчүн Кремлге баргандыр» деп болжолдойт. Экинчи бир мунун чындыгын ырастаган көрүнүш Ташиев Келдибековду «Ата журт» партиясынын катарынан чыккан эмес деп, аны таасирдүү фигура катары сыпаттайт. Анан дагы жайчылыкта Мадумаровдун, Суваналиевдин, Ташиевдин бир кыймылга биригиши өтө эле күмөн болчу. Экинчиден, булар эл алдындагы өздөрүнүн кадыр-баркын, дараметин билип туруп, оппозициялык кыймыл түзүп жатышы кандайдыр бир ишенимдүү күчкө үмүт артып турушканын ырастап турат. Эгер чын эле ошондой болсо эртең эле булардын ка-
тарын Мелис Мырзакматов, Акматбек Келдибеков, Кубанычбек Кадыров, Бектур Асанов, Садыр Жапаров, Азимбек Бекназаров толукташы ыктымал. Ал эми Адахан Мадумаров айткан 3 чоң саясый партия башында «Республика» турары айтпаса да түшүнүктүү. Ал эми ОКБнын лидерлеринин бири Бегалы Наргозуев кыймыл боюнча төмөнкү пикирин айтат:
— Негизинен биз койгон талаптарды бийлик аткарат деп ойлойбуз. Анткени бул талаптардын ишке ашышы бийликтин кызыкчылыгы үчүн иштейт. Эгер бийликтин өзүн-өзү сактоо инстинкти иштесе анда талаптарды аткарат. Бирок бийлик дагы эле мурдунун учунан алысты көрө албай,”өзүн-өзү билип, өтүгүн төргө илип”, өз билемдикке сала берсе, ОКБ койгон талаптарды аткарбаса анда биз саясый күрөштүн алкагында саясый иш-чараларды уюштуруп, митингдерди, пикеттерди өткөрүү жолдору менен мыйзамдардын аткарылышын талап кылабыз жана бийликти мыйзамдын чегинде иштөөгө мажбурлайбыз. Бул жаатта коомчулук бизди колдоруна ишенебиз. Эл бүгүнкү бийликтин 6 жылдан берки жалган убадаларына тоюп бүттү. Азырынча Адахан Мадумаров, Өмүрбек Суваналиев, Камчыбек Ташиев баштаган саясый топтор бир туунун астына биригишти. Дагы бир нече саясый күчтөр менен тынымсыз сүйлөшүүлөр жүрүп жатат жана жакынкы убактарда дагы бир нече топтордун биздин ОКБга кирүүсү тууралу билдирүү таратабыз. Өзүўүздөр байкагандай бул биригиүү узакка созулган сүйлөшүүлөрдөн кийин, бүгүн өлкөдө түзүлгөн катастрофалык абалга байланыштуу ишке ашкандыктан узак убакытка такай иш алып баруучу бирикме болот. Чындыгында бийлик элдин турмушуна карабай, ага кайдыгер болсо оппозиция ирденет, ал сес көрсөтүүчү күчкө айланат. Андан ары элдин колдоосуна ээ болот.

Кадыр Бостон

Булак: “Жаңы Агым”

Жарандык активист Адиль Турдукуловдун билдиргенине караганда, учурда Аксы районунун Кербен шаарында бийликтин элге каршы саятына нааразычылык иретинде митинг өтүп жатат.

Эл мамлекеттик администрациянын маңдайына чогулушкан. Ал эми жергиликтүү бийлик оппозиция өкүлдөрүнө келип, митингди стадионго өткөрүүнү талап кылган.

“Спорттук дене түзүлүштөгү жигиттер митинг боло турчу жерге келе башташты. Мындан улам уюштуруучулар бийлик тараптан болчу провокациядан чочулап турушат”, – дейт Адиль Турдукулов.
Бишкектен барган “Жаңы муун” кыймылынын лидерлеринин бири Тимур Саралаев микрофонго чыгып сүйлөй баштаганда бийлик алып келген спортчу-провокаторлор Саралаевди түртүкүлөп, сүйрөп кетишкен жана ортого алып коркута башташкан. Милиция болсо кийлигишпей, шакаба чегип карап турган.
Спортчулар Адил Турдукуловду да сүйлөтпөй коюшту. Бкл тууралу Адил Турдукулов өзү билдирүүдө.




https://www.youtube.com/watch?v=So0-YwjB-fM
Булак:Кyrgyztoday.kg
Фотолор Адил Турдукуловдуку

«Даңазалуу доор» сериалынан кийин өкүмдар атка конгон актер Жолдошбек Жанжигит уулу келинчегин Москвадан тапкан. Таластын кызы кымбатка түшүп калат деп чочулаган деле эмес. Анткени, табышкан жубайлар студент кезинде эле Москвадан баш кошуп, ошол жактан никеге турушкан.

Учурда жубайы Анара менен эки уул, бир кызды тарбиялап жаткан кездери. Келинчеги чөнтөгүн, телефонун текшербегенине ичи жылыйт. Кээде актер бир айлап гастролго кеткенде телефон чалып «тигил чөнтөгүмдө мынча акча бар, алып керегиңе жарат» демейин тийбейт.

Экөө тең актер болгондуктан мурда гастролго чогуу чыгышчу. Үйдө патриархат. Хандын тукуму экенин мезгил-мезгили менен эскертип, керектүү жерден кабакты түйүп турат. Анан да балдары өзүн тартып сүйлөөк болбосо дейт. Майрамдарда келинчегине жакшы белек берип, көңүлүн алып турганды унутпайт.

