АКШнын Калифорния штатында жайгашкан Google компаниясынын кеңсесинде кыргыздын боз үйү тигилди. Бул тууралуу аталган компанияда иштеген мекендешибиз Тилек Мамутов өзүнүн фейсбуктагы баракчасында билдирди. Анын айтымында боз үй атайын конокторду кабыл алуучу бөлмө катары колдонулат.

Бүгүн, 27-июнда журналист Дайырбек Орунбеков президент Алмаз Атамбаевдин моралдык чыгымын калыбына келтирүүчү каражат катары 200 сом акчаны анын эсебине которду. Бул тууралуу журналист Орунбеков ѳзү билдирди.

Эскерте кетсек, журналист Дайырбек Орунбеков 2010-жылдагы Ош кандуу коогалаңына Убактылуу ѳкмѳттү айыптап, анын катарында Атамбаевдин атын да атаган. Президент журналистти кадыр-баркыма шек келтирди, Ош коогалаңына жоопкерчилигим жок деп сотко берип 2 000 000 сом доо утуп алган. Аталган доону тѳлѳѳнүн башы катары Орунбеков бүгүн Атамбаевге 200 сом ѳлчѳмүндѳ акчаны банк аркылуу которду.

Булак: Кyrgyztoday.kg

Жогорку Кеӊештин бюджет жана финансы боюнча комитети “Жалал-Абад областындагы Токтогул районунун жана Кара-Көл шаарынын Жазыкечүү айылынын аймагында Токтогул ГЭСин жана суу сактагычын курууда келтирилген зыяндарды компенсациялоо жөнүндө” мыйзам долбоорун дароо эле үч окууда жактырды. Бул тууралуу ЖКнын басма сөз кызматы билдирди.

Өкмөт мыйзам долбоору аркылуу Токтогул ГЭСин жана суу сактагычын курууда келтирилген зыяндардын ордун толтуруу максатында түзүлгөн Токтогул районунун атайын фондун 70 млн сомго чейин көбөйтүү демилгесин көтөрүүдө. Буга чейин атайын фондун жылдык каражаты 43 млн сом өлчөмүндө болгон.

Жыйын жүрүшүндө жакшы ниет менен ачылган Токтогул районунун атайын фонду түзүлгөндөн бери чыр-чатактан арылбай келатканы, жергиликтүү тургундар анын ишине нааразы экени, 9 кылмыш иши козголгону белгиленди. Жыйынтыгында комитет мүчөлөрү Токтогул районунун акими менен атайын фонддун жетекчилигинин отчетун угуу чечимине келишти.

Жакында эле интернетте чоң чууга айланган Аламүдүн районундагы ит атаарлардын иши коомчулукта бир катар суроолорду жараткан. Алардын эң эле кооптусу – “атылган иттердин эттери кайда кетип жатат?” дегени болду. Бул суроого ушул күнгө чейин аталган иш-чарага катышкандар так жооп бере албай убара болушууда.

Видео: НТС

Бишкек шаарынын Ленин райондук сотунда Кыргыз Республикасынын КЖКсынын 247-ст.(Баңги каражаттарын, психотроптук заттарды, алардын окшошторун же прекурсорлорду башкага берүү максатында мыйзамсыз даярдоо, сатып алуу, сактоо, ташуу, жөнөтүү, ага тете эле мыйзамсыз өндүрүү же берүү) 2-6. 1-п, 3-б. 4-п менен айыпталган Мирабдуллаев Асаттулло Убайдиллаевичтин кылмыш иши каралууда. Бул тууралу КР Жогорку Сотунун басма сөз кызматы билдирет.

Алдын-ала тергөө органы тарабынан Мирабдуллаев Асатулло Убайдуллаевич 2014-жылдын 4-ноябрында Бишкек шаарынын Абакан көчөсүнүн жанынан салмагы 15 кг. 590 гр. баңги заты менен кармалган деп КР КЖКсынын 247-ст. 2-б. 1-п. 3-б. 4-п. менен айыпталып сотко берилген.

Аталган кылмыш иши Ленин райондук сотунун судьясынын өндүрүшүндө болуп, жактоочу төрагалык кылуучуга баш тартуу келтирген жана баш тартуу канааттандырылып, кылмыш иши башка судьяга берилген.

Кылмыш иши боюнча бардык күбөлөр, күбө-калыстар суралып, 1 күбөнү сотко камсыздоо мүмкүн болбогондуктан анын көрсөтмөсү жарыяланган.

Соттолуучунун жактоочусунун өтүнүчү боюнча кылмыш иши боюнча буюм далили 15 кг. 590 гр. баңги заты соттук териштирүүдө изилденди.

Соттолуучунун жактоочусу өтүнүч келтирип, анда баңги заттарына карата комиссиялык соттук-химиялык экспертиза дайындоону өтүнгөн жана Ленин райондук сотунун 17.06.2016-ж. токтому менен жактоочунун комиссиялык соттук-химиялык экспертиза дайындоо тууралуу өтүнүчү канааттандыруусуз калтырылган.

Жактоочу ушул эле күнү төрагалык кылуучуга карата баш тартуу келтирген.

Ленин райондук сотунун 17.06.2016-ж. токтому менен жактоочунун баш тартуусу канааттандыруусуз калтырылып, кабыл алынган сот актыларына иш боюнча биротоло чечимге даттануу менен бир эле учурда апелляциялык тартипте даттануу укуктары түшүндүрүлгөн.

Жумуш убактысы бүткөндүгүнө байланыштуу соттук териштирүү 24.06.2016-ж. саат 15-00го калтырылган.

24.06.2016-ж. саат 15-00го калтырылган соттук териштирүүгө жактоочу ооруп жаткандыгын билдирип келген жок.

Соттук териштирүүгө жактоочу келбегендиктен сот процесси 05.07.2016-ж. саат 10-00го калтырылган.

Бүгүн Жогорку Кеӊештин бюджет жана финансы боюнча комитети өкмөттүн республикалык бюджетине өзгөртүү киргизип, Балыкчы – Корумду автожолунун курулушуна кошумча 1 млрд сом өлчөмүндө каражат кароо сунушун жактырды. Бул тууралуу ЖКнын басма сөз кызматы билдирди.

Ошондой эле тармактык комитет жергиликтүү жолдорду калыбына келтирүү багытында бюджеттен 10 млн сом өлчөмүндө каражат кароо чечимине келди.

7-апрель окуялары боюнча сот процесси 20-июлга жылдырылды. Бул тууралуу Жогоку соттун басма сөз кызматы билдирди.

Маалыматка караганда бүгүнкү сот процесси Курманбек Бакиевдин, Жаныш Бакиевдин, Мурат Суталиновдун жана Данияр Үсөновдун адвокаттарынын жоктугуна байланыштуу 20-июлга жылдырылды. Себеби, КР ЖПКнын 46-беренесине ылайык өзгөчө оор кылмыштар менен айыпталгандарга карата сот отуруму сөзсүз адвокаттын катышуусунда каралышы керек.

Жогорку Кеӊештин агрардык саясат, суу ресурстары, экология жана регионалдык өнүктүрүү боюнча комитет премьер-министр тарабынан Айыл чарба, тамак-аш өнөр жайы жана мелиорация министри кызмат ордуна сунуш кылынган Турдуназир Бекбоевдин талапкерлигин жактырды. Бул тууралуу ЖКнын басма сөз кызматы билдирди.

Биринчи вице-премьер-министр Мухаметткалый Абулгазиев жаӊы талапкер буга чейин Айыл чарба жана мелиорация министри болуп иштеп келгенин, Айыл чарба, тамак-аш өнөр жайы жана мелиорация министрлиги болуп кайра түзүлгөнүнө байланыштуу анын жетекчилигине Турдуназир Бекбоевдин талапкерлиги көрсөтүлүп жатканын билдирди.

Тармактык комитеттин төрагасы Мирлан Бакиров Турдуназир Бекбоев аталган министрликте иштеген учурда айыл чараба тармагын жөнгө салууга көп аракет жасаганын, анын жаӊы кызмат ордунда да башталган демилгелерди уланта турганына ишеним артарын белгилеп, комитет мүчөлөрүнүн атынан анын ишинде ийгиликтерди каалады.

Эске салсак, 2016-жылдын 22-июнунда Жогорку Кеӊеш премьер-министрдин сунушу боюнча өкмөттүн түзүмүн өзгөртүү жөнүндө токтом кабыл алган.

Оо бир боорлорум! Ондогон кылымдарды карытып, далай бороон-чапкындуу, кайгы-муңдуу кырларды ашып, өзүнүн КЫРГЫЗ — деген аты-заты үчүн көптөгөн кандуу кармаштарда кан кечип, КЫРГЫЗ экендигин далилдеп келген кыргыз калкымдын, эң бир оор, жүрөктөн өтүп, жүлүнгө жеткен каргышы бар! Ал – «АТЫҢ ӨЧКҮР!» … Эмне урматтуу менин «инилерим», өзүңөрдүн КЫРГЫЗ деген ысымыңарды өзүңөр, өз колуңар менен муунтуп, жок кылганы жатасыңарбы? Эсиңер барда этегиңерди жапкыла! Ансыз деле ар кайсыл улуттарга аралашып отуруп, ашмалтайыбыз чыгып бара жатат! Ата-бабаларыбыздын каргышына калбайлы! Ушунчаңарда айткан сөзүңөрдөн кайткыла инилерим! Ылайым АТЫҢАР ӨЧПӨСҮН инилерим, КЫРГЫЗЫМ! … Ойлон КЫРГЫЗ. Ойгон КЫРГЫЗ! КЫРГЫЗ – деген атыңды сактап кал КЫРГЫЗ! Ал сенин гана колуңда…

Мурат Жетимишбаев, мурунку “Ак жол”, азыркы “Өнүгүү-Прогресс” партиясынын Ысык-Көл” облусундагы өкүлү

Жогорку Кеңештин бюджет жана финансы боюнча комитетинин отурумунда айыл чарба жана мелиорация министринин орун басары Жаныбек Керималиевди депутаттар жыйындан чыгарып ийишти. Алгач бир канча жолу эскертүү берилгенине карабай Керималиев сөз талаша бергени эл өкүлдөрүнө жакпай калды.

“Сиз мурдагы жыйындарда дагы өзүңүз каалаган учурда микрафонду жандырып сүйлөп жаттыңыз эле. Бул жолу да сизге эч ким сөз бербегенине карабай ошонуңузду кайталап жатасыз. Тартипке баш ийбесеңиз залдан чыгып кетиңиз. Мындай кылыктарыңызды өзүңүздүн министрликте кыласыз”, – деди комитет төрагасы Аскар Шадиев.

https://youtu.be/L4lYgYeNiLk

Видео: Кabarlar

Кыргызстандын экс-президенти Курманбек Бакиев 24-июлда Москва шаарында жашап, иштеген кыргыз мигранттарына ооз ачырып чогултуп, сый тамак уюштурду. Бул тууралуу Москва шаарындагы мигранттар кабарлады.

Оз ачуу кечесине Курманбек Бакиевдин иниси Асылбек Салиев келип, экс-президеттин куттуктоосун айтып, чогулган элге куттуктоо сѳзүн билдирип, ыйык Рамазан айында тилеген аруу максаттар ишке ашсын деди.

200дѳн ашык мекендештердин арасында Бауман атындагы кафедранын доценти Маматжан Акжолов, Кыргызстадын Оруссиядагы мурдагы элчиси Раимкул Аттокуров, “Ала Тоо”  коомунун жетекчиси Жамилия Бегиева жана Орусиянын баатыры  Марат Исаевдер келишти.

Булак: maalymat.kg

Премьер-министр Сооронбай Жээнбеков Кытайдын Тяньцзинь шаарына барды. Бул тууралуу өкмөттүн маалымат кызматы билдирди.

Өкмөт башчы 27-28-июнда өтүүчү «Жайкы Давос-2016» Дүйнөлүк экономикалык форумунун онунчу – юбилейлик жыйынына катышат. Аталган форумундун алкагында Жээнбековдун КЭР Мамлекеттик кеңешинин премьери Ли Кэцян жана Дүйнөлүк экономикалык форумдун президенти, профессор Клаус Шваб менен эки тараптуу жолугушуусу пландаштырылган.

«Жайкы Давос-2016» экономикалык форумунун кеңешмеси дүйнөлүк 90 мамлекеттин делегациясынын катышуусунда «Төртүнчү өнөр-жай революциясы жана анын өзгөртүүчү таасири» аталышында өтөт.

Эскерте кетсек, «Жайкы Давос-2016» Дүйнөлүк экономикалык форуму алгач ирет 2007-жылы сентябрь айында Кытайдын Ляонин провинциясынын Далянь шаарында өткөн.

– Тимур мырза, коомчулукту катуу ойго салган суроодон баштасак, эмнеге Кыргызстан профсоюздар федерациясында ушак жана ызы-чуулар көп?

– Улуу Орозо айында жаман-жакшы айтышкым келген жок эле. Өзгөчө Кыргызстан профсоюздар федерациясында иштеген адамдар менен. Алардын кетирген кемчиликтерин түшүнүп, кечирим сурап келишкендеринен кечиргем. Пендечилик ар бир адамда бар эмеспи. Бирок, эмнегедир ошол адамдар улуу Рамазан айында кайым-айтышты токтоткондун ордуна, ынтымакка келүүгө шарт түзүлүп турганын түшүнбөй, тескерисинче, баарын ырбатып, кайра далилсиз каралоо-жамандоо жолуна түшүп алышыптыр. Эми эки жүздүүлүктүн деле чеги болсо керек. Мен жана мени менен бир мезгилде иштешкен абройлуу, коомдо салмактуу орду бар жетекчи жөнүндө дагы далилсиз, жалган айтып, ушак таратып жүрүп калышыптыр. Ошол жердеги акылы бар, бирок, эси жок, ак сакалы бар, бирок, уяты жок адамдар дагы ушак ташып, токтоно алышпай, оңго-солго жамандап жүрүшөт. Мындайда, айла жок жооп узатканга туура келет экен. Коомчулук көйгөйлүү жагдайды туура түшүнүш үчүн өзүмдүн дагы оюмду ачык эле (сыпайы эмес) айтайын. Учурунда Кыргызстан профсоюздар федерациясынын мурунку төрагасы менен тыгыз иштешкем. Мактагандай болбоюн, бирок, аны калыстык үчүн айта турган мезгил келди. Мен дайым жакшыны-жакшы, жаманды-жаман деп жүрөм. Ал киши келечекти түшүнгөн, профсоюз уюмун кандай кылып, кайсыл багыт менен өнүктүрүш керек экенин обьективтүү түшүнчү. Анткени, ал башка өлкөлөрдүн профсоюздарынын ишмердүүлүгүн жана алардын деңгээлин ичинен көрүп, биздин дагы профсоюздар ошондой туруктуу, тайманбас, камкордуу, заманбап, ыкчамдуу жана ынтымактуу болуусун кыялданчы. Ошол ойлордун көбү болбосо да алар четинен ишке аша баштаган болчу. Тилекке каршы, былтыр эмгекчилердин акчасына көз арткан КПФын башкы эсепчиси кассага кол салып, акчаны уурдап кеткен. Бул кылмыш иши экс-төраганын жылдап чогулткан аброюн аштай төгүп сала жаздады. Калыстык бар экен, көз-карандысыз 2-3 иликтөөлөр жүрүп (ИИМ, прокуратуранын, каржы полициянын), А.Токтогуловтун ал ишке тиешеси эч кандай жок экенин толугу менен далилденген. Тескериче, мурунку башкы эсепчинин күнөөсү толук далилденип, ал соттон 10 жылга эркинен ажыратылып, учурда абакта отурат. КПФын экс-төрагасынын өз убактысында жанынан айланчыктап чыкпай, тегерегинен кетпей, сакалдарын саксайтып жүргөн “аксакалдар”, алыстан келип учурашкан адамдар артынан бычак сайып, сатып кетишти. Алардын дооматы “ичти-жеди, алды-жутту, бөлүштү-алышты” деген болду. Көрсө, ал доомат ордунан оодаруу үчүн жөн эле себеп болуптур.

Көпчүлүгү ак менен караны айырмалай алышпай, убактылуу нерселерге кызыгышып, “маданияттуу айдамалар” тыйын-тыпырга жана кызматтык орунга соодалашып-сатылышып, аксаган койлордой болуп, башкалардын артынан ээрчип кеткен иш бул “көксакалдар” менен аксакалдардын ишиби? Алар айткандай боло турган болсо, мурунку төрага мыйзам алдында толугу менен жооп берет эле, бирок, эч нерсе жок болсо дагы, токойдон адашып келген адамдын коштоочулары жумурткадан кыр издегенин токтотпой жатышат. Мындай иштерди жигиттер кылбайт! Бирок, профсоюздагы “аксакал” сөрөй адамдар кылат экен. Өз мезгилинде мурунку КПФын төрагасына деле бир топ сындуу ойлорду айтчымын. Ал кишинин азыркылардан артыкчылыгы, жетекчи катары сынды көтөрө алган. Анткени, андай сындар иштин кызыкчылыгы үчүн болчу. Көбү менен макул болгон, өзгөрүү керек экенин түшүнгөн, болгону тегерегиндеги адамдар бут тоскон үчүн убактысы тар болуп, үлгүрбөй калды. Акыры, тегерегиндегилердин көбү санаалаш, тилектеш эмес экенин түшүнүп, алар менен иштешүү мүмкүн эмес экенин билип, өз каалоосу менен арыз жазып, кетип калды. Өз каалоосу менен кеткен адамды дагы баалаш керек. Баары эле андай кадамга бара албайт. Андайга эрктүү, мырзалык сапаттарга ээ болгон адам барат. Кызматка жармашпай кеткен адамды дагы сыйлоо керек. Анткендин ордуна, кайра жанын койбой каралап, ар кайсыл кишилерге тиешеси бар деп баракчаларды профсоюздарда таратып, жамандап жүрүшөт. Ушундай иштерди туура эмес деп эсептейм.

– Ошондо, учурдагы профсоюздар федерациясынын жетекчилиги деле популисттик сындоо, доомат менен кызматка келген болсо, айткан убадаларын аткара алдыбы?

– “Адамды сөзүнөн тааныбайт — ишинен тааныйт” дейт эмеспи. Башында кандай адамдар турса, ал адамдардын максаты жеке кызыкчылыктары үстөмдүк кылса, ошого жараша иштер болот турбайбы. Учурдагы жетекчилик жаңыча (анын ичинде КПФы төрагасы, анын орун басарлары, кеңешчилери, анын артында турган “абышка-кемпирлердин”), замандын талабына шайкеш келе турган, 180 градуска бурулуп, мыкты иштерди кылганга каалоосу жок. Атүгүл алардын ал боюнча ою да жок. Кыскасы, алардын дээринде жок турбайбы. Убагында ошол профсоюздук аксакал сөрөйлөр жогоруда айткан кишинин кеткенден кийин кубанышып, шарактап шарап ичишип, “шайлоо” кылымыш этип жатканда, катуу кыйкырып жүрүштү эле – “реформа эле, реформа кылабыз” деп. Кана ошол реформалар? Ал реформалардын көлөкөсү эмес, керек болсо жыты дагы жок. Алар ошол айтылган реформаларды эзели кылбайт. Себеби, алар аны кыла албайт. Мына ушул сындуу сөздөрдү беттерине айтсам, мени баардык жерде, түшүнбөгөн адамдарга жамандап жүрүшөт. Профсоюздук “аксакалдарга” айтайын, мен антип каралоодон жана баракча (листовка) тараткандан эч нерсе болбойм, себеби, чындык мен тарапта. Бул “реформаторлордун” бир эле кызыкчылыгы бар – ал профсоюздардын мүлкү, акча бөлүштүрүүнүн бир топ “мыйзамдуу” жолдорун өздөштүрүп, схемаларды түзүп алышкан. Ошол үчүн профсоюздар федерациясында тырышып жүрүшөт. Себеби, ал уюмда жеңил-желпи акча табуунун жолдору көп. Жандары кыйналбайт, ысык-суукта базарда турушпайт, чаң талаада кетмен чаппайт, курулушта оор кыш көтөрбөйт, белдери оорубайт, колдору жоорубайт. Булар бир реформаны кылышты, бетке айткандарга кысым-басымдарды көрсөтүштү, укук коргогондун ордуна, тескерисинче, укуктарды кордошту. Анан кайдагы өзгөрүү болмок эле өзүлөрү бузуку болсо? Ушундай нерселерди ачык айткан үчүн мени жана башка адамдарды жамандап жүрүшөт.

– Май айынын аягында сиз жана сиздин тарапташтар Кыргызстан профсоюздар федерациясынын алдында акция өткөрдүңөр. Эмне себептен көчөгө чыктыңар? Ойду башкача айтуунун жолу жок беле?

– Ооба, мен жана мени менен болгон тилектеш адамдар, өзгөчө жаштар митинге чыгышты. Антип чыкканыбыздын себеби, “коомчулук Кыргызстан профсоюздар федерациясынын ичиндеги былыктар жөнүндө уксун, билсин” дегенбиз. Биздин негизги ураан – “Профсоюздар Абдрахмановсуз” деген болчу. Ага жогоруда айтылган ойлор негиз болгон. “Балык башынан сасыйт” эмеспи, башында кандай адам болсо, чоң уюмдун иши да ошондой болот. Ал киши жана анын командасы өзгөрүүлөрдү каалабайт. Азыркы КПФын жетекчиси профсоюздук кыймылдын трагедиясы болот. Кесиптик бирликтерди акыры жок кылат. Ошону билип, түшүнгөн  үчүн, биз ачык эле көчөгө чыгып айттык, бул дагы позицияны билдирүү формасы, демократиялык өлкөлөрдө митинг, пикеттер өткөрүлө берет, мунун жаман эч нерсеси жок. Митинге чыкканга чейин бир топ жолу КПФ жетекчисине бетме-бет жолугушууларды сунуштагам, түз эфирге чыгууну дагы айткам. Бирок, тилекке каршы, андайга барышпады. Болгону митинг өткөндөн соң, түз эфирге (радиого) Жанадил Абдрахманов өзүнүн жашыраак орун басарын жөнөттү. Ал жерден аны мен муундаш болгон үчүн эле көп сын айтпадым. Анткени, суроолордун баардыгы түздөн-түз Жанадил Абдрахмановго даректелген болчу. Бирок, ал киши адаттагыдай коркуп, бетме-бет түз эфирден сүйлөшүүдөн шылтоолоп качты. Арты таза адам түз эфирден баш тартабы? Менимче, качпайт, тескериче, каалайт элдин алдына чыгып атаандашына каршы аргумент айтканга. Бирок, булар андай шарттан коркушат, себеби, колдорунда каршы аргументтери жок. Тек гана тымызын көшөгөнүн артында жатып алып, иштерди кылганга көнүп калышкан жана курч суроолордон чочулашат. Мурунку жетекчилик ММКлар менен баарлашууга кызыктар эле. Ар түрдүү сын-пикир, суроолор болсо да жооп берчи. Түз эфирге чыгыштан эч чочулачы эмес. Өткөн түз эфирге чалынган 99% телефон чалуулары сын-пикирлүү болду. Бир дагы адам “профсоюздар алгылыктуу иштери аткарып жатышат, баары жакшы” деп айтышкан жок. Тескерисинче, нааразычылыгын абдан билдиришти. Ошентип, айтып жатышса дагы азыркы жетекчилик эч нерсе болбой отурушат.

– Тимур мырза, сындаган жеңил иш кылганга караганда. Сизде сындоодон тышкары башка ойлоруңуз барбы? Профсоюздарды эмне кылыш керек? Деги эле азыркыдай профсоюздардын кереги барбы Кыргызстанга?