Бегайым БАЙБОСУНОВА

Булак: “Жаңы Агым”

Бишкек шаарынын жылдык бюджети 8 млрд. сомдун айланасында деп айтылат. Шаардыктар төлөгөн салыктын баары эле шаардын бюджетине түшпөйт. Бирок мындан он эсе көп жүз миллиардаган акчалар жалаң борбордо айланат. Көмүскө экономиканын ири өлчөмү да Бишкекте. Ошондуктан шаарды жетектеген мэрден көп нерселер көз каранды. Эгер айылда 3-4 чарчы жердин баркы билинбесе, Бишкекте алакандай жердин наркы миңдеген долларга бааланат. Борбор жалпы мамлекеттин деңгээлин чагылдырат. Кыргызстанга келген чет элдиктер борборду көрүп андан соң жалпы мамлекетке баа берет. Демек өлкөнүн жүзү, экономикасы, маданияты, күн кечирген жашоосу борбор

Чоң базарды элестеткен бүгүнкү шаар

Алыска барбайлы, бүгүн совет мезгилиндеги Ашхабад менен
азыркы Ашхабаддын асман менен жердей айырмасы бар. Астана көз алдыбызда жоктон куралып, азыр Борбор Азиядагы эң мыкты борборлордун көч башында турат. Ташкент Европа шаарларынын деңгээлине жетти. Дүйшөмбүдө да улттук колоритти чагылдырган ондогон кооз имараттар салынды. Ал эми бир кезде «Жашыл шаар -Фрунзе» аталган Бишкектин бүгүнкү абалы өзүбүзгө маалым. Өзгөлөр кандай баа берери белгисиз. Себеби бирөөнүн жерин эч ким жамандабайт. Эгер Астана, Ашхабад, Ташкент саргарган эрме чөл, ээн талаада жайгашса, Бишкек чокусунан кар кетпеген, жашыл арчалуу, мөлтүр таза суулар аккан тоонун этегинде жайланышкан. Жараткан бул жагынан жаратылыш көркүн Бишкектен аяган эмес. Эгемендүүлүк мезгилинен бери борбор калаага кимдер гана мэр болбоду. Баш-аягын санасаң азыркы шайланган Албек Ибраимов 25 жыл аралыгындагы
он төртүнчү мэр экен. Эгер акыйкат бааласак Бишкек Нариман Түлеев, менен Медетбек Керимкулов мэр болуп турганда бир аз өзгөрүлгөнү сезилген. Ашкере өнүгүп кетпесе да шаарды бирөө башкарып жатканы элге дайын болгон. Башка
мэрлердин келгени менен кеткени эле угулбаса шаар баягы эле таштанды көйгөйүнөн арылбай кала берди. Бирок жаңы курулуштар Астанада эле эмес, Бишкекте да салынган. Биздин жетишкендиктердин көч башында жолду тарыткан базарчалар, ири соода борборлору, кафе, ресторан, тойканалар, андан ары ашкана менен чайканалар, кечки клубдар (турак жайдын) мектеп менен ооруканалардын жанында жайгашкан мунай куючу станциялар. Унаа оңдоочу СТОлор, аларды жууп тазалаган жайлар, деги койчу санай келсең баары бар. Жогорудагы жетишкендиктерибиз Бишкектин ар бир көчөсүндө жайнайт . Керек болсо жүз орундуу төрт ресторан бир көчөдө жанаша жайгашкан. Шаарга көрк берип, кооздоп турган да ошолор. Бирок жогорудагылардын баарын, акыркы кездеги сансыз көп кабаттуу үйлөдүн курулуштарын, павильондон тарта ресторандарга чейинкисин акыл таразасына салсаң ошонун баары мэриянын элегинен өткөн. Аларга мэр болуп иштегендер кабардар болуп, уруксат кагазын берген. Албетте, екер эмес.
Мердин башкы милдети таштанды чыгаруу менен өлчөнгөндө
Бишкек шаарын жетектеген бардык мэрлердин тушунда жалаң
соода тармагындагы курулуштар салынды. Бүгүн киши акылы жетпеген күтүүсүз жерлерге он кабаттуу курулуш имараттары салынууда. Мисалы, Ош базарынын айланасына төрт соода комплекси салынды. Анын бири бир кездеги «Кыял» өндүрүштүк ишканасынын жанындагы арчаларды кыйып, «Беш-Сары» соода комплексинин экинчи имаратын тургузду. Бул үчүн эч ким унчуккан жок. Андан ары эзелтеден эл эс алган Чүй-Павлов көчөлөрүнүн кесилишиндеги бак арактардын арасын дагы бирөө кафеге айлантып алды. Ал эми ЦУМ менен цирктин тегерегинде да бир нече жеке менчик, оода комплекстери, офистерге ижара үчүн берилчү көп кабаттуу үйлөр салынган. Жакында Эмен паркынын чок ортосуна да кандайдыр бир имарат салынса ага деле таң калуунун кереги жок. Ушундай эле соода комплекстери түрк ишкерлерине да берилген. Кыскасы, санай берсең аягы түгөнбөйт. Кызыл Аскерден тарта чыгышы Аламүдүн менен 12-кичи-районго, түштүгү Жалга, түндүгү Дордой базарына чейин ушундай. Буларга ким уруксат берди, кандай зарылдыктан, кандай жагдайда берилди бул башка маселе. Макул, соода комплекстери курулсун, бирок азыркыдай эмес, ирээти менен көрктүү, шаардыктарга залакасы тийбегендей болсун, жолдор кенен каралып, келечеги менен пландаштырылсын. Ушулардын айынан бүгүн Бишкекте балдар ойноочу жай эмес,кенен-кесирит жетелеп жүргөнгө болбой калды. Ал эми шаар тургундары мэрдин милдетин бир гана таштанды чыгарат деп түшүнүп алган. Анын башка да милдеттери бар экени тууралуу кабарлары жок. Бир сөз менен айтканда, биз 25 жылда өзгөлөрдү таң калтырчу, кыргыздын жүзүн, маданиятын чагылдырган, улуу эл экенибизди ырастаган бир да ири курулуш жайсай албадык. Муну Феликс Кулов, Аскар Салымбеков, Медетбек Керимкулов, ж.б. мэр аттуунун бири да ойлонбоду. Кыскасы, бардык мэрлер таштанды маселесинин деңгээлинен көтөрүлө албады.
Мэрдин креслосу шаардын кызыкчылыгы эмес, аясый кызыкчылыкка айланганда
Эгер Бишкек шаарына мэр болгон кишилердин бейнесине
үңүлсөң алар шаардыктардын кызыкчылыгына кызмат кылуу эмес, бийликтин кызыкчылыгы үчүн келгени оңой эле байкалат. Кайсы гана бийлик болбосун борбордун мэри бийликтин кишиси болуусу зарыл деген жобо Акаев мезгилинен бери жашап келет. Себеби жалпы республикалык шайлоодо Бишкек шаары тагдыр чечкен ролду ойнойт. Бишкек шаары аркылуу шайлоонун жыйынтыгын каалагандай бурмалап салууга болоору өткөн бийликтердин тушунда далай ырасталган. Ошондуктан да мэрдин кадыр-баркы таштанды чыгаруу, жол оңдоо аркылуу ченелип, борбордун чыныгы кадырбаркы унутта калган. Башкасын айтып курмандын башын айлантпай бир эле шаар ичиндеги коомдук транспортту алалы. Шаардыктар 25 жылдан бери кичи автобустарда тыгылып, башын эңкейтип каттап
келет. Учурда жолдо тыгынды жараткан да кичи автобустар. Сыягы бул чечилгис маселеге айланды. Жайдын аптабында ошол кенедей бустарда биринин колтугун бири жыттап бараткан жүргүнчүлөр шаар мэрине кантип ыраазы болсун? Эгер мэрия шаардыктарды талаптагыдай коомдук транспорт менен камсыз кыла албаса эмне үчүн жеке ишкерлерге чоң автобустарды алып келүүгө уруксат берип, аларга шарт түзүп бербейт. Эгер кичи автобустарга шаар ичинде жүргүнчү ташууга тыюу салып, чоң автобустарга уруксат берсе бул маселе алда качан эле чечилген болот эле. Азыр кыргыз ишкерлеринин арасында автобус эмес самолет атып алам деп акча көтөрүп жүргөндөрү бар. Же болбосо ошол
эле соода комплекстерин, кафе, ресторандарды салган олигархтарга сырткы келбетин улуттук оймочийме, калпак, боз үйдүн элесин чагылдырган, четтен келгендерди таң
калтырчу курулуштарды куруу милдетин жүктөсө болмок. Макул, ошонун ичинде ресторан, супермаркет, оюн залдары ж.б. болсун. Бирок кооз, ары көрктүү, шаардын чырайын чыгарып турсун. Эгер шаарда союз учурунда урулган кыргыз, орус драмтеатрлары, опера-балет, филармония, Тарых музейи сыяктуу имараттар болбогондо Бишкекти кыдырып көрө турган да эч нерсе жок экенин моюнга алуу зарыл.
Азыркысы алгачкылардан айырмаланабы?