– Албетте, бар. Жөн эле курулай сөздөрдөн мен алысмын. Сындаган соң дароо альтернативалык багытты сунушташ керек, мен аны туура түшүнөм. Жеке менде профсоюздар боюнча аларды мыкты деңгээл болбосо дагы карапайым элди канааттандыруучу деңгээлге чыгара турган боюнча ойлор көп. Мени сындаган да адамдар болду митингде, “мурун эмне ал ойлорду айткан жоксуң?” деп. Улуу айда калп айткан болбойт жана учурунда бир топ сунуштарды, арасында сындуу ойлорду дагы айтып жүрчүмүн. Мен КПФ иштерине аралашып жүрүп, бир нерсени түшүндүм. Чыныгы реформа кылыш үчүн радикалдуу жолго түшүш керек. Андан башка жол жок. Себеби, учурдагы профсоюздук жетекчилердин көбү (баары эмес, арасында дагы бар дурусураак иш кылган, булар: жаштар, соода, билим-илим, тоо-кен, коммуналдык чарбадагы жана авиация кызматкерлеринин тармактык профсоюздары) ойлойт “азыркы мезгилдеги профсоюздук көйгөйлөрдүн башатында турган Саралаев жана Токтогулов үчүн” деп. Же анын артындагы (баракчаларга ошентип жазышыптыр Асанакунов деген кишини), ал кишини мен тааныбайм жана көргөн эмесмин. Ысык-Көл облусунун губернатору болгонун дагы эми билдим. Менимче, бул баягы эле жамандоонун бир элементи, бөйрөктөн-шыйрак чыгармай адат болуп калыптыр. Дагы бир жолу баса белгилеп айтайын, учурдагы КПФ көйгөйлөрү Саралаев, Токтогулов же мен билбеген, жармаштырган Асанакунов үчүн эмес, маселе менде же башкада эмес, маселенин баардыгы өзүлөрүндө, алардын иш кылбаганында. Мейли, “бириң өлүп, бириң кал” деп кол шилтеп, жеке иштеримди кыла берейин (Кудайга шүгүр кылып эле жатам), бирок, эртең же бүрсүгүнү дагы мага окшогон, алардын былык иштерине иренжиген, тике айткан киши сөзсүз чыгат. Анда алар эмне кылышат? Кайра эле аны жамандап жатып калышат. “Пожарный метод” маселени чечпейт. Көйгөйдү түп-тамыры менен радикалдуу жол аркылуу чечүү керек. Антпесе, азыр кандай болсо, профсоюздар эртең деле ошол бойдон кала берет. Эми сөздүн соңунда, мен силердин гезит аркылуу катардагы профсоюз мүчөлөрүнө жана коомчулукка кайрылат элем, ушундай профсоюздар федерациясынан тажаган жоксуңарбы? Келгиле, жалпылап маселени кабыргасы менен коелу? Мындай профсоюздар федерациясы карапайым элге кереги барбы деги? Себеби, бул паразиттик уюм болуп калды го? Карапайым калктын эсебинен жашаган, мындан ары дагы ушундай жат көрүнүшкө көз жумуп жүрө беребизби? Качанкыга чейин бул нерсе созулат? Мен жаңы муун үчүн мындай элдин эсебинен жашаган профсоюздук уюм кереги жок, ошон үчүн баштаган ишимди токтотпой улантып, аягына чейин бекем туруп, профсоюздук олигархтар менен күрөшөм.

Булак: “Азия news”

Алмазбек Атамбаевдин кызы Алия Шагиеваны көпчүлүк таанып калды. Апасынын фамилиясын алып жүргөн Алия буга чейин сүрөтчүлүк өнөрү менен эл алдына чыгып, тарткан сүрөттөрүнүн көрөзмөсүн дагы уюштурган.  Ажонун кызы бул ирет жаңы идеяларды айтып, талкуулаган ТедХ дүйнөлүк уюмунун Кыргызстанда өткөн жыйналышында сөз сүйлөп жатып толкундап, көз жашын тыя албай жашып кетти.

https://youtu.be/_H5s-r6mmKk

Видео: Kabarlar

КТРКнын «Ой ордо» телеберүүсүн көрдүм, урматтуу замандаштар. Мына ушул телеберүүдөн соң Түгөлбай, Кыяз агаларга ич дүйнөмдөн кылып жүргөн урмат-сыйымды артка тарттым. Эми алар мага катардагы кыргызга кайдыгерчилик кылып жүргөн гана адамдар. Ал эми Тайыр экөөбүз бир айылда чоңойгонбуз, теңтуш болуп. Тайыр мырза деп жазайын дедим, бирок «мырза» деген сөзгө сен дагы деле татыктуу эмес экенсин.
Тайырдын айтуусу боюнча фейсбукта болуп жаткан талкуулар «тайкы» экен. Менимче, тескерисинче бүгүн сен «демилгечи» катары өзүңдүн баардык жагынан тайкы экениңди далилдедиң. Бир дагы жүйөлүү аргумент келтире алган жоксун, эмнеге кыргыз улутун графадан алып коюш керек экенине. Эгер баардык улуттар кыргыз жараны болуп калса ынтымак болот, чек араны барып биз менен бирдикте кайтара баштайт деген таризде тантырайсын. Эмне алар бүгүнкү күндө башка өлкөнүн жараныбы?? Алар азыр деле кыргыз жараны, Тайыр! Алардын, биздин баарыбыздын паспортубузда «кыргыз жараны» деп кашкайып азыр дагы жазылып турат. “Башка этностор бул маселеге каршы болсо түшүнөт элем” деп мыйыгыңан күлөсүң, уяты жок. Алар балким, кайра ичинен кудуңдап сүйүнүп жаткандыр, аны билээр бекенсиң, туяр бекенсиң. Же, себеп жанагы өзүң айткан «көрүнбөгөн жипте» болуп жүрбөсүн, көп кайталап калдың. Ал улуттар арасындагы эмес эле, сени ушундай кыласың деп буйруп, муунтуп аткан «жип» болуп жүрбөсүн?
Баш мыйзам бузулат деп юридика илимдеринин доктору айтып отурду, ага жооп бере албай, паспорттун тарыхын саймедирейсиң. Өзүң менен барган киши, айтып ийди, өзүнүн сөзүнө каршы сүйлөп. Улуттук биримдик- улутту жазбай койгондон эмес деп. Анда эмнеге алып жатасыңар?? Улуттук биримдик менен байланышы жок болсо? Эмне анда, жөн эле, ( улуу сөздө уят жок ) кыргыз деген жазуу «бир» жериңерди өйкөп атабы?!
Айтор бүгүнкү «Ой ордодон» кийин, « улуту» деген паспорттогу графаны алып коюнун кереги жок экенине дагы бир ынандым. Түрктөр улутун жазбай коюп өлкөсүнө ынтымак алып келе алган жок, күрттөрдүн толкуганы толкуган. Европа -улутун жазбай коюп террактарды токтото албай келишет. Демек, кеп улутту жазбай коюуда эмес экен. Албетте мен дагы кыргыз жараны катары өлкөбүздө тынчтык, ынтымак болушун каалайм. Бирок мындай жол менен эмес, анын башка миңдеген жолдору бар эмеспи
Манасты мисал келтиресинер..  Айкөл Манас – бизге кыргыз мамлекетин, кыргыз улутун сактап, тапшырып кеткен. Бар күчүнөр менен сактагыла урпактарым деп.. Ооба тилеке каршы кээ бир өлкөлөргө окшоп ондогон-жүздөгөн миллион, миллиард болуп сакталбадык, азбыз. Мына ошол аз экенибизде – коркунуч! Үлкөн элдерге теңелебиз деп жоголуп кетүүгө себеп ишти жасайсынар..  Жогорку технологиялар, глобалдашуу заманы менен Манас атабыздын заманын теңеп, паспорту жок деле улут болуп келгенбиз деп күйгүзбөгүлөчү. Анда Манас атабызга окшоп, дүйнөгө ач курсактын айынан чилдей таркаган кыргызды топтобойсунарбы!? Элдин санын 10-20 миллиондон ашырып алып анан көтөрбөйлүбү бул маселени..  Жокбу..?  Анда шүгүр деп, улутубузду паспортко жазып эле тура турбайлыбы?! Көбөйбөй, чет өлкөгө кетип азайып атсак.. Мына ушул себептерден, азыркы кезде бизге Кыргыз деп паспортто жазылуу эң зарыл, эң гана керектүү мезгил! Улутту сактап калууга ийненин көзүндөй мүмкүнчүлүк болсо да, башка элдерди билбейм, бирок биз жармашышыбыз керек. Манастын улутуна каршы иш жасап, мындан ары кайра аны мисал кылбагыла, кыянатчылар.
Улуттук идеология дейсиңер, улуттук идеологияга каршы болуп алып. Автономия сурап, жарга такайт деген жообуң дагы кызык болду. Эми корко турган ошол эле калды эле.. Бул маселенин да саясий чечиле турган миң жолу бар, Тайыр!
Аттиң, мен сыйлап, идеал тутуп жүргөн агаларым баш болуп, ушул нерселердин баарын түшүнүп, билип туруп, ушундай тарыхый катачылыкка барып жатасыңар. Бул сасыган «демилгеңерди» күчкө салып болсо да өткөргөнү калыпсыңар, бирок мен ишенем..  Бийликтен кетериңер менен бул «катачылыгыңар» оңдолот, кайрадан улутубуз паспортко жазылып, адилеттүүлүк орнойт замандаш!
Ооба катуу айтып алдым, катуу тийсе.. Менин да кыргыз катары келечекке, муундарга жеке өзүмдүн жоопкерчилигим бар. Ушул улут деп көтөрүлгөн маселе үчүн бирөөгө жакпай калсам, бирөө менен сүйлөшпөй, учурашпай калсам, кайылмын. Орозо кабыл болсун бир туугандар, асаламалейкум!

Бек Борбиев, элдик артист

Өткөн жумада СДПКчы депутат Кожобек Рыспаев “Массалык маалымат каражаттары тууралу мыйзамга”  өзгөртүү киргизүү тууралуу мыйзамды талкуулап жатып “биз журналисттерди өтө эле эркелетип жибердик” деп күпүлдөдү.

Чындыгында Атамбаевдик бийлик Кожобек Рыспаевди өтө эле эркелетип, ал өзүнүн жүрүш-турушу менен Кыргызстанды чет жерлерде уят кылып келатса да жаап-жашырып, колдоп келатышат.  Президент жана анын аппараты, депутаттардын көбү жакшы билген анын жосунсуз жоруктарын карапайым эл биле турган болсо төбө чачтары тик турмак.

2014-жылы Япония мамлекети өзүнүн эсебинен 15тей кыргыз депутаттарын жана аткаруу бийлигинин өкүлдөрүн чакырып, Япониянын шайлоо системасынын өзгөчөлүктөрүн окутуу боюнча 12 күндүк окуу семинарларын уюштурат. Кыргызстандагы япон элчилиги биздин депутаттардын авиабилеттерин, 5 жылдыздуу мейманкана жатагын, 4 маал тамак-ашын төлөп, мыкты окуу залдарын, лекторлорун жалдап берген. Япондун мыкты саясатчылары жана саясат талдоочулары, шайлоо системасынын адистери менен жолугушууларды, пикир алышууларды  уюштурушуп өтө олуттуу иш чараларды даярдаган экен.

Кыргызстан тарап КР Президенттик аппаратынын жетекчиси Данияр Нарынбаев баштаган аткаруу бийлигинин 7 өкүлүн жана КР Жогорку Кеңешинин 8 депутатын бул иш чарага аттантат. Бу 15 кишиден турган делегациянын курамында ошол кезде түзүлгөн КР шайлоо системасын өркүндөтүү боюнча комиссиянын да мүчөлөрү бар эле. Кыргыз парламенти жөнөткөн депутаттардын арасында Кожобек Рыспаев, Нурбек Алымбеков, Нургазы Айдаров, Акылбек Эшимов, Равшан Жээнбеков, Бахтияр Кадыров, Эркин Алымбеков жана башкалар бар болчу.

Япон тарап баргандын эртесинен тартып окууларды уюштура баштайт. Кыргыз делегациясы ал окууларга катышып, шайлоонун япондук системасын үйрөнүүгө аракеттенишет. Бирок, депутат Кожобек Рыспаев баштаган 3 депутат барган күндөн баштап мейманканадан чыкпай, баш көтөрбөй ичишип, такыр семинарларга катышпай жатып алышат. Япон тарап “аларга эмне болду?” деп тынсызданып кайра-кайра сураган сайын кыргыз делегация курамы ар түрдүү калп менен актанып уят болушат.

Окуу семинарлар аятаган күнү япон парламентинин спикери кыргыз делегациясы үчүн сый тамак бергенде гана жанагы Кожобек Рыспаевдин тобу мас бойдон ошол жерге темтеңдеп келишип, какырынып-түкүрүнүп, эч кандай этикетти сыйлабай ой-тоону сүйлөп бакылдап, обу жок каткырышып, өздөрүнүн 10 күндөй ичип жатышканын эрдик көрүп мактана башташат. Япон парламентинин комитет төрагалары менен депутаттары алардын кебетесин карап баш чайкап күлгөндөн башкага жарашпайт. Кожобек Рыспаевдин бул кылыктарынан уялган айрым кыргыз депутаттары япон депутаттарынан кечирим сурап кечки сый тамактын мөөнөтүн кыскартышкан.