Албек Ибраимов мэр болору дайын болгондон баштап бул кишиге коомчулук тарабынан көп деле жылуу сөздөр айтылбады. Алтурсун кээ бир жарандык коомдук өкүлдөрү «мындай шаарды жетектөө жактан даярдыгы жок киши өткөн авторитардык бийликтин тушунда да дайындалган эмес» деген пикир билдиришти. Грамматикалык жактан сабатсыз экени дароо коомчулукка угулду. Буга чейин кайсы жерде иштебесин коррупциялык чуудан арылган эмес экен. Ошого карабай шаар
депутаттары жапырт колдошту. Эми жаңы мэрдин программасына үңүлүп көрөлү. Биринчиси, бюджет саясатын күчөтүү, экинчиси, жолдорду оңдоо, андан ары парктарды көрктөндүрүү, шаарды жасалгалоо. Ошону менен бирге Кулматовдун ишин улантуу. Демек баягы эле таштанды көйгөйү башкы милдет болуп кала берет. Борбордун жетекчисин жалпы шаардыктар шайлоо менен чечсин деген да демилге болду. Бирок ал колдоого алынбады. Балким Бишкектин мэри шаардыктардан башка эч кимге көз каранды болбой дайындалса, шаар ичиндеги бардык коррупциялык схемаларды бузуп, 25 жылдан бери келе жаткан былык иштерди ачыкка чыгарып, шаардыктардын эсебинен жан багып жаткандарды жумуштан айдап чоң өзгөрүү жасайт беле деген ойго кетесиң. Себеби шаардагы башкаруу уюмдардын баары бир схема менен иштеп ошого каныгып бүткөн. Мэр жаңы дайындалганы менен олуттуу реформа жасамайынча эч кандай өзгөрүү болбойт. Бардык райондор акча жок деп шылтоо айтканга маш болуп бүткөн. Эгер Албек Ибраимов бюджет саясатын күчөткүсү келсе таза аардык жүздөгөн чиновниктерди кызматынан айдап, шаарды оңдойм деген таза кишилерден команда түзүүсү зарыл. Бирок буга бекем саясый эрк керек. Буга бир эле Албек Ибраимов эмес убагында Феликс Кулов, Борис Силаев, Аскар Салымбеков, Медетбек Керимкулов, ж.б. ондогон мэрлердин алы жетпей тескерисинче табакташ болууга аргасыз болушкан. Айрыкча менчиктештирүү башталгандан кийин дайындалган Өмүрбек Абакиров, Борис Силаев, Феликс Кулов, Медетбек Керимкулов сыяктуу мэрлердин тушунда не деген мүлктөр менчикке кетпеди. Орун алмашуудан сумма өзгөрбөйт демекчи, шаардыктар азыркы мэрден эмне күтөрү белгисиз. Алдыда президенттик шайлоо жакын. Ошондуктан мэрия жазда көрктөндүрүү, жайда сугаруу менен азыноолак жол оңдоо,
күздө кышка даярдык көрөбүз, салыкты өз убагында төлөгүлө деген көнүмүш чакырыктар менен күн өтө берет. Буга чейин деле ошондой болуп келген. Ал эми Эгемендүү Кыргызстандын ордосу болгон борбордун келечек тагдырын ойлогон улуу демилгелер азырынча чыкпайт шекилди. Бишкек шаары жылдан жылга тарып баратат. Жакында Казакстандын президенти Нурсултан Назарбаев Алматы мэрине акыркы кездеги салынган көп кабатту тамдар шаарга шамалды өткөрбөй, Тоо тараптан согуп турган муздак абаны тосуп жатканын айтып, ал тамдарды сүрүп салууга тапшырма берди. Ал эми Бишкекте шамал кайсы тараптан согот, тамдар кандай тартипте салына турганы боюнча эреже да,тартип да жок.

Келдибек НАЗИРОВ

Булак: “Жаңы Агым”

Экс-депутат Ирина Карамушкинага Свердлов райондук соту депутат Өмүрбек Бабановдун кадырбаркына доо кетирди деп 250 миң сом моралдык айып салса, Ирина айым өкүм чыгарган сот Элвира Жаркеева Конституцияны бузду, Жаркееванын ишин текшертүү керек деп кайра соттун өкүмүн кудум колунда депутаттык мандаты бардай социалдык түйүндөгү өзүнүн баракчасына жазып чыкты.

Себеби мунун да жөнү бар, Карамушкина депутат болуп турганда кызматтык унаасы бир нече жолу кырсыкка кабылып КСДП партиясынан депутат катары мандатын көргөзүп, МАИ кызматкерлерине кызыл күбөлүктү термелтип кайра-кай- ра көрсөткөн. Бирок райондук сот Карамушкинаны канааттандырбаса, ызычуу салбай эле андан аркы шаардык сотко кайрылууну кандайча унутту экен…

Булак: “Жаңы Агым”

Акыркы кез­де бийликтин кадр саясатына коомчулуктун ичи чыкпай жатат. Маселен, Ош облусунун же­текчиси Таалайбек Сарбашев базарда соода-сатык кылып жүрүп аким болду.

Андан түз эле Кыргызстандын эң ири стратегиялык облусуна губернатор болуп келди. Үч жылдык техникумду 10 жылда араң бүткөн адамга Ош облусунун эки тизгин бир чылбырын карматып койгонуна таң калгандар арбын.

Кыргызстандын тарыхында мындай жагдай алгач болуп отурат. Негизи Ош облусунун башына илгертен Султан Ибраимов, Апсамат Масалиев, Абдыганы Эркебаев сыяктуу билимдуу, тажрыйбалуу ишмерлер келишкен.

Кийинки губернатор Сооронбай Жээнбеков деле Жогорку Кеңештин депутаты, министр болуп жүрүп барган. Сарбашев кайдан, кантип,  түндүктөн түшкөнсүп губернатор болуп калды түшүнүп  болбойт. Өзү де­ле “кой уят, деңгээлим” жетпейт дебейби? Кызмат десе эле жанталашып чуркабай, жуурканына карап бут сунуп, мурдуна карап бышкырса жарашмак…

Булак: “Фабула”

Биздин каармандын төшөк жаңыртып, нике тойго баш урганы коомчулуктун кайрадан кызыгуусун жаратып, көпчүлүктүн бүйүрүн кызытууда. Оригиналдуу жүрүш – турушка ээ, ар бир баскан кадамы таңданууну жараткан каарманыбыздын нике тою менен куттуктап, сөз арасында гезит үчүн да кеп козгоп койдук.

-Нурлан аке, куш боо бек болсун! 19 жаштагы секелек жеңебизди кайдан таап алдыңыз? Дегеле экөөңөрдүн ортоңордогу  сүйүүңөрдүн тутанышына эмне түртк болду? Сүлкүлдөгөн далай жигиттер үйлөнө ал бай жүрүшсө, дегеле аялдан жол- дуусуз ээ?

-Рахмат, иним! «Катын кетсе камчы сап, төшөк кай­ра жаңырат» дегендей, азыркы заманда катын алуу деле көйгөй эмес го. Туз, бир калыпта, эркекче зыңкыйып жүрсөң, ичпесең, чекпесең, бутуңа турган болсоң, жаркыраган кеңсең, машина «Джипиң», үстүндө үйүн, бизнесин болсо, намаз окусаң, суутулган күлүктөй болуп спорт ме­нен машыксаң, жүзүңдөн нур жанып турган кубаттуу бол­соц, «илибой» аялзаты имерилет да. Же андай эмеспи?

-Жеңебизди алганча бойдокчулук доордо кийим-кечектериңизди өзүңүз эле жуучу белеңиз?

-Өмүрү кийим жууп, же үй жыйнап көргөн жан эмесмин. Берки аялымдын мойнуна жүктөлгөн да баары. Эркек деген касиетин жоготпоого тийиш.

-Бул жеңебиз өзбек улутунан турбайбы. Башка улутка басым жасап, кан жаңыр­тып, генефондду өзгөртөюн дедиңизби?

-Биринчи аялым казак кызы болчу. Андан АКШ гражданы болуп  төрөлгөн 3 балам бар. Ал эми бул 19 жаштагы узбечка менен сүйүү оту жалындап, алоолонуп эле тутана түштү. Өзүм да түшүнбөй калдым, махабатка мас болуп…

Спорт залга барып, «качок» болуп чыкыйып турсаң, кыздарга жагат окшобойсуңбу. Же атак-даңк, аурам жеңип кеттиби, айтор… Негизи, никебиз декабрь айында эле кыйылган

болчу. Азыр наристе күтүүдөбүз. ЗАГСка арыз берген соң, «элге ачыкка чыгалы» деп чечтик. Анүстүнө, Исламда улутка, урууга бөлүнүү айыпталат.