Эми ушул киши кыргыз коомчулугуна акыл үйрөтүп, мыйзамдарды жазып, журналисттерге сын тагып, СДПКнын ардактуу депутаты болуп жүргөнү күлкүнү гана келтирет.

Булак: Кyrgyztoday.kg

КТРКнын “Ой ордо” программасында Атамбаевдик бийлик көтөрүп жаткан Кыргызстандын жаңы паспортторунан жарандын улутун аныктаган графаны алып таштоо демилгесин колдогондор менен ага каршы чыккандар беттешип, кызыл чеке талашышты.

Жазбаса Кыргыз Улутун,
Кесесиң урпак ырысын.
Жоо болуп эле Кыргызга,
Тыйтаңдап мынча тырыштың?
Тынымсыз жинге тийгенди,
Жок кылат Кыргыз тымызын…
Эскертүү кылам эсиңе ал,
Көздөй бер “жандын тынычын”!
Унутуп жатат окшойсуң,
Арсызды МАНАС кырышын…
Төңкөрүш болуп кетпесин,
Түшүрсөң Кыргыз жылдызын!
Каарына калсаң кыргыздын,
Качкандардын артынан
Ээрчитип бүлөөң бараарсың!!!
Бузбагын Кыргыз арасын,
Сыйрыба бүтпөс жарасын.
Кыргыз деп жазбай койсоңор,
Кыргыздар жатып алмакпы?
Кырышаар калган калмакты…
Бийликтеги төбөлдө-ө-өр,
Жоготпо болгон салмакты!
Президентке айтаарым:
– Жок кылам десе Кыргызды,
Жоготкун ошол дардакты!!!!
саат 21.50 – 22.10 2016-ж.

“Бандит” операциясы учурунда, Жалал-Абад ОИИБнын изкубарлары тарабынан ок атуучу куралдарды сактагандыгы жана ок атуучу куралдарды жасагандыгы боюнча оперативдүү маалымат алынган. Ал  маалыматтардын негизинде жана Майлуу-Суу ШИИБнүн кызматкерлеринин жардамы менен  опертивдүү топ түзүлүп, 2016-жылдын 24-июнь күнү саат 14-00 чамаларында, Майлуу-Суу шаарынын Садовая көчөсүнүн тургуну 1953-жылы туулган Ф.А.нын үйүнө күбөлөрдүн катышуусунда, Жалал-Абад  областык сотунун санкциясы менен үйүнө тинтүү жүргүзгөн учурда төмөндөгү курал жарактар алынды.

https://www.youtube.com/watch?v=UvzxzlNlm_4

1948-жылы чыгарылган “ТОЗ” үлгүсүндөгү сайлуу курал, 16 калибрдеги сайсыз курал, стволу жасалган “ТОЗ” үлгүсүндөгү сайлуу курал, ТОЗ үлгүсүндөгү сайлуу куралдын кундагы, “Револьвер” тапанчасы, ИЖ үлгүсүндөгү пневматикалык курал, 20 даана 16 калибрдеги гильза, 6 даана “Револьвер” тапанчасынын огу, 10 даана 32 калибрдеги ок жана  анын 5 даанасы октолгон.

1. 
2. 
3. Алынган курал-жарактар жана ок-дарылар боюнча тиешелүү экспертизалар дайындалып, тергөө амалдары жүргүзүлүүдө.

Эгерде “Ата Мекен” фракциясы демилгелеген ««Жарнак жөнүндө» Кыргыз Республикасынын Мыйзамына өзгөртүүлөрдү киргизүү жөнүндө» Кыргыз Республикасынын төмөнкү мыйзамы кабыл алынып калса, анда Бишкек шаарынын тарыхый өзгөчөлүгү жана архитектуралык ажары мындан дагы ачылмак. Бул тууралу “Ата Мекен” фракциясынын басма сөз кызматы билдирет.

Мыйзам долбоору рекламалык щиттердин Бишкек шаарынын борбордук бөлүгүнө жайгаштырууга каршы иштелип чыккан. Ошондой эле шаардын көчөлөрүндөгү транспорттук кырсыктардын азайышына да шарт түзөт.

Текст :  Долбоор

««Жарнак жөнүндө» Кыргыз Республикасынын Мыйзамына өзгөртүүлөрдү киргизүү жөнүндө»

КЫРГЫЗ РЕСПУБЛИКАСЫНЫН МЫЙЗАМЫ

1-берене.
«Жарнак жөнүндө» Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 1999-ж., №4, 195-б.) төмөндөгүдөй толуктоолор киргизилсин:

14-берене төмөндөгүдөй мазмундагы 5-бөлүк менен толукталсын:
5. Ю.Фучик – Жибек–Жолу – Шабдан баатыр – И.Ахунбаев көчөлөрү менен чектелген Бишкек шаарынын борбордук бөлүгүндө сырткы жарнакты жайгаштырууга тыюу салынат.
Сырткы жарнактын каражаттарын орнотууга тыюу салынат:
– пилондор (бургучтар);
– сити-борддор (сити-борддун жарнактык тегиздигинин бир жагынын өлчөмү 3×4 м ашык эмес, жарнак түшүрүлгөн сүрөттүн өлчөмү 3×2 м түзөт);
– аялдамаларда, көчөлөрдүн боюнда жайгашкан Г, П, Т – түрүндөгү такталар (жарнактык тегиздигинин өлчөмү 6×3 м жана 4×9 м түзөт), ошондой эле көчөнүн өтө турган бөлүгүнө жана газондордун үстүнө таянычтары түшкөн такталар;
– супер-борддор (суперборддун жарнактык тегиздигинин бир жагынын өлчөмү 12х4 м, жарнак түшүрүлгөн сүрөттүн өлчөмү 12х4 м);
– Г, П, Т – түрүндөгү супер-сайттар (суперсайттын жарнактык тегиздигинин бир жагынын өлчөмү 15×5 м, жарнак түшүрүлгөн сүрөттүн өлчөмү 15х5 м);
– арка (жарнактык тегиздигинин өлчөмү 24х5 м, 12х3 м, 6х3 м);
– жумшак негизге тартылган транспаранттар-перетяжкалар;
– 3×4 м кем эмес жарнактык аянтка ээ сырткы жарнак каражаттары, конструкция;
– жана башкалар.
Бул берененин талаптары кызмылсыз мүлктүн объектилерине (имараттар, курулмалар ж.б.) бириктирилген жер тилкелеринде жана жакшыртылган жана салттуу эмес жарнак объектилеринде жайгаштырылган сырткы жарнактын кичи форматтагы каражаттарына тарабайт.

2-берене.
Бишкек шаарынын мэриясы ушул Мыйзам күчүнө кирген күндөн тартып үч ай ичинде:
– ушул Мыйзамдын аткарылышын камсыздасын;
– Бишкек шаарынын аймагында сырткы жарнактын каражаттарына коюлган талаптарды аныктаган өзүнүн ченемдик укуктук актыларын ушул Мыйзамга ылайыкташтырсын.

Буга чейин бир катар кызматтарды аркалап, бирок артынан жакшы сөз ээрчибеген Дайыр Кенекеев деген жигит аз күн мурда эле Таласка өкмөттүн өкүлү болуп барды. Жаңы жетекчини таластыктар деле кубанып тосуп алышкан жок. Жергиликтүү эл “жулмалашып жатып мурдагы губернатор Б.Жуманазаровду араң кетирсек, анын ордуна дагы бир жумуру баш келди” – деп нааразы болуп туруптур. Анан дагы элдин кыжырын келтиргени Кенекеевдин кыргыз тилин жөндөп сүйлөй албаган “киргиз” мүнөзү экен. Албетте, айылдагы карапайым элге ошол жердин шартын түшүнгөн, жөнөкөй, жарандар менен тил табыша билген жетекчинин болгону дурус эмеспи. Анан шаардан бара калып, “это, мето” деп элдин эсин оодарып отурса, кимге жакмак эле? Минтип таластыктар Кенекеевге азыртан ичи чыкпай жатса, анын бул кызматта көпкө отураары күмөн шекилдүү. Эртерээк жумушун жөндөп, кыргызча сүйлөгөнгө өтпөсө күнү кыйын болчудай…

Булак: Кyrgyztoday

Жакында бир гезит коомдук уюмдар чет өлкөдөн алган гранттык акчаларды чогултса Кыргызстанга ондогон мектеп, бала-бакча салганга жетмек деген тариздеги макала жазып чыкты. Ушунчалык дагы бийликке кошоматчылык кылабы, же урунаарга тоо таппай, урушаарга жоо таппай жатабы? Эки жүздүүлүктүн дагы чеги болуш керек. Так ушундай мааниге ээ болбогон макалалар, президент Атамбаевга каршы, атайын провокация кылып жатат. Мындай макаланын артынан толгон токой карама-каршы, сын пикир макалалар жазыларын гезит жакшы билет. Так ушундай дежур журналисттер элди адаштырып, кыргыз элине жарака кетирип жатканы өтө кейиштүү. Ошо макаланы Атамбаев кабыл алса, анда Атамбаев көр пенде экенин далилдейт. Ушунчалык жүйөсүз макалалар, мурунку Акаев, Бакиевди элден чыгарып, жек көрүндү кылган. Кошоматчылык элди козгогон детонатор, мамлекетти талкалаган кадам, кошоматчылыктан эл кырылган.  Өкүнгөн тарыхты башыбыздан өткөрүп келгенбиз, ошо тарыхты эмне үчүн кайталай беребиз. Ошо жүзүкаралыкты колдогон гезит кожоюндары, президенттин артынан бычак сайып жатканын билди бекен? Ууру экенин көргөзүп, пайда түшпөгөн, же өнүгүү факторуна бир дагы үлгү болбогон гезитке каражаттык колдоо көргөзгөн кожоюн – президент Атамбаевге душман.  Мындай макалаңарды “медвежья услуга” деп коёт, муну президентти жардан учура турган мамиле деп атаса болот.

Ал эми коомдук бирикмелердин грантын козгопсуңар, ар бир проектинин максатына колдоо тапса грант берет эмеспи. Ошол эле гезиттин журналисти мектеп, бала-бакча салам деп проект жазып көрбөйбү, колдоо табабы?! Эсиңерге сала кетейин, керек болсо өлкөдөгү бардык кыймыл грант менен бүтүп келетат, медицина, билим берүү тармагы, күч органы, администрация тармагы, коопсуздукту коргоо, мындан башка толгон токой бийлик гранттарды алып жатат. Оңолуп кеттикпи, албетте жок! Россиядан келген гранттын эсебинен беш заводду менчикке чыгарып алган Атамбаев, заводдорду иштете алдыбы, албетте жок. Эсиңерден чыгарбагыла, бардык түрдөгү мамлекетке колдоо көргөзгөн гранттар уурдалып, жеп коюшкан. Азыр дагы бийликке келген гранттарды уурдап жатканы жалганбы? Активдүү, өлкөгө салым кошкон укук коргоочуларга асылып алдыңар, керек болсо ошо укук коргоочулар Атамбаевди убагында коргоп, демократиялык жол менен бийликке алып келген. Азыркы Атамбаевдин жоруктары өтө кооптуу, кошоматчылар мактап жатып, өлкөнүн ашмалтайын чыгарат деп ким ойлоду? Кошоматчы  ММКлар президентке каршы иш алпара баштадыңар, эсиңерге келгиле!

Качкынбек БУЛАТОВ, укук коргоочу

Кечээ, 24-июнда Өзбекстандын борбору Ташкент шаарында өткөн Шанхай Кызматташтык Уюмуна мүчө-мамлекеттердин башчыларынын кеңешинин кеңири курамдагы 15-юбилейлик саммитинте Алмазбек Атамбаев сөз сүйлөдү. Кызыгы, дүйнө коомчулугу Атамбаевдин сөзүнө эле эмес, анын артында отурган жан-жөөкөрүнүн адепсиз кылык-жоругуна дагы күбө болушту. Жаш балача колун кайра-кайра оозуна салып ойноп, эриккенинен жарылып кете жаздап араң отурган бул эргул ким? Канчалаган өлкө лидерлеринин алдында акылга сыйбаган жүрүм-туруму менен өзүн эле эмес алдындагы “шефинин” дагы абийрин төгүп салды. Ажо дагы тегерегинде жүргөн адамдарга бир көз чаптырып алса жакшы болмок экен. Айрыкча мындай эл аралык деңгээлдеги жолугушууларда…

https://youtu.be/Q4oyJkPBNeI

Видео: Санжар Калматай

Кыргызстанда орозо кармоо убактысы 17 саат 40 мүнөттү түзөт. Ал эми географиялык абалынан улам быйыл 20 саат же андан да көп убакыт орозо кармаган мамлекеттер  бар. Быйылкы орозо жыл ичиндеги эң узун күн саналган 22-июнга туш келди. Андыктан быйыл Кыргызстанда орозо кармагандар таң заардан күн батканга чейин дээрлик 17 саат 40 мүнөттөй оозуна наар албай жүрүштү.