-Сиздин мүнөзүңүз жайдын күнкү аба-ырайындай бирде бүркөлүп, кээде ачылып турат эмеспи. Ориги­налдуу жүрүш-турушуңуз менен бир  күнү секелек же­ңебиз ачууңузга тийсе колуңуз тийип, чаап-жаскап жибербейсизби? Анын үстүнө спорт менен дагы машыгып алыпсыз…

-Мен эзели аялзатына кол көтөрүп көргөн жан эмесмин. Өзүнө жараша өч алам. Үйгө кеч келсе, эртеси мен да андан 2 саат ашыра кеч келем. Суроо- сопкутсуз кафелеп же подружкалап кетсе, мен да эртеси дал ошентип ойноп кетип, жүрөгүн оорутам. Мындай эрегишүүнү сени сүйүп турган аял- заты көтөрө албай, «кысчу жерин бат эле кысат» да. Үйдөгү погоданы сакташ үчүн деле…

-Элдин баары эле аял алат, спорт менен машыгат. А сиздин аял алып, спорт менен машыкканыңыз коомчулукка дароо ажиотаж жаратат да. Мунун сыры неде?

-Эми-и, спорт менен машыксам, 6 айда эле 30 килограмм майымды ээритип, баякы семиз Мотуев жок, чыкчыйган эле сымбаттуу бирөө туруп калса, далайынын оозу Ошту карап, тебетейи тетири тегеренди да. Ал эми, Исламда 4 аял алууга уруксат. Тээ ата- бабасы мусулман болуп өткөн кыргыз азыр эле каапыр орусту туурап, 1 аялга байланып калганы үчүн менин үйлөнулөрүмө таң  калып жатса керек да. Ал узбечкадан тышкары дагы кыргыз аялым бар. Ии, эмне кылып аласыңар?

Калыгул БЕЙШЕКЕЕВ

Булак: “АЗИЯnews”

Бир күн да мамлекеттик кызматта иштебеген, болгону «Авро­ра» пансионатынын жетекчилик кызматынан өкмөттүн Ысык- Көл облусундагы ыйгарым укуктуу өкүлү катары карьералык жүрүш жасаган Асхат Акибаевден эмнени үмүт кылабыз?

Баса, былтыркы «Көчмөндөр оюнун» уюштурууда мыйзамсыз иштерге жол бергени чынбы? Ал эми «Аврорада» иштеп жүргөндө Акибаев шектүү иштери менен текшерүү-сурактан башы чыкчу эмес эле. Табиятынан бу жигит коммерцияга жакын экенин билебиз. Эми бир облустун кызыкчылы­гын жең ичинен соодага айландырып жибербейби?..

Булак: “АЗИЯnews”

Гезиттин өткөн санында Нарын облусунун ыйгарым өкүлү А.Кайыпов чээнден чыгып эл кыдырып жүргөнүн жаздык эле,басма сөз катчысы Айнура Дүйшөк кызы анын “чээнге кирбегенин”, “жасаган иштерин эч кимге жар салбай эле бүтүрө бере турганын” айтып жооп жазып жибериптир.

Эмне иш бүтүрүп атты экен десек, гүбүрнатыр Кайыпов күүлөнгөн боюнча Жумгал районуна барып, эки күндүн ичинде райондун Түгөл-Сайынан бери түгөл кыдырып, ири долбоорлор тууралуу кыскача, малды дарылоо тууралуу узун кеп салып, ветклиникаларды көбөйткүлө, жакырчылыкты азайткыла дептир.

Дагы карапайым адамдарга орой мамиле жасагандарды онтотом дептир… Дагы бак-дарактарды куураткандарды кууратам дептир…Болду го. Баарын айтсак, мактанып кетпесин. Биз дагы ың-жыңы билинбей кеткенинен Нарындын суугунда чээнге кирип кеткен го десек…Көрсө иштеп эле жаткан турбайбы.

“Жаңы Агым” – пресс

Экс-мэр Кубанычбек Кулматов ушул күндөрү Москвада жүргөнү, ата-энесинин кашында келечек пландарын талкуулап, кеңешип жаткан­дыгы, Бишкекке марттын аягында келээрин биздин кабарчыбызга билдирди.

Айрым маалыматтарда Куба­нычбек Кеңешовичке Кремль лөктөрү азыр да түз көз карашта экендиктери, келечекте бирге иштешүү пландарын кыйытышканы күбүр-шыбыр кеп болуп, желдей тароодо.

Баса, марттын аягында экс- мэр Бишкекке кайтып, мындан аркы пландары менен бөлүшөрү да кабарланды. Бул боюнча маалыматтарды кезеги келгенде да бөлүшмөкчүбүз.

Булак: “АЗИЯnews”

Ушул күндөрү Кочкор районунун акимдик креслону талашуу кызык маанайда уланганы туру. 15-мартта белгиленген район башчысын шайлоо өнөктүгүнө  жалпы 4 талапкер ат салышаары маалым болсо, негизги кармаш 2 талапкердин ортосунда болоору болжолдонууда. Буга дейре райондогу кызарган жердин баарысын  өздүк кишилерине ыйгарып алууну адат кылып алышкан Кочкор кланынын бийликтеги «көзүрлөрү» (Мухаммедкалый Абылгазиев, Дуко мырза, Сапар Исаков) учурдагы акимдин милдетин аткаруучу Нур­лан Керимкуловду сүрөөнгө алышса, өкмөт башчы Темир Сариев Бурканбек Акишов аттуу айылдык кеңештин депутатын туртмелеп жаткандыгы кабарлан- ды. Премьер-министр Темир Сариевден «бата алган» Бурканбек Акишовго парламент депутаты, айтылуу  көпөс Нурлан Макеев каржылык жактан колдоо көрсөтүп жаткандыгы, натыйжада, Букең жергиликтуу кеңештин депутаттарынын тамагын «майлоого» өткөнү каңкууланды. Эми качанкыга чейин бийликтеги Кочкор кланынын өкүлдөрү районго «өз бала» деп эле өкүлдөрүн түртө беришет? Көрдүк го алардын буга чейинки кадрларын. Бул сапар Темир Сариев Кочкорду «менчиктеп» алышкан береги чиновниктерди укпай, өз кадрын дайындап алса, кызык интригалар башталат окшойт. Темике деле оңой жоо эмес да, өзүнө карата моюн толгоп жатышкан берки чиновниктерге жемин жедирбесе керек.

Булак: “АЗИЯnews”

Экс-спикер Ахматбек Келдибековдун башына кара булут айланганы, күтүүсүз камакка алынышы, капастагы кесел, чет өлкөдөн барып дарыланып келиши, соттук териштүүлөрдөн  Чубактын кунундай созулган  сериалга айланган  отурумдары…Айта берсең  баш аягы жоктой эле туйулат.Коррупциянын башын жулуп алабыз деген жалган ураанды көтөртүп койгон экс-баш прокурор  А.Салянова мына ушул арабөк кадамы менен президентке, өзунө, дегеле бийликке Ала-Тоодой рейтинг алып берем деп ойлогунан деле күмөн чоң. Болгону бир “буйрутманы” аткарганы чындыкка жакыныраактай. Бүгүн “буйрутманы” аткарбасаң сага да кылмыш ишин козгоп салышы барып турган иш. Бир сөз менен “оозу кыйшык болсо да шоопурдун баласы сүйлөсүн” Бүттү. Башкача сөз болушу мүмкүн эмес. Бул “мыйзам!”

Экинчиден, мына ушул “кутумдун” башында кимдир бирөө эмес, кадимки “Ата-Мекен” фракциясынын чыгааны Өмүрбек Текебаев турганы бүгүн жашыруун деле эмес. Мына ушул чыгаан тылактай баракка арыз-муңун жазып, кала берсе мөөрүн баспай, колун койбой эле Саляновага кармата салган. Тиги болсо ушуну эле күтүп тургандай, иштин ак-карасына көзү жетпестен эле коррупциялык 303-беренени  көтөрө калып, депутатты ошо жерден басып  жыгылган. “Кылмышы толук далилденди”, деп чоң сот боло койгондо эле баары түйшөлүшкөн. Бу качан эле кылмыш иши башталбай, сот болбой туруп эле баары далилденип калды… негедир баары шекшинип калышкан. Мына ушул күдүк ойлорду таратуу максатында президент өзү расмий түрдө “кары-картаңдардын акчасын сугунуп койуптур” деп айтып кирбедиби… бир же эки эмес, байма-бай айтып турду… Анан сыналгыдан кетти Келдибековдун хан сарайлары, башка-башка байлыктары… Экс-спикердин башынан ылдый  куйулган жугундулар  бүгүн да токтой элек. Чын эле Келдибеков президент жана Салянова  айткандай ири коррупциячыл дөө-шаабы?

Мына ушул соболдорго сот гана жооп бере алмак. Бирок телефондук буйрутмага байланып калган кыргыз соту кара кылды как жара алабы? Маселе ушунда эле. Башынан айтканбыз, жок,баары  бир кара кылды как жара алышпайт, коркушат, чочушат көчүгүндөгү амалдарынан деп. Чынында ошондой эле болду соңунда.

Биринчи Май райсоту жана судья Боромбаев айлап –жылдап, ар бир күбөнүн көрсөтмөлөрүн дапдаана угуп, көзү жетип, иштин ак-карасын так ажыратып  туруп кара кылды как жара алдыбы..? Албетте жок. Буга Боромбаев күнөлүүдеп айта албайбыз. Аны система бурчка такап салган. Ошолордун айтканын кылбаса эле… Түшүнүктүү да. Мыйзамдын чегинен чыга албаса да, баары тигилердин айтканындай болбой  баратканы менен Ак үйдө олтурган “акылмандар” ийненин көзүнөн тешик таап, өтүп кетип жатпайбы. Табышты. Келдибековго тагылган эки айыптын бири-салык боюнча айып боюнча акташып, Маскөө шарында ачылган парламенттин атайын өкүлчүлүгү боюнча  күнөөнү тагышып, “соттолду” дегенин укурукту аста илишип, 3 миллиондук айып жыгып салышты. Эми таап көр айлаңы, сенин чындыгыңын кимге кереги бар дешип… Кала берсе 60 депутаттын көрсөтмөлөрү, башка күбөлөрдүн калыс сөздөрү туулбай жатып өлүккө айлангандыгын чечим чыкканда билдик. Таң деле калбадык. Анткени, баары кудум ушундай болмок.

Кийинки баскыч албетте Бишкек шаардык соту… Соттун курамы үч соттон тургандыктан  балким  ушерде  калыстык таразасы жакшылап иштээр деген үмүткө байлангандар болду.Айып деле баягы: кылмыш жаза кодексинин 30-беренесинин төртүнчү бөлүгү (кылмышка шериктеш болуу), 303-беренесини биринчи бөлүгү (коррупция), 304-беренесинин төртүнчү бөлүгү (кызматтык абалынан кыянаттык менен пайдалануу) боюнча кылмыш иши …

Баягы эле күбөлөр,  депутаттар, башкалар болгонун болгондой айтып турушту. Соттун катчылары тизмелеп жазып жатышты. Кала берсе бу курдайы Текебаев өзү да келип, деле түшүнүксүз көрсөтмөлөрдү балп эткизип, актуалдуулугун жоготту дегендей да бирдемелерди айткандай болду. Көрсө мына ушул көрсөтмө кийинки чечимге түздөн-түз байланышта экендигин даана көрсөтө албадыбы… 60 депутаттын сөзүн жокко чыгарып, жалгыз Текебаевдин сөзүн ынанган сот эски жомокту кайра токушту.

Чынында сотто бирөөбү, үчөөбү, жетөөбү бүгүн айырмасы деле жок. Пири мыйзам эмес бир киши болуп турганда кайдагы адилеттүүлүк да, кайдагы мыйзамдуулук!