Белгилей кетсек, дүйнө жүзүндө миллиондогон мусулмандар бар. Орозо кармоо алардын парзы.  Айрым мамлекеттердеги мусулмандар жашаган өлкөсүнүн географиялык абалына байланыштуу 18 сааттан 21 саатка чейин орозо кармашууда.

Мисалы, Англияда орозо кармоо 18 сааттан ашса, Канадада 19 саатка чейин кармалууда. Ал эми Швеция, Норвегия, Германия жана Россиядагылар 20 сааттан ашык орозо кармашат.

Орозонун  эң эле узак убактысы Исландияда катталган, андагы мусулмандар орозо убагында 21 саат бою ооздоруна наар алышпайт.

АКШнын Чикаго шаарында орозо кармоо убактысы  биздегидей эле 17 саатка чейин  созулат. Алар таңкы саат 3.29га чейин ооз бекитип, кечинде саат 8.24төн кийин ооз ачышат.

Австралиянын Мельбурн шаарында учурда кыш болгондуктан  12 сааттан ашыгыраак орозо кармашат экен.

Орозого уруксат бербеген өлкөлөр

Орозонун башталышы менен ооз бекитип, орозо кармоого уруксат бербеген же анын айрым амалдарын аткарууга жолтоо болгон мамлекеттер да бар.

Кытайдын Синьцзян Уйгур автономиялуу облусунда жергиликтүү элдин орозо кармашына тоскоолдуктар жасалууда.

«Кытай бийлиги уйгурлар көп жашаган Синьцзян Уйгур автономиялуу облусундагы мамлекеттик жетекчилердин, окуучулардын орозо кармоосуна тыюу салганын жергиликтүү ЖМКлар маалымдашкан. 10 миллиондон ашык уйгурлар жашаган аймактарда күндүз айрым тамактануучу жайлардын иштөөсү милдеттендирилген.

Ал эми коңшу Өзбекстан орозо айында эл чогултуп ооз ачууга тыюу салганын өлкөнүн айрым жалпыга маалымдоо каражаттары билдирди. Тыюу салуу аракеттери былтыр да киргизилген. Анда мындай аракеттер элди диний экстремисттик агымдарга берилип кетүүсүн алдын алат деп түшүндүргөн.

6-июнда башталган Орозо 5-июлда аяктайт.

Аскат ЖЭЭНБЕКОВ, Санкт-Петербург шаары: Санк-Петербургда 21 саат ооз бекитилет

Рамазан айында орозо кармоо —мусулмандардын парзы болуп эсептелинет. Орозо, бизге ар дайым Алла Тааланы эскертет, жоопкерчилик сезимин ойготот. Жүрөгүбүздү жаман ой-пикирлерден алыстатат, башкаларга жамандык кылуудан коргойт.  Мен өзүм Жалал-Абад облусунун кулунумун. Учурда Орусиянын Санкт-Петербург шаарында иштеп жатам. Бизде орозо кармоо абдан эле оор. Бирок мусулмандык парзды аткаруу үчүн кармап жатабыз. Орусиянын ак түндөрүнө байланыштуу 22:15те күн батып, 1:15те таң агарат. Ортодо үч саат гана оозубуз ачык болот.

Көпчүлүк мекендештерибиз курулуштарда жана башка оор жумуштарда эмгектенишүүдө. 21саат бою ооз бекитип жүрүүгө туура келсе да  орозо кармашууда. Орозонун өз касиети бар эмеспи. Башка мусулмандардай эле чыдап жатабыз. Орозо кармагандардын орозосу кабыл болсун.

Вакан кыштагында 3,5 саат гана ооз бекитилет

Акыркы жылдарда рамазан айы жайдын узак күндөрүнө туш болуп, көпчүлүк өлкөлөрдөгү мусулмандар 17-20 саатка чейин ооз бекитишүүдө.

Араб өлкөсү менен чектешкен Оман шаарынан 150 км алыстыкта жайгашкан Вакан кыштагында саат 11де таң агарып, кайрадан эле 14:30да күн батат. Географиялык абалы кызыктуу, тоого курчалган бул кыштакка туристтер көп келишет.

Булак: “Жаңы агым”

Кечээ, 24-июнда “Өнүгүү-Прогресс” фракциясынын жыйынында фракция лидери Бакыт Төрөбаев фракциянын 2015-2016-жылдардагы ишмердүүлүгү боюнча маалымат берди.

Төрөбаевдин айтымында, аталган фракция 8 ай ичинде 24 жыйын өткөрүп, өлкөнүн туруктуу өнүгүүсү үчүн социалдык-экономикалык маселелерди камтыган 108 чечим кабыл алган. Фракциянын дарегине 1570 кат келип, анын 1325ине жооп кайтарылган. Жалпысы 35 мыйзам долбоору каралып, Жогорку Кеңештин кароосуна сунушталган. Маселен, шайлоо алдында убада кылып, көтөрүп чыккан оң рулдуу унааларды коммерциялык максатта пайдаланууга тыюу салынган мыйзамга өзгөртүү киргизүү менен анын күчүнө кириши 2020-жылдын 1-январына чейин жылдырылды. Ошондой эле унааларды милдеттүү түрдө камсыздандырууну талап кылган мыйзам долбоору 3 жылга , 2019-жылдын 7-февралына чейин жылдыруу боюнча мыйзам долбоору 2-окууда кабыл алынган.

Мындан сырткары, “Өнүгүү-Прогресс” фракциясынын тапшырмасы менен айыл өкмөттөрүнүн базасында МТСтерди уюштуруу боюнча КР Өкмөтүнүн токтому чыккан. Учурда 86 айыл өкмөтү МТС түзгөнгө арыз берген.

Соңунда саламаттыкты сактоо, демилгеленген мыйзам долбоорлору, келген кайрылуулардын мазмуну тууралуу маалыматтарынан кийин фракция лидеринин отчету кабыл алынды.

Ош мамлекеттик университетинин «Ыйман» лицейинин алгачкы бүтүрүүчүлөрүнө жалпы орто билимге ээ болгон аттестаттар тапшырылды. Бул боюнча аталган лицейдин  жетекчиси Жеңишбек Элболдуев билдирди.

Маалыматка ылайык лицейди 15 кыз жана 23 бала бүтүрүшкөн. Жалпы бүтүрүүчүлөргө жалпы орто билимге ээ болгондугун тастыктаган аттестат менен биргеликте дин таануу курсун аяктагандыгы жөнүндө сертификаттар да тапшырылды. Ошондой эле бүтүрүүчүлөр өздөрү каалаган мамлекеттик окуу жайларга тапшыра алаары жана дин таануу курсунун сертификаты менен муфтияттын структурасындагы диний мекемелерде иштөөгө болоору белгилүү болду.

Эскерте кетсек, “Ыйман” лицейи Түркиянын “Диянет” фонду жана ОшМУ тарабынан ачылып, окуучулар 8-класстан кабыл алынат. Мамлекеттик предметтерден сырткары дин таануу сабактары, араб, түрк тилдери окутулат.

Кыргызстан Бажы Биримдигине кирсе, агрардык өлкөбүздөн өндүрүлгөн мөмө-чөмө, жер-жемиш, азык-түлүктөр биримдикке кирген 200 миллиондон ашуун калкы бар базарга экспорттолоору, бу жагынан дыйкандарыбыз кыйла жетишкендиктерге ээ болоору айтылган. Тилекке каршы, бүгүн андай “таттуу тилектердин” бири жок. Тээ ала жазда Казакстанга экспорттолуп турган “экинчи наныбыз” болгон картошканы да ашыналар киргизгенге тыюу салышты эле өлкө башчыбыз Алмазбек Шаршенович бул ишке өзү кийлигишип, маселени чечкени бар. Колдо турган малды да сыртка экспорттой албай, ушул күндөргө чейин эл аралык стандарттарга туура келген тийиштүү лабораториялар курулбай келүүдө. А сыртта дыйкандарыбыздын жазында эккен түшүмүнүн алгачкы мөмөлөрү жыйнала баштады. Мындай шартта биздин дыйкандар качанкыга дейре түшүмдөрүн тыңгылыктуу баага сата албай, мукурашы керек? Дал ушундай көйгөйлүү суроолорго адистер менен бирге жооп издедик.

Төрөбай Зулпукаров, ЖК депутаты:

– ЕАЭБге кыргыз мамлекетинин киргенинин негизги максаты, өндүрүлгөн товарларды ЕАЭБдин базарын өз базарыбыздай пайдаланууну максат кылганбыз. Бирок, тилеке каршы, ЕАЭБдин курамындагы кээ бир мамлекеттер биздин кыргыз мамлекетине жасап жаткан мамилеси таң калыштуу болуп жатат. Мындай мамиле менен жүрүп отурушса, анда ЕАЭБдин курамы биз үчүн канчалык деңгээлде пайдалуу же зыяндуу экени каралып чыгышы толук мүмкүн.

Мирлан Бакиров, ЖК депутаты:

– Туура, ЕАЭБге киришибиз менен дыйкандардын үмүтү толук 100 пайыз аткарылды деп айта албайбыз. Биримдикке алгач кирип жатканда “200 миллиондон ашуун калкты тейлеген базар ачылат, айыл-чарба өсүмдүктөрүбүз үзгүлтүксүз сатылат” деген жалындуу сөздөр айтылган. ЕАЭБдин өзүнүн 10го чукул атайын талаптары бар. Алардын ичинде мал чарбачылыгы боюнча идентификация, аккредитациядан өткөн заманбап лабораториялар аркылуу сертификат алып өтүш керек. Ветеринардык дарыгерлерге атайын зоналар бөлүнүүсү абзел. Бүгүнкү күндө 3 миңге жакын жеке ветеринар атайын зоналар боюнча иштеп жатышат. Ал эми жер-жемиш, фитосанитария боюнча маселелер бир аз жеңилирээк болууда. Бүгүнкү күндө бизден өндүрүлгөн жер-жемиштер толук эмес, жарым-жартылай болсо да экспортко өтүп эле жатат. А бирок, азырынча биздин ЕАЭБге даяр эмес болуп туруп киргенибиз байкалып калды. Андыктан, азыркы өкмөт түздөн-түз эпизотикалык абалга, вакцинация менен камсыз кылганга карата 131 миллион сом каражат бөлдү. Идентификация боюнча өкмөттөн токтом чыгып, ири мүйүздүү малдарга бирка басууга азыр тендер жарыяланды. Албетте, мындай иштердин баардыгы өтө узак процедура. Буга чейин ЕАЭБдин курамынан атайын түзүлгөн комиссия өлкөбүзгө 6 ирет келип, 6 жолку сапарында тең биздин бул жааттагы абалыбызды талапка жооп бербегендигин аныктап кетишти. Азырынча сүт, жер-жемишти кайра иштетүүчү 14 айыл-чарба ишканалары атайын тизмеге кирди. Ошол тизмеге киришкен ишканалар аркылуу талапка жооп берген продукцияларыбызды экспорттоого мүмкүнчүлүк болот. Мурункудай “аткезчилик же кандайдыр бир “сыйкырдуу жолдор” аркылуу өндүрүлгөн түшүмдөрдү чек арадан алып өтүп кетем” деген ойдон алыс болушубуз керек. Өкмөттүн курамын өзгөртүү боюнча да премьер-министрдин сунушунда айыл-чарба, суу, тамак-аш жаатында реформаларга жол ачкан иштери башталды. Айыл-чарба министрлигинин алдында заманбап агентство түзүлгөн турат. Бул структура дыйкандарыбыздын өндүргөн түшүмдөрүн сыртка экспортко чыгаруу машакаты менен алектенип, көйгөйлүү иштердин чечилишине жол ачмакчы.