Кеңешкени кирип кетип, эки сааттай жоголушкан сотторго али да анча-мынча ишеним артып, балким кара кылды как жарат дегендер да толтура эле. Үмүт да. Бирок, ошондо эле баары дайын болгондугун билгендер да жок эмес болчу.

Экинчиден, өгүз өлбөсүн, араба да сынбасын дегендей жогор жакта “Ким  миллионер?” болот деген ойунду сотторго таңуулап койушу кандайдыр бир жаңылыктай деле болуп калды. Абал курчуп турса, каматып ийсе эл көтөрүлүп чыгышы мүмкүнбү, мүмкүн… Шо сымал тигинтип миллиондогон айыпка жыгып койсоң ким болсо деле алапайын таппай калат эмеспи. Мисалга журналист Дайырбек Орунбековго, Уран Ботобековго 2 миллиондон  илип койгонун жакшы билебиз. Андан кийин Келдибековдо ставканы көтөрүп, үчкө чыгарышкан…

Мына, ал ойун андан ары уланып, эми шаардык сот Воронцованын жана анын эки шеригинин  колдору менен “миллион ойуну” 10 го жетти. Бул деле чек эмес. Алдыда Жогорку сот дегени бар, балким алар андан ары көтөрүп ийишер. Баарын күтсө болот.

Эми биз жалаң сотту гана жемелеп, короосуна котур ташыт ыргыта берген менен, ал деле бүтүндөй чирип  бүткөн системанын бир бурамасы…Баш жактан сасып атса, булар көктөн түшүшкөн эмес да акыры…Ишенип берилген вазийпасын толугу менен аткарышты жана алчу “сыйлыктарын” алышат. Жок дегенде соттук орундарында азырынча олтура беришет…

Ал эми  мына ушундай “шайтан ойундардан “ кийин деле адилеттүүлүккө  терең ишенген экс-спикер Келдибеков жана анын жактоочулары күбөөнаамалырын көтөрүп алышып, эми Жогорку соттон чындыктын эшигин кагып көрүшөт. Бирок, айтчу бир гана сөз бар: баары таптакыр башка жерден эбак чечилип калган. Келдибековдун “ саясий салмагынын өтө жогору болушу, акылынын тунуктугу, эл башында  туруу, элди артынан ээрчите алуу жөндөмү, ааламдашкан кырдаалга сареп салып, башын тоголотушту жакшы билиши, жөнөкөй элдин тилдин таба алышы” сыяктуу көктөн издесең табылгыс касиеттери бүгүнкү бийликке жакмак беле… Анын үстүнө президенттик шайлоо келе жатса, айла канча “галдирбайлар ар дайыма “галдирбайча” ойлонуп келишкен жана ойлоно да беришет. Жолдун туюк же түз экендигин  көрө да алышпайт. Аларга эптеп эле кайсыл бир жол болсо болгону…

Демек, Келдибековго  бүгүн бийлик эч кандай мүмкүнчүлүктү бербейт. Ойлоп да койбойт. Аларды кыргыз элинин эртеңи башкасы кызыктырбайт.  Атамбайчылык, икрамчылык жана анча мынча темирчилик жуурулушуп тарыхтын бир  бүктөмүндө унутулуп калып кетээрин гана эске алышпай жатышат. Кудум эле дүйнөнүн устуну болгондой ары-бери чаап жүрүшөт ооздорунан “миллиону“ түшпөй. .Качанга чейин? Эми бул таптакыр башка маселе…

Калдарбек Шерматов

Бүгүн, 14-мартта Жалал-Абад шаарында митинг  өтүү алдында турат. Ага бир катар оппозиция өкүлдөрү катышуу үчүн аталган шаарга кечээ барышкан. “Эгемен Кыргызстан” саясий партиясынын лидери, оппозициялык маанайды тутунган саясатчы Бектур Асановдун “Саясат.kgге” билдиришине караганда, жергиликтүү бийлик митингди болтурбоонун айла-амалын жасап баштады.

Саясатчынын айтымында, Жол кайгуул кызматынын кызматкерлери оппозиция өкүлдөрүнүн унааларын токтотушуп,  ар кандай терс көрүнүштөрдөн улам шаарда көзөмөл күчөтүлүп, паспорт текшерүү болуп атканын айтып, кармап атышат.

“Жергиликтүү эл көзү менен көрүп тургандыктан, бийликтин мындай жоругуна нааразы болушууда. Жер-жерлерден телефон чалган адамдардын катары көбөйдү. Алар: “Биз бүгүн эле облустук администрацияны басып алабыз”, -дешти. Мен күч менен токтотуп турам. Биз эртең, эч кандай мыйзам бузууга барбайбыз. Мыйзам чегинде демократиянын эрежесине ылайык, топтолуп, бийликтин айрым аракеттерине нааразычылык гана билдиребиз. Элдин маанайын көргөн бийлик балким калкка ооручулук келтирчү аракеттеринен баш тартар деген гана ниет”, – дейт Бектур Асанов.

Эске салсак, оппозициялык күчтөр тарабынан уюштурулуп аткан митинг эртең, 14-мартта, Талас жергесинде, Жалал-Абад шаарында жана Аксы районунда болот. Бул митингди Улуттук оппозициялык кыймылы да колдоого алаарын билдирген.

Бул тууралуу КСДП фракциясынын жыйынында депутат Төрөбай Зулпукаров билдирди. Айтымында, өкмөт башчы Жогорку Кеңештин көпчүлүк коалициясына жасаган иштери боюнча маалымдама берет.

Маалыматка ылайык, Темир Сариев көпчүлүк коалициянын 14-мартта саат 16:00дө боло турчу жыйынына катышат.

Белгилей кетсек, парламенттик көпчулүк коалициясына КСДП, “Кыргызстан”, “Өнүгүү-Прогресс”, “Ата Мекен” фракциялары кирет.

АЙТЫҢЫЗЧЫ?..
“..передачасын көргөн сайын ..Эрнис сага дайыма ыраазы болом да, уялбай барып туалетине чейин барып киресиң, көргөзөсүң, чын эле позор да.. Силердин (өкмөттүн) атыңардан Эрниске белек берейинчи бир,.. ичинде камчысы бар, жанакыдайларды камчы менен чапсын дагы..”.
(премьер-министр Алмазбек Атамбаев, 2007-жыл)
****
…Курманбек Бакиевдин буйругу менен дайындалган премьер-министр Алмазбек Атамбаев 2007-жылы менин КТРдеги “Багыт” автордук көрсөтүүмдө козголгон туризм, Ысык-Көлдүн жол боюндагы дааратканалардын абалы боюнча темадан кийин өкмөттүк чогулуштардын бирине мени чакырып, ыраазылык айтып, чын дилден алкап камчы белекке берген эле, “камчылап тур..” деп. Ошонку премьер министр Алмаз Шаршеновичтин илгерки өтүнүчү ар убак эсимде, такай камчылабасам да, кээ-кээде ошол аманатты эстеп, а киши президентке айланганда да колдон келишинче камчылап коюп келе жатам. Алмаз Шаршенович “..дайыма ыраазы болуп көрчү Багыт передачасы” ырас азыр эч бир телеканалдан чыкпаганы менен, Сүкөрбергдин Фейсбугу аркылуу камчы-салам узатып коюп турам. Бул жолку камчылоом да өзүңүз белекке берген камчынын деми менен жазылды урматтуу Президент, анда баштадык…
Айтыңызчы, урматтуу президент..
1). Акаев менен Бакиев кескин, батыл реформаларды жасай алышкан жок дешет. Парламентаризм терисин жамынган азыркы президентчил бийлик келечек муундар көп жылдар бою айта жүрчү көзгө жарк этип көрүнгөн олуттуу, уникалдуу кандай реформа жасады, манжалап санап айтыңызчы?
2). Мурунку президенттер бийликтин баарын бир колго топтоп алган авторитарлар катары мүнөздөлүп келет, азыркы өкмөттүн, парламенттин, соттордун куурчак ойноткуч жиптери сиз – президент Алмазбек Шаршеновичтин колунда болбосо кимде, айтыңызчы?
3). Акайып, Бакийип режимдерде көз каранды сот, көз каранды өкмөт, көз каранды парламент болгон экен,.. а азыр өкмөт, парламент, сот Атамбаевден көз карандысыз, өз алдынча иш алып барып жатышабы, айтыңызчы?
4). “Алга Кыргызстан”, “Ак жол” деген бийликке ляппай деген партиялар жашап өткөн экен илгери, а азыркы КСДП жана бийликтин батасын алып парламенттик орун алган көз каранды партиялары бар Жогорку кенеш мурунку режимдердеги кол жоолук партиялардын эмне айырмасы бар, айтыңызчы?
5). Мурункулар чече албай келген: Кумтөр, Энергетика-тарифтер, Мегаком, чек ара, сот реформасы сыяктуу маселелерди бүгүнкү Атамбаевдик бийлик чече алдыбы, чечсе кантип чечти, айтыңызчы?
6). Мейли Атамбаевди аялы башкарбайт экен, мейли Семетей, Сейтек деген уулдары, күйөө баласы саясатка кийлигишпей өзүнүн таланттарына жараша оокат кылып атышкан имиш, анда мурунку айдоочусу Икрам Илмиянов, мурунку жан сакчысы Мамбеталиев, УКМК башчысы Абдил Сегизбаев, кенешчиси Фарид Ниязовдор кимдердин ролун аткарып жатышат, айтыңызчы?
7) Акаевдик, Бакиевдик кадр саясатынан Атамбаевдин кадр саясаты идеалдуу болуп кеттиби? Европадагы, Батыштагы атактуу Оксфорд, Кембридж сыяктуу окуу жайларды бүткөн, ар кайсы мамлекеттерде иштеп тажрыйба топтогон жаңы, жаш, таза кадрлар ак үй, көк үйдө иштеп жатабы, айтыңызчы?
8). Атамбаев оппозицияда кезинде КТРди эле сындап, “туура эмес көрсөтөт” дечү эле, азыр коомдук деген көз боёмой күрмөнү жамынган КТРК башкача болуп, президенттин да, өкмөтүн да, башкасын да агы-көгүнө карабай сындаган, ачык, түз айткан, ак үйгө көз каранды эмес каналга айланып кеттиби, айтыңызчы?
9). Убактылуу өкмөт учурунда банк ячейкаларынын акчалар, алтындар сырдуу жоголгонун, Батукаевдин көз көрүнөө качырылышын, Оштогу Мырзакматовду атайылап жыдытыш үчүн өткөрүлгөн мэр шайлоонун бетпак мүнөзүн, бийликтин тымызын өкүмзордугу менен Омбудсмен шайлоо өнөктүгү өтө ыплас өткөнүн моюнга алып – учурдагы бийлик өз абийири үчүн жок дегенде уялабы, айтыңызчы?
10). Атамбаевчил бийлик алгач бийликке отурган жылдары “иштейли десек акайыпчылар, бакийичилер жолтоо болуп атат..” дегенсип күңк-мыңк этип атты эле, азыр ошол Акайып, Бакийип деген “желмогуздар” жок, бүтүндөй бийликти топтоп алган Атамбаевдин колунда азыр баары бар – соттор, өкмөт, парламент, күч органдары, УКМК,.. канакей реформа? Реформа болбосо да кур дегенде элдин аң сезиминде “ушулар бирдеме жасай алат окшойт..” деген үмүт жарата алдыбы, ачык айтыңызчы?
урматтоо менен, сиз бир кезде “ыраазы болуп, передачасын улам көргөн” журналист
Эрнис Кыязов.