Тургунбек Кулмурзаев, экс-губернатор:

– Жогорудагы силер белгилеген алешемдиктердин баардыгы ошол убактагы өкмөттүн кылган ишинин жыйынтыгы да. ЕАЭБге кирээр алдында өкмөттөгүлөрдүн айтканы эсиңердеби? “Биримдикке киргенге кол койсок, чек араларыбыз ачылса эле элдин баары жыргап калышат” дегенин ким унутту дейсиң? А бирок, биримдикке киргендин ичинде да көп маселелер бар болчу. Маселен, андагы Темир Сариев башында турган өкмөт ошол эле карантин көйгөйү, лабораторияларды куруу өңдүү иштерди биз укканда “лабораториялар беш-алты жерге курулуп, бул жааттагы маселелер чечилди, ачсак эле эми тиешелүү уруксат кагаздарын алып алышып, ЕАЭБ өлкөлөрүнө сата беришет” деп айтышканда “жыргап калбадык” беле? Биримдикке алгач киргенде чек арага эки өлкөнүн өкмөт башчылары официалдуу ачылыш расмисин кылышып, абдан жакшы “шоу” болбоду беле? Ошондо элдин баары “картошканы жүктөп алып, экспортко чыгарып, сатабыз” дешип жыргай түшүшкөн. Мына 1 жылга жетпей Нарында картошкалардын өтпөй, чирип жаткандыгын көрдүк. Биримдикке кире элек, чек араларыбыз ачыла электе бизде картошканын баасы 30 сомго чейин чамалап чыкчу эмес беле? Биримдикке кирип, чек араларыбыз ачылганы менен картошкабызды Казакстан өткөрбөй, кайдагы бир шылтоолорду айтып жатат го? Казактарга картошкабыздын оорусу жок экендигин тактаганга лабораториябыз жок экен. Мунун айынан казактар картошкабызды “оорусу бар экен” дешсе, унчукпай отуруп калдык. Мындай алешемдиктердин баардыгын карапайым эл тынбай айтып жатышат. ЕАЭБге киргени эки өлкөнүн бажы кызматтарын алып, чек арачыларды коюп коюшту эле Казакстандын чек арачылары азыр бажычылардан да жаман экенин айтышууда. Айтор, санай берсең сөз көп. Билбейм эми, кайсы жагынан жыргап кетээрибизди? Албетте, биримдикке кирген багытыбыз туп-туура. Бирок, ушуга жакшылап даярданбай кагазга кол коердо “эптеп эле кирип кетели” деп кыргызча уруп киришсе керек.

Булак: “Азия news”

Кыргызгидрометтин берген маалыматына ылайык, бүгүн, 25-июнда өлкөбүздө жаан-чачын күтүлбөйт. Шамалдын багыты өзгөрүлүп турат, ылдамдыгы 1-6 метрге жетет.

26-июнда жана 27-июнда түнкүсүн жаан-чачын болбойт, ал эми күндүз көпчүлүк аймактарда жаан жаап, күн күркүрөшү, айрым жерлерде катуу жаашы күтүлөт. Батыштан соккон шамалдын ылдамдыгы секундасына 4-9 метр, 27-июнда кээ бир райондордо 15-20 метрге чейин жетет.

28-июнда да көпчүлүк аймактарда жаан жаап, күндүн күркүрөшү, айрым жерлерде катуу жаашы күтүлөт. 29-июнда жаан-чачын кээ бир райондордо гана болушу мүмкүн. Абанын температурасы өзгөрүлүп турат.

– Мен билгенден сиз соңку 5 жылдан бери өкмөт мүчөлөрүнүн арасынан “ат алмаштырбаган”, 5 премьер-министр менен иштешкен жалгыз министр экенсиз. Албетте, көз тийбесин, бирок, 5 жылдан бери өкмөт башчылары алмашса да “ат которбой”, кызматыңызда былкылдабай отурганыңыздын сыры эмнеде?

– Ар бир жылы өкмөт алмашкан сайын башында чындап эле мага да кызык болчу. Өкмөт отставкага кеткен сайын башында 15 күндөй олку-солку абалда калып, “мындан ары иштейминби же кетемби” деген санаркоо менен жашап каласың. Үч-төрт жолу өкмөт курамы алмашкандан кийин менде кандайдыр бир тынчсыздануу деле болбой калды. Аягында көнүп, көңүл бурбай деле калдым. Маселен, соңку ирет өкмөт алмашканда, мен Кыргызстанда эмес, чет өлкөдө командировкада болчумун. Мен командировкадан келгиче өкмөт кетип, жаңы премьер баштаган курам иштеп калышыптыр. Туура, кээде айрым депутаттардан, саясатчылардан “өкмөт курамынан Кубатбек Боронов көптөн бери иштеп жатат. Ал өйдө жакка каршы пикир айтпаса, алардын айткандарын кылып жүрө берсе, министрликте калат да, тил алчаак министрди ким алмак эле?” дегендей кептерин угуп калам. Биздин саясатчылар, ошол эле депутаттар аткаруу бийлиги менен мыйзам чыгаруу бийлигинин айырмасын түшүнбөй жатышат. Аткаруу бийлигине келдиңби, ырас, иштеш керек. Өкмөт курамы бирөөгө ыксыз сын айтып, бирөөнүн кемчилигин издеп, саясат, интрига менен алектенген туура эмес. Кызматта турганымдын жөнөкөй эле сыры, иштеш керек. Аткаруу бийлигинде иштеп жаткандан кийин мойнуңа коюлган тапшырманы так аткарып, жогору жактан тапшырма күтүп эле отура бербестен аракет кылып, эл алдындагы жоопкерчилигиңди моюндап, ар кандай ушак, интригаларга аралашпай кызматыңды татыктуу аткарсаң эле ишеним болот да. Анан калса, биздин аткарып жаткан жумушубузду урматтуу президентибиз баш болуп, парламент депутаттары көрүп турушат. Азыр кайсы кадр болбосун, анын кызматын бат-бат алмаштырбай, ордунда көп жыл иштесе, ишинен майнап чыгаарын баары эле түшүнүп, билип калышты.

Булак: “Азия news”

Адамдар ар кандай абалда болот. Кээ бири жол жүрүп калат. Ооруп калышат. Кээде жөн гана ысыкка шалдырап уйку келет. Уйкунун ары жок. Бирок мамлекеттик маанилүү иштерди, элдин келечегин, тагдырын  чечип отурган жетекчилердин, депутаттардын уктап же уйкусурап отурганы элди кыжырлантат экен. Бир жуманын беш күнү жумуш күнү болгондон кийин мамлекеттик кызматкерлер ошол беш күнү кайдыгер болбой, уйкусурабай жакшы иштеп берүүлөрү керек. Ар бир күнү иш күнүнө, ар кандай жыйындарга алдын ала даярдануулары керек деп нааразы болгондор андан көп.

Ош шаарынын уйкудагы депутаттары

Өткөн жумада «Ынтымак» телеканалы Ош шаарынын жетекчилеринин стратегиялык планынын болжолун түзүү боюнча жыйындагы көрүнүштүн видеосун интернетке жарыялашты. Анда жетекчилердин айрымдары уктап отурат. Айрымдары уюлдук телефондорунан сулуу кыздардын сүрөттөрүн карап отурушат. Айрымдары берилүү менен ушакташууда. Бул видео интернет желелеринен тарап кеткен соң 40 миңден ашуун адам көрүптүр, жүздөгөн адамдар жетекчилерди жек көргөн өз пикирлерин узатышкан. Ош шаардык кеңешинин маалымат кызматы 13-июнда жыйынга төрага Жапар Ормоновдун толук катышпагандыгы боюнча түшүндүрмө берип актанып чыгышты.

“Одноклассники” социалдык тармагында отурган жалал-абаддык жетекчилер

Жакында эле Жалал-Абадда айыл чарба багыты боюнча облустук коллегия өтүп, анын көркүн “уйкучу” жана “одноклассники” соц.тармагында отурган жетекчилер ачкан. Коллегияга келген аймактардагы жетекчилердин айрымдары уктап калса, кээ бири “одноклассники” сайтынан футбол көрүүгө жетишишкен.
Облус жетекчи Жумагүл Эгембердиева жыйында уктап отурган жетекчини көрүп, сыртка чыгып бетин жууп келүүсүн талап кылды.

“Коллегия учурунда облуска келип алып уктасаңар жумуш ордуңарда эмне кылганыңар белгисиз. Ишиңерге кайдыгерлигиңер ушундайыңардан эле билинет”,-деп ачууланган Ж.Эгембердиева.

Эске салсак, өткөн жылдын жарым жыйынтыгы чыгарылган коллегия учурунда телефон ойноп, уктап калган жетекчилер 9 айдын жыйынтыгы менен Ж.Эгембердиевадан эскертүү алышкан.

Замира Кожобаева, Азаттык радиосунун кабарчысы: «Мамлекеттик кызматкерлердин чыныгы жүзү»

— Бул видео карапайым элдин төлөгөн салыгынын эсебинен жан баккан, кызматтык унаасын, телефондогу «узун шыйрак» кыздардын сүрөтүн көрүү мүмкүнчүлүгүн берген интернетин, кабинетин, мамлекетке пайдасынан зыяны арбын иш сапарларын ар кандай колдонгон атка минерлердин жүзү. Кызмат акыларын элдин эсебинен төлөтүп, уйку-соо арасында «иштеп жаткан» мамлекеттик кызматкерлердин чыныгы жүзү… Баракелде, «Ынтымак»!

Айбек Бузурманкулов, «Жаңы муун» жаштар кыймылынын өкүлү: «Кыскасы, балык башынан сасыйт»

—Иш убагында уктап отурган, кайдыгер  депутаттарды,  мамлекеттик кызматкерлерди көп эле кезиктирип калам. Муну менен алар ишине кылган мамилесин, коомго болгон деңгээлдерин көргөзүп жатышат.

Жыйынтыгында мамлекеттүүлүгүбүзгө коркунуч туулуп жатат.

Анткени качан гана анын кызматкерлери ишке берилүү менен иштегенде мамлекет  күчтүү болот. Азыр болсо эптеп эле айлык алышса болду. Уктап же интернет чукулоо менен алек. Анткени жетекчилери да жакшы көзөмөлдөбөйт. Талап койбойт. Иштин жыйынтыгын аныктаган так көрсөткүчтөр жок.

Кыскасы балык башынан сасыйт.

Бермет Наралиева, психолог: «Кызмат өтөөдөн мурун жеке маселелерин ойлошот»

– Негизи жашоого болгон умтулуу ички жана сырткы болуп экиге бөлүнөт.

Бир жумушту аткарууда эгер адамдын аң-сезимин ички умтулуу коштосо ал аткарган жумушун берилгендик менен жасап ишти аткарууда эргүү коштолот. Уйкусурабайт.

Эгерде аң-сезимде сырткы умтулуу коштосо ал адам жумушуна барды келди Балтабай болуп күн өткөнүнө маашыр болуп жүрө берет. Ал иштин айлыгын жана өз кызыкчылыгына керектүү нерселерин  колдонот. Ал иши аркылуу элге кызмат өтөөдөн көрө башка жеке көп маселелерин чечиши мүмкүн.

Марклен Табалдиев: «Кыргызстандын жашоосун аксаткандар»

-Жетекчилердин бул көрүнүшү бала бакчадагы балдардай эле көрүнөт. Балким жанагы акылы өспөй калган балдарды тарбиялоо борборуна да окшоштурсак болот.

Булардын биринде да Кыргызстандын келечегин оңдойлу деген ойлору жок, баарынын ойлору кайсыл жактан пайда көрсөм же уурдасам деген ойлор менен жүрүшөт. Ошол себептен Кыргызстандын жашоосу оңдолбой, өркүндөп өсө албай аксап турушат.

Уктаганы үчүн жазаланган министр

Өткөн жылдары айыл чарба министринин орун басары Жаныбек Керималиевдин парламентте отуруп көзү илинип кеткени тартылган видео тасма коомчулукта чоң талкуу жаратты.

Бажы биримдиги боюнча маселе талкууланып жатканда парламент жыйынында үргүлөп отурган аткаминердин видеосу интернетке тарап, социалдык тармактарда талкуу жараткан. Интернет колдонуучулар бийлик өкүлүн сындап чыгышкан болчу. Видеодогу аткаминер, айыл чарба министринин орун басары Жаныбек Керималиев ал күндөрү тумоолоп жатканына байланыштуу дары ичкенин, буга байланыштуу шайы ооп отурганын кабарлаган.

 Адам канча саат укташы керек?

Адистердин айтымында, жүрөк кан тамыр оорулары, инсульт, экинчи типтеги кант диабети уйкунун бузулуусунан улам келип чыгат. Гарвард университетинин окумуштуулары «кечкисин же түнкүсүн кирпик какпай иштөө адамдын ишмердүүлүк жөндөмүн азайтып, жашоодо ийгиликке жетишүүсүн басаңдатат» деген тыянак чыгарды.  Кеч жатып, аз уктаган кишилердин маанайы да төмөн болот дешет адистер. Алар уйкусу бузулган кишинин жалпы абалын алкоголдук ичимдикти көп ичип, мас болууга салыштырышат.

Бузулган уйкулар

Уйку бузулса адамдын жеке эле мээси эмес, жалпы саламаттыгы да жабыркайт. АКШнын Улуттук уйку фондунун адистери киши жок деген кеминде жети-тогуз саат укташы керек деген бүтүм чыгарган. Аталган фонд атайын изилдөө жүргүзүп, суткасына алты сааттан аз уктагандардын айынан АКШ жылына 63 миллиард доллар зыян тартып жатканын аныктаган. Talent Smart бирикмеси жакында эле бир миллиондон ашык кишини байкоого алып, алардын ичинен таланттуулары жана ийгиликтүүлөрүнүн 90 проценти уйку маалын бузбай эс алышаарын аныктаган.

Булак: “Жаңы агым”

26-июнь – Бүткүл дүйнөлүк баңги затына каршы күрөшүү күнүнө карата областтык үй-бүлөлүк дарыгерлер борборунун демилгеси менен Жалал-Абад шаардык мэриясында тегерек стол болуп, ага шаардагы бир катар орто кесиптик билим берүү мекемелеринин, коомдук уюмдардан, укук короо органдары жана областтык дин башкармалыгынын өкүлдөрү катышты. Бул тууралуу шаар мэриясынын басма сөз кызматы билдирди.

Анда негизинен учурда коомчулукта, айрыкча жаштар арасында баңгизаттын ден-соолукка тийгизген терс таасири, аны алдын алуу боюнча бир катар маселелер талкууланды. Анда сөз сүйлөгөн Жалал-Абад областтык психикалык саламаттык борборунун наркология бөлүмүнүн жетекчиси Махпурат Умарованын айтуусу боюнча, бүгүнкү күндө област боюнча алты айдын эсебинен 476 адам баңгизатына көз каранды катары каттоодо турат. Алардын арасынан 147 адам баңгизатын ийне аркылуу кабыл алышат. Ал эми шаар боюнча бул илдетке кабылган 80 адам каттоодо турат. Ал эми район-шаарлардын ичинен Сузак районунда 160 адам көзөмөлдө турат.

Тегерек столдогу талкуунун аягында баңгизатка каршы күрөштү коомчулуктун жардамы менен  күчөтүү боюнча резолюция кабыл алынды.

Өзбекстандын борбору Ташкент шаарында өтүп жаткан Шанхай Кызматташтык Уюмунун (ШКУ) саммитинин алкагында салтанаттуу концерт уюштурулуп, анда кыргыз, түркмөн, орус тилдеринде ырлар ырдалды.  Концертте кыргыздын белгилүү “Сары-Ой” элдик ырын өзбек ырчысы ийнине жеткире ырдаты.

https://youtu.be/FfmNZ3kUu1k

Санариптик телерадиоберүүгө өтүү менен көрүүчүлөр жогорку сапаттагы теле уктуруулар менен сапатуу видео көрсөтүүлөрдү  көрө алышат. Бул тууралуу вице-премьер-министр Гулмира Кудайбердиева Кыргыз Республикасында санариптик телерадиоберүүгө өтүү боюнча уюштуруу комитетинин жыйынында билдирди.

«Женева-2006» санариптик берүүгө өтүү боюнча эл аралык келишимине ылайык, 2011-жылдан тартып өлкөдө санариптик телерадиоберүүгө өтүү программасы ишке ашырылып келе жатат.

Санариптик телерадиоберүүгө өтүү менен  көрүүчүлөр көптөгөн телеканалдарды жогорку сапаттагы теле уктуруулар менен сапатуу видео картиналарды көрүүгө шарт түзүлөт.

Ошондуктан санариптик телерадиоберүүгө өтүү менен калкыбыз утушка ээ болот. Ал эми өлкөдө аналогдук берүүлөрдү толугу менен өчүрүү  2017-жылга пландаштырылууда – деп баса белгиледи вице-премьер-министр.

Гулмира Кудайбердиева санариптик телерадиоберрүүгө өтүүдө калкка телеантеналарга ресиверлерди орнотуу зарылдыгы  боюнча түшүндүрүү ишитерин жүргүзүүнү тапшырды. “Бул ишке жергиликтүү өз алдынча башкаруу органдары тартылышы керек”, – деп билдирди Кудайбердиева.

Кыргыз паспортуна улут жазылышы керектиги же жоктугу туурасындагы талаш-тартыш башталганда эле негедир Ален Офойо деген афро-кыргыз кикбоксер эсиме түштү. Кикбокс боюнча Азия чемпиондугун жеңип алып , кыргыздын желегин желбиретип , өлкө гимнин сыймыктануу менен кошо ырдап турган бу жигитти көргөндө анын жеңишине кошо шерденип, далыма канат бүткөнсүп кубангам. Анын паспортунда улуту ким деп жазылганына кызыкпай, а түгүл ал туурасында түк ойлобой эле сүйүнгөм. Менчилеп башка мекендештерим деле сүйүнгөн чыгаар? Же “Эмне үчүн кыргыз эмес? Эмне үчүн африкалык?” деп ичи ачышкандар да болду бекен? Баса, Талант Дүйшөбаев деген кыргыз бар, өзү Испаниянын жараны болгон менен Польшанын гандбол боюнча курама командасынын башкы машыктыруучусу,.. ошо кишинин ийгиликтерине бир эле учурда үч эл кубанат экен – кыргыздар, испандар, анан поляктар, кыргыздарды айта албайм,.менимче кубанычка бөлөнгөн испандар менен поляктар үчүн Талант Дуйшебаевдин паспортундагы улуту деле анча мааниге ээ эмес болуш керек.. Айтайын дегеним, ийгиликке сыймыктануунун чеги улут менен, паспорт менен өлчөнбөшү керектир? Улуу эл экенибиз чын, байыркы эл экенибиз анык, бирок кайсы эл өзүн “жаманмын, жакшы эмесмин” деп айтмак эле?

“Кылым карыткан кыргызбыз..”, “чыныгы арийлердин тукумун алып жүргөн калкпыз”, “2200 жылдан да ары карай кеткен тарыхыбыз бар”, “Манастын урпагыбыз “ деп санай берсек мактанчу жактарыбыз оголе көп болуп кете берет экен. А бирок эмне үчүн чоң державаларды мындай кой, жаныбыздагы эле коншу өлкөлөргө баркыбыз жок? Эмнеге алар бизди “..булар улуу эл, Манастын урпактары, арийлердин тукуму, 2200 жыл тарыхы бар” деп биздей улуу элден айбыгып, ийменишпейт,..балким маселени башкача көз айнек менен караганыбыз жөндүүдүр? Аныбыз го ал, жалкоолугубузду, кашаңдыгыбызды, жалакайлыгыбызды, кедей болсок да керсеймелигибизди моюнга алып, өзүбүздү өзүбүз шылдыңдаган “кыргызбыз да..” деген купуя слоганыбыз дагы бар экенин жалганбы? Сырттан кытайыбы, немисби, түркүбү же америкалыгыбы өлкөбүзгө зоот-фабрика, ишкана ачканы жатса, “бөлөктөр келип басып алмай болду,. каптап кирмей болду” деп айкырганыбыз бир тең да, же ал ишканаларды өзүбүз жөндөп иштете албай, ар качандан бир качан түндүк-түштүк, тиги уруу-бул уруу, кокту-колот, ылдыйкы көчө, өйдөңкү көчө болуп ич ара бөлүнө бергенибиз бир тең. Тарыхтын оомал-төкмөлү менен илгери кыргыз жергесине баш паана кылып келген орус, дунган, өзбек, тажик, түркмөн,чечен, карис, украин,беларус жана башка ушул сыяктуу башка улуттар бизде чейрек кылым жашап келе жатса да аларды “бөтөн” деп бөлбөй, өз кылып, кыргыздын туусунун астына бириктирип, “Кыргыз өлкөсүнүн жаранымын!” деп сыймыктандыруунун ордуна жерибизди чөнтөгүнө салып башка жакка уурдап кетчүдөн бетер “бул жердин ээси бизбиз, а силер келгинсиңер” деп астыртан өгөйлөгөнүбүз өгөйлөгөн. Францияга, Италияга, Кытайга, Германияга же мейли мобуреки эле Казакстан, Грузия же Орусияга көчүп барып ал жактын жарандыгын алып, жашап калдыңыз дейли, ошондо эмне кыргыз болуудан калып франсуз, италян, кытай, немис же казак, грузин, оруска айланып калмак белеңиз? Африкада жашап африка паспортун алсаңыз деле кыргыз бойдон каласыз да. Маселен, чет өлкөгө барсаңыз аэропорттогу чек ара кызматкерлери эле паспортуңузду ачып карабаса, сиз алар үчүн болгону чет өлкөлүк Кыргызстандын жаранысыз. Кыргызстанда жашаган улуту кыргыз, өзбек, дунган, орус экенибиз алар үчүн мааниге деле ээ эмес. Менимче улут формалдуулукта эмес, кыргыз экенибиз жүрөгүбүздө жашашы керек, а жүрөгүбүздөн аны ким сууруп алмак эле?

Андан да кеңирирээк айтсам, азыркы глобалдашкан ааламда “улут” деген кеңири түшүнүк го акыры. Кыргыз өлкөсүндө канча эл болсо ошонун ар бири “мен ушул өлкөнүн адамымын!” деген сыймыкка бөлөнсө, мээнетине жараша жашаса, көп иштегени көптөй, аз иштегени аздай , кадырына, аракетине жараша калыстыкта (!) жашоо кечирсе ошонун баары бир бүтүн улут болбой эмине? Тарыхыбыз кайда калат, тек-түгүбүз кайда калат?-деп патриоттулук каны ойноп чыкчуларды деле түшүнсө болот, а бирок ар элдин тарыхын, басып өткөн жолун, баалуулуктарын танка менен тепсетип майкандалышын каалаган эч ким жок. Андай экен,.. адамзат тарыхында “мен баланча деген улуу журтмун, бийик улутмун” деп ошонусун ташка оюп жазып, түбөлүк өчпөс болуп калууну каалаган нечен эл, нечен улут аты-жыты менен жок болуп кеткени жалганбы? Ат жалында казан асып, найзаларды кылкылдатып “биз кыргызбыз!” деп ураан чакырган ыкма балким өткөн тарыхтын ынгайына туура келчү талап эмеспи? Глобалдашкан, жогорку информациялык технологиялардын дооруна айланган 21-кылымда жеңишке жетүүнүн бирден бир жолу тунук акыл-эс, зирек ой чабыт, терең билим болуп жүрбөсүн?
“Кыргызстандыкмын” дейбизби же “кыргыз жергесиненмин” деп айтабызбы, аталышынан мурда да “сүйүктүү өлкөмдүн адамымын” деген жалпы улуттук сезимдин ойгонуусу ириде кыргыздардан гана көз каранды дегенге анча кошулбас элем. Эгер өлкөбүздөгү кыргыздардан бөлөк элдер “бул кыргыздардын жери да,демек кыргыздар өзү кыймылдасын, анан биз ойлонуп көрөбүз..” деген чайпалма мүнөз күтчү болсо, анда мунун өзү түбүнөн туура эмес. Өлкөнүн Кыргызстан деген аталышына эле кыйылып, “Дунганстан болсо кыймылдамакмын, Уйгурстан болсо козголмокмун же Кытайстан болсо ыргып турат элем..” деген сыңар эртең, бүрсүгүнү көчүп кетип калчу коноктун образында ой жүгүртүүнүн да тарапкери эмесмин. Кыргызстан – тек географиялык, тарыхый кубулуш катары кабылданышы туура болот деген ишенимдемин.
Паспортто улутту көрсөтүп жазбоо кампаниясы бир караганда кыргызга өтө копол туюлуп жатканы менен, мунун түпкү көздөгөнү жалпылык, биримдик экени түшүнүктүү. Бирок ушуну демилгелеп жаткан бийлик тек гана паспорттогу “улут” графасын алып салган формалдуулук менен эле кыр ашып кетпей турганын аңдап иш кылып атабы , кеп ушунда. Чоң жыйындарда, чогулуштарда, кыргыз этносуна байланышкан тарыхый иш чараларда, айрыкча шайлоолор учурундагы аймактык жолугушууларда “биз кыргыздар!” деп төш кага берме ала көөдөндүк болбоосу кажет. Бийлик өзү улутка, аймакка, тарыхына карап бөлүп-жармайын коюп, ар бир жаран өлкө үчүн баалуу экендиги сезилгидей кадамдарды жасаганы туура. Шайлоо күрөшүнүн ынгайына карап, түштүккө барса түштүкчүл, түндүккө барса түндүкчүл, өзбек электораты менен жолукса өзбекчил, орус шайлоочуларга кезиксе орусчул боло калган тар кызыкчылык дээринде бөлүп-жарууга үндөөрүн өлкө элитасы болууга чамынгандар кулагына күмүш сырга кылып алышса дурус болоор эле. Бир чети, айланып келип эле жоопкерчиликтин баары кыргыздардын өзүнө келип такалгансып жатканынын жөнү бар. Кыргызстандын атын дүйнөгө тааныткан кыргызыбы, орусу болобу, өзбегиби, дунганыбы же африкалыгыбы ал ийгиликке чындап кубана алсак, анда паспорттогу улут маселеси башкы мааниге деле ээ болбой калмак. Кубануунун ордуна ошол ийгилик ээси кыргыз эмес, башка улуттан болуп калганына бир аз ич ачышкан, ичте “ит өлгөн” мандем болсо эле анда паспортко кандай деген улутту жазып алып мактанба,..иштин бүткөнү ошол … Бул маселени паспортто улут деген жазууну “калтырсын” же “алып салсын” деген алкактан эмес, башка өңүттө кароо керек го. Улуту кыргыз эмес болсо да Кыргызстанга анча-мынча кыргыздан мыкты кызмат кылган инсандар бар, паспортунда “кыргыз” деп балчайта жазылып турган менен же үй бүлөсүнө,же мамлекетке залалдан башка пайдасы жок дангеселер канча… Жогорудагынын баары эми менин жарандык жеке көз карашым. А дегинкиси, паспорт маселесинде мени түпөйүл кылган нерсе башка. “Улут” деген графаны алып салууну демилгелеген тараптын түпкү максаты анча айкын эмес, жеткиликсиз болуп жаткансыйт, анткени “улутту” жазбай коюу ниети ким тарабынан, эмне максатта секирип чыга калганын алигүнчө коомчулукка так түшүндүрүп берише элек. Мамлекетте бул маселеден да жүз эсе актуалдуу, чечилүүгө тийиш болгон саясый, экономикалык, социалдык, идеологиялык маселелер турса, паспорттогу “улутту” алып салуу маселесиндеги көшөргөн позициясын өкүмөт коомго ынанымдуу түшүндүрбөсө бүдөмүк ойлор калкып тура берет, а мындай шек жараткан кырдаал эл ичинде күмөн саноолорду ого бетер күчөтүп, аягы өтө опурталдуу аякташы мүмкүн…

Эрнис Кыязов, журналист.

Улуттук банктын Төрагасы Толкунбек Абдыгулов  менен Россия-Кыргыз өнүктүрүү фондусу башкармасынын төрагасы Кубанычбек Кулматов бүгүн, 24-июнунда өз ара иш алып баруу келишимине кол коюшту.

Келишим, Улуттук банк менен Россия-Кыргыз өнүктүрүү фондусунун ортосунда эки тараптуу маалымат алмашуунун пайдубалын түптөйт. Өлкөнүнү финансы секторун өнүктүрүүдө аталган Фонддун таасирдүүсалымын эске алганда, тараптардын биргелешкен күч-аракети өлкөнүн экономикалык өнүгүшүнө өбөлгө түзүү максатында кызматташып иш алып барууну бекемдеп, көрүлүп жаткан аракеттерди бир нукка бурууга багытталат. Келишимге кол коюу кыргыз экономикасынын Евразия экономикалык бирлигинин алкагында иш алып баруу шарттарына ыңгайлашып, ага толук аралашуусу үчүн кезектеги кадам болуп саналат.

Буга чейин эки финансылык институт ортосунда Фондго 3 миллиард сом жалпы суммасында кредит бөлүү макулдашуусуна жетишилген эле. Учурда, 1 миллиард 680 миллион сом суммасында каражатдоллар түрүндөгү ресурсту күрөөгө коюу алдында сунушталып, фонд менен өнөктөштүктө иштеп жаткан банктар аркылуу өздөштүрүлүүдө.

Россия-Кыргыз өнүктүрүү фондусунун сом түрүндө кредиттөө линиясын жөнгө салуу демилгеси улуттук валютада кредиттик каражаттарды алууга кызыкдар болгон  чакан жана орто бизнес өкүлдөрүн колдоого багытталган.

Маалымат үчүн:

 Россия-Кыргыз өнүктүрүү фондусу Россия Федерациясынын Өкмөтү менен Кыргыз Республикасынын Өкмөтү тарабынан 2014-жылдын декабрь айында, Кыргыз Республикасынын экономикасын модернизациялоо жана андан ары өнүктүрүүгө өбөлгө түзүү, ошондой эле Фондго мүчө өлкөлөр ортосунда экономикалык кызматташтыкты бекемдөө максатында түзүлгөн эл аралык уюм болуп саналат.

Кечээ, 23-июнь күнү “Гармония Плюс” коомдук бирикмеси ВИЧ болуп жашаган адамдар (ВИЧ адамдар) “теңме-тең” принциби боюнча иштеген консультант болуп жана башка ВИЧ адамдарга колдоо көрсөтө алышы үчүн алардын коомчулугунан 10 адамды окута баштады. Билимин жана ВИЧ болуп жашаган тажрыйбасын колдонуп, “теңме-тең” консультанттар ушундай абалга туш болгон башка адамдарга жардам беришет. Окутуу USAID жана DFIDдин колдоосунда өткөрүлүүдө.

Даярдалган “теңме-тең” консультанттар ВИЧ адамдардын тобуна колдоо көрсөтүп, купуялуулукту сактоо менен чыр-чатактуу учурларда ортомчулардын ролун аткарышат. Теңме-тең консультанттар адамдарды өз ара жардамдашуунун атайын топторуна тартышып, топко ар кандай учурларда чечим табууга жардам берет.

Бул тренинг ВИЧ адамдардын коомчулугун мобилизациялоо жана чыңдоо максатында “Үй-бүлөгө багытталган мамиле – ВИЧ болуп жашаган адамдарга психологиялык-социалдык жардам көрсөтүүнүн негизи” долбоорунун алкагында өткөрүлүүдө. Ысык-Көл облусундагы СПИДдин алдын алуу жана ага каршы күрөшүү борборунун кызматкерлери “теңме-тең” консультанттарды окутууда консультациялык колдоо көрсөтүшүүдө.

Консультанттарды окутуу жана өз ара жардамдашуу тобун түзүү ВИЧ позитивдүү адамдарга карата стигма жана басмырлоо маселелерин чечүүгө багытталган. Алар кризистик кырдаалды жеңип чыгууга жана ушул адамдарга өзүнүн саламаттыгын жана бакубаттыгын чыңдоо үчүн моралдык жактан күч-кубат берүүгө, өзүндө ВИЧ-инфекция диагнозу бар деп туура кабылдоого, ошондой эле социалдык активдүү позицияны түптөөгө жардам берүүгө чакырылган.

Бул долбоор Биргелешип башкаруу программасынын (ББП) колдоосунда ишке ашырылууда, ал Кыргыз Республикасында өкмөттүн, жарандык коомдун жана менчик сектордун өнөктөштүгүн чыңдоого багытталган. Программа АКШнын Эл аралык өнүгүү боюнча агенттиги (USAID) жана Улуу Британиянын Эл аралык өнүгүү министрлиги (DFID) тарабынан каржыланган жана Ист-Вест Менеджмент Институту (EWMI) тарабынан ишке ашырылууда.

Фатима Касмахунова

Алмаз Атамбаев менен соттошуп жүргөн журналист Дайырбек Орунбеков бүгүн өзүнүн фейсбуктагы баракчасы аркылуу төмөнкүдөй билдирүү таратты:

“Бүгүн,  24-июнда Аламүдүн райондук сот аткаруучулары Атамбаевдин төгүлүп калган абийирин калыбына келтирүү үчүн мени милдеттендирген 2 000 000 сом жана Атамбаев Алмаздан кечирим суроо чечимин аткарбай жатат деп, Октябрь РИИБне мага карата кылмыш ишин козгоп, жазага тартуу сунушун берди. Сот аткаруучу Талант Нурматов менин банк эсебимди, мүлкүмдү баарын текшерип чыккан. Жана төлөй турган шартым жок экенинен толук маалымат алып, жашаган үйүмдөгү буюмдарымды да эсептеп чыккан. Бирок, “атайын төлөөдөн баш тартып, чечимди аткарбай жатат” деп кылмыш козголсун деди. Бирок, мен соттун чечимин аткаруудан баш тарткан жокмун, мүмкүнчүлүккө жараша аткарууга макулмун деп түшүнүк кат дагы жазып бергемин. Мындай шартта, сот аткаруучулар ишти артка кайтарып бериши керек болчу. Мыйзамдуу каралган жагдайда. Бирок, меники саясий буюртма болгондуктан мыйзамдар тебеленип, Атамбаев Алмастын каалоосун аткаргысы келип жатышат. Сот аткаруучуларга Акүйдөн басым болуп жатканынан да кабардар болдум, алар мойнунан байлангандай ыргылжың, аргасыз кылмыш козгоо сунушун берип жаткандыктарын билдим. Алар ачык эле Акүйдөн кысып жатканын айтышты. Атамбаев Алмаз, карыган ата энемдин, кичинекей баламдын ырыскысына суук колуңду салып, ачкөздүк, адилетсиздик менен мага кысым кылып жатасың. Себеби колуңда бийлигиң бар. Бирок, адилеттигиң, айкөлдүгүн жок арсыз, алсыз баскынчы президентсиң!”

Дайырбек Орунбеков, журналист

Алмазбек Атамбаев бүгүн, 24-июнда Ташкентке иш сапарынын алкагында, Кытай Эл Республикасынын төрагасы Си Цзиньпин менен жолукту. Бул тууралуу президенттин маалымат кызматы билдирди.

Жолугушууда КЭР төрагасы Си Цзиньпин Кыргызстан менен Кытай ортосунда ар тараптуу стратегиялык кызматташтыктын үч жылы ичинде саясый диалог бекемделип, эки тараптуу алака-катыш жемишин берип жатканын белгиледи. «Биз эл аралык иштерде тыгыз координацияны арттырып, бири-бирибизге ар кайсы аянтчаларда колдоо көрсөтүп, элдерибизге пайда алып келиш үчүн жаңы мүмкүнчүлүктөрдү ачып жатабыз», – деди Си Цзиньпин.

КЭР төрагасынын айтымында, Кытай Кыргызстан менен мамилелерди өнүктүрүүгө чоң көңүл бурууда жана ар тараптуу кызматташтыкты арттыруу үчүн чогуу иштөөгө даяр. Си Цзиньпин Кыргызстан 2016-жылы көз карандысыздыгынын 25 жылдыгын белгилерин, бул жылдары өлкөдө өнүгүү жышааны байкалып жатканын белгиледи. «Сиз кызматка киришкенден тарта туруктуулукту камсыз кылууга умтулуп, коррупция менен күрөшкө өзгөчө көңүл бөлдүңүз. Сиздердин ийгиликтерге биз ортоктошпуз», – деди КЭР төрагасы.

Өз кезегинде Алмазбек Атамбаев Кыргызстан менен Кытай ортосунда эки тараптын кызматташтыгына тоскоол боло турган олуттуу карама-каршылыктар жана талаштар жок экенин билдирди.

Мамлекет башчысы Кыргызстан Кытай менен коопсуздук жаатында кызматташтык чыңдалып жатканын жана кытайлык өнөктөштөрдүн “үч жамандык” –  экстремизм, терроризм жана сепаратизм менен күрөшүү боюнча аракеттерин колдорун белгиледи.

Сүйлөшүүлөрдүн жүрүшүндө Атамбаев менен Си Цзиньпин ар кайсы чөйрөлөрдө эки тараптуу кызматташтыктын маанилүү маселелерин жана кеңири маселелер боюнча өз ара алака-катыштын перспективаларын талкуулады